Babaire Ibukin Taabo n Taromauri

IAI TE TUA nakoia taan taromauria Iehova ni koaua bwa a na bobotaki ibukini karekeani kaetieti ao te ikaungaunga i marenaia. (Ebera 10:​23-25) Te moan tabo n taromauri ibukia ana aomata te Atua aika rineaki ake I-Iteraera, bon “te umwanrianna ae tabu ae te umwa ni botaki.” (TeOti. 39:​32, 40) Imwina riki ao natin Tawita are Toromon e a katea te auti ke te tembora, ibukin neboan te Atua. (1Uea 9:3) Imwin uruakan te tembora anne n 607 B.C.E., ao a a baireia I-Iutaia bwa a na bobotaki n auti aika aranaki bwa taian tinakoka, ibukin taromaurian te Atua. Imwina riki ao e a manga kateaki te tembora, ao e a manga riki naba bwa nibwan te taromauri ae koaua. E angareirei Iesu n taian tinakoka ao n te tembora. (Ruka 4:16; Ioa. 18:20) E karaoa naba te taromauri Iesu i aon te maunga.​—Mat. 5:1–7:29.

² Imwini maten Iesu ao a a bobotaki Kristian n ana tabo te botannaomata ao n taiani mwenga, bwa a na angareirei i aon te Baibara ao n itamwaomwao ma raoia n onimaki. (Mwa. 19:​8, 9; IRom 16:​3, 5; IKoro. 4:15; Bire. 2) N tabetai ao e nakoraoi riki irouia Kristian ake rimoa bwa a na botaki n taabo aika tionako, ni kararoaia mairouia taani bwainikirinia. Bon iai nanoia ana toro te Atua aika kakaonimaki rimoa ni kani bobotaki n taabo n taromauri bwa a aonga n “reireinaki iroun Iehova.”​—Ita. 54:13.

³ A kakabonganaaki naba ni boong aikai mwengaia taari ao ana tabo te botannaomata ibukini bobotaki ni Kristian. A kakabonganaaki mwengaia taari ibukin te botaki ibukin te mwakuri ni minita. A taraia bwa bon te kakabwaia te koraki ake a anga mwengaia ibukini bobotaki aikai. A bati aika a namakinna bwa a kakabwaiaaki n aia onimaki ngkai a anga mwengaia ibukin aei.

TE TABO N TAROMAURI

⁴ Aia tabo ni botaki Ana Tia Kakoaua Iehova bon te Tabo n Taromauri. N angiin te tai, e kabooaki te aba ao ni kateaki iai te Tabo n Taromauri ae boou ke e onobwaiaki te kateitei are iai. Tabeua ekaretia a ibuobuoka te Tabo n Taromauri teuana ngkana e angaraoi, ibukini kauarerekean te kabanemwane ao e aonga naba ni manena raoi ara tabo ni bobotaki. N aono tabeua ao e tamaroa riki ngkana e kabooaki tangoan te tabo teuana. E riai ni karaoaki te katabu ibukin Taabo n Taromauri aika boou ao kateitei ake e karaoaki te onobwai ae bubura iai. Ma ngkana e uarereke onobwaian te Tabo n Taromauri are e a kaman tei, e aki riai ngkanne ni katabuaki.

⁵ E aki riai n riao aroni katean te Tabo n Taromauri n te aro ae e a kamimia te aba. E ngae ngke e kakaokoro tein te kateitei n te tabo teuana ma teuana, ma tii teuana te kantaninga iai. (Mwa. 17:24) E riai ni kamwengaraoi ao n tau ibukini bobotaki ni Kristian ni kaineti ma katein te tabo teuana ma teuana.

⁶ A bane Ana Tia Kakoaua Iehova n ibuobuoki n te kabanemwane ibukini kabonganaan ao katamaroaan te Tabo n Taromauri are a kakabongana. Akea te karemwangko iai ke a aki naba bubutii te mwane. Iai te bwaoki ibukin te bwaintangira ae katauraoaki, ngaia are a kona naake a roko n taromauri ni kabwakaa iai buokani kabanemwane tabeua ni kaineti ma kabonganaan te tabo n taromauri. A kukurei ni karaoa anne ao e bon nako mai nanoia.​—2Kor. 9:7.

⁷ E kukurei te ekaretia ni buoka mwanenakin te Tabo n Taromauri, ao ni kakataraaraoia. E aki toki ni mwiokoaki te unimwaane ke te tabonibai ibukini bairean te mwakuri aei. E kakaraoaki te kaitiaki irouia kaain taiani kurubu n uarongorongo, ae e kairaki irouni mataniwin te kurubu ke ana tia ibuobuoki. E riai n oti raoi bannan Iehova ao ana botaki man taraakin nanon ao tinanikun te Tabo n Taromauri.

