Te Oota Mairoun Te Atua E Kaotaa Te Rotongitong!

“Ane E na kaoota au ro Iehova.”​—2 TAMUERA 22:29.

1. Tera irekereken te oota ma te maiu?

“E TAKU te Atua, e na oota: ao e a oota naba.” (Karikani Bwaai 1:3) N taeka aika nano aikai, rongorongon te karikibwai are ni Karikani Bwaai, a kaotia ae Iehova bon nibwan te oota. Ngkana akea te oota, ao akea te bwai teuana ae kona ni maiu i aon te aba. Iehova bon nibwan naba te oota n taamnei, are moan te kainnanoaki ibukin kairirara i nanoni maiura. (Taian Areru 43:3) Te Uea are Tawita e kaota raoi irekereken te oota n taamnei ma te maiu, ngke e korea ae kangai: “Ane i Roum kakoburakean te maiu: Ti na nora te oota i nanon am oota.”​—Taian Areru 36:9.

2. N aron ae e kaotia Bauro, e irekereke te oota ma tera?

² Tenga tabun te ririki imwin ana tai Tawita, te abotoro Bauro e maroroakina rongorongon te karikibwai. E korea ae kangai nakon te ekaretia ni Kristian i Korinto: “Bon te Atua, are kangai, E na oota te oota mai buakon te ro.” Imwina, e a manga kaota irekereken te oota n taamnei Bauro ma te atatai mairoun Iehova, ngke e reitia ni kangai: “Are oota i nanora, ba E na kaota ootan atakini mimitongin te Atua i matan Iesu Kristo.” (2 I-Korinto 4:6) E kanga n roko iroura te oota anne?

Te Baibara E Karokoa te Oota

3. Te oota raa ae e anganira Iehova rinanon te Baibara?

³ Ana anga Iehova ae kakawaki riki ae e karokoa te oota n taamnei iai, bon rinanon ana Taeka ae kairaki koreana ae te Baibara. Mangaia are ngkana ti ukeuke n reirei n te Baibara ma ni karina te atatai mairoun te Atua, ai aron ae ti kariaia ana oota bwa e na oota i aora. Rinanon te Baibara, Iehova e kaotaa ana kaantaninga, ma n tuangira arora ni kona ni kakaraoa nanona. E oti iai manenani maiura, ao e buokira ni karekei bwaai n taamnei aika ti kainnanoi. (Te Minita 12:1; Mataio 5:3) Iesu e katereterea ae ti riai n tabeakina kainnanora ni bwaai n taamnei ngke e mwanewei taeka aikai man te Tua mairoun Mote: “E koreaki ae kangai, E aki maiu te aomata n ti te berena, ma e maiu n taeka nako aika a oti nako mai win te Atua.”​—Mataio 4:4; Te Tua-Kaua 8:3.

4. N te aro raa ae Iesu bon “ootan te aba”?

⁴ E rangi n irekereke Iesu ma te oota n taamnei. E taekinna bwa “ootan te aba” ngaia, ao e taku: “Ane irai ao e na bon aki nakonako n te ro, ma e na karekea te oota ni kamaiu.” (Ioane 8:12) Taeka aikai a buokira ni kaotaira n aron kakannaton Iesu ni kaineti ma karokoan ana koaua Iehova nakoia aomata. Ti riai ni kakauongo nakon baike e taekin Iesu ao n tou mwin ana katoto ao ana reirei ake a taekinaki n te Baibara, ngkana ti na kararoaa te rotongitong, ao n nakonako n ana oota te Atua.

5. Tera mwiokoaia taan rimwin Iesu imwin matena?

⁵ Tabeua te bong imwain maten Iesu, ao e a manga taekinna naba bwa ngaia te oota, ngke e tuangia taan rimwina ni kangai: “Ai ti tabebong riki aika e na mena iai te oota i roumi. Kam na nakonako ngkai iai te oota i roumi, ba e kawa n oingkami te ro: ao ane nakonako n te ro ao e aki ata ike e nako iai. Ngkai iai te oota i roumi, ao kam na ira nanon te oota, ba kam aonga n riki ba natin te oota.” (Ioane 12:35, 36) Te koraki ake a riki ba natin te oota a reiakin “aron taeka akana kamaiu” man te Baibara. (2 Timoteo 1:13, 14) A kabonganai taeka aika kamaiu aikai ni kairiia aomata aika raoiroi nanoia man te rotongitong nakon ana oota te Atua.

