Te Tautaeka n Uea ae E na Teimatoa n Aki Toki

N te tairiki teuana, e a miia te bwai ae kamimi te Uea ae Nebukaneta. E rangi n tabetabe iai ao e a aki reke matuna. E weteiia ana tia tabunea ao e taku nakoia: ‘Kabwarabwaraa nanoni miiu.’ A taku taan tabunea: ‘Te Uea, tuangira miim.’ Ma e taku Nebukaneta nakoia: ‘I aki konaa! Kam na tuangai miiu, ma ngkana kam aki ao N na kamateingkami.’ A a manga taku riki nakoina: ‘Taekina miim ao ti na kaota nanona.’ E taku te uea: ‘Kam kataia ni mwamwanaai. Tuangai miiu!’ A taku nakon te uea: ‘Akea te aomata ae kona ni karaoa anne. E rangi ni kangaanga te bwai ae ko tuangira.’

E kororake unin Nebukaneta ao e tua bwa a na bane ni kamateaki mwaane aika wanawana i Baburon. A irekereke naba iai Taniera, Tiateraka, Metiaka ao Abeteneko. Ngaia are e a butiia te uea Taniera bwa e na anganna ana tai. Ao e tataro ma raoraona nakon Iehova bwa e na buokiia. Tera ae e karaoia Iehova?

E kaota Iehova miin Nebukaneta ma nanona nakon Taniera n te miitara. N te bong are imwina, e a nako Taniera nakon ana toro te uea temanna ao e taku: ‘Tai kamateia mwaane aika wanawana. I kona ni kaota nanoni miin te uea.’ Ao e a kaira Taniera te toro anne nakon Nebukaneta. E taku Taniera nakon te uea: ‘E a tia te Atua ni kaotii kanoan taai aika a na roko nakoim. Aio miim: Ko nora te boua ae totoakaei ma atuna ae te koora, bwabwaana ma baina bon te tirewa, birotona ma boton rangana bon te buraati, rangana bon te biti, ao raurauniwaena a irengan iai te biti ma te bokaboka. E koreaki te atibu teuana man te maunga ao e orea raurauniwaen te boua. E kamantintaki te boua ao e riki ni bwauta ao e ukakinako n te ang. E riki te atibu anne bwa te maunga ae bubura ao e kaona te aonnaba ni kabutaa.’

Ao e taku Taniera: ‘Aio nanoni miim: Te atu ae te koora bon taekan am tautaeka n uea. Te tirewa bon taekan te tautaeka n uea are imwim. Ao iai riki teuana ae te buraati ae e na tautaekana te aonnaba ni kabutaa. Te tautaeka n uea are imwina e na korakora n aron te biti. Te kabanea bon te tautaeka n uea ae bwenaua, ae iterana tabeua a korakora n aron te biti ao ake tabeua a mamaara n aron te bokaboka. Te atibu are riki ni maunga bon Ana Tautaeka n Uea te Atua. E na urui tautaeka n uea aikai ni kabane ao e na teimatoa n aki toki.’

E katorobubua ni bobaraaki nako aontano Nebukaneta i matan Taniera ao e taku: ‘E boni kaota te mii aei nakoim Atuam. Bon akea te Atua ae ai arona.’ N oneani mwin are e na kamateaki Taniera iroun Nebukaneta, e a karikia bwa te mataniwi i aoia mwaane aika wanawana ni kabane ao te tia tautaeka n aononi Baburon. Ko nora aron Iehova ni kaekaa ana tataro Taniera?