Bebeku Iroun Iehova Ma Te Nano Ae Teimatoa
“E teimatoa nanou, te Atua, e teimatoa nanou.”—TAIAN ARERU 57:7.
1. Bukin tera bwa e kona ni korakora ara onimaki n aron Tawita?
E KONA ni kakorakoraira Iehova bwa ti aonga ni kona n teimatoa bwa ana toro aika katabuaki, n te onimaki ni Kristian ni koaua. (I-Rom 14:4) Mangaia are ti kona ni katotonga korakoran ana onimaki te tia areru ae Tawita are e a kairaki iai bwa e na anenea ae kangai: “Te Atua, e tei matoa nanou.” (Taian Areru 108:1) Ngkana e teimatoa nanora ti na kairaki bwa ti na kakoroa nanon ara katabu nakon te Atua. Ao ngkana ti onimakinna ibukin te kairiri ao te korakora, ti na riki bwa aomata aika aki bibitaki aika nene n aia onimaki, ao a kakaonimaki ni ‘kakorakoraia n ana mwakuri te uea ni kamwaiti.’—1 I-Korinto 15:58.
2, 3. Tera nanon ana taeka ni kaungaunga Bauro are koreaki n te 1 I-Korinto 16:13?
2 E taku ana taeka ni kaungaunga te abotoro Bauro nakoia taan rimwin Iesu i Korinto ngkoa, ae kaineti naba nakoia Kristian ni boong aikai: “Kam na marurung, kam na teimatoa n te onimaki, kam na mwaane, kam na korakora.” (1 I-Korinto 16:13) N te taetae n Erene tuua aikai ni kabane, a kaumakira bwa ti na teimatoa ni kakaraoa ae taekinaki iai n ira nanoia. Tera nanon taeka ni kaungaunga aikai?
3 Ti kona ni “marurung” n te itera n taamnei ngkana ti kaitaraa te Riaboro ma n nim ma te Atua. (Iakobo 4:7, 8) Onimakinan Iehova e kateimatoaa bonnanora ao e buokira bwa ti na ‘nene n te onimaki ni Kristian.’ Ngaira ni kabane, mwaane ao aine, ‘ti na kammwaaneira’ n arora n ninikoria ni bebeku iroun te Atua n tataekina rongorongon te Tautaeka n Uea. (Taian Areru 68:11) Ti “korakora” ngkana ti teimatoa ni butiia Tamara are i karawa bwa e na kakorakoraira ibukin karaoan nanona.—I-Biribi 4:13.
4. Tera ae kairira nakon ara babetito ni Kristian?
4 Ti kaotia bwa ti butimwaea te koaua ngkana ti katabua maiura ma nanora ni kabane nakon Iehova, ao ti kaota tian karaoan anne ni babetitoakira n te ran. Ma tera ngkoa ae kairira nakon ara babetito? Ti boni karekea moa te atatai ae eti man ana Taeka te Atua. (Ioane 17:3) E karikirakeaki iai ara onimaki ao e kairira nakon te raraoma are ti mwinikora iai ibukin buure ake ti karaoi mai mwaina. (Mwakuri 3:19; Ebera 11:6) Imwina ti rairi nanora, ngke ti a tannako man mwakuri aika buakaka bwa ti aonga ni maiuakina ae boraoi ma nanon te Atua. (I-Rom 12:2; I-Ebeto 4:23, 24) E rimwiaki aei n te tataro ae ti katabui iai maiura nakon Iehova ma nanora ni kabane. (Mataio 16:24; 1 Betero 2:21) Ti butiia te Atua bwa e na kaitiaka mataniwin nanora, ao ti babetitoaki ni kaotia iai bwa ti a tia ni katabuaki nakoina. (1 Betero 3:21) Iaiangoan mwaneka aikai iroura e na buokira n ururinga ae ti riai ni kakorakoraira n taai nako bwa ti aonga ni kakororaoa katabuan maiura ma ni bebeku iroun Iehova ma te nano ae teimatoa.