6. Tera te koaua ibukin te oota ao te rotongitong ae ti karekea man te 1 Ioane 1:5?

⁶ E korea ae kangai te abotoro Ioane: “Bon te oota te Atua, ao bon akea te ro teutana i nanona.” (1 Ioane 1:5) Nora te kaokoro i marenan te oota ma te rotongitong. Te oota n taamnei e roko mairoun Iehova, ao bon akea reitakin te rotongitong n taamnei ma ngaia. Antai ngkanne nibwan te rotongitong?

Nibwan te Rotongitong n Taamnei

7. Antai ae aana te rotongitong n taamnei ae rabuna te aonnaba, ao e kona te aomata anne ni kaira aia iango aomata?

⁷ Te abotoro Bauro e taekina “atuan aonteaba aei.” E nanona iai Tatan te Riaboro. E taekinna naba bwa “a karooaki nanoia [aomata] iroun Tatan . . . ao a aki nora otan te Euangkerio, ae taekani mimitongin Kristo, ngaia ae katotongan te Atua.” (2 I-Korinto 4:4, BK) A mwaiti aomata aika a taku bwa a onimakina te Atua; ma a mwaiti i buakoia aika a aki kakoauaa te Riaboro. Bukin tera? A rawa ni kariaia ae bon iai te aomata ae mwaaka riki nakoia aomata, ae e kona ni kaira aia iango. Ma n aron ae e kaotia Bauro, bon iai te Riaboro, ao e kaira aia iango aomata bwa a aonga n aki nora ootan te koaua. Mwaakan Tatan ni kaira aia iango aomata e kakoauaki n te taetae ni burabeti are e taekinaki iai bwa e “mamanaiia kaain aonaba ni kabane.” (Te Kaotioti 12:9) Man mwin ana mwakuri Tatan, ao e a koro iai bukin aroaroia aomata aika aki beku iroun Iehova are taetae ni burabetinaki iroun Itaia, ae kangai: “Noria, ane e na rabuna aonaba te ro, ao e na rabuniia kaain aonaba te rotongitong.”​—Itaia 60:2.

8. Tera aroia aomata aika a mena n te rotongitong ni kaotia bwa e bua kawaia?

⁸ E boni kangaanga norakin te bwai teuana n te rotongitong. E kai bua kawain te aomata iai. N aron anne, te koraki ake a mena n te rotongitong n taamnei a aki ota ni bwaai n taamnei ao a kai bua iai. A aki kona n nora te kaokoro i marenan te koaua ao te kewe, ao te raoiroi ma te buakaka. E taetae Itaia ibukia te koraki ake a mena n te rotongitong n taamnei ngke e korea ae kangai: “A na reke kaiia akana atonga te buakaka ba te raoiroi, ao te raoiroi ba te buakaka; akana arana te ro ba te oota, ao te oota ba te ro; akana atonga ae maai ba e kangkang, ao ae kangkang ba e maai!” (Itaia 5:20) Te koraki ake a mena n te rotongitong n taamnei, a tabe ni kairaki iroun atuan te ro aei, are Tatan te Riaboro, ao n tokina, a karaureaki nako man nibwan te oota ao te maiu.​—I-Ebeto 4:17-​19.

Kangaangan te Otinako man te Rotongitong Nakon te Oota

9. Kabwarabwaraa aron irekerekeia taani kakaraoa ae buakaka ma te rotongitong n te aro n rabwata ao n taamnei.

⁹ Te aomata are kakaonimaki are Iobi e kaota irekerekeia taani kakaraoa ae buakaka ma te rotongitong ngke e kangai: “Ao e taninga te airo matan te tia kimoa bun te aomata, ao e kangai, Akea te mata ae na norai: ao e karaba moana n te rabuna.” (Iobi 24:15) Taani kakaraoa ae buakaka a mena naba n te rotongitong n taamnei, ao a kona n taonaki nako iai. E taku te abotoro Bauro bwa e a taabangaki te wene ni bure, te ira, te matai ni kanibwaibwai, te koro ni manging, te taetaebuaka, ao te babakanikawai, irouia aomata ake a tauaki aia iango n te rotongitong. Ma a kona ni bitaki aomata aika a karekea te oota man ana Taeka te Atua. E boni kona n reke te bitaki anne n aron ae e katereterea Bauro n ana reta nakoia kaaini Korinto. A mwaiti Kristian ake i Korinto ake a kakaraoi ngkoa ana mwakuri te rotongitong, ma e tuangia Bauro ni kangai: “Ma kam tebokaki, ao kam kaitiakaki, ao kam karaoiroaki n aran te Uea are Iesu, ao iroun naba Tamnein Atuara.”​—1 I-Korinto 6:9-​11.

