E Tataro Anna Bwa E na Reke Natina te Mwaane

Iai te mwaane ae tibun Iteraera ae arana Erekana ao iai buuna aika uoman, aika Anna ao Beninna, ma e tangira riki Anna. E kakanikoaki n taai nako Anna are akea natina irouni Beninna ae bati natina. Ni katoa ririki ao e nanako Erekana ma ana utu n taromauri n te umwanrianna ae tabu i Tiro. N te tai teuana ngke a a roko ikanne, e a noria bwa e rangi n nanokawaki buuna ae Anna ae e rangi n tangiria. E taku nakoina: ‘Anna, taiaoka ma tai tang. Boni ngai buum ae I tangiriko.’

Imwina riki ao e a nako Anna ni kaokoroa bwa e na tataro. E aki toki tangina ngke e tabe ni bubutii buokana mairoun Iehova. E berita ni kangai neiei: ‘Iehova, ngkana ko anganai natiu te mwaane, ao N na anga ngaia nakoim, ao e na beku ibukim ni kabane ana bong ni maiu.’

E nora Anna n tang te Ibonga ae Rietata ae Eri, ao e taku bwa e koro ni manging neiei. E taku Anna: ‘Tiaki ngaia anne au toka, I aki koro ni manging. E korakora rawawatau, ao I taetae ngkai ma Iehova ibukin anne.’ E a ataia Eri bwa e kairua ao e taku: ‘E bia anganiko te Atua te bwai ae ko tangiria.’ E namakinna Anna bwa e a kabebeteaki riki ao imwina e reitaanako kawaina. E tuai koro teuana te ririki imwina, ao e a reke natina te mwaane ao e aranna bwa Tamuera. Ko kona n iangoa aroni kukurein Anna?

E aki mwaninga ana berita Anna nakon Iehova. Ngke e a raure man te mamma Tamuera, ao e a kairia nakon te umwanrianna ae tabu bwa e na beku iai. E taku nakon Eri: ‘Aio te teei are I tataro ngkoa ibukina. Bon ana bwai Iehova ni kabane ana bong ni maiu.’ A kakawara Tamuera Erekana ma Anna ni katoa ririki ao a uouota ana kooti ae akea baina ae boou. Ao Iehova e a manga angan Anna teniman riki natina mwaane ao aine aika uoman.