Kateimatoaa Ukoukoran te Atatai ae Eti
5. Bukin tera bwa ti riai ni karirikirakea ara atatai man te Baibara?
5 Ngkana ti na teimatoa ni kakororaoa ara katabu nakon te Atua, ti riai ni karirikirakea ara atatai n te Baibara, ae e na kakorakoraa naba ara onimaki. Ai kakukurei ra katoongan te amwarake n taamnei ngke ti moan ongongora ngkoa ana koaua te Atua! (Mataio 24:45-47) A rangi ni kangkang ‘amwarake’ akanne, ao a kamarurungira n te itera n taamnei. Moan te kakawaki ngkai bwa ti na kateimatoaa kanuaakira n amwarake n taamnei aika manena, bwa ti aonga ni kawakina te nano ae teimatoa ae riai irouia ana toro Iehova aika katabuaki nakoina.
6. Ko a kanga n tia ni buokaki bwa e na rikirake tangiran te koaua man te Baibara iroum?
6 E kainnanoaki te kakorakora ngkana ti na karababaa riki ara atatai man te Baibara, n ai aron naba ae e kainnanoaki te kakorakora ibukin kakaaean te kaubwai ae taunaki n te tabo teuana. Ma ai kakabwaia ra ngkoe ngkana e “reke i roum atakin te Atua”! (Taeka N Rabakau 2:1-6) Tao te tia uarongorongoa te Tautaeka n Uea ae moan reirei n te Baibara ma ngkoe e kabongana te boki ae te Knowledge That Leads to Everlasting Life. E kabonganaki te tai ae maan teutana ibukin maroroakinan mwakoro nako n te boki aei, ma tao mwakoro tabeua mai iai a aki kona ni bane i nanon te tai n reirei ae tii teuana. Ko karekei kakabwaiam ngke a warekaki kiibu ake a kaotaki, ao a maroroakinaki. A kabwarabwaraki nanon reirei ngke e ataaki bwa e kangaanga te ota iai. E karaoa raoi ana katauraoi te aomata are e kaira am reirei n te Baibara, e tataro imwain ami reirei ni bubutii reken taamnein te Atua, ao e buokiko ni karikirakea iroum tangiran te koaua.
7. E na kanga n tau te aomata ibukin reiakinan ana koaua te Atua nakoia aomata tabemwaang?
7 E bon riai te kakorakora aei, bwa e korea ae kangai Bauro: “Ane reireiaki ana taeka te Atua e na buokanibwai n ana bwai aika raraoi ma te tia reirei.” (I-Karatia 6:6) Te kibu aei n te taetae n Erene, e katereterea bwa a karinaki raoi reirei man ana Taeka te Atua n ana iango ao nanon te aomata ‘are e reireinaki.’ Arom n reiakinaki ko a tau iai ni manga riki bwa te tia reireinia aomata tabemwaang. (Mwakuri 18:25) Ngkana ko na kakaonimaki nakon am katabu, ko riai ni kateimatoaa marurungim n te itera n taamnei rinanon te aki toki n reirei n ana Taeka te Atua.—1 Timoteo 4:13; Tito 1:13; 2:2.
Ururinga Arom n Raraoma ao n Rairannano
8. E na kanga ni kateimatoaki maiuakinan ae boraoi ma nanon te Atua?
8 Ko uringa aroni kabebeteam ngke ko moan reiakina taekan te koaua ma n raraoma, ao imwina, ko a namakinna bwa e a bwara am bure iroun te Atua ibukina bwa ko onimakina ana karea ni kaboomwi Iesu? (Taian Areru 32:1-5; I-Rom 5:8; 1 Betero 3:18) Ko na boni bae n aki kani manga maiuakina ae kairua. (2 Betero 2:20-22) Te kakaonimaki n tataro nakon Iehova e na buokiko naba ni maiuakina te aroaro ae boraoi ma nanon te Atua, ni kakororaoa katabuani maium, ao ni kakaonimaki ni beku iroun Iehova.—2 Betero 3:11, 12.
