E Katamaroaia Ana Aomata Iehova N Te Oota
“Tei rake, oota; ba e a roko ootam, ao e oti mimitongin Iehova i aom.”—ITAIA 60:1.
1, 2. (a) Tera aroaroia ngkai angiia aomata? (b) Antai ae bukinaki ibukin rikin te rotongitong?
“AI TERA ngke arona bwa e mena iroura te aomata ae ai aron Itaia ke Santo Bauro!” Anne ana bwaebwaeti te Beretitenti mai Amerika ae Harry Truman, are e taekinna n 1940 tabun. Bukin tera bwa e taekin taeka aikai? Ibukina bwa e nora kainnanoakia taani kairiri aika rangi ni mwaatai. Bwa te tai arei e rangi ni kabwaranano bwa e ngae ngke e a bon tibwa toki te Kauoua ni Buaka are Kabuta te Aonnaba, ma e bon aki naba rau te aonnaba, bwa e teimatoa n rotongitong. Ao ngkai, ai 57 te ririki imwin te buaka anne, ao e bon tiku naba n rotongitong te aonnaba. Ngke arona bwa e maiu ngkai Beretitenti Truman, ao akea te nanououa bwa e na nora naba kainnanoakia taani kairiri aika raoiroi n aron Itaia ke te abotoro Bauro.
2 Ngkana e ataia Beretitenti Truman ke e aki, ma te abotoro Bauro e taekina te rotongitong ae rotiia aomata, ao e koroboki ni kauringia aomata bwa a na tarataraiia man te rotongitong aei. N aron anne e kauringia raona n onimaki Bauro ni kangai: “Ti aki kaunrabata ma te raraa ma te iriko, ma ti kaunrabata ma taian uea, ma ake a korakora, ma taan tauu taekan aonaba aika taan taua aron te ro aei, ma taanga n tamnei aika buakaka ake i aani karawa.” (I-Ebeto 6:12) N ana taeka aikai, Bauro e aki tii kaotia bwa e ataia ae aomata a rabunaki n te rotongitong n taamnei, ma e kaotia naba bwa te rotongitong aei e nako mairouia taimonio aika mwaaka, are e kabwarabwarai taekaia bwa “taan tauu taekan aonaba.” Tera ngkanne te bwai ae a kona ni karaoia aomata bwa a aonga ni kaotaa te rotongitong aei, kioina ngkai bon taimonio aika a karaoa te aro aei?
3. Tera ae e a kaman taetae ni burabetinna Itaia ibukia te koraki ake a kakaonimaki, e ngae ngke iai te rotongitong ae taonia botannaomata?
3 E taekina naba te rotongitong Itaia are e taonia aomata. (Itaia 8:22; 59:9) Ma e kairaki iroun te Atua bwa e na taekina ae e ngae ngkana iai te rotongitong ae bati, ma e na kaotaa ootana Iehova i aoia te koraki ake a tangira te oota. Ai ngaia are e ngae ngke akea irarikira Bauro ao Itaia, ma iai iroura aia koroboki aika kairaki koreaia iroun te Atua, are e a riki bwa kairirara. Ngkai, ti na rinanon ana taetae ni burabeti Itaia ake a mena n ana boki, mwakorona 60, bwa ti aonga n nora iai aron kakabwaiaia taan tangira Iehova.
E Kaotaa te Oota te Aine are E Taetae ni Burabetinaki
4, 5. (a) Tera are e tuanga te aine arei Iehova bwa e na karaoia, ao tera ana berita nakoina? (b) Baikara rongorongo aika kamimi aika taekinaki n Itaia mwakorona 60?
