E Na Kanga N Taua Taekan Nanora Te Raoi Are Mairouni Kristo?

“Ao e na tauu taekan nanomi te raoi are mairouni Kristo, are kam weteaki naba nako iai n ti te rabatana.”​—I-KOROTE 3:15.

1, 2. N te aro raa ae “te raoi are mairouni Kristo” e na taua taekan nanon te Kristian?

TE KIBU n taeka ae tauan aron te aomata e riribaki irouia aomata aika mwaiti, bwa e kaururinga taekan tauan aroia aomata ma te matoa ke te babakanikawai. Aomata tabeman, a kona n taku bwa a aki riai ana taeka ni kaungaunga Bauro nakoia raona ni Kristian i Korote ngke e kangai: “E na tauu taekan nanomi te raoi are mairouni Kristo.” (I-Korote 3:15) Tiaki te koaua bwa ti inaaomata? Bukin tera bwa ti na kariaia te bwai teuana ke te aomata temanna bwa e na taua taekan nanora?

² Bauro e aki tuangia kaaini Korote bwa a na kakeaa inaaomataia. Te taeka n Erene ae rairaki bwa “tauu taekan” n I-Korote 3:15 e reitaki ma te tia biira ae e anga te kaniwanga n aia takaakaro kaain rimoa. Iai irouia taan takaakaro, inaaomataia n takaakaro n aroia ae boraoi ma tuan aia takaakaro. Ma n etina, bon taben te tia biira ni baireia bwa antai ae e ira nanon te tua ao antai ae e moanna n te takaakaro. N aron anne, ti inaaomata naba ni karaoi babaire aika mwaiti ibukini maiura, ma ngkana ti karaoi babaire aikai, te raoi are mairouni Kristo e riai n riki bwa kaanga, “te tia biira”​—ke n aron are e kaotaki iroun te tia rairai ae Edgar J. Goodspeed, “te bwai ae kairira” ae memena i nanora.

3. Tera “te raoi are mairouni Kristo”?

³ Tera te “raoi are mairouni Kristo”? Bon te mweeraoi ao te raunnano ae ti karekea ngkana ti riki bwa taan rimwin Iesu ao ti ataia bwa ti tangiraki ma n akoaki iroun Iehova ae te Atua ao Natina. Ngke e nang kitania taan rimwina Iesu, e taku nakoia: “I anganingkami au rau. . . . A na tai rawawata nanomi, ao a na tai maku.” (Ioane 14:27) I nanon ririki aika a a kaani koro 2,000 mwaitiia ngkai, te rau anne e namakinaki irouia te koraki ake rabwatan Kristo aika kabiraki aika kakaonimaki, ao a buokanibwai naba iai “tiibu tabemang” ni boong aikai. (Ioane 10:16) Te rau aei e riai n taua taekan nanora. Ngkana ti a rangi ni kataaki, e na boni buokira bwa ti na aki taonaki n te maaku ke n rangi ni karawawataki. Ngkanne, ti na noria bwa e na kanga naba n ibuobuoki, ngkana ti a kaaitaraki ma te ribuaka, ti a taonaki n te tabeaianga, ao ngkana ti a namakinna bwa ti aki tau.

Ngkana Ti a Kaaitaraki n te Ribuaka

4. (a) E a kanga Iesu n nora te ribuaka? (b) Tera aroaroia Kristian ake a a tia ni karaoia, ngke a kaaitaraki ma te ribuaka?

⁴ E kangai te Uea ae Toromon: “E taua aron te aomata temanna te aomata temanna ni karekea oini kaina iai.” (Te Minita 8:9) E ataia Iesu bwa a koaua taeka aikai. Ngke e mena i karawa, e nori mwakuri n ribuaka aika rangi n riao ake a karaoia aomata nakoia raoia n aomata. Ngke e mena i aon te aba, e karaoaki nakoina te ribuaka ae te kabanea ni buakaka, ngke e bukinaki bwa e taetae ni bakanatua ao e kamateaki n ai aron te tia kamwarua, e ngae ngke bon akea ana bure. (Mataio 26:63-​66; Mareko 15:27) E taabangaki naba ngkai te ribuaka, ao Kristian ni koaua a rinanon te ribuaka ae bati ngkai a bon ‘riribaki irouia botannaomata nako.’ (Mataio 24:9) Ma e ngae n anne, a rinanon bwaai aika kakamaaku n aia kaembwa ni mate taian Nazi ao ni kaembwa ake a kairoroaki aomata bwa a na mwamwakuri iai, ake i Rutia, ao a kuribwaiaki irouia koraki n aomata aika mwaiti, ao a bukinaki ni bukibuki ni kewe ao rongorongo aika kewe, ma te raoi mairouni Kristo e a tia ni kawakinia bwa a na teimatoa n nene. A katotonga aron Iesu are ti wareka taekana ae kangai: “Ngke E taetaebuakaki, ao E aki manga taetaebuaka; ngke E kamarakaki, ao E aki taku ba E na kareke kaiia; ma E anga nakon Teuare motiki raoi taeka.”​—1 Betero 2:23.

