Te Kabanea ni Maroro ma Taani Bwabetito

E kakaraoaki te bwabetito n aia runga ao n aia bwabwaro Ana Tia Kakoaua Iehova. N raabanen te kabwarabwara ibukin te bwabetito, ao te tia kabwarabwara e na tuangia taani bwabetito bwa a na teirake ao ni kaekai titiraki aika uoua aikai n te bwanaa ae nene:

1. Ko a tia ngkai n raira nanom man am bure ao ni katabua maium nakon Iehova, ao n onimakina ana anga ni kakamaiu rinanon Iesu Kristo?

2. Ko ataia bwa bwabetitoakim, e a kaotiko bwa temanna ngkoe Ana Tia Kakoaua Iehova, ao ko a kaaina ana botaki Iehova?

Aia kaeka taani bwabetito ae matoa nakon titiraki aikai, a a riki bwa te bwai ni “kaotioti i mataia aomata,” ae a a onimakina te karea ni kaboomwi ao a a tia ni katabui raoi maiuia nakon Iehova. (IRom 10:​9, 10) A riai taani bwabetito ni kaman tataroi ao n iaiangoi titiraki aikai, bwa a aonga ni kona ni kaeka ma nanoia ni koaua.

Ko a tia ni katabua maium nakon Iehova n te tataro, ni berita nakoina bwa ko na taromauria n tii ngaia ao ni moanibwaia karaoan nanona bwa te kabanea ni kakawaki ni maium?

Ko a kakoauaa raoi ngkai bwa ko a tauraoi ni bwabetito?

Tera te onea ae tau ibukin te bwabetito? (1Tim. 2:​9, 10; Ioa. 15:19; IBir. 1:10)

Ti riai ni kunnikainira “n te aro ae riai ma te iangoraoi” ae e na oti iai bwa ti “karinea te Atua.” Ngaia are a na aki oneiia taani bwabetito n te kunnikai n tebotebo ke ni kunnikai aika korobokiaki. A riai ni kunnikainia n ae taraaraoi, ae itiaki, ae kan, ao ae tau ibukin te botaki aei.

Tera aroaron te aomata ae riai ni kaotiotia ngkai e nangi bwabetitoaki? (Ruka 3:​21, 22)

E riki ana bwabetito Iesu bwa te katoto ibukia Kristian aika bwabetitoaki ni boong aikai. E ataia Iesu ae te bwabetito bon te mwaneka ae kakawaki, ao e oti anne n aroarona ao n ana mwakuri. Ngaia are te tabo ni bwabetito bon tiaki te tabo n takaakaro, ke n uaua, ke waaki riki tabeua aika a na kona ni kamangora kakawakin te tai anne. E na aki naba riai ni kaotia te Kristian ae boou bwa aongkoa e a reke irouna te tokanikai ae korakora. E ngae ngke bon te tai ni kimwareirei tain te bwabetito, ma e riai ni kaotaki te kimwareirei anne n te aro ae riai.

E na kangaa kaakaean te botaki n taromauri ao te ikoikotaki ma kaain te ekaretia ni buokiko ni waakinaanako karaoan am katabu nakon Iehova?

E aera ngkai e rangi ni kakawaki bwa ko na kateimatoa am babaire ae nakoraoi ibukin am ukeuke n reirei i bon iroum, ao ibukin uataboan te mwakuri ni minita ni katoatai, imwini bwabetitoam?

KAETIETI IBUKIA UNIMWAANE N TE EKARETIA

Ngkana e a kaotia te tia uarongorongo ae tuai ni bwabetitoaki bwa e a kani bwabetito, e riai moa ni kaungaaki bwa e na rinanon raoi “Titiraki Ibukia Naake A Kani Bwabetito,” n iteraniba 185-207 n te boki aei. E riai ni kairaki nakon te kaongora ae “Te Rongorongo Nakon te Tia Uarongorongo ae Tuai ni Bwabetitoaki” are moanaki n iteraniba 182, are e kabwarabwaraa arona ni katauraoi imwain ae e maroro ma unimwaane. N aron are e taekinaki iai, e kona te tia kani bwabetito, ni kabonganai bwaai ni kauring ake e a tia ni korei, ao ni kauka te boki aei n tain te maroro. Ma e aki kainnanoaki te aomata temanna bwa e na rinanoi moa titiraki aikai ma ngaia imwaini marorona ma unimwaane.