10, 11. (a) E kanga Iesu ni kaota ana mwamwannano n aron kaokan ana taratara te mwaane arei? (b) Bukin tera bwa aomata aika mwaiti a aki tangira te oota?

¹⁰ Te aomata ae e a tibwa otinako man te rotongitong nakon te oota, e na bae ni kainnanoa ana tai ni kaeta raoi ana taratara nakon te oota. I Betetaita, e bwaina te akoi Iesu ngke e kamaiua te aomata ae mataki teutana imwin teutana. “E taua bain te mataki, ao E kairia nako tinanikun te kawa; ao ngke E bawarei matana, ma ni kaki baina i aona, ao E titirakinna ba tao e noraba, ke e aki. Ao e tara rake, ao e taku, I noriia aomata ba kanga ai aroni kaai, aika nakonako. Ao rimwi E a manga kaki baina i aoni matana, ao e taratara raoi; ao e kamaiuaki, ao e a eti norani bwaai ni bane i rouna.” (Mareko 8:23-​25) Iesu e karaua ni kaoka noraban te mwaane aei teutana imwin teutana bwa e aonga n eti raoi ana taratara te mwaane aei ma ootan taai. Ti kona n iangoa kukurein te mwaane aei ngke e a noraba.

¹¹ Ma, e karako kukurein te mwaane aei nakon kimwareireia aomata ake a buokaki teutana imwin teutana bwa a na kitana te rotongitong n taamnei nakon ootan te koaua. Ngkana ti nora aron kimwareireiia, tao ti kona n iangoia bwa bukin tera bwa a aki katikaki aomata aika mwaiti riki nakon te oota. E kaota bukina Iesu ni kangai: “Aio te bwai ae e kabuakakaki te aba iai, ba e a roko te oota i aon te aba, ao aomata a tangira riki te ro nakon te oota; ba kioina ngkai a bubuaka aia makuri. Ba ane kakaraoa ae buakaka ao e ribaa te oota, ao e aki nako n te oota, ba a kawa ni kaotaki ana makuri ba a bubuaka.” (Ioane 3:19, 20) E koaua bwa a mwaiti aika a tatangira ae “buakaka,” n aron te wene ni bure, te karawawataa te aba, te kewekewe, te babakanikawai, ao te iraa, ao e angaraoi kakaraoan aikai n ana rotongitong n taamnei Tatan.

Te Rikirake i Nanon te Oota

12. Baikara aaro ake ti a tia ni kakabwaiaki iai ngkai ti a roko n te oota?

¹² Baikara bitaki aika ti a tia n nori n aroarora ma imwin ataakin te oota iroura? E raoiroi ngkana ti tanrikaki ao n iangoi rikirakera n taamnei ake ti a tia ni karaoi. Baikara aroaro aika bubuaka aika ti a tia ni kanakoi? Baikara kangaanga i nanoni maiura aika ti a tia ni kaetii? A kanga ni bitaki ara babaire ibukin taai aika na roko? Ni korakoran Iehova ao ana ibuobuoki te taamnei ae raoiroi mairouna, ti kona n teimatoa ni bitii aroarora ao ara iango, ae e na kaotia bwa ti a tabe ni butimwaea te oota. (I-Ebeto 4:23, 24) E taekina aei Bauro: “Kam mena i nanon te ro ngkoa, ao ngkai kam mena i nanon te ota, ba ana aomata te Uea. Ma ngaia ae kam na maiu n ai aroia aomata aika a ota. Ba uan te ota, bon te akoi, te eti ao te koaua ni bai ni kabane.” (I-Ebeto 5:8, 9, BK) Ngkana ti kariaia kairirara n ana oota Iehova, ti na karekea te kaantaninga ae raoiroi, ma ni buokia raora. Ai kimwareirei ra Iehova ngkana ti karaoi bitaki aikai!​—Taeka N Rabakau 27:11.