5. Ngkana ti ongora bwa aongkoa iai te ribuaka ae e karaoaki n te ekaretia, tera moa ae ti riai n iangoia?

⁵ Ma n te itera are teuana, tao ti kona n taku bwa iai temanna ae e karaoaki ae ribuaka nakoina i nanon te ekaretia ni Kristian. Ngkana e riki anne, ti kona n namakina naba are e namakinna Bauro, ngke e kangai: “Antai ae kabwakaki, ao I aki un naba iai?” (2 I-Korinto 11:29) Tera ae ti kona ni karaoia? Ti riai n titirakinira bwa, ‘Te koaua bwa e karaoaki ae ribuaka iai?’ A mwaiti taai aika e aki tabwanin raoi te rongorongo iroura. Tao e kona n roko nanora ngkana ti ongora iroun te aomata ae e taku bwa aongkoa e ataa raoi taekan te bwai ae riki. E raoiroi ngkanne ngke e taku te Baibara: “E kakoauai taeka ni kabane te aomata ae aki wanawana.” (Taeka N Rabakau 14:15) Ngkanne, ti riai ni karaurau iai.

6. Tera ae ti kona ni karaoia ngkana iai mwakuri aika a taraa n ribuaka aika a riki i nanon te ekaretia?

⁶ Ma iangoia bwa tao e a karaoaki nakoira ae ti taku bwa e ribuaka. Tera ae e na karaoia, te aomata ae iai te raoi are mairouni Kristo i nanona? Tao ti na taku bwa ti riai ni maroro ma te aomata are e karaoa ae ribuaka nakoira. Imwin anne, ti na aki manga maroro ma te aomata temanna n taekan anne, ma ti na maroro ma Iehova n te tataro ma n onimakinna bwa e na tabeakina karekean te eti iai. (Taian Areru 9:10; Taeka N Rabakau 3:5) Ngkana ti a tia ni karaoa anne, ao tao ti na kukurei ni karaua nanora n are e riki, ma ni “kainababu.” (Taian Areru 4:4) N angiin te tai, e na nakoraoi ana reirei Bauro ae kangai: “Kam na uaia n taotaon nanomi ngkana tao iai te bobuaka i marenami; kam na uaia ni kakabarai ami bure: kam na katotonga te Uea ae e a tia ni kabarai naba ami bure.”​—I-Korote 3:13, BK.

7. Tera ae ti riai n ururingnga ngkana ti mwamwakuri ma tarira?

⁷ Ma ti riai n uringnga bwa e ngae ngke akea mwaakara n totokoa te bwai ae e a tia n riki, ma iai mwaakara ni baireia bwa tera aroarora ae ti na karaoia iai. Ngkana ti karaoa ae aki riai ngkana e karaoaki te ribuaka nakoira, ao tao e kona ni korakora riki te urubwai nakon raun nanora n arora anne, nakon are e riki man te mwakuri n ribuaka are e moani karaoaki. (Taeka N Rabakau 18:14) Ti kona naba ni kanaeng n te aro ae ti katoka ara iraorao ma te ekaretia ni karokoa ae ti taku bwa e a reke te eti iai. E koreia te tia areru bwa “akea kabwakaia teuana,” te koraki ake a tangira ana tua Iehova. (Taian Areru 119:165) Ni koauana, ti na bae n rinanon te ribuaka n te tai teuana ma teuana. Tai kariaia te mwakuri ae aki raoiroi aei bwa e na tukiko n am beku iroun Iehova. Ma kariaia te raoi are mairouni Kristo bwa e na taua taekan nanom.

