Oon Ierutarem

Ti na oki rikaaki nakon ririki aika tibwa nako. Neemia bon ana toro te Uea ae Atatokititi, ae tibun Iteraera ae maeka ni kaawani Botia ae Tiutian. E roko mai Iuta tarin Neemia ma te rongorongo ae aki raoiroi aei: ‘A aikoa mano aomata ake a oki nako Ierutarem. E tuai mani kateaki oon te kaawa ao mataroana ake a urui ngkoa kaaini Baburon.’ E rangi n nanokawaki iai Neemia. E kan nako Ierutarem n ibuobuoki, ngaia are e a tataro bwa e na kariaia nakona te uea.

Imwina riki, e a noria te uea bwa e mata n nanokawaki Neemia. E taku nakoina: ‘I tuai man noriko n arom anne. Tera ae riki?’ E taku Neemia: ‘E aera bwa N na aki mata n nanokawaki ngkai e a urubekebeke au kaawa ae Ierutarem?’ E taku te uea: ‘Tera ae ko tangiria bwa N na karaoia ibukim?’ E tataro ngkekei naba Neemia i nanona. Imwina ao e taku: ‘Taiaoka kanakoai nako Ierutarem bwa N na manga katea oona.’ E tuanga Neemia te Uea ae Atatokititi bwa e kona n nako, ao e taraia raoi te uea bwa e na aki reke n te kangaanga teuaei ni mwanangana ae abwabwaki. E mwiokoa naba Neemia bwa te kowana i Iuta ao e anganna taiani kai ibukin oon te kaawa.

Ngke e roko Neemia i Ierutarem, ao e tuoi oon te kaawa. Imwina, e botiia ibonga ma taan tautaeka ao e taku nakoia: ‘Bon te kangaanga ae korakora. Ti riai ni mwakuria.’ A boonnano iai aomata ao a a moana katean oona.

Ma a kakanikoia tibun Iteraera tabeman taani kairiribai nakoia ao a taku: ‘E kona te arobeke n urua te oo ane kam kateia.’ A aki tabe taani mwakuri ma taeka ni kakaniko ao a teimatoa ni kateitei. E a ririkirake riki n rietata te oo ao ni matoatoa.

A iangoia aiaia bwa a na roko man taabo aika kakaokoro ao ni buakana Ierutarem n te tai ae aki kantaningaaki. Ngke a ongo I-Iutaia aia babaire ao a a maaku. Ma e taku Neemia: ‘Tai maaku. E memena Iehova iroura.’ E kateiia taan tantani bwa a na kamanoia taani mwakuri, ao a aikoa kona aiaia ni buakania.

I nanon tii 52 te bong ao e tia raoi te oo ma mataroana nako. E kairiia tibun Rewi ni kabane Neemia nako Ierutarem ibukin te katabu. E baireiia taan anene nakoni kurubu aika uoua. A tamwarakea te oo n te kaintamwarake are ni Mataroan te Koburake n Ran ao imwina a mwananga ni kaaitara ni katobibia te kaawa. A katanga te buu, te timbara, ao te abi, ao a anene nakon Iehova. E ira te kurubu teuana Etira, ao Neemia are teuana ni karokoa are a a kaitiboo n te tembora. A bane mwaane, aine, ao ataei, n angakarea nakon Iehova ao ni bukamarua te bong anne. E kona n ongo te aba kimwareireia mai kiraroa.