REIREI 15

Kaotia Bwa Ko Kakoauaa te Bae Ko Taekinna

1 I-Tetaronike 1:5

KABWARABWARAANA: Kaotia ae ko kakoauaa raoi bwa te baere ko taekinna e boni koaua ao e manena.

Katauraoi raoi. Kamatebwaia am reirei ni karokoa ae ko a atai reirei aika kakawaki iai ao a kangaa ni kaotaki koauaia n te Baibara. Kataia ni kabwarabwarai reirei aika kakawaki tii n taeka tabeua aika bebete. Kaatuua riki am iango i aon aroni buokaia taan ongora iai. Tataroa te taamnei ae raoiroi.

Kataneiai ni kabaibati bwanaam bwa ko aonga n taneiai riki ma am reirei anne, ao ni kanakoraoa arom ni kabwarabwara.
Kamanenai taeka aika kaotia bwa ko kakoauaa te bae ko taekinna. N oneani mwin are ko na okioki ni kamanenai taeka man am reirei are ko anganaki, kabonganai oin am taeka. Kabonganai taeka ake ko kaotia raoi iai bwa ko kakoauaa te bae ko taekinna.
Taetae ma te ingaingannano ao mai nanom. Taetae n te aro ae bon tau nenen bwanaam. Ngkana e aki kamatauninga n am tabo, tatarai mataia taan ongora.

Tai iangoia bwa ngkana ko na kaota ae ko kakoauaa te bae ko taekinna, ko a kona iai ngkanne n taetae ma te aki karinerine, n taua am eti, ke ni kairoro. E ngae ngkana e a roko nanom n taetae ma anai nanoia taan ongora ma te tangira.