E Kanakoaki Bauro Nako Rom

E toki i Ierutarem ana katenua ni mwananga n uarongorongo Bauro. E katikaki ikanne ao ni karinaki n te karabuuti. E taku Iesu nakoina n te miitara ngke e a tairiki: ‘Ko na nako Rom n uarongorongo iai.’ E kairaki Bauro mai Ierutarem nako Kaitareia, ao e kabureaki uoua te ririki iai. Ngke e tei n te boowi Bauro i matan te Kowana ae Beteto ao e taku: ‘I bia tei i matani Kaitara i Rom.’ E taku Beteto: “Ko bubutii bwa ko na tei i matani Kaitara, mangaia ae ko na nakoni Kaitara.” E katokaaki Bauro n te kaibuke are e na nako Rom, ao a iria taari mwaane aika uoman aika Ruka ao Arititareko.

Ngke a borau ao a a taonaki naba n te angibuaka ae korakora i nanoni boong aika bati. A bane n iangoia bwa a nangi mate. Ma e taku Bauro nakoia: ‘Mwaane, e taku te anera nakoiu n te mii: “Tai maaku Bauro. Ko na roko i Rom ao a na bane ni maiu te koraki ake a borau ma ngkoe.” Kaninikoriaingkami! Ti na aki mate.’

E a rangi ni korakora te angibuaka i nanon 14 te bong. Imwina riki e a ria te aba ae Merita. E koro te kaibuke ao e a urubekebeke, ma a bane n roko n te aba kaaina aika 276. A uaua tabeman ao ake tabeman a toka i aoni mwakorokoroni kain te kaibuke ao ni beibeti iai ni karokoa ae a roko n te aba. A akoaki naakai irouia kaaini Merita ao a kauraa te ai bwa a na kaabueia iai.

Tenua te namwakaina imwina, e a kairaki Bauro nako Rom irouia tautia n te kaibuke riki teuana. Ngke e roko ikanne Bauro, ao a roko taari ni kaitiboo ma ngaia. Ngke e noriia Bauro, e kaitaua Iehova ao e kaninikoriaaki iai. E ngae ngke te bure ngaia ma e kariaiakaki ni maeka n te auti ae kabooa tangoana ao e teinaki irouia tautia. E tiku ikanne uoua te ririki. A roko aomata ni kawaria ao e tataekina nakoia taekan Ana Tautaeka n Uea te Atua ao e reiakinia taekan Iesu. E korei naba Bauro reeta nakon ekaretia ake i Asia Minor ao Iutaia. E boni kamanena Bauro Iehova bwa e na kabutaanako te rongorongo ae raoiroi nakoia natannaomata.