Ngkana Ti Taonaki n te Tabeaianga

8. Baikara bwaai tabeua aika a karika te tabeaianga, ao tera te bwai ae kona n riki man te tabeaianga?

⁸ Te tabeaianga boni kanoan te maiu i nanoni “boong aika kaitira” aikai. (2 Timoteo 3:1) E koaua bwa e kangai ana taeka Iesu: “Tai iangoi maiumi n raraomaeakini kanami; ao tai iangoi rabatami, n raraomaeakini karabami.” (Ruka 12:22) Ma tiaki tii bwaikorakin te maiu aei ae e kona ni karika te tabeaianga. E ‘karawawataki naba nanon’ Rota n te buakaka ae waakinaki i Totom. (2 Betero 2:7) E taonaki Bauro ‘n te tabeaianga ibukia taian ekaretia.’ (2 I-Korinto 11:28) E rangi ni korakora te maraki ae rinanona Iesu n te tairiki are imwain matena, n te aro ae “maonona ai aron timtim n raraa aika bubura, aika bwaka i aontano.” (Ruka 22:44) E teretere bwa tiaki nanona n taai nako bwa e mamaara ana onimaki te aomata ngkana iai te bwai are e tabeaianga iai. E aki ongeaki bwa tera ae aana te tabeaianga, ma ngkana e a maan taina, ao e a kona ngkanne n iraea te rau mairoura. Tabeman aomata a taonaki n te tabeaianga, ao ibukin anne a taku bwa a aikoa kona n teimatoa ni kakaraoa tabeia aika a reitaki ma te beku iroun Iehova. E kangai te Baibara: “E bara nanon te aomata n te tabeaianga.” (Taeka N Rabakau 12:25, BK) Tera ae ti kona ni karaoia, ngkana ti a taonaki n te tabeaianga?

9. Baikara mwakuri tabeua aika manena aika a kona ni kabebetea riki te tabeaianga, ma baikara bwaai aika karika te tabeaianga ake a aki kona n totokoaki ngkai?

⁹ N taai tabetai tao iai bwaai tabeua aika ti kona ni karaoi. Ngkana ti tabeaianga ibukin te aoraki, ti na wanawana ngkana ti tabeakina aorakira anne. Ma karaoan babaire i aon aorakin te aomata boni bwaai aika a riai ni baireaki i bon irouna.a (Mataio 9:12) Ngkana ti karawawataki n taian tabetabe aika bati, tao ti kona ni mwiokoia aomata tabeman n tabera tabeua. (Te Otinako 18:13-23) Ma tera aroia aomata tabeman​—n aroia kaaro​—aika a aki kona n anga nako tabeia nakoia aomata tabeman? Tera aron te Kristian ae e tekateka ma raona ae kairiribai nakon ana onimaki? Tera aroia utu ake a taonaki n te kangaanga ae korakora ibukin aki-taun te mwane, ke a maeka n te tabo are e bo te buaka iai? E teretere bwa ti aki kona ni kamaunai bwaai ni kabane aika a karika te tabeaianga n te maiu aei. Ma ti kona ni kawakina te raoi are mairouni Kristo i nanora. N te aro ra?

10. Baikara aaro aika uoua ake e kona te Kristian ni kakaaea iai kauarerekean te tabeaianga irouna?

¹⁰ Te anga teuana, boni kakaean te kabebeteaki man ana Taeka te Atua. E korea ae kangai te Uea ae Tawita: “Ngkana a bati au iango n raraoma i nanou, ao a kabebetea tamneiu am nanoanga.” (Taian Areru 94:19) Ana “nanoanga” Iehova e kona ni kuneaki n te Baibara. Te katoa tai ni wareka te Boki ae kairaki koreana aei e na buokira ni kawakina te raoi are mairouni Kristo i nanora. E kangai te Baibara: “Angani Iawe rawawatam, ao e na buokiko, e aki kariaia te aomata ae e raoiroi ba e na konaaki.” (Taian Areru 55:22, BK) N aron naba anne, e korea ae kangai Bauro: “Tai tabeaianga n te bai teuana, ma kam na kaoti kainnanomi nakon te Atua n tai nako, n te tataro ma te bubuti, n raonaki n te katituaraoi. Ao e na kawakin nanomi ma ami iango, ana raoi te Atua ae e riaon ana atatai te aomata, i nanoni Iesu Kristo.” (I-Biribi 4:6, 7, BK) Te kakaonimaki n tataro ma te nano ni koaua e na buokira ni kawakina te raoi i nanora.

11. (a) Tera aron Iesu ni karaoa te katoto ae raoiroi ni kaineti ma te tataro? (b) Tera ae ti riai n iangoia ibukin te tataro?