9. Tera kawaira ae ti riai n uaiakinna ngkai ti a tia ni kitan aroaro aika bubuaka?
9 Ngkai ko a tia n rairaki ao ni kitan aroaro aika a bubuaka, teimatoa ni bubutii buokam mairoun te Atua bwa e na kateimatoaa nanom. Kaanga ko toua te kawai ae kairua ngkoa, ma ko a tibwa kaeta kawaim ngke ko a nora te mwabe ae eti. Tai manga kabuaa kawaim ngkai. Kateimatoaa onimakinan ana kairiri te Atua, ao kamatoaa nanom bwa ko na tiku n te kawai ae eti.—Itaia 30:20, 21; Mataio 7:13, 14.
Tai Mwanuokina Am Katabu ao Am Babetito
10. Baikara bwaai aika ti riai ni ururing ni kaineti ma ara katabu nakon te Atua?
10 Ururinga are ko a tia ni katabua maium nakon Iehova n te tataro, ma ni kaantaningaa are ko na kakaonimaki ni beku irouna n aki toki. (Iuta 20, 21) Te katabu e tei ibukin te teiararoa, ke te kaokoroaki, ibukin karaoan te mwioko ae tabu. (Nakoaia Ibonga 15:31; 22:2) Am katabu bon tiaki te bwai ae kai toki ke karaoan te berita ma te aomata temanna, ma bon te katabu ae akea tokina nakon te tia Tautaeka i aon bwaai ni kabane, ao kakororaoana e kainnanoa te kakaonimaki nakon te Atua ni karokoa tokini maium. Eng, ‘ngkana tao ti maiu ke ti mate, ma bon ana bwai naba Iehova ngaira.’ (I-Rom 14:7, 8) E boto kukureira i aon ara aantaeka nakoina ao n ara kakaonimaki ni beku irouna ma te nano ae teimatoa.
11. Bukin tera bwa ko riai n ururinga am babetito ma ni kakawakinna?
11 Ururinga am babetito are e kaotaki iai bwa ko a tia ni katabua maium nakon te Atua. Ko bon aki kairoroaki nako iai, ma boni ngkoe ae ko motika nanom. Ko kamatoaa nanom ngkai bwa ko na maiuakina nanon te Atua ni karokoa tokini maium? Ko a butiia te Atua ibukin kaitiakan mataniwin nanom ao ko a babetitoaki bwa kaotan am katabu nakoina. Kateimatoaa raoiroin mataniwin nanom rinanon kakororaoan raoi am katabu, ao ana kakabwaia Iehova e na boni memena i aom.—Taeka N Rabakau 10:22.
E Irekereke ma Nanom
12, 13. E kanga n irekereke oin nanora ma ara katabu ao ara babetito?
12 A uota te kakabwaia ni koaua te katabu ao te babetito nakoia aomata aika mirion ma mirion mwaitiia ni katobibia te aonnaba. Ngkana ti kaota tian katabuani maiura nakon te Atua n ara babetito n te ran, ao ai aron ae ti kamatei anuani maiura ngkoa, ma e aki katokaki iai inaaomatara ni bairea oin nanora. N aroia taani kakoaua aika reireiaki raoi, ti motika oin nanora ngke ti katabui maiura nakon te Atua n te tataro, ao ni babetitoaki. Ni kaineti ma katabuan maiura ao babetitoakira, ti riai n ukoukora moa nanon te Atua, ao imwina ti na manga rineia i bon iroura bwa ti na kakaraoia. (I-Ebeto 5:17) N te aro aei, ti katotonga iai Iesu, are e motika nanona bwa e na katoka ana mwakuri ni kabenta, ma ni babetitoaki, ao imwina e a kabanea nanona ni kakaraoa nanon Tamana are i karawa.—Taian Areru 40:7, 8; Ioane 6:38-40.
13 E kaantaningaia Iehova ae te Atua, bwa e na “kakoroa raoi aroni Iesu n ri nanon te maraki.” Ngaia are e riai Iesu n anga nanona ni kariaia anne bwa e aonga ni kona n nanomwaaka ma ni kakaonimaki i aani karawawatana. Ibukin kakoroan bukin anne irouna e anga “taian tataro ma bubuti ma te tang ae korakora ma rannimatana, ao E ongo te Atua i Rouna i bukini makan te Atua i Rouna.” (Ebera 2:10, 18 BK; 5:7, 8) Ngkana ti katotongnga ni maaka te Atua ma te karinerine, e na bon ‘ongo’ naba Iehova iroura, ao ti kona n onimakinna bwa e na kateimatoaira bwa ana tia Kakoaua aika a tia ni katabuaki.—Itaia 43:10.
