REIREI 47
Ko a Tauraoi Nakon te Bwabetito?
Ko a tia n reiakini baika bati ibukin Iehova n am reirei n te Baibara. Ko bae n tia ni karaoi bitaki tabeua ni maiuakini baike ko reiakin. Ma tao iai te bwai ae tautauko mani katabuani maium nakon Iehova ao te bwabetito. E na maroroakinaki n te reirei aei bwaai tabeua aika tutukiko man te bwabetito ao arom n tokanikai i aoia.
1. Mwaitira ae ko riai n ataia imwain ae ko bwabetito?
Ngkana ko na bwabetitoaki, ko riai ni karekea “te atatai ae eti ibukin te koaua.” (1 Timoteo 2:4) Tiaki nanona bwa ko riai n atai kaekaan titiraki ni kabane man te Baibara, imwain ae ko na bwabetitoaki. A bon teimatoa naba n reirei Kristian aika a maan ni bwabetitoaki. (I-Korote 1:9, 10) Ma ko riai n atai moan reirei aika n te Baibara. A na buokiko unimwaane n te ekaretia n noria bwa e a reke am atatai ae tau ke e tuai.
2. Baikara mwaneka tabeua aika ko riai ni karaoi imwain ae ko bwabetitoaki?
Imwain ae ko bwabetitoaki, ko riai ‘raira nanom ao ni bita aroarom.’ (Wareka Mwakuri 3:19.) Nanon aei bwa ko raraoma n am bure ake mai mwaina ao ko bubutiia Iehova kabwaraan am bure. Ko a rawa naba nakon aroaro aika bubuaka, ao ko a motinnanoia bwa ko na maiuakina ae kukurei iai te Atua. Irarikin anne, ko a uataboi baika kakaraoaki n te ekaretia, n arom n irira te taromauri ao n uarongorongo, ngkai ko a riki bwa te tia uarongorongo ae tuai ni bwabetitoaki.
3. E aera bwa ko aki riai ni kariaia te maaku bwa e na tautauko?
Tabeman a maaka are a na aki kona ni kakoroa nanon aia berita nakon Iehova. E koaua ae n tabetai ti na karaoi kairua, bwa iai naba mwaane ao aine aika kakaonimaki aika karakinaki n te Baibara aika kabwaka naba. Ma Iehova e aki kantaningaiia taan taromauria bwa a na kororaoi. (Wareka Taian Areru 103:13, 14.) E kukurei ngkana ko karaoa am kabanea n tamaroa! E na boni buokiko. Ni koauana, e karaui nanora Iehova bwa akea te bwai teuana ‘ae kona ni karaureira ma tangirara irouna.’—Wareka I-Rom 8:38, 39.
REIAKINA AE BATI RIKI
Noria bwa ko na kangaa n tokanikai i aoni bwaai aika tutuka am bwabetito, n arom ni karekea ataakin riki Iehova ao ni butimwaea ana ibuobuoki.
4. Karekea ataakin riki Iehova
Mwaitira ae ko riai n ataia ibukin Iehova imwain ae ko bwabetitoaki? E riai n tau am atatai ibukina n te aro ae ko a tangiria ao ni kani kakukureia. Kaota te TAAMNEI n noria bwa a kangaa ni karaoa anne, naake a reirei n te Baibara ni katobibia te aonnaba. Ao maroroakina te titiraki aei.
N aron ae oti n te taamnei, tera ae a buokaki iai naakai n tauraoi nakon te bwabetito?
Wareka I-Rom 12:2, ao maroroakin titiraki aikai:
Ko nanououa n ana reirei te Baibara, ke n aia angareirei Ana Tia Kakoaua Iehova bwa a koaua ke a aki?
Ngkana eng, tera ae ko kona ni karaoia?
5. Tokanikai i aoni baika kona n tutuka am bwabetito
Ngkana ti motinnanoia bwa ti na katabua maiura nakon Iehova ao ni bwabetito, ti a kaitiboo naba ma kangaanga. Nora te katoto teuana, kaota te TAAMNEI, ao maroroakin titiraki aikai.
N aron ae oti n te taamnei, baikara bwaai aika tutuka Narangerel, man te beku iroun Iehova?
E kangaa ni buokaki neiei n tangiran Iehova, bwa e na tokanikai i aoni baikai?
Wareka Taeka N Rabakau 29:25 ao 2 Timoteo 1:7, ao maroroakina te titiraki aei:
Tera ae kaninikoriaira n tokanikai i aoni bwaai n tutuki?
6. Onimakina ana ibuobuoki Iehova
E na boni buokiko Iehova ni kakukureia. Kaota te TAAMNEI, ao maroroakin titiraki aikai.
N aron ae oti n te taamnei, tera ae tautaua te aomata ae reirei n te Baibara aei, man te bwabetito?
Tera are e a ataia ao ni buokaki iai bwa e na korakora onimakinan Iehova irouna?
Wareka Itaia 41:10, 13, ao maroroakina te titiraki aei:
E aera ngkai ko kona ni kakoauaa bwa e na boni kona ni koro bukin am berita are ko karaoia n am katabu?
7. Kabatiaa am kakaitau ibukin ana tangira Iehova
Ngkana ko iaiangoa aron tangiram iroun Iehova, ko na rangi ni kakaitau riki iai ao e na korakora riki nanom ni kan toro irouna n aki toki. Wareka Taian Areru 40:5, ao maroroakina te titiraki aei:
Baikara kakabwaia mairoun Iehova aika ko kakaitau riki iai?
E tangira Iehova ao ana taeka te burabeti are Ieremia, ao e rangi ni kakaitau ngkai e kona n uouota aran Iehova. E taku: “E a riki am taeka irou bwa kakatongan ao kimwareirein nanou, bwa I ingoanaki n aram, ngkoe ae Iehova.” (Ieremia 15:16) Kaekai titiraki aikai:
E aera ngkai bon te kakabwaia te riki bwa Ana Tia Kakoaua Iehova?
Ko kani bwabetitoaki bwa temanna Ana Tia Kakoaua Iehova?
Iai te bwai teuana ae tutuka am bwabetito?
N am iango tera ae ko riai ni karaoia bwa ko aonga n roko n tiam ae te bwabetito?
A TAKU TABEMAN: “I maaku bwa mwina I a aki kona ni kakororaoa nanon au bwabetito.”
Anne naba am namakin?
KAKIMOTOTOANA
Ko kona n tokanikai i aoni bwaai ni kabane aika tutuka am bwabetito, man ana ibuobuoki Iehova.
Kauring
Mwaitira ae ko riai n ataia man te Baibara, imwain ae ko bwabetito?
Baikara bitaki aika ko riai ni karaoi imwain ae ko bwabetito?
Bukin tera bwa ko aki riai ni kariaia te maaku bwa e na tautauko?
NORI NABA AIKAI
Iaiangoia bwa tera ae riai n aana am motinnano nakon te bwabetito.
“Ko a Tauraoi ao n Tau Nakon te Bwabetito?” (Te Taua-n-Tantani, Maati 2020)
Noria bwa ko na kangaa n tokanikai i aoni kangaanga tabeua aika tautauko.
“Tera ae Tukai Man te Bwabetito?” (Te Taua-n-Tantani, Maati 2019)
Nora aron te mwaane temanna n tokanikai i aoni bwaai n tutuki aika bubura, ao ni kona ni bwabetitoaki.
N te moantai e rawa teuae Ataa ni bwabetitoaki. Noria bwa tera ae e kairia bwa e na karaoa te mwaneka ae kakawaki aei.