4 Moan taeka aika kaotaki n Itaia mwakorona 60, a kaineti nakon te aine ae kananoanga, are e mena n te rotongitong, ma ni wene ni bobaraki i aontano. Akea bwa e a karina naba n oota, ao e wewete bwanan Iehova nakon neierei ni kangai: “Tei rake, oota; ba e a roko ootam, ao e oti mimitongin Iehova i aom.” (Itaia 60:1) E a roko te tai are e nang teirake iai te aine are kaikonakaki n te kibu aei, bwa e na kaotiota ana oota te Atua ao mimitongina. Bukin tera? E oti kaekana n te kibu are imwina ae kangai: “Noria, ane e na rabuna aonaba te ro, ao e na rabuniia kaain aonaba te rotongitong: ma E na oti Iehova i aom, ao e na noraki naba mimitongina i aom.” (Itaia 60:2) Kioina ngkai e ongotaeka te aine aei iroun Iehova, ao e kaungaki nanona bwa e na nora uaan ana mwakuri ae kamimi n aron ae taku ikai Iehova: “Ao botanaomata a na kawara ootam, ao uea a na kawara raneanean otim.”—Itaia 60:3.
5 Taeka aika kaunganano aika a mena ni kiibu aika tenua aikai, a katereterea moan rongorongon Itaia mwakorona 60, ao oin te rongorongo mai iai. E a kaman taekin bwaai aika a na riki nakon te aine are kaikonakaki arei, ao ni kabwarabwaraa bwa ti kanga ni mena n ana oota Iehova n aki ongea te rotongitong ae otabwaninia te botannaomata. Tera ngkanne ae a tei ibukina, kanikina aika taekinaki ni kiibu aika tenua aikai?
6. Antai te aine are kaotaki n Itaia mwakorona 60, ao antai ae e tei ibukina i aon te aba?
6 Te aine are taekinaki n Itaia 60:1-3 bon Tion, ae ana botaki Iehova are e kaainaki irouia anera. Ni boong aikai, iai taan tei ibukin Tion aika mena i aon te aonnaba, aika nikiraia kaain “ana Iteraera te Atua,” ae te ekaretia ae kaainaki irouia Kristian aika kabiraki n te taamnei, ae a kaantaningaia bwa a na uea ma Kristo i karawa. (I-Karatia 6:16) Mwaitiia kaain te botannaomata n taamnei aei bon 144,000, ao kakoroan bukin taetae ni burabeti ake n Itaia mwakorona 60, e a boboto i aoia nikiraia kaain te koraki aei, aika a maiu i aon te aba i nanoni “boong aika kaitira.” (2 Timoteo 3:1; Te Kaotioti 14:1) A bati naba rongorongoia raoraoia Kristian aika kabiraki aikai, ae “te koraki ae uanao” aika “tiibu tabemang.”—Te Kaotioti 7:9; Ioane 10:16.
7. Tera aroaron Tion n 1918, ao e kanga n taetae ni burabetinaki arona anne?
7 Iai te tai teuana ae e a tia ni mena iai n te rotongitong “ana Iteraera te Atua,” n aron are kaikonakaki iroun te aine? Eng, e riki aei 80 tabun te ririki n nako. N te moani buaka are kabuta te aonnaba, ao Kristian ake a kabiraki, a korakoraia ni kamaiua te mwakuri n uarongorongo. Ma n 1918, are kabanean ririkin te buaka anne, ao e kuri n toki iai te uarongorongo. Joseph F. Rutherford, are ngaia ae e kaira te mwakuri n uarongorongo ni kabuta te aonnaba, n ikotaki naba ma tarina ni Kristian tabeman ake a mwiokoaki n te tararua, a kabureaki n te tai ae maan, ibukin bukibuki aika kewe. E kabwarabwaraki taekaia Kristian aika kabiraki ake a mena i aon te aba ni bokin Te Kaotioti, bwa ai aroia maate aika wene “ni kawain te kawa are ababaki, are aranaki n tamnei ba Totom ma Aikubita.” (Te Kaotioti 11:8) Ao anne raoi te tai are a mena n te rotongitong iai natin Tion aika taani kabiraki ake a mena i aon te aba!