E Kona n Teimatoa Nanom
14. Bukin tera bwa ti riai ni wareka te Baibara ni katoa bong?
14 Tera ae e na buokiko ni kateimatoaa nanom bwa ko aonga ni kona ni kakororaoa katabuani maium nakon te Atua? Wareka te Baibara ni katoa bong bwa ko aonga ni karikirakea iai am atatai i aon ana Taeka te Atua. Aio te bwai ae e aki toki ni kaumakira iai “te toro ae kakaonimaki ae wanawana,” bwa ti na karaoia. Ti anganaki te reirei anne ibukina bwa kakororaoan ara katabu, e nanonna bwa ti riai n teimatoa n nakonako n ana koaua te Atua. Ngkana arona bwa e boutokai reirei ni kewe ana botaki Iehova, a na bon aki ngkanne kaungaaki kaain Ana Tia Kakoaua Iehova ao te koraki ake a uarongorongo nakoia, bwa a na wareka te Baibara.
15. (a) Tera ae e riai n iangoaki ngkana ko karaoi motinnano? (b) Bukin tera ngkai e kona n taekinaki bwa e mwinibwaiaki irouia Kristian, te mwakuri ni kareketianti ibukin te maiu?
15 Ngkana ko karaoi motinnano, ko riai n iangoia moa bwa a na kanga am motinnano akanne n rota kakororaoan am katabu nakon Iehova. Tao am motinnano teuana e kona n reitaki ma te mwakuri ni kareketianti ibukin te maiu. Ko iangoia bwa e na buokiko am mwakuri anne ni kanakoraoa riki am taromauri ae koaua? Angiia taani kamwakuri a kunea bwa Ana Tia Kakoaua Iehova ake a a tia ni katabui maiuia bon Kristian aika kakaonimaki ma n rabakau ni mwakuri, ao a ataia naba bwa Kristian aikai a aki iangoa te kabirirakeaki ke te kaiangatoa ma tabeman ibukin uaiakinan nakoa aika bubura. E riki aei ibukina bwa tiaki tiaia taani Kakoaua karekean te kaubwai, te kakannato, nakoa aika ririeta, ao te mwaaka. Te koraki ake a kakororaoa katabuan maiuiia nakon te Atua, a moanibwaia riki kakaraoan nanon te Atua. Te mwakuri ni kareketianti ibukin bwaai aika a kainnanoi ibukin maiuiia, bon te mwakuri ae mwinibwaiaki irouia. A katotonga te abotoro Bauro, are e moanibwaia te mwakuri ni minita ni Kristian ni maiuna. (Mwakuri 18:3, 4; 2 I-Tetaronike 3:7, 8; 1 Timoteo 5:8) Ko moanibwaia Uean te Atua ni maium?—Mataio 6:25-33.
16. Tera ae ti kona ni karaoia ngkana raraomaeakinan bwaai tabeua e a kangabuakaa kakororaoan ara katabu nakon te Atua?
16 Tabeman a taonaki n raraomaeakinan bwaai tabeua imwain ae a reiakina te koaua. Ma ai boni kimwareirei ra ao ai kakaitau ra nanoia n ikotaki ma rikiraken tangiran te Atua irouia, ngke a moani butimwaea rongorongon te Tautaeka n Uea! Iaiangoan kakabwaia ake a a tia n reke irouia man te tai anne, e na buokia bwa a na kona ni kakororaoa aia katabu nakon Iehova. N te itera are teuana, tera ae na karaoaki ngkana raraomaeakinan bwain te maiu aei, e a moanna ni karibwaa “ana taeka te Atua,” n aron taian aroka aika a kateketeke ake a kona n tuka te aroka bwa e na ikawai? (Ruka 8:7, 11, 14; Mataio 13:22; Mareko 4:18, 19) Ngkana ko taku bwa e nang moanna n riki aei nakoim ma am utu, ao kaaki rawawatam i aon Iehova ao tataro nakoina bwa e na buokiko ni karikirakea te tangira ao te kakaitau. Ngkana ko kaaki rawawatam i aona, e na boni kateimatoako ma ni kakorakorako bwa ko na teimatoa n toro irouna ma te kukurei ao te nano ae teimatoa.—Taian Areru 55:22; I-Biribi 4:6, 7; Te Kaotioti 2:4.