¹¹ Moan te raoiroi ana katoto Iesu n te aro aei. N taai tabetai, e tataro nakon Tamana are i karawa i nanon tabeua te aoa. (Mataio 14:23; Ruka 6:12) E boni buokia te tataro n nanomwaaka ni kataakina aika rangi ni korakora. N te tairiki are imwain matena, e korakora rawawatan nanona. Tera ae e karaoia iai? E “kakorakora” riki n tataro. (Ruka 22:44) Eng, Natin te Atua ae kororaoi bon te aomata ae e bwabwaina te tataro. Ai riai ra ngkanne ngkana taan rimwina aika aki kororaoi a a karekea te tataro bwa anuani maiuiia! Iesu e reireinia taan rimwina bwa a “na tataro n aki toki, ma n aki botu.” (Ruka 18:1) Te tataro bon te bwai ni koaua ae kakawaki ae ti kona ni maroro iai ma Teuare mwaatai riki n ataa aroarora. (Taian Areru 103:14) Ngkana ti na kawakina te raoi are mairouni Kristo i nanora, ti na “tataro n aki toki.”​—1 I-Tetaronike 5:17.

Te Tokanikai i aon Tian Ara Konabwai

12. Bukin tera ngkai tabeman a kona n taku bwa e aki tau aia beku?

¹² Iehova e iangoia ana toro n tatabemania nako bwa aomata aika kakawaki. (Akai 2:7) Ma e kona ni kangaanga kakoauan aei irouia aomata tabeman. Tao a bwara nanoia tabeman ibukin rikirakeia ni kara, rikiraken tabeia irouia kaain aia utu, ao kerikakin marurungiia. Tabeman riki a taku bwa a aki-konabwai ibukin aki raoiroin aroni kaikawaaia. Tabeman a aki rau nanoia ibukin taiani kairua ake a karaoi n taai aika nako, ao a nanououa n aron reken kabwaran aia bure aikai iroun Iehova. (Taian Areru 51:3) Tera ae e kona ni buokia aomata aika a namakini bwaai aikai?

13. Tera te kabebeteaki man te Baibara ae e kona ni buokia aomata aika a taku bwa a aki tau?

¹³ Te raoi are mairouni Kristo e na kakoauaa tangirara iroun Iehova. Ti kona ni kawakina te raoi anne i nanora ngkana ti iaiangoa are akea ana taeka Iesu ae e kaotia bwa arora e boto i aon mwaitin ara mwakuri ake ti karaoi, ni kabotauaki ma mwaitin aia mwakuri aomata tabemwaang. (Mataio 25:14, 15; Mareko 12:41-44) Ma e boni kaatuua taekan te kakaonimaki ae boto i aon te tangira. E tuangia taan rimwina ni kangai: “Ma ane nanomwaka ni karokoa te toki ao e na kamaiuaki” (Mataio 24:13) E “riribaki” Iesu irouia aomata, ma e aki nanououa n aron tangirana iroun Tamana. (Itaia 53:3; Ioane 10:17) Ao e tuangia taan rimwina bwa a bon rangi n tangiraki naba. (Ioane 14:21) E kangai Iesu ni kamataata aei: “A kaboaki uoman mannikiba aika a uarereke aika tibaro n teuana te tianti, ma e aki baka temanna te tibaro i aontano n aki ataki iroun Tamami. Ao ngkami, a bane ni warekaki naba iranatumi. Ma ngaia ae tai maku: Kam kakawaki riki nakoia tibaro aika a bati.” (Mataio 10:29-31, BK) Ai raoiroi ra taeka aikai aika a kakoauaa tangirara iroun Iehova!

14. Tera ae e kakoauaa nakoira bwa Iehova e iangoira n tatabemanira nako bwa aomata aika kakawaki?

¹⁴ E kangai naba Iesu: “Akea ae e kona n nakoiu ngkana e aki katikia te Tama are e kanakoai.” (Ioane 6:44, BK) Kioina ngkai Iehova e kairira bwa ti na rimwin Iesu, e oti iai bwa E tangirira bwa ti na kamaiuaki. E kangai Iesu nakoia taan rimwina: “Ao ai aron naba Tamami are i karawa, ngkae E aki tangira maten temanna i buakoia aika uarereke aikai.” (Mataio 18:14) Mangaia are ngkana ko beku ma nanom ni koaua, ko kona ni kakatonga ni kimwareirei n am mwakuri aika raraoi. (I-Karatia 6:4) Ngkana ko kammarakaki ni kairua ake ko karaoi n taai aika nako, kakoauaa bwa Iehova e na “kaababaka” kabwaran aia bure aomata aika raraoma ni koaua. (Itaia 43:25; 55:7) Ngkana e bwara nanom n te bwai teuana, ao uringnga bwa “E a kaan Iehova ma akana a uruaki nanoia, ao E kamaiuia akana a raraoma tamneiia.”​—Taian Areru 34:18.