8. Tera te bitaki ae korakora ae riki n 1919, ao tera mwina?
8 Ma e noraki te bitaki ae korakora n 1919, bwa e a kaotaa iai ootana Iehova i aon Tion! Nikiraia kaain ana Iteraera te Atua, a a manga waakina aia mwakuri ni kaotiota ootan te Atua, rinanon te ninikoria n tataekina te rongorongo ae raoiroi. (Mataio 5:14-16) Ao ibukin ingaingan nanoia Kristian aikai, a a manga atikaki riki nanoia tabeman nakon ootan Iehova. N te moan tai, aomata ake a kairaki nako iai a kabiraki bwa kaain ana Iteraera te Atua. A aranaki bwa uea n Itaia 60:3, ibukina bwa a na tautaeka ma Kristo n ana Tautaeka n Uea te Atua. (Te Kaotioti 20:6) Imwina riki, a manga atikaki nanoia te koraki ae uanao mai buakoia tiibu tabemwaang nakon ootan Iehova. Aikai “botanaomata” ake a taekinaki taekaia n te taetae ni burabeti.
A Okiria Natina!
9, 10. (a) Tera te bwai are e noria te aine arei ae kakukurei nakoina, ao tera ae kaikonakaki iai? (b) Tera bukin kukurein Tion?
9 E a moanna ngkai Iehova ni kabwaraa nako nanon te rongorongo are e kaotaki n Itaia 60:1-3. E a manga angan riki te aine aei te tua teuana, ao ongora n te bwai ae taekinna: “Kaeka matam n taratara nako, ao noria.” E ongotaeka n te bwai are e tuangaki neiei, ao ai kakukurei ra te bwai are e a noria! Eng, a okiria natina. E a manga taku riki te kibu anne: “A bane ni botaki, a nako im: a na roko natim mwaane man taabo ake a raroa, ao a na rarikinaki natim aine!” (Itaia 60:4) Tataekinan te Tautaeka n Uea ni katobibia te aonnaba are e moanaki n 1919, e kairia aomata aika boou aika ngaa ma ngaa mwaitiia bwa a na beku iroun Iehova. A a riki te koraki n aomata aei bwa natin Tion aika “mwaane” ao “aine,” ao a rineaki bwa kaain ana Iteraera te Atua aika kabiraki. N te aro anne, e a tia Iehova ni katamaroaa Tion rinanon kairaia nikiraia te koraki aika 144,000 mwaitiia, nakon te oota.
10 Ko kona n iangoia bwa tera aron kimwareirein Tion ngke a a okiria natina? E ngae n anne, Iehova e a manga kaota riki bukina teuana ae e na kimwareirei iai Tion. Ti wareka ae kangai: “Ane ko na noria iai, ma ni kabebeteaki, ao e na tata burom ma n onrake; ba a na rairaki bwaini marawa aika bati nako im, ao a na nako im aia bwaikoraki botanaomata.” (Itaia 60:5) Man 1930 tabun Kristian aika mwaiti kurikuri ake a kakaantaningaa te maiu n aki toki i aon te aba, a a tia ni karaoa ae boraoi ma taeka ni burabeti aikai ngkai a bane ni bwaroakina Tion. A otinako te koraki aei mai “marawa,” are e a tei ibukia aomata aika a ianena ma te Atua. A kabotauaki ma kaubwaia taian botannaomata, aika “bwaai aika tatangiraki aika aia bwai botanaomata ni kabaneia.” (Akai 2:7; Itaia 57:20) Noria naba bwa “bwaai aika tatangiraki” aikai, a aki kakaokoro n aroia ni beku iroun Iehova, ma a boni buoka katamaroan Tion n aroia n reitaki n taromauri ma taria aika kabiraki, ao a riki bwa “ti te nanaina” ma ngaiia i aan ana tararua temanna “te tia kawakin-tiibu.”—Ioane 10:16.
A Bwaroakina Tion Taani Bobwai, Taani Kawakin Tiibu, ao ai Taan Iokinibwai
11, 12. (a) Kabwarabwaraa aroaroia te koraki ae uanao are a noraki ni kawara Tion.