⁸ Ngkana e raka i aon teuana te ekaretia ae a kakabongana te tabo n taromauri ae tii teuana, a riai unimwaane man ekaretia akanne ni katea te Komete Ibukin Tararuaan te Tabo n Taromauri, ake a na tararuai baika kainnanoaki ibukin te tabo anne ke te aba. E na rineaki iroun te rabwata n unimwaane te tari te mwaane temanna bwa te tia babaire n te komete. E mwakuri te komete aei i aan ana kairiri te rabwata n unimwaane n tararuaa kaitiakan te tabo n taromauri, kateimatoaan taraaraoina, ao ai aki tareni baika kainnanoaki iai. A kainnanoaki aia ibuobuoki kaain ekaretia nako n aei.

⁹ Ngkana iai ekaretia aika kakabongana te Tabo n Taromauri ae tii teuana, e riai ni baireaki kabutan te tai ni bobotaki iai. A na bairea aei unimwaane ma kaotiotan tabeakinaia i marenaia ao te itangitangiri n tari. (IBir. 2:​2-4; 1Bet. 3:8) E aki riai te ekaretia teuana n tii ngaia ni karaoi babaire ibukia ekaretia ake tabeua. N taai ake e roko iai te mataniwi n te aono ae uarereke ni kawara te ekaretia teuana are kakabongana te Tabo n Taromauri, a riai ekaretia ake tabeua riki ni bita moa aia tai ni botaki i nanon te wiki anne.

¹⁰ E kona ni kabonganaaki te Tabo n Taromauri ibukini maare ao taunimate i aan ana kariaia te Komete Ibukin te Mwakuri n te Ekaretia. A karaua n rinanon raoi te bubutii unimwaane aikai ao a kabotoi aia iango i aon te babaire ae a karekea man te aobiti n tararua.

¹¹ A kantaningaaki naake a kariaiakaki ni kabongana te Tabo n Taromauri ibukin itera aikai, bwa a na kaotiotii aroaro aika riai ibukia Kristian ni koaua. E aki riai ni karaoaki te bwai teuana n te Tabo n Taromauri ae e na kamatauningaa te ekaretia ke e na kabuakakaaki iai Iehova ao taraaraoin te ekaretia i mataia aomata. (IBir. 2:​14, 15) E kona ni kabonganaaki te Tabo n Taromauri ibukini botaki riki tabeua n te ekaretia i aan ana kariaia te aobiti n tararua, n aron te Kuura ni Minita Ibukin te Tautaeka n Uea ao te Kuura Ibukin te Mwakuri ni Bwaiania.

¹² E kakawaki n taai nako irouia kaain te ekaretia bwa a na karinea aia tabo n taromauri. E riai n oti mimitongin taromaurian Iehova man arora ni kunnikainira, ni katamaroaira, ao ai ni kateira. (TeMin. 5:1; 1Tim. 2:​9, 10) Ni maiuakinan te reirei ni kairiri i aon aei, ti a kaota iai ara kakaitau ibukin ara bobotaki ni Kristian.

¹³ E kakawaki kateimatoaan te aki mangaongao n ara bobotaki. E tamaroa riki ngkana a tekateka ataei i rarikia aia karo. A kona ni kaungaaki kaaro ake a uarereke natiia bwa a na tekateka n te tabo ae a na aki rangi n uruanaki iai aroia taan ongora, ngkana a kan otinako ibukin reireinaia natiia ke bwaai riki tabeua.

¹⁴ A mwiokoaki taari mwaane aika tau bwa a na riki bwa taan ibuobuoki ni bobotaki n te Tabo n Taromauri. A riai n taratara raoi ao ni bwaina te akoi ao ni karaoi aia babaire ma te wanawana. Mwiokoaia naba boni butimwaeaia ake a boou ao n angania te namakin ae a mwaneaki raoi, a na buokiia ake a rimwi ni karekei aia tabo n tekateka, a na taui mwaitiia ake a roko, ao a na taraia naba bwa e na aki rangi ni kabueroro te tabo ni botaki. Ngkana e riai, a na kauringia kaaro naakai bwa a na taraiia raoi natiia bwa a na aki biribiri imwain ao imwin te taromauri, ke n takaakaro n ana tabo te tia kabwarabwara. E kona te tia ibuobuoki ni bwaina te akoi ao te wanawana ni butiia te karo are e rangi ni kakeru natina, bwa e na kairia nako tinaniku bwa a aonga n aki rangi ni kakiriweaki taan ongora. Aia mwakuri taan ibuobuoki aikai e boutokaa naba kimwareireia aomata nako ake a kaea te taromauri. E raoiroi ngkai a ririneaki unimwaane ao tabonibai bwa taan ibuobuoki.

KATEAN TE TABO N TAROMAURI

¹⁵ N te moan tienture ao iai tabeman Kristian ake a kaubwai riki nakoia ake tabeman, ngaia are e korea aei te abotoro Bauro: “E na riki rakan ami bwai ngkai, bwa buokani kainnanoia, bwa e na buokaki naba kainnanomi n te taina n rakan aia bwai, bwa e aonga ni kaboraoaki uotami.” (2Kor. 8:14) Ni boong aikai, ao e “kaboraoaki” naba te uota. A ikotaki taiani mwane aika reke mani bwaintangira irouia ekaretia nako ni katobibia te aonnaba, ibukini mwanenakini katean ao onobwaian Taabo n Taromauri. A rangi ni kakaitau kaain ana botaki te Atua ao ekaretia ake a kakabwaiaaki mani bwaintangira aika reke man te botaki n itaritari ni katobibia te aonnaba.