13. Ti na kanga ni kona ni kaota ara kakaitau ibukin ana oota Iehova, ao tera ae kainnanoaki ibukin karaoan anne?

¹³ Ti kaota ara kakaitau ibukin te maiu ae kakukurei ae e a tia n reke iroura, ngkana ti a manga kaotiota ana oota Iehova, n arora n tibwai reirei man te Baibara ake ti a tia n atai, nakoia kaain ara utu, raoraora, ao kaain rarikira. (Mataio 5:12-​16; 24:14) Ara mwakuri n tataekina te rongorongo ma ara katoto ni Kristian, a riki bwa bwaai ni kabuakaka nakoia aomata ake a rawa n ongora iroura. E kabwarabwaraa Bauro ni kangai: “Ukera te bai ae e kukurei iai te Uea. Tai buoki makuri aika akea uaia, aika bain te ro. E raoiroi riki ngkana kam katereterei buakakani makuri akanne.” (I-Ebeto 5:10, 11, BK) Ti kainnanoa te ninikoria ngkana ti na buokia aomata bwa a na otinako man te rotongitong nakon te oota. Ma ae kakawaki riki, ti riai n nanoangaia ma n tabeakinia aomata, ma ni kan tibwa ootan te koaua nakoia, bwa a aonga ni kakabwaiaki iai n aki toki.​—Mataio 28:19, 20.

Tarataraingkami man te Oota ni Kewe!

14. Tera te kauring ae ti riai n mutiakinna ni kaineti ma te oota?

¹⁴ A rangi ni kukurei n nora te oota te koraki ake a maan ni mena i taari n te bong. N taai ake ngkoa, aai ake a kauraaki i aon taiani bwaa i Engiran, a kaotii taabo ike a kona ni kamanoaki kaibuke iai man buakan taari. A rangi ni kukurei kaimoa ngkana a kairiraki n oota aikai nakon taabo n rooro. Ma aai tabeua boni bwaai ni kewe. A aki roko n taabo n rooro kaibuke aika mwaiti, ma a mwamwanaki kaimoa ao a urubekebeke aia kaibuke i aon te rakai, ike a a iraeaki iai aia kaako. N te aonnaba ae onrake n te kewe aei, ti riai naba tarataraira raoi bwa ti kawa ni kairaki nakon oota ni kewe ake a na kona n urua ara onimaki. Ti tuangaki bwa “e onikia Tatan ba kaanga te anera ae raona te oota.” N te aro naba anne, ana toro n ikotaki ma taani kabwaoua te koaua, bon “taani mwakuri aika mamana te aba” ake ‘a onikiia naba bwa kaanga tabonibain te raoiroi.’ E kona ni mamaara ao ni boni mate naba ara onimaki ma kakoauaan ana Taeka Iehova ae te Baibara iroura, ngkana ti karin iango aika kairua aika mairouia taani mwamwana te aba aikai.​—2 I-Korinto 11:13-​15; 1 Timoteo 1:19.

15. Tera ae e na buokiira ni kateimatoaira n te kawai are nakon te maiu?

¹⁵ E korea ae kangai te tia areru: “Boni bwaeni waeu am taeka, ao ootani kawaiu.” (Taian Areru 119:105) Eng, e kaotaaki te ‘kawai ae irariki are nakon te maiu’ iroun Atuara ae tatangira ae Iehova, are e “tangiriia aomata ni kabaneia ba a na kamaiuaki, ma ni karekea atakin te koaua.” (Mataio 7:14; 1 Timoteo 2:4) Maiuakinan ana reirei te Baibara e na kamanoira man te mwaninganako ni manga toua te kawai ae rotongitong. E korea ae kangai Bauro: “E anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi.” (2 Timoteo 3:16) Ti rikirake n te itera n taamnei man reiakinara n ana Taeka te Atua. Ti kona ni kaetii aroarora n ootan ana Taeka te Atua, ao ni boaaki irouia taan tararuaa te ekaretia aika tatangira, ngkana e kainnanoaki. N te aro naba anne, ti kona ni kaetii bwaai ao ni butimwaea te kairiri ae raoiroi ma te nanorinano bwa ti aonga n teimatoa n nakonako ni kawain te maiu.