E riai ane e kani bwabetitoaki ni kaongoa te tia babaire n te rabwata n unimwaane. Ngkana e a tia te tari are e kani bwabetitoaki ni wareka te kaongora ae “Titiraki Ibukia Naake A Kani Bwabetito,” ao te tia babaire n te rabwata n unimwaane e na titirakina ngkanne te aomata anne bwa e a tia n tataro ni katabua maiuna nakon Iehova bwa e na karaoa Nanona ke e tuai. Ngkana e a tia ni karaoa ana katabu, ao te tia babaire n te rabwata n unimwaane e na baireiia ngkanne uoman unimwaane bwa a na maroroakina ma ngaia “Titiraki Ibukia Naake A Kani Bwabetito.” A riai ni mwiokoaki unimwaane aika kakaokoro ni karaoan itera aika uoua aikai. E aki riai n taningaaki katanoataan taekan te runga ke te bwabwaro ao a a tibwa karaoaki maroro aikai.

N angiin te tai a karaoaki itera aika uoua aikai n taai aika uoua i nanon tao kaka teuana te aoa, ma e kona ni kaananauaki riki ngkana e riai. A riai ni kaukaki ao ni kainaki maroro aikai n te tataro. E aki riai n ienikuri te aomata are kani bwabetito ke te unimwaane ngkana a a rinanoi titiraki aikai. A riai ni moanibwaia te maroro aei i buakon aia babaire unimwaane ake a mwiokoaki iai.

N angiin te tai, e raoiroi riki rinanoakin titiraki ma taani bwabetito n tatabemania nako, ao a na aki ikotaki. Mani kaekaan titiraki aikai iroun te aomata are kani bwabetito, a kona iai unimwaane n nora raababan otana, ao n aki nanououa bwa e a tau nakon te bwabetito ke e tuai. Irarikina, e na kona ni kaota riki nanona te aomata are kani bwabetitoaki, ngkana tii ngaia. A kona ni karaoaki maroro aikai n te tai ae tii teuana nakoia taanga.

Ngkana te tari te aine ae kani bwabetitoaki, e riai ni karaoaki te maroro ma ngaia n te aro ae a na kona n noraki irouia aomata ma a na aki ongo baike a taekin. Ngkana e kainnanoaki bwa e na iri temanna te aomata, e riai n ae te unimwaane ke te tabonibai, ni kaineti ma te itera are e na maroroakinaki, n aron ae e na kabwarabwaraaki n te barakirabe ae imwina.

N ekaretia ake a karako iai unimwaane, a kona tabonibai aika mwaatai, ake a kaotiota te iangoraoi ao te wanawana, n rinanon titiraki ibukin te bwabetito, ma taani bwabetito ae oti n “Itera 1: Koaua ni Kristian.” Tii unimwaane aika riai n rinanon “Itera 2: Te Maiu ni Kristian.” Ngkana e aki tau n te ekaretia teuana mwaitiia taari mwaane aika katauaki ibukini karaoan anne, e kona ni kaongoaki te mataniwi n te aono ae uarereke, bwa e na baireia ngkana e kona n ibuobuoki i aon aei te ekaretia ae uakaan.

Ngkana te roro n rikirake ae kani bwabetitoaki, a riai ana karo aika kaain te onimaki n irii maroro aikai. Ngkana a aki kona n iri kaaro, a riai n rinanon te maroro teuana ma teuana unimwaane aika uoman (ke te unimwaane temanna ao te tabonibai temanna, ni kaineti ma te mwakoro are e na rinanoaki).