17. Ti na kanga ni kona ni kaaitarai kataaki aika kakaiaki?
17 Teimatoa n tataro nakon Iehova ae te Atua ni katoa tai, n aron are ko a tia ni karaoia ngke ko katabua maium nakoina. (Taian Areru 65:2) Ngkana ko kaririaki bwa ko na karaoa ae kairua ke ko a kaaitara ma te kataaki ae kakaiaki, ukoukora ana kairiri te Atua ao ana ibuobuoki bwa ko na iria. Ururinga kainnanoakin te onimaki, bwa e korea ae kangai te abotoro Iakobo: “Ngkana iai temanna i buakomi ae e kainnanoa te wanawana [ibukin kaitaraan te kataaki teuana], ao ke e butia te Atua, ao e na anganaki, ba e tituaraoi te Atua nakoia aomata ni kabaneia, ao e anganga ma te kukurei. Ma e riai ni bubuti ma te onimaki te aomata anne, n akea te nanokokoraki; ba ngkana e nanokokoraki, ao e katotonga naoni marawa, ae e uti ma n takareburebu n te ang. Ke e tai taku te aomata anne ba e na anganaki te bai teuana iroun te Uea, ngkai e tibauaki ana iango ao e nanotiotio ni bai ni kabane.” (Iakobo 1:5-8, BK) Ngkana ti a taraa n taonaki n te kataaki, ti kona n onimakina ae kangai: “Taiani kataki aika kam a tia n reke iai, a botau ma korakoran te aomata. E kakaonimaki te Atua: e na aki kariaia ba kam na kataki i aoni korakorami; ma ngkana kam kataki, ao e na anganingkami te korakora ni kaitaraa katakimi ao te anga ni birinako mai iai.”—1 I-Korinto 10:13, BK.
18. Tera ae ti na karaoia ngkana te bure ae kakaiaki ae ti karabaa e a kamamaraa nanora ni kani kakororaoa katabuani maiura nakon Iehova?
18 Ma tera ngkana e a kakiriwea mataniwin nanom te bure teuana ae kakaiaki ae ko karabaa, ao e a kamamaarako n te aro are ko nang aki kona ni maiuakina am katabu nakon te Atua iai? Ngkana ko raraoma, e kona n rau nanom n ataakin ae Iehova e “aki riba te nano ae uruaki ae raraoma.” (Taian Areru 51:17) Kakaaea buokam mairouia unimwaane ni Kristian aika tatangira, ngkai ko ataia bwa a na katotonga aron Iehova ao a na aki kakeaa bongan nanom ni kani manga raoiakinaki ma Tamam are i karawa. (Taian Areru 103:10-14; Iakobo 5:13-15) Ao e na manga kateimatoaki ngkanne nanom ao korakoram n taamnei bwa ko aonga ni manga toua te kawai ae eti ma ni kona ni kakororaoa am katabu nakon te Atua.—Ebera 12:12, 13.
Bebeku ma te Nano ae Teimatoa
19, 20. Bukin tera bwa e rangi ni kakawaki bwa ti na kateimatoaa maiuakinan nanon ara katabu?
19 N taai aika karuanikai aikai, ti riai ni kakorakoraira ni kakororaoa ara katabu, ma ni bebeku iroun te Atua ma te nano ae teimatoa. E taku Iesu: “Ane nanomwaka ni karokoa te toki ao e na kamaiuaki.” (Mataio 24:13) Kioina ngkai ti a maeka i nanoni “boong aika kaitira,” ao e a kona ni karina n roko te toki. (2 Timoteo 3:1) Mangaia are akea i buakora ae e kona n ataia bwa e na maiu ningabong, ke e na aki. (Iakobo 4:13, 14) Ngaia are e kakawaki bwa ti na teimatoa ni kakororaoa ara katabu ni katoa bong!
