Kaain te Rabwata n Tautaeka Aika Boou

N TE Kaonobong Okitoba 2 1999, e kainaki aia Bwabwaro n Ririki te Watch Tower Bible and Tract Society of Pennsylvania, ma te katanoata ae aki kaantaningaki. Aomata aika 10,594 ake a kaea te bwabwaro anne ke aika a kakauongo iai rinanon te tarebon, a kukurei n ongora bwa iai aman aika boou aika a rineaki bwa a na kaaina aia Rabwata n Tautaeka Ana Tia Kakoaua Iehova. Kaain te rabwata aikai aika boou, aika Kristian aika kabiraki, bon Samuel F. Herd; M. Stephen Lett; Guy H. Pierce; ao David H. Splane.

• E moanna ni karaoa te mwakuri ni bwaiania Samuel Herd n 1958, ao man 1965 ni karokoa 1997, e mwamwananga n te mwakuri n circuit ao te mwakuri n district. Imwin anne, ngaia ma buna ae Nei Gloria a kaaina te utu ni Beta-era n te United States, ike Brother Herd e a mwakuri inanon te Botaki Ibukin te Mwakuri. E a mwakuri naba bwa te tia ibuobuoki n te Komete Ibukin te Mwakuri.

• Stephen Lett e moanna ni bwaiania n Ritemba 1966, ao man 1967 ni karokoa 1971, e beku i Beta-era n te United States. N Okitoba 1971 e mare ma buna ae Nei Susan, ao a karaoa te mwakuri n special bwaiania. Man 1979 ni karokoa 1998, e beku bwa te mataniwi ibukin te circuit. Man Eberi 1998, ngaia ma Nei Susan a kaaina te utu ni Beta-era n te United States. E beku iai n te Botaki Ibukin te Mwakuri ao e a ibuobuoki naba ma te Komete Ibukin te Reirei.

• Guy Pierce e kaikawaia ana utu moa, ao imwina, ngaia ma buna a moanna ni karaoa te mwakuri ni bwaiania n Eberi 1982. E beku bwa te mataniwi ibukin te circuit man 1986 ni karokoa 1997, ao ngkanne, ngaia ma buna ae Nei Penny a riki bwa kaain te utu ni Beta-era i Brooklyn. Brother Pierce e a beku bwa te tia ibuobuoki n te Personnel Committee.

• David Splane e moanna ni karaoa te mwakuri ni bwaiania n Tebetemba 1963. E karekea ana beba man te ka 42 ni kuura ni Kireata ao e a beku bwa te mitinare i Senegal Aberika, ao imwin anne, ngaia ma buna a karaoa te mwakuri n circuit i Kanata inanon 19 te ririki. Ngaia ma buna ae Nei Linda a mena i Beta-era n te United States man 1990, ike Brother Splane e a mwakuri n te Botaki Ibukin te Mwakuri ao te Writing department. Man 1998, e a riki bwa te tia ibuobuoki n te Writing Committee.

Irarikiia aomata aika boou aika aman aikai, te Rabwata n Tautaeka ngkai e kaainaki iroun C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, ao D. Sydlik. A bane aomata n tataro bwa Iehova e na teimatoa ni kakabwaia mani kakorakora riki te Rabwata n Tautaeka ae e a tia ni kabuburaki, ngkai e teimatoa ni mataniwina aia mwakuri ana aomata te Atua ni katobibia te aonnaba, ma ni beku ni buoki kainnanoia n te aro n taamnei.