¹⁶ Bon te aobiti n tararua ae baireia bwa te tabo n taromauri raa ae e na kabonganaaki irouia ekaretia nako n taian aono. E baireia naba bwa n ningai ao ia ae a na kateaki iai Taabo n Taromauri aika boou ao n onobwai kateitei ake a a kaman tei n te aono are e tararuaia. Ngkana a riki kabuanibwai aika karina ao a a baireaki naba mwakuri n onobwai aika kainnanoaki nakon Taabo n Taromauri aika uruaki, ao n tabetai nakoni mwengaia taari.

¹⁷ Bon te aobiti n tararua ae rineiia taan anganano aika a na ibuobuoki ni karekean te aba, korean taamnein te Tabo n Taromauri, karekean te kariaia man te tua ibukini kateana, te kateitei, ao te onobwai. Ibukini korakorani kainnanoan Taabo n Taromauri n angiin aaba, a a kainnanoaki riki taan anganano aika bati. A kaungaaki naake a a tia ni bwabetitoaki ao a kan ibuobuoki, bwa a na kanoaa te booma ni bubutii ao n angan aia Komete Ibukin te Mwakuri n te Ekaretia. A kona naba taan uarongorongo aika tuai ni bwabetitoaki n ibuobuoki n te kateitei ke n onobwaian aia Tabo n Taromauri.

TAABO NI BOTAKI IBUKIN TE RUNGA

¹⁸ A bobotaki Kristian ake rimoa ni kurubu aika uarereke. Ma n tabetai a a manga botaki “aomata aika uanao.” (Mwa. 11:26) N aron naba anne, a kona ni botaki ana aomata Iehova ni boong aikai aika rangi ni mwaiti, n ruunga ao ni bwabwaro n te aono. A kakabooaki tangoan taabo tabeua n te aono ibukini botaki aikai, ma n taabo ake e aki kona ni karaoaki iai anne ke akea te tabo ae tauraoi n tangoaki, e a kona ngkanne ni kateaki te tabo n taromauri ae aranaki bwa te Tabo ni Botaki Ibukin te Runga.

¹⁹ N tabetai ao e kabooaki te kateitei teuana, e onobwaiaki, ao ni kabonganaaki bwa te Tabo ni Botaki Ibukin te Runga. Ma n angiin te tai, e kabooaki te aba teuana ao ni kateaki iai te tabo ni botaki ae boou. A kakaokoro buburan Taabo ni Botaki Ibukin te Runga ni kaineti ma ae e kainnanoaki n te aono. Bon te aobiti n tararua ae bairea kabooan ke katean te aeka ni kateitei anne, ma tii ngkana e a tia n rinanoaki raoi te kataumwane i aona ao mwaitini kabonganaana.

²⁰ A mwiokoaki taari mwaane iroun te aobiti n tararua bwa a na tararuaa mwakurian ao katamaroaan te Tabo ni Botaki Ibukin te Runga. A karaoaki babaire bwa a na katoatai aono nako ni kaitiakia n ikotaki naba ma te kaitiaki are uatai n te ririki, ao ai buokani kateimatoaan onobwaiana. Bon te kakabwaia nakoia taari ake a anga nanoia ni karaoan te mwakuri aio. Ngaia are a kaungaaki ekaretia bwa a na boutokaa te babaire aei ma nanoia.​—TaiAre. 110:3; Maraki 1:10.

²¹ N tabetai ao e kona naba ni kabonganaaki te Tabo ni Botaki Ibukin te Runga, ibukini baika a irekereke ma te beku ibukin te Atua, n aroni kuura aika boto i aon te Baibara ao botaki aika okoro ibukia mataniwi n te aono ae uarereke. E katabuaki naba te Tabo ni Botaki Ibukin te Runga n aron te Tabo n Taromauri. Ngkana ti ira te taromauri n te Tabo ni Botaki Ibukin te Runga, e riai n oti te karinerine n aroarora, ara kunnikai, ao katamaroaara, kaanga ai aron ae ti ira te taromauri n te Tabo n Taromauri.

²² I nanoni kabaneani boong aikai ao a bati aika boou aika waekoa ni kaaina ana botaki te Atua. E bon oti iai ana kakabwaia Iehova. (Ita. 60:​8, 10, 11, 22) Ngaia are ti kani boutokai babaire n arora ni kaitiakii ara tabo n taromauri, ao ni kateimatoa itiakia ao kamwengaraoia. Ni karaoan anne, ti a kaota iai ara kakaitau ibukini buokara ae reke man aeka ni kateitei aikai, bwa ti na ikaungaunga riki ngkai ti a nora ana bong Iehova bwa e a tabe ni kaan.