15. (a) Tera aron Tatan ni kataia n iraea te rau mairoura? (b) Tera ae ti kona n onimakinna raoi ibukin Iehova?

¹⁵ E na rangi ni kukurei Tatan ngkana e kona n iraea te rau mairoum. Boni ngaia te tia karika te bure ae reke iroura ae ti bane ni kekeiaki iai ngkai. (I-Rom 7:21-24) E na rangi ni kukurei ngkana ko a namakinna bwa aki-kororaoim e a karikiko bwa ko na aki tau ni beku iroun te Atua. Tai kariaia Tatan bwa e na kabwara nanom! Ko na ataa ana kunemwaan, ao kariaia am atatai anne bwa e na kamatoa nanom bwa ko na nanomwaaka. (2 I-Korinto 2:11; I-Ebeto 6:11-13) Uringnga bwa “E matairiki riki te Atua nakon nanora, ao E atai bwaai ni kabane.” (1 Ioane 3:20) E bati riki are e noria Iehova nakon tii mamaaran nanora. E nori naba nanora ao ara kaantaninga. Kabebeteko ngkanne n ana taeka te tia areru aikai: “E na aki tewea nako ana botanaomata Iehova, ao E na aki kitania naba ana aomata.”​—Taian Areru 94:14.

Katiteuanaki n te Raoi are Mairouni Kristo

16. N te aro raa ae tiaki tii ngaira iai ni kekeiaki n nanomwaaka?

¹⁶ E koreia Bauro bwa ti riai ni kariaia tauan taekan nanora n te raoi are mairouni Kristo, ibukina bwa ti “weteaki naba nako iai n ti te rabatana.” Kristian aika kabiraki ake e kororeta nakoia Bauro a weteaki bwa a na riki bwa te koraki ake rabwatan Kristo, n ai aroia naba nikiraia taani kabiraki aika maiu ni boong aikai. Raoraoia aika “tiibu tabemang,” a katiteuanaki ma ngaiia n “ti te nanaina” ao “ti temanna te tia kawakintiibu,” ae taekan Iesu Kristo. (Ioane 10:16) Ni katobibia te aonnaba ngkai, iai te “nanai” ae mirion ma mirion mwaitini kaaina, ake a a tabe n uaia ni kariaia tauan taekan nanoia n te raoi are mairouni Kristo. Ataakin ae tiaki tii ngaira, e a buokira bwa ti na nanomwaaka. E korea ae kangai Betero: “Kam na rarawa [nakon Tatan], n teimatoa n te onimaki, ngkai kam ataia ba a kumeaki ni kakoroaki maraki aika ti te bo ma marakimi i nanoia tarimi aika mena i aon te aba.”​—1 Betero 5:9.

17. Tera ae e kaungaa nanora nakon kariaian te raoi are mairouni Kristo bwa e na taua taekan nanora?

¹⁷ A bia bane aomata n teimatoa ni karikirakea te rau, ae uaan te taamnei ae raoiroi ae moan te kakawaki are mairoun te Atua. (I-Karatia 5:22, 23) Te koraki ake a noraki iroun Iehova bwa a itiaki ao akea barekaia ao a raoi, a na kakabwaiaki n anganaki te maiu are aki toki n te aonnaba ae te baretaiti ike e mena iai te raoiroi. (2 Betero 3:13, 14) A mwaiti bukina ngkanne ae ti na kariaia iai te raoi are mairouni Kristo bwa e na taua taekan nanora.

[Kabwarabwara ae nano]

Ko Uringnga?

• Tera te raoi are mairouni Kristo?

• E na kanga te raoi are mairouni Kristo n taua taekan nanora ngkana ti kaitaraki ma te ribuaka?

• E na kanga te raoi are mairouni Kristo ni buokira ngkana ti taonaki n te tabeaianga?

• E na kanga ni kabebetei nanora te raoi are mairouni Kristo ngkana ti namakinna bwa ti a aki tau?

[Taamnei n iteraniba 15]

Ngke e tei Iesu i mataia taani bukinna, e a anga ngkanne mwiokoni maiuna nakon Iehova

[Taamnei n iteraniba 16]

N aron te irabati mairoun te tama ae tatangira, te kabebeteaki mairoun Iehova e karaui nanora ni bwaai aika ti tabeaianga iai

[Taamnei n iteraniba 18]

E kakawaki te aomata ae nanomwaaka iroun te Atua