Ko na Kangaa ni Kakukureia Iehova n Am Taetaenikawai?

Ngke e karikira Iehova ao e anganira te bwaintituaraoi ae tamaroa ae te konaa n taetae. Ma te koaua bwa e kakawaki irouna arora ni kamanena te bwaintituaraoi aei? Eng! (Wareka Iakobo 1:26.) Ti na kangaa ngkanne ni kamanena ara konabwai n taetae n te aro ae e na kukurei iai Iehova?

1. Ti na kangaa ni kamanena te bwaintituaraoi ae te taetaenikawai?

E taekinna te Baibara bwa ti na ‘teimatoa ni kaungaira i marenara ao ni kateimatoaira.’ (1 I-Tetaronike 5:11) Iai tabeman ae ko ataia bwa a kainnanoa te kaungaunga? Tera ae ko kona ni karaoia bwa a aonga ni kabebeteaki? Kaotia nakoia bwa ko bon tabeakinia. Tao ko kona n tuangia baika ko tatangiria ibukia. Iai te kibu ae kona ni kaungaaki iai temanna ae ko kinaa? A bati kiibu aika ko kona n rinei. Ma uringnga naba are a kona n rangi ni kaungaaki aomata man arom n taekina te bwai teuana. Ngaia are kataia n taetae n taai nako ma te akoi ao te nimamannei.​—Taeka N Rabakau 15:1.

2. Te aeka n taetaenikawai raa ae ti riai n rarawa nako iai?

E kangai te Baibara: “E na tai otinako te taeka ae buakaka mai wimi.” (Wareka I-Ebeto 4:29.) E nanonaki n aei bwa ti aki riai ni kabonganai taeka aika buakaka ke n taekini taeka aika kamatauninga ao aika kona ni kammaraka nanon temanna. Ti riai naba n rarawa nakon te winnanti ao te uarao.​—Wareka Taeka N Rabakau 16:28.

3. Tera ae e na buokira n taekini baika kaungaunga?

N angin te tai, baika ti taekin a kaotaki iai baika mena raoi i nanora ao n ara iango. (Ruka 6:45) Ngaia are ti riai ni kataneiaira ni kaatuua riki ara iango i aoni baika raoiroi n aroni bwaai aika eti, a itiaki, a kauekea te tangira, ao aika riai ni kamoamoaaki. (I-Biribi 4:8) Ngkana ti na kaatuui ara iango i aoni baikai, ti riai ni bwaina te wanawana n rinean ara kaakibotu ao raoraora. (Taeka N Rabakau 13:20) E buokira naba bwa ti na kona n iango moa imwain ae ti taetae. Iaiangoa aron rotakia tabemwaang n am taeka. E kangai te Baibara: “Te taetaenikawai ae aki iangoaki raoi kaanga ai aron te ewa n te kabaang, ma bon te bwai ni kamaiu neweia akana wanawana.”​—Taeka N Rabakau 12:18.

REIAKINA AE BATI RIKI

4. Tarataraa raoi aron am taetaenikawai

N taai tabetai, ti kona n taekini baika ti a manga uringaaba iai imwina. (Iakobo 3:2) Wareka I-Karatia 5:​22, 23, ao maroroakin titiraki aikai:

• E nga mai buakon aroaro aikai ae ko kona n tataroia ibukini buokam n tarataraa raoi aron am taetaenikawai? Ko na kangaa ni buokaki n aroaro aikai?

Wareka 1 I-Korinto 15:​33, ao maroroakina te titiraki aei:

• E na kangaa n rotaki aron am taetaenikawai irouia raoraom ao am kaakibotu ake ko rinei?

Wareka Te Minita 3:​1, 7, ao maroroakina te titiraki aei:

• N ningai te tai ni kainabwabu ke n tataningaa te tai ae angaraoi bwa ti na taetae iai?

5. Taekini baika raraoi ibukia tabemwaang

TAAMNEI: Taekina “Te Taeka ae Raoiroi ae na Kateimatoa te Aba” (4:07)

• N aron ae oti n te taamnei, e aera te tari te mwaane aei ngke e tangiria ni bita arona n taekinia tabemwaang?

• Tera are e karaoia bwa e aonga ni bitaki?

Wareka Te Minita 7:​16, ao maroroakina te titiraki aei:

• Tera ae ti riai n ururingnga ngkana ti a kaririaki bwa ti na taekini baika bubuaka ibukin temanna?

Wareka Te Minita 7:​21, 22, ao maroroakina te titiraki aei:

• Ko na kangaa ni buokaki ni kiibu aikai bwa ko na aki un ngkana e taekini baika bubuaka ibukim temanna?

6. Bwaina te akoi ngkana ko taetae nakoia am utu

TAAMNEI: A Katiteuanaaki Utu n te Tangira ao te Karinerine (3:08)

• Tera ae e na buokiko n taetae ma te akoi nakoia am utu?

Wareka I-Ebeto 4:​31, 32, ao maroroakina te titiraki aei:

• Te aeka n taetaenikawai raa ae a kona ni kaungaaki iai ara utu?

E kaota ana namakin Iehova ibukin Natina ae Iesu. Wareka Mataio 17:​5, ao maroroakina te titiraki aei:

• Ko na kangaa ni kakairi iroun Iehova n arom n taetae nakoia am utu?

KAKIMOTOTOANA

A kona n rotaki aomata n ara taeka. Ti riai n iaiangoa raoi ara taeka, te tai are ti taekinna iai, ao arora n taekinna.

Kauring

• Baikara aanga tabeua aika ko kona ni kamanena iai am taetaenikawai ni buokiia tabemwaang?

• Te aeka n taetaenikawai raa ae ko riai n rarawa nako iai?

• Tera ae kona ni buokira bwa ti na teimatoa ni bwaina te akoi ao ni kaungaia tabemwaang n ara taetaenikawai?

NORI NABA AIKAI

Tera ae kona ni buokira bwa ti na kaungaia tabemwaang n ara taetaenikawai?

Katotonga Neweia Akana Wanawana (8:04)

Reiakina te bae kona ni buokiko n rarawa nakoni kabonganaan te taetae ae buakaka.

“Te Koaua Bwa E Rangi ni Buakaka te Taetaebuaka?” (Te kaongora n jw.org)

Nora arom n rarawa nakon te bwai ni kamwane ae te winnanti.

N na Kangaa ni Katoka te Winnanti? (2:36)

Nenera aron Iehova ni buoka te mwaane temanna n ana kabokorakora ni katoka te taetaebuaka.

“I a Moanna n Iangoia Raoi Bwa Tera Aroni Maiu” (Te Taua-n-Tantani, Aokati 1, 2013)