A na taraia raoi unimwaane bwa e tau otan te aomata ae kani bwabetitoaki, i aoni moan reirei man te Baibara. A na kan ataia naba bwa te aomata ae kani bwabetito e bon tangira te koaua ma ni kaotia n aroarona bwa e karinea raoi ana botaki Iehova, ke e aki. Ngkana e aki ota te aomata ni moan reirei man te Baibara, a na bairea karaoan te ibuobuoki nakoina unimwaane bwa e aonga n tau nakon te bwabetito imwina riki. Tao iai aika a kainnanoa riki aia tai ni kaotia bwa a ataa kakawakin te mwakuri ni minita, ke tao iai aika a riai n aantaeka riki nakon taiani babaire ibukin ara botaki. Bon tabeia unimwaane tibwatibwaan raoi te tai are teuana te aoa maanna ke e raka riki, are a na kabanea ni maroroakin iai titiraki nako bwa a aonga n ataia raoi bwa e a tauraoi te aomata nakon te bwabetito ke e tuai. E ngae ngkai a na bae n iai titiraki aika a na tangira te tai ae bati riki nakon ake tabeua, ma a riai n rinanoaki titiraki ni kabane.

A na ikotaki imwin te kauoua ni maroro unimwaane ake a mwiokoaki, bwa a na iangoia bwa e riai ni kariaiakaki nakon te bwabetito te aomata anne, ke e aki. A na iaiangoi rikiaia aomata akanne unimwaane, aia konabwai, ao aroaroia riki tabeua. Ti tabe ma buokaia aomata aika tangira raoi Iehova, ao aika a ota n ana koaua te Baibara aika kakawaki. N ami ibuobuoki ae tatangira, a na buokaki iai te koraki aika a nangi bwabetito ni kakororaoa mwiokoaia ae kakawaki, ae taan tataekina te rongorongo ae raoiroi.

Imwin anne, a na botaki temanna ke uoman unimwaane ma te aomata anne, ni kaongoa bwa e tau nakon te bwabetito ke e tuai. Ngkana e a tau, ao a na maroro ma ngaia unimwaane i aon “Te Kabanea ni Maroro ma Taani Bwabetito” n iteraniba 206-207. Ngkana e tuai ni bane ana reirei te aomata are kani bwabetitoaki, n te boki ae Ko Kona ni Kukurei n Aki Toki!, a na kaungaa te aomata anne unimwaane bwa e na kabanea imwini bwabetitoana. Kaongoa ane e kani bwabetito bwa e na koreaki te bongi n namwakaina are bwabetitoaki iai n ana booma ae te Ana Ribooti te Tia Uarongorongo are mwakoro iai arana. Kauringnga ae a anai rongorongona aikai unimwaane bwa e aonga n teimatoa ana botaki Iehova n tararuai baika karaoaki irouia Ana Tia Kakoaua Iehova ni katobibia te aonnaba, ao e aonga naba n iririi waaki aika baireaki n te ekaretia, ao ni karekea kaungaana ni kaineti ma te onimaki ao te kairiri mairouia unimwaane. Irarikin anne, a kona unimwaane ni kauringia taan uarongorongo aika boou bwa rongorongoia aikai, a boni kabonganaaki n aron are oti n te Global Data Protection Policy of Jehovah’s Wintesses, are n te jw.org. E riai n tii tebwina te miniti maanin te maroro aei ke i aana.

Teuana te ririki imwini bwabetitoana, ao a riai unimwaane aika uoman ni manga kawaria ni kaungaa ao n anganna taeka n ibuobuoki. Temanna i buakoia unimwaane akanne, e riai n ae te mataniwi n ana kurubu te aomata anne. Ngkana te roro n rikirake te aomata anne, a riai n ira te maroro anne ana karo aika kaain te onimaki. E riai ni kaotiotaki te akoi n tain te maroro aei, ao n reke naba iai te kaungaunga. A na maroroakina unimwaane marurungin ana onimaki ao n anga taian ibuobuoki aika manena, ni kaineti ma arona ni kateimatoa ana babaire ae raoiroi ibukin ana ukeuke n reirei i bon irouna, ao ana katoabong ni wareware n te Baibara, ana taromauri n utu ni katoa wiki, ana kakaonimaki ni kaei bobotaki ao n anga ana ibuobuoki, ao ai ana mwakuri ni minita ni katoa wiki. (IEbe. 5:​15, 16) Ngkana e tuai ni bane ana boki are Ko Kona ni Kukurei n Aki Toki!, a riai unimwaane ni bairea temanna ae e na buokia ni kabanea. A riai unimwaane ni kamoamoaa te tari aei. N angiin te tai, e rangi n tau te reirei ni kaetieti ke te reirei n ibuobuoki i aon teuana ke uoua baika kakawaki.