REIREI 4

Katauraoan te Iango Imwaini Warekan te Kibu

Mataio 22:41-45

KABWARABWARAANA: Katauraoi aia iango taan ongora imwain ae ko wareka te kibu.

Iangoia bwa bukin tera ngkai ko wareka te kibu. Imwain taekinan te kibu, kairi aia iango taan ongora bwa a aonga n ataa te reirei ae kakawaki ae ko kani katuruturua n te kibu.

Iangoa bwaninin te rongorongo n te kibu. Ngkana ko na taekinna bwa antai ae taetae ke ane e korea bokin te Baibara, taraia bwa e na eti raoi.
Kabotoa am maroro i aon te Baibara. Ngkana ko maroro ma aomata aika kakoauaa te Atua, kaira aia iango bwa a na ataia ae te Baibara bon Ana Taeka te Atua, ao n te aro aei ko kaotia iai bwa te Baibara bon nibwan te wanawana ae te kabanea n tamaroa.
Kauekea te kan ongora n te Baibara. Tabeka te titiraki ae e na kaekaaki n te kibu, ke taekina te kangaanga ae e na ibuobuoki ni kanakoraoia te Baibara, ke taekina te boto n reirei ae e na kamatataaki n te rongorongo man te Baibara.

Iaiangoa te baere a a kaman ataia taan ongora ni kaineti ma te boto n iango are maroroakinaki ao te kibu. Ngkana ko na taekina te kibu ae a taneiai iai, karaoia n te aro ae anainano, ao buokiia bwa a na iangoia riki n te itera teuana.