TE BWAOKI N REIREI 19A
Karaanga Aika Uotii Ana Kakabwaia Iehova
Iangoi rongorongo tabeua aika kakaokoro n te Baibara, ake a kabonganaaki iai taeka aika “te karaanga” ao “te ran” ni kataamnei kakabwaia aika raanga mairoun Iehova. Ngkana ti wareki ni kabane, ti a kaungaaki iai n ataakin aron Iehova ni kakabwaiaira. N te aro raa?
IOERA 3:18 E oti n te taetae ni burabeti aei te koburake n ran ae otinako man te tembora. E raanga mai iai n teboka te tabo ae mwau ae “te Mwarua ae Titim.” Ngaia are a uaia Ioera ma Etekiera n nora te karaanga ae uota te maiu nakon taabo aika aki karikiuaa. Ao a uaia karaanga akanne n otinako man ana auti Iehova, ke te tembora.
TEKARIA 14:8 E nori “raan ni kamaiu” te burabeti ae Tekaria n raanga man te kaawa ae Ierutarem. E raanga iterana nakon taari are mai mainiku, ke Taari ae Mate, ao are iterana nakon taari are mai maeao, ke Taari ae te Meriteranian. Ierutarem bon “ana kaawa te Uea ae kakannato” ae Iehova ae te Atua. (Mat. 5:35) Ni mwanewean te kaawa aei iroun Tekaria, ti a kauringaki iai taekan ana waaki n tautaeka Iehova n te aonnaba ni kabutaa n taai aika imwaira. Ti a maan n ataia ae raan aika n te taetae ni burabeti aei, a katerea ae Iehova e na kakabwaiaia n te Bwaretaiti koraki n aomata aika uakoraki aika kakaonimaki, ae taekaia naake a maiu rinanon te rawawata ae korakora ao naake a kautaki imwina.
TE KAOTIOTI 22:1, 2 E nora te karaanga ni kaikonaki te abotoro Ioane, ae kuri n titeboo ma are e noria Etekiera. Ma e aki otinako man te tembora ma boni man ana kaintokanuea Iehova. N aron ana miitara Tekaria, e taraa n ae te miitara naba aei e katuruturui taekani kakabwaia man ana waaki n tautaeka te Atua i nanon Ririki Ake Tenga.
A boni kuri n titeboo kakabwaia aika roko man ana waaki n tautaeka Iehova ao ake a kaikonakaki n te karaanga are e noria Etekiera n te miitara. A bane n roko mairoun Iehova aeka ni kakabwaia aikai ao a raanga nakoia aomata nako aika kakaonimaki.
TAIAN ARERU 46:4 Nora aron te kibu aei n ikotii itera aika uoua aikai, ae taekan te taromauri ao te waaki n tautaeka. Ti nora ikai te karaanga ae uota te kimwareirei nakon “ana kaawa te Atua,” ae taekan te Tautaeka n Uea ao ana waaki n tautaeka, ao nakon naba “ana umwanrianna ae tabu ae kakannato Teuare Moan te Rietata,” ae taekan te taromauri ae itiaki.
Ni warekani kiibu aikai ao a a karauaki nanora ngkai e na boni kakabwaiaia aomata aika kakaonimaki Iehova n aanga aika uoua. Te moan, ti na boni kakabwaiaaki n aki toki man ana waaki n tautaeka, ao te kauoua man ana babaire ibukin te taromauri ae itiaki. Ngaia are ti bia kananomatoaira ngkai bwa ti na teimatoa n ukoukora “te ran ni kamaiu” mairoun Iehova ae te Atua ao Natina, ake taekani baike a katauraoi ma te tatangira ibukini karekean te maiu ae aki toki!—Ier. 2:13; Ioa. 4:10.