REIREI 49
Ko na Kangaa ni Karekea te Kukurei n Am Utu?—Mwakoro 1
A kantaningaia taanga aika tibwa mareaki bwa e na bon teimatoa n aki toki te kukurei are a namakinna n aia bongi ni mare. Ao e kona n riki anne. A ataia ae e kona n riki anne, Kristian aika a a maan n tia ni mareaki ao ni kakorakoraia ni maiuakin ana taeka n reirei te Baibara.
1. Tera te taeka n reirei man te Baibara nakoia buumwaane?
E mwiokoa te buu te mwaane Iehova bwa atun te utu. (Wareka I-Ebeto 5:23.) E kantaningaia Iehova bwa e na karaoi babaire te buu te mwaane ibukini kabwaian ana utu. E reireinia ni kangai buumwaane te Baibara: “Teimatoa n tangiriia buumi.” (I-Ebeto 5:25) Tera nanon anne? E akoa buuna te buu te mwaane ae tatangira, ngkana a mena ni mwengaia ke i buakoia te koraki. E kamanoa buuna mani kabuanibwai ao e kabanea ana konaa n tabeakina kainnanon neiei ma ana namakin. (1 Timoteo 5:8) Ae kakawaki riki, e na buoka buuna te buu te mwaane bwa e na kaan riki ana iraorao ma Iehova. (Mataio 4:4) N te katoto, e kona ni kaai n tataro ao ni wareka te Baibara ma buuna. Ngkana e tararuaa buuna ma te tatangira te buu te mwaane, e a kateimatoa iai ana iraorao ma Iehova.—Wareka 1 Betero 3:7.
2. Tera te taeka n reirei man te Baibara nakoia buuaine?
E taekinaki n te Baibara bwa “e riai te buu te aine ni korakora karineani buuna irouna.” (I-Ebeto 5:33) E na kangaa ni karaoa anne? E kona n iaiangoi aroaroni buuna aika raraoi ao ana kakorakora n tararuaia ma natiia. E kona naba ni karinea buuna neiei n arona ni boutokai ana babaire, ao n taetae ma te akoi nakoina ao ibukina, e ngae naba ngkana tiaki te tia kakoaua.
3. A na kangaa taanga ni kakorakoraa aia mare?
E kangai te Baibara ibukia taanga ni mare: “A na riki n tii te irikona naaka uoman.” (Mataio 19:5) Nanon aei bwa a riai ni buakani baike a na kamamaraa aia tangira i marenaia. A karaoa anne ngkana a kakabanea aia tai i bon irouia, ao ni mamaroro ni kaotii aia iango ma aia namakin n akea te imamaakin. A aki kariaia te bwai teuana ke te aomata temanna, bwa e na kakawaki riki nakoni buuia, ma tii Iehova. A taratara raoi naba bwa a na aki kabanea riki aia tai ma temanna ae tiaki buuia.
REIAKINA AE BATI RIKI
Nori ana boto n reirei te Baibara aika kona ni kakorakoraa am mare.
4. Buumwaane—tangiriia buumi ao tabeakinia raoi
E taekinaki n te Baibara bwa “a riai buumwaane n tangiriia buuia n aron tangiran oin rabwataia.” (I-Ebeto 5:28, 29) Tera nanon anne? Kaota te TAAMNEI, ao maroroakina te titiraki aei.
Baikara aanga tabeua aika e kona iai te buu te mwaane ni kaotia bwa e tangira buuna ao n tabeakinna?
Wareka I-Korote 3:12, ao maroroakina te titiraki aei:
E na kangaa te buu te mwaane ni kaotiotii aroaro aikai n ana mare?
5. Buuaine—tangiriia buumi ao karineia
E kaungaaki te buu te aine n te Baibara bwa e na karinea buuna, n aki ongeia bwa e toro iroun Iehova buuna ke e aki. Wareka 1 Betero 3:1, 2, ao maroroakin titiraki aikai:
Ngkana buum tiaki te tia kakoaua, ko boni bae n tangiria bwa e na taromauria Iehova. N am iango tera ae mwakuri riki, ko na katoatai n uarongorongo nakoina, ke ko na kaotiotii aroaro aika raraoi ao ni karinea? Bukin tera?
A kona taanga n uaia ni karaoi motinnano aika raraoi. Ma e na bon iai naba taai ake e na aki boraoi iai n iango te buu te aine ma buuna. E kona ngkanne ni kaotii ana iango ma te karaurau ao te karinerine, ma e riai n uringnga ae e a tia Iehova ni mwiokoa te mwaane bwa e na bairea ae te kabanea n tamaroa ibukia kaain te utu. Ngaia are e na kabanea ana konaa neiei ni boutokaa ana babaire buuna. Ngkana e karaoa anne te buu te aine e a boutokaa te kukurei n ana utu. Wareka 1 Betero 3:3-5, ao maroroakina te titiraki aei:
Tera ana namakin Iehova ngkana e kaotiota karineani buuna te buu te aine?
6. Ko kona n tokanikai i aoni kangaanga n am mare
Akea te mare ae kororaoi. Ngaia are a riai taanga n uaia ni mwakuria aia kangaanga ao n tokanikai iai. Kaota te TAAMNEI, ao maroroakin titiraki aikai.
N aron ae oti n te taamnei, baikara kanikina aika kaotia bwa e a moanna ni mamaara aia reitaki te taanga aei?
Baikara mwaneka aika a riai ni karaoi ibukini kakorakoraan aia mare?
Wareka 1 I-Korinto 10:24 ao I-Korote 3:13. Imwini warekan te kibu teuana ma teuana, maroroakina te titiraki aei:
E na kangaa maiuakinan te taeka n reirei aei ni kakorakoraa am mare?
E taekinaki n te Baibara bwa ti riai n ikarinerine i marenara. Karinean temanna e nanona bwainan te akoi nakoina ao karineana. Wareka I-Rom 12:10, ao maroroakin titiraki aikai:
A riai buumwaane ke buuaine ni kantaningaa karineaia moa irouia buuia? Bukin tera?
A TAKU TABEMAN: “Ai tiaki aron ngkoa au reitaki ma buu.”
Ko na kangaa ni kabwarabwaraa ae e kona te Baibara ni buokiia?
KAKIMOTOTOANA
E kona te buu te mwaane ao te buu te aine ni kukurei ngkana a tangiriia i marenaia, ao ngkana a maiuakin ana boto n reirei te Baibara.
Kauring
E na kangaa te buu te mwaane ni karika ana mare bwa e na kakukurei?
E na kangaa te buu te aine ni karika ana mare bwa e na kakukurei?
Ngkana ko a tia ni mare, tera ana boto n reirei te Baibara ae kona ni kakorakoraa am mare?
NORI NABA AIKAI
Nori taeka n ibuobuoki aika kona ni karika am utu bwa e na kakukurei.
Mataku n te anene ae oti taamneina aei, ae e kaotii kakabwaia aika reke mani maiuakinan ana kaetieti te Atua n am mare.
Noria bwa tera nanon te aantaeka nakoni mwaakan te buu te mwaane ni kairiri.
“E Aera Bwa A Aantaeka Aine Nakon te Waaki ni Kairiri?” (Te Taua-n-Tantani, Mei 1, 2010)
Nora aroni buokaia te taanga teuana man ana taeka n reirei te Baibara.