Mwaakan te Tataro
E tabe ni bung taai i aon te kaawa ae Naora n Aaba ake i Mainiku. E a roko Erietera ae te mwaane ae te I-Turia ma ana kamero ake tengaun, n te maniba are itinanikun te kaawa anne. E ngae ngke e boni kua ao e taka ni kani moi, ma Erietera e tabeakini riki bwaai aika kainnanoaki irouia aomata tabemwaang. E a roko man te aba ae ianena bwa e na kakaea te aine ae e na buna natin ana toka. Irarikin anne, e riai n rinea te aine aei mai buakoia ana koraki ana toka. E na kanga ni katiaa te mwioko ae kangaanga aei?
E RIETERA e kakoaua bwa e mwaaka te tataro. Ao e kamimi ngke e katotonga ana onimaki te tei ae uarereke ngke e tabeka te bubutii ae nanorinano aei: “Iehova, ae Atuan au toka are Aberaam, I butiko ba Ko na kakabaiaai n te bong aei, ao Ko na kaota te atataiaomata nakon au toka are Aberaam. Noria, I tei i rarikin te koburake n ran; ao a oti nako aine aika natiia kain te kawa ba a na roaa te ran: ao e na riki te aro aei, ba te teiaine ae N na kangai nako ina, I butiko ba ko na karuoa am bitia mai aon angam ba N na moi; ae na kangai, Ko na moi, ao N na kamoiia naba am kamero: ao ai ngaia te aine ae Ko rineia ba bun am toro are Itaaka; ao N na ataia iai ba Ko a tia ni kaota te atataiaomata nakon au toka.”—Karikani Bwaai 24:12-14.
E aki matebuaka onimakinan mwaakan te tataro iroun Erietera. Bwa te moan aine are e a roko n te maniba arei bon tibun tarin Aberaam! Arana Nei Rebeka, ao akea buna, ao neierei bon te aine ae itiaki maiuna, ao e bakitoutou. Te kamimi bwa e aki tii kamoa Erietera, ma e kukurei naba ni kamoia ana kamero ni kabane. Imwina riki, ngke a a tia ni boowi te utu, Nei Rebeka e kukurei n ira Erietera nakon te aba ae raroa nako, bwa e na riki bwa bun natin Aberaam are Itaaka. Ai kamimira ma n teretere ra kaekan ana tataro Erietera iai, are n te tai are te Atua e karaoi kakai n taai tabetai ibukin kairan bwaai aika a na riki!
E bati reireiara ae ti kona ni karekei man ana tataro Erietera. E oti iai ana onimaki ae korakora, ana nanorinano, ao tabeakinan kainnanoia aomata tabemwaang n aki tii iangoa oin nanona. Ana tataro Erietera e kaotia naba bwa e butimwaea naba aron Iehova ni mwamwakuri nakoia aomata. Akea te nanououa bwa e ataa aron te iraorao ae kaokoro imarenan te Atua ma Aberaam, ao taekan Ana berita bwa a na karokoaki kakabwaiaia aomata nakon taai aika a na roko, rinanon Aberaam. (Karikani Bwaai 12:3) Mangaia are Erietera e kauka ana tataro n taeka aika: “Iehova, ae Atuan au toka are Aberaam.”
Iesu Kristo bon kanoan Aberaam are a na kakabwaiaki aomata ni kabane aika ongeaba, rinanona. (Karikani Bwaai 22:18) Ngkana ti tangiria bwa a na kaekaki ara tataro n taai aikai, ti riai n nanorinano ni kaota ataakin aron te Atua ni mwamwakuri nakoia aomata rinanon Natina. E kangai Iesu Kristo: “Ngkana kam maeka i nanou, ao ngkana a maeka au taeka i nanomi, ao kam na bubuti baika kam tangiri, ao a na reke i roumi.”—Ioane 15:7.
Te tia rimwin Kristo ae e nora koauan ana taeka Iesu aikai, bon te abotoro Bauro. E bon aki matebuaka kakoauan mwaakan te tataro irouna. E kaungai nanoia raona ni Kristian bwa a na uota rawawataia ni kabane nakon te Atua rinanon te tataro, ao e kaotioti naba ni kangai: “I boni konai bwaai ni kabane ni karaoi iroun Teuare kakorakoraai.” (I-Biribi 4:6, 7, 13) E nanonaki iai bwa e karekei bwaai ni kabane ake e butiia te Atua iai Bauro rinanon te tataro? Ti na noria.
