A Katanoataa Bungiakin Iesu Anera

E tua te tia tautaeka n te Embwaea n Rom ae Kaitara Aukutito bwa a riai I-Iutaia ni kabane n okiri aia kaawa ni karin araia n te boki. Ngaia are a a mwananga Ioteba ma Maria nako Betereem, bwa kaain te kaawa anne ana utu Ioteba. E a kaani bung Maria n te tai aei.

Ngke a roko i Betereem, ao bon tii aia tabo maan ae mwaawa ae a kona ni mena iai. Ao ikanne are Maria e a bungia natina te mwaane ae Iesu. E niria ni kunnikai aika maraurau ao e kawenea ni nneni kanaia maan.

N uakaan ma Betereem ao iai taani kawakintiibu tabeman aika mena i tinaniku n te bong n tararuaiia aia nanai. E a rina naba n tei i mataia te anera ao e ootanako rarikia ni mimitongin Iehova. A maaku taani kawakintiibu ma e taku te anera: ‘Tai maaku. I uota te rongorongo ae kakukurei. E a bungiaki te Mesia n te bong aei i Betereem.’ N te tai naba anne ao a kaoti anera aika bati i karawa ao a taku: ‘E na neboaki te Atua i karawa, ao te raoi i aon te aba.’ Ao imwina a a nako anera. Tera aroia taani kawakintiibu?

A taetae i marenaia taani kawakintiibu ni kangai: ‘Ti a nako Betereem.’ A kawaekoaia n nako ao a nora Ioteba ma Maria n aia tabo maan ma natiia are e a tibwa bungiaki.

A bane ni mimi naake a ongo taekan te baere e taekinna te anera nakoia taani kawakintiibu. E iaiangoi raoi Maria baike e taekin te anera ao e ururingi. A okiri aia nanai taani kawakintiibu ao a kaitaua Iehova ibukini bwaai ni kabane ake a ongo ma n nori.