E Ninikoria Ionatan ao E Kakaonimaki ni Koaua

Bon te tia buaka ae ninikoria Ionatan ae ana karimoa te Uea ae Tauro. E taekinna Tawita bwa e birimwaaka riki Ionatan nakon te ikare ao e korakora riki nakon te raian. N te bong teuana, ao Ionatan e noriia tautiani Biritia aika 20 i aon te tabuki teuana. E taku nakon te tia uouota ana bwai ni buaka: ‘Ti na buakania ma tii ngkana e anganira te kanikina teuana Iehova. Ngkana a tuangira I-Biritia bwa ti na waerake nakoia, ti a ataia iai bwa ti na buakania.’ Ao a takarua I-Biritia ni kangai: ‘Waerake nakoira ao ti na buaka!’ Mangaia are a a tamwarakea te tabuki mwaane aika uoman aikai ao a tokanikai i aoia tautia akanne.

Kioina ngkai Ionatan bon ana karimoa Tauro, e na bae n uea imwina. Ma e ataia Ionatan ae e a tia n rineaki Tawita iroun Iehova bwa e na uea i Iteraera imwin Tauro, ao e aki bakantang. E a riki Tawita bwa raoraona ni kaan. A berita bwa a na uaia n tabeakinia ao ni kamanoia. Ao Ionatan e angan Tawita ana kunnikai, ana kabaang, ana kainikatebe ao kabaean nukana bwa kanikinaean aia iraorao ae kaan.

Ngke e birinako Tawita mairoun Tauro ao Ionatan e kawara Tawita ao e taku: ‘Ko na korakora ao n ninikoria. E a tia n rineiko Iehova bwa te uea. E ataa naba anne tamau.’ Ko kani karekea raoraom ae raoiroi ae ai aron Ionatan?

A bati ana tai Ionatan ni karuanikaia maiuna ibukini buokan raoraona aei. E ataia naba bwa te Uea ae Tauro ae tamana e kani kamatea Tawita, ngaia are e taku nakoina: ‘Ko bure ngkana ko tiringa Tawita bwa akea te bwai ae bure ae e karaoia.’ E rangi n un Tauro iroun Ionatan. Tabeua te ririki imwina, a a kaai ni mate Tauro ao Ionatan n te buaka.

Imwini maten Ionatan, ao Tawita e kakaaea natin Ionatan te mwaane ae Mebiboteta. Ngke e a reke irouna ao e taku nakoina: ‘Ibukina bwa bon raoraou ni kaan tamam, N na tararuaiko ni kabane am bong ni maiu. Ko na maeka n au baareti ao n amwamwarake n au taibora.’ E aki mwaninga Tawita taekan raoraona are Ionatan.