A Aki Kakoroaki Nanon Bubutii ni Kabane
N ana mwakuri ni minita are e kukurei n anga boni ngaia nako iai, Bauro e karawawataki n te bwai are e aranna bwa ‘te bwai ni kateketeke n irikona.’ (2 I-Korinto 12:7) Tao e kona n nanonaki iai te rawawata ae roota te iango ao te nano imwin aia kairiribai “taari ni kewe.” (2 I-Korinto 11:26; I-Karatia 2:4) Ke tao e nanonaki iai te mwebuaka ae riki man aorakin te mata ae rangi ni maan. (I-Karatia 4:15) N aki ongea bwa tera ‘te bwai ni kateketeke n irikona,’ ma e bon kamamaara Bauro. E koroi bwa “I katenua au butiia te Uea i bukin te baei ba e na nako mai rou.” Ma e ngae n anne, e aki reke ane e butiia Bauro. E a kabwarabwaraki nakon Bauro bwa kakabwaia n taamnei ake a a tia n reke irouna mairoun te Atua, n aron te kona n nanomwaaka i aan kataana, a bon tau moa ibukina. Irarikin anne, e kangai te Atua: “E kakoroaki raoi mwakau n te mamara.”—2 I-Korinto 12:8, 9.
Tera reireiara man aia katoto Erietera ao Bauro? Te koaua bwa Iehova ae te Atua e ongora aia tataro aomata aika a nanorinano ni kataia ni beku irouna. Ma e aki nanonaki iai bwa e bon angania bwaai aika a butiia n taai nako, ibukina bwa e rababa nako ana taratara te Atua. E matairikiriki n atai bwaai aika ti na kabwaia riki iai. Ao ae kakawaki riki, e aki toki ni karaoa ae boraoi ma ana kaantaninga ae kaotiotaki ae e koreaki n te Baibara.
Te Tai Ibukin te Kamaiu n Taamnei
E berita te Atua bwa ngkana Natina e waakina ana Tautaeka ae Maanna Tenga te Ririki i aon te aonnaba, e na kamaiuia aomata man aorakia ni kabane aika a reitaki ma te rabwata, te iango, ao te nano. (Te Kaotioti 20:1-3; 21:3-5) Kristian ni koaua a ingainga n tataningai bwaai aika beritanaki aikai ibukin taai aika a na roko, n onimakinna raoi bwa iai mwaakan te Atua ni kakoroa bukiia. E ngae ngkai a aki kaantaninga kamaiuan aorakia n te kakai n te tai aei, ma a tataro nakon te Atua ni butiia kabebetean nanoia, ao kakorakorakiia irouna bwa a aonga n tokanikai i aon kataakiia. (Taian Areru 55:22) Ngkana a ituaki n te aoraki, a kona n tataro nakon te Atua ni bubutii kairaia bwa a aonga ni karekea bwainaorakiaia ae te kabanea n raoiroi ae boraoi ma aia kona ni kabooi.
Aaro tabeua a kaungai nanoia aomata aika aoraki bwa a na tataro ni bubutii kamaiuaia ngkai naba, ao a boutokoa aia iango anne ngke e kotei ana kakai Iesu ma ana abotoro ngke e kamaiui aoraki n te kakai. Ma a karaoaki kakai akekei i aan te kaantaninga ae kaokoro. A kakoaua bwa Iesu Kristo bon te Mesia ni koaua, ao a kaotia bwa ana akoi te Atua e manga aki mena i aon te botannaomata ae Iuta, ma e mena iroun te ekaretia ni Kristian ae e a tibwa tei. Ngkekei, a kainnanoaki bwaai n tituaraoi aika kakai, ibukin kakorakoran aia onimaki kaain te ekaretia ni Kristian ae e a tibwa kateaki. Ngke e nene riki te ekaretia, ao e a ikawai raoi, “a na kamaunaki” naba bwaai n tituaraoi aika kakai.—1 I-Korinto 13:8, 11.
N te tai ae kakawaki aei, Iehova ae te Atua e kairia taan taromauriia n te mwakuri ae kakawaki riki, ae kamaiuaia aomata n te aro n taamnei. Imwain banen te tai, a riai ni butimwaea te kakao aei aomata: “Kam na ukoukora Iehova ngkae E na reke, kam na weteia ngkae E a kaan: ke e kitana arona nikawai te aomata ae buakaka, ao nanona te aomata ae iowawa: ao ke e okira Iehova, ao ane E na nanoangaia iai; ao ke e okira Atuara, ba E na kaababaka kabaran ana bure.”—Itaia 55:6, 7.
Te kamaiuaki n te aro n taamnei aei ae kamaiuaia taani bure aika raraoma ni koaua, e a tabe ni waakinaki ngkai rinanon tataekinan euangkerion ana Tautaeka n Uea te Atua. (Mataio 24:14) Ngke e mwiokoia ana toro ni waakinan te mwakuri ae kakamaiu aei, Iehova ae te Atua e a tabe ni buokia aomata aika mirion ma mirion mwaitiia mai buakoia botannaomata nako, bwa a na raraoma man aia bure, ma ni manga raoiakinaki ma ngaia imwain tokin te waaki ae buakaka ae ngkai. A boni kaekaki aomata ni kabane aika a tataro ma nanoia ni koaua ni butiia kamaiuaia n te aro n taamnei aei, n ikotaki naba ma aomata ni kabane aika a tataro ni bubutii buokaia ibukin waakinan te mwakuri ni kakamaiu aei.
[Te Kabwarabwaraan te Taamnei 3]
Erietera ao Nei Rebeka/The Doré Bible Illustrations/Dover Publications