E Reiakina te Koaua te Tia Tararuaiia Buure

Iai te toro ae te aine i Biribi ae taniaki n te taimonio. E kabonganaaki neiei iroun te taimonio bwa te tia taekini kanoan taai aika a na roko, ao ana toka neiei a a rereke aia mwane aika rangi ni bati mairouna. Ngke a roko i Biribi Bauro ma Tira, e ririmwia neiei i nanoni boong aika bati. E kairaki iroun te taimonio neiei bwa e na tatakarua ni kangai: “Bon ana toro te Atua ae Moan te Rietata mwaane aikai.” N tokina, e a kangai Bauro nakon te taimonio: ‘N aran Iesu, ao otinako mairoun neienne!’ Ao e a kitana neierei te taimonio.

Ngke a ataia ana toka neiei bwa a nang aki rereke aia mwane irouna, ao a a rangi n un. A katikiia Bauro ma Tira nakoia taani moti ao a taku: ‘A urua te tua mwaane aikai ao a kakiriweia kaain te kaawa ni kabane!’ E tua te tia moti bwa a na batiboaki Bauro ma Tira ao ni kaakaki n te karabuuti. E kaakiia te tia tararuaiia buure n te tabo ae rotongitong mai nuka riki n te karabuuti, ao e karini waeia n te bwai ni kabaewae.

Ngke a anene n neboa Iehova Bauro ma Tira, ao a ongongora buure. Ngke e a nukanibong ao e a rina naba n roko te mwaeiei ae korakora, n te aro are e a kamwaingingaki te karabuuti mai eta nako naano. A uki mataroan nako te karabuuti ao a bane ni bwara kabaeaia buure. E biri te tia tararuaiia buure nakon te matawariki ao e nori mataroa aika uki. E taku bwa a bane ni birinako buure ngaia are e anaa ana kabaang bwa e na bakabureia.

Ma e a tii takarua naba Bauro ni kangai: ‘Tai kaikoakiko! Ti bane ni mena ikai!’ E biri n rin te tia tararuaiia buure ao e katorobubua i matani Bauro ma Tira. E taku nakoia: “Tera ae I riai ni karaoia bwa I aonga ni kamaiuaki?” A taku nakoina: ‘Ko riai ni kakoauaa Iesu ma kaaini batam.’ Ao Bauro ma Tira a reireinia ana taeka Iehova, ao e a bwabetitoaki te tia tararuaiia buure ma kaaini batana ni kabane.