E Kamanoaki Iesu Iroun Iehova

N te aba teuana ae mena i mainikun Iteraera ao a kakoauaa kaaina ae a kona itoi ni kaiririia. N te tairiki teuana, a nora te itoi ae otamwaaka i karawa mwaane tabeman mai Mainiku, ao a a iriria. E kairiia te “itoi” anne nako Ierutarem. A a titirakinia aomata mwaane aikai ni kangai: ‘E nga te teei ae e na riki bwa aia uea I-Iutaia? Ti a roko bwa ti na bobaraaki nakoina.’

Ngke e ongo Erote are uean Ierutarem taekan te uea ae boou ao e rangi n tabeaianga. E titirakinia mataniwi n ibonga ni kangai: ‘E na bungiaki ia te uea aei?’ A taku nakoina: ‘A taku burabeti bwa e na bungiaki i Betereem.’ Ngaia are e weteiia mwaane ake mai Mainiku ao e taku nakoia: ‘Naako Betereem ao kakaaea te teei aei. Kam na oki n tuangai bwa e mena ia. I kan nako naba ni bobaraaki nakoina.’ Ma e boni kewe.

E a manga mwaing te “itoi” anne. A iriria mwaane akekei nako Betereem. E tei te “itoi” i etan te auti teuana ao a a rinnako iai mwaane akanne. A nora Iesu ma tinana are Maria. A bobaraaki nakon te teei ao a anganna taiani bwaintangira ae te koora, te ribano ao te mura. E kanakoia mwaane aikai Iehova bwa a na kakaaea Iesu? E aki.

N te tairiki anne, e tuangaki ae kangai Ioteba iroun Iehova n te mii: ‘E tangiria Erote bwa e na tiringa Iesu. Kaira buum ma natim ao birinako nako Aikubita. Tiiku iai ni karokoa ae I tuangko bwa ai akea te kangaanga ao ko a kona n oki.’ Ao e a nako ngkekei naba Ioteba ma ana utu nako Aikubita.

E tuangia mwaane ake mai Mainiku Iehova bwa a aki riai n okira Erote. Ngke e a ataia Erote bwa a aikoa oki, e a rangi n un. Kioina ngkai e a aki kona n reke Iesu irouna, e a tua bwa a na bane n tiringaki ataei aika mwaane aika roron Iesu i Betereem. Ma e aki tiringaki Iesu bwa e raroanako i Aikubita.

Imwina riki ao e a mate Erote. E taku Iehova nakon Ioteba: ‘Ai akea te kangaanga ngkai, ko a kona n oki.’ A a okira Iteraera Ioteba, Maria ao Iesu ao a nakoni mwengaia n te kaawa ae Natareta.