20 E katuruturua anne te abotoro Betero n ana kauoua n reta. E kaotia bwa te aonnaba ae ngkai, are nanona te botannaomata ae buakaka, e nang kamaunaki n “ana bong [Iehova],” n aron naba kamaunakia ngkoa aomata ake a aki tangira te Atua n te Ieka. Mangaia are e kakatonga ni kangai Betero: “Aro ra aromi aika riai ba kam na maeka n itiaki ma n tangira te Atua”! E kaumakiia naba ni kangai: “Ngkami aika kam tangiraki, ngkai kam atai baikai, ngkai a tuai n roko, ao kam na tarataraingkami ba kam kawa ni bwaka man teimatoami n anakin nanomi [irouia taan reirei ni kewe ao aomata aika a aki tangira te Atua] n aia bure akana buakaka.” (2 Betero 3:5-17) Ai kananokawaki ra ngkana e a kairarangaki nako te aomata ae e a tia ni babetitoaki, ao e a toki maiuna i buakoia te koraki ake a aikoa kona ni kateimatoaa nanoia!
21, 22. E na kanga ni kakoauaki Taian Areru 57:7 n rongorongon Tawita ao rongorongoia Kristian ni koaua?
21 Nanom ni kan teimatoa ni kakororaoa katabuan maium nakon te Atua e na kakorakoraki ngkana ko ururinga kimwareireim ngkoa ngke ko babetitoaki, ao ngkana ko ukoukora ana ibuobuoki te Atua bwa ko na kakukureia nanona n am taeka ao am mwakuri. (Taeka N Rabakau 27:11) E kakaonimaki nakoia ana aomata Iehova, ngaia ae ti riai ni kakaonimaki naba nakoina. (Taian Areru 94:14) E kaotiota te akoi ao te nanoanga n arona n totokoa aia waaki taiani kairiribai, ma e kamaiua Tawita. E rangi ni kakaitau Tawita iai ao e tataekina tangiran ana tia Kamaiu irouna ae matoatoa ao e aki bibitaki. E anenea ae kangai ma nanona ni koaua: “E teimatoa nanou, te Atua, e teimatoa nanou: N na anene, eng, N na anenea karaoiroam.”—Taian Areru 57:7.
22 A katotonga naba Tawita Kristian ni koaua ngkai a aki kona ni kitana tangiran te Atua. A kamatoaa nanoia ni bukina Iehova bwa aia tia kamaiu, ma ni kimwareirei n neboia n aia anene. Ngkana e teimatoa nanom, ko na bon onimakina te Atua, ao e na buokiko ni kakoroa bukin am katabu. Eng, ko kona ni katotonga “te aomata ae raoiroi” are e aneneia ni kangai te tia areru: “E na aki maku n te rongorongo ae buakaka: E tei matoa nanona, ngkae e onimakina Iehova.” (Taian Areru 112:6, 7) Ngkana ko onimakina te Atua ao ko mwiokoia ma nanom ni kabane, ko kona ni kakororaoa katabuani maium ma ni bebeku iroun Iehova ma te nano ae teimatoa.
Ko Uringnga?
• Bukin tera bwa ti riai ni kateimatoaa karekean te atatai ae eti man te Baibara?
• Bukin tera bwa ti riai n ururinga ara raraoma ao ara rairannano ngkoa?
• Ti na kanga ni kakabwaiaki man ururingan ara katabu ao ara babetito?
• Tera ae e na buokira bwa ti na nanomwaaka ni beku iroun Iehova ma te nano ae teimatoa?
[Taamnei n iteraniba 18]
Ko kateimatoaa marurungim n te aro n taamnei n am wareware n ana Taeka te Atua ni katoa bong?
[Taamnei n iteraniba 18]
Moanibwaian te mwakuri ni minita ni Kristian e buokira bwa ti nanomwaaka n ara beku iroun Iehova ma te nano ae teimatoa