Reireiara Man te Tembora ae n Ana Miitara Etekiera

E Karietataaki te Taromauri ae Itiaki ao ni Kamanoaki

E karietataaki te tembora ae n te miitara i aon “te maunga ae rangi n rietata” (1). Ti a tia n tabekaarake te taromauri ae itiaki, ao n rangi ni moanibwaia ni maiura?

Te oo ae tobibi (2), are otabwaninia ana kambwaaun te tembora ae mena i nukan te maranga ae raababa (3), e a kauringira bwa ti aki riai ni kariaia te bwai teuana bwa ti na kabarekaa iai taromaurian Iehova. Ngkana ngaia bwa a riai naba ni kararoaaki baika “aki tabu” man te taromauri ae itiaki, ai kakawakira riki aki bwainan aroaro aika bubuaka ao aika kammaira irouia taan taromauria Iehova ni boong aikai!​—Etek. 42:20.

Kakabwaia Aika Akea Tokia

E bwarobwaro te karaanga man te tembora ao n riki bwa te raanga ae korakora ao e a uota te maiu ao te maiureirei nakon te aba (4). A na maroroakinaki kakabwaia aikai ni Mwakoro 19 n te boki aei.

Te Kaetieti ae Tii te Tikina Ibukia Aomata Nako

Mataroan te oo aika rangi n rietata ake mai tinaniku (5) ao mataroan te oo ake mai nanona (9) a kauringira ae a rietata ana kaetieti Iehova ibukin te aroaro ni maiu ibukia aomata nako ake a uataboa te taromauri ae itiaki. Noria bwa titeboo raoi abwakini mataroan te oo ake mai tinaniku ao ake mai nanona. E tonu raoi aei ma ana kaetieti Iehova aika raraoi aika tii te tikina ibukia ana toro ni kabane, n aki ongei mwiokoaia, ke buburan tabeia n aia beku.

Te Amwarake n Ana Taibora Iehova

Taabo n amwarake (8)  a kauringira bwa n taai ake rimoa ao a kona aomata n uaia n amwarake ni karea tabeua ake a uotii nakon te tembora, ae ai aron ae a kaai n amwarake iai ma Iehova. Ma e a aki karaoaki anne n te tembora n taamnei ae a tataromauri iai ngkai Kristian, bwa e a tia ni kareanaki “te karea ae tii teuana.” (Ebera 10:12) Ma ti bon anga naba ara karea ni karaoiroi.​—Ebera 13:15.

Ana Karaunano te Atua

Ko bae n rangi ni mimi n abwaki ake a kabwarabwaraaki n te miitara. Ma a anga te reirei ae kakawaki ae kangai: A karaui nanora bwa e boni koaua ao e kororaoi ana kantaninga Iehova ibukini kaokan te taromauri ae itiaki, n aron etin raoi ao aki bibitakin taian abwaki akekei. E ngae ngke e aki taekinna Etekiera bwa e noriia aomata n ana miitara, ma e korea ana reirei ni kairiri Iehova ae matoa ibukia ibonga, mataniwi, ao aomata. A riai ana toro te Atua ni kabane n irii Ana kaetieti aika raraoi.