Nakonako n te Oota ma te Kakaitau

16. Ti na kanga ni kona ni kaota ara kakaitau ibukin ana oota Iehova ae kamimi?

¹⁶ Ti na kanga ni kona ni kaota ara kakaitau ibukin ana oota Iehova ae kamimi are e bwaintangiraia nakoira? Ioane mwakorona 9 e kaongoira bwa ngke e kamaiua te mwaane ae bungiaki ni mataki Iesu, teuarei e kani kaota ana kakaitau nakoina. N te aro raa? E onimakina Iesu bwa Natin te Atua, ao e kaotiota Iesu bwa “te burabeti.” Irarikin anne, e ninikoria n taetae nakoia te koraki ake a kataia ni kakeaa bonganan ana kakai Iesu. (Ioane 9:17, 30-​34) Te abotoro Betero e taekinia kaain te ekaretia ni Kristian ake a kabiraki bwa “te natanaomata ae bon ana bwai te Atua.” Bukin tera? Ibukina bwa iai naba irouia te nano ni kani kakaitau ae ai aron nanon teuare bungiaki ni mataki are kamaiuaki. A kaota aia kakaitau ibukin Iehova, ae te tia Akoiia, rinanon ‘kaotiotan raoiroin nako Teuare weteiia man te ro nakon te oota ae kamimi.’ (1 Betero 2:9; I-Korote 1:13) A kakaitau naba te koraki ake a kaantaninga te maiu n aki toki i aon te aonnaba, ao a boutokaia tariia aika a kabiraki n tataekina ‘raoiroin’ Iehova nakoia aomata nako. Ai akea ra kabotauan te kakabwaia ae e anga te Atua nakoia aomata aika aki kororaoi aikai!

17, 18. (a) Tera tabera ngaira n tatabemanira nako? (b) Tera ae a kaungaki iai Kristian n tatabemania nako bwa a na katinanikua, n aron are e karaoia naba Timoteo?

¹⁷ Moan te kakawaki bwa ti na kani kakaitau ibukin ootan te koaua. Uringnga bwa akea mai buakora ae e a bon bungiaki naba n ataa te koaua. Tabemwaang e a tibwa reke irouia ngkai a a ikawai, ao a waekoa n noria ae e raoiroi riki te oota nakon te buakaka. Temwangina a kakabwaiaki bwa a kaikawaki irouia aia karo aika a mamaaka te Atua. Tao e kona ni kai reke irouia te mwaan ae a kakeaa bongan te oota aei. Temanna te tia Kakoaua, ae ana karo a toro naba iroun Iehova imwain bungiakina, e taekinna bwa e kainnanoa te tai ao te kakorakora ae bati, bwa e aonga n ataa raoi kakawakin ao nanon te koaua are e kaikawaki i nanona mai nanon uarerekena. Ngkana ataei ngaira ke kaara, ma ti riai ni bane ni karikirakea i nanora tangiran te koaua are e a tia ni kaotia Iehova nakoira.

¹⁸ Te ataeinimwaane ae Timoteo e a kaman reiakinaki “te Baibara” ma ngke e merimeri, ma e ikawai i nanon te onimaki ni Kristian ngke e kakorakoraa n ana mwakuri ni minita. E a kona ngkanne ni buoka te abotoro Bauro, are e kaungaa ngkoa ni kangai: “Ko na kakorakorako ni kani kaotiko nakon te Atua ba ko ataki ba ko raoiroi ngkai ko a tia ni kataki, ae te tia makuri ae ko aki riai ni maamaa, ae ko bairea raoi taekan te koaua.” Ti bia bane ni katotonga Timoteo, ni kararoai bwaai ni kabane ake a na kamamaaira ke a na kaira Iehova bwa e na maamaa iroura!​—2 Timoteo 2:15.

19. (a) Tera ae e taku Tawita, ae ti riai naba n taekinna? (b) Tera ae e na maroroakinaki n te kaongora are imwin aei?

¹⁹ A mwaiti bukina ae ti riai ni kamoamoaa iai Iehova are e anganira ootan ana koaua. Ti katotonga te Uea are Tawita ni kangai: “Au bwae Ngkoe, Iehova: ao ane E na kaoota au ro Iehova.” (2 Tamuera 22:29) Ma ti na bon aki aoriorira, bwa ti kona iai ni manga kerikaki nakon te rotongitong ae ti a tia ni kamaiuaki mai iai. Mangaia are, te kaongora are imwin aei e na buokira n ataia bwa tera aron kakawakin te koaua mairoun te Atua nakoira.

Tera Reireiam?

• E kanga Iehova ni karokoa te oota n taamnei?

• Baikara kangaanga ake a mena n te rotongitong n taamnei ae otabwaninira?

• Baikara kangaanga aika karuanikai aika ti riai ni katinanikui?

• Ti na kanga ni kaotiota ara kakaitau ibukin ootan te koaua?

[Taamnei n iteraniba 8]

Iehova bon nibwan te oota n te itera n rabwata ao n te itera n taamnei

[Taamnei n iteraniba 10]

Iesu e kamarurunga te aomata ae mataki teutana imwin teutana, ao n aron naba anne e buokiira bwa ti na otinako man te rotongitong n taamnei, teutana imwin teutana

[Taamnei n iteraniba 11]

E na uruaki ara onimaki ngkana ti mwamwanaki n ana oota ni kewe Tatan