11 Mwin te ikoikotaki ae taetae ni burabetinaki aei, e a karika rikiraken mwaitiia taan neboa Iehova. E taetae ni burabetinaki naba aei n ana taeka Itaia aika imwina riki. Iangoia bwa ko tei irarikin te aine ae kaikonakaki aei, i aon te Maunga are Tion. Ko taraa mainiku, ao tera ae ko noria? “E na rabuniko kabatiaia kamero, ma kameroni Mirian aika ataei, ma Eba; a na bane n nako mai ake mai Tieba: a na ua koora ma ribano, ao a na ua rongorongo aika raraoi aika kamoamoan Iehova.” (Itaia 60:6) Te koraki n aomata aika taani bobwai, a mwananga ma aia kamero ni kaineta Ierutarem. Ai aron te ieka kamero aikai ae taona te aba! Taan iokinibwai a anga bwaintangira aika kakawaki aika “koora ma ribano.” Ao taani bobwai aikai a kawara ootan te Atua bwa a na ‘kamoamoaa Iehova.’
12 Tiaki tii taani bobwai aika mwananga, ma taani kawakin tiibu naba aika a bwaroakina Tion. E a manga reitia ni kangai te taetae ni burabeti aei: “A na bane ni botaki nako im nanaini Keta, a na toro i roum tibun Nebaiota aika mwaane.” (Itaia 60:7a) A kawara te kaawa ae tabu aei taani kawakin tiibu, bwa a na karean moan raoiroin aia nanai nakon Iehova. A bon anga naba ngaiia bwa a na toro iroun Tion! Tera aron Iehova ni butimwaeia ianena aikai? E kaeka i bon irouna te Atua n taku: “A na aerake ma te tangiraki nako aoni baonikareau, ao N na katamaroa maneabau ae tamaroa.” (Itaia 60:7b) E rangi ni kukurei Iehova ni butimwaei aia karea ma aia taromauri ianena aikai. E katamaroaki ana tembora Iehova n aia bwaintangira.
13, 14. Tera ae noraki ae tabe ni kaoti mai maeao?
13 Manga taraa te oraitan are i maeao. Tera ae ko noria? E taraa n ae iai te nang ae mainaina ae rabuna taari, mai kiraroa. E tabeka te titiraki aei Iehova are tao titeboo naba ma are ko iangoia: “Antai aikai aika kiba mai n ai aron te nang, ao n ai aroia naba taobe nakoni mataroani neia?” (Itaia 60:8) E a manga boni kaekaa ana titiraki Iehova ni kangai: “A na boni kaantaningaai aba-makoro, ao a na roko moa kaibuken Taretiti, ba a na uotiia mai natim mai kiraroa, ma aia tirewa ao aia koora ma ngaiia, i bukin aran Iehova ae Atuam, ma Atuaia Iteraera ae Tabu, ba kioina ngkae E katamaroako.”—Itaia 60:9.
14 Ko kona ni kamataua raoi taraan te bwai are noraki? Te nang are mainaina arei e a tabe ni kaan ma e taraa ngkai n riki bwa kaanga bwaai aika kirimtoo i maeao. E a taraa n riki bwa te nanai ni mannikiba aika kiba i aon taari. Ma ngke e a kaan riki, ao ko a noria bwa ngaia boni kaibuke aika taakinaki raoi ieia ibukin rawean te ang. A bati kaibuke aikai aika ieie ni kaineta Ierutarem, n te aro are taraakia ai aroia taobe aika bati. Kaibuke aikai, a uotiia taan onimaki man aaba aika raroa, nako Ierutarem bwa a na taromauria Iehova iai.
E a Karababaki Riki ana Botaki Iehova
15. (a) Te rikirake raa are e taetae ni burabetinaki n taeka ake a mena n Itaia 60:4-9? (b) Te nano raa ae a kaotiotia Kristian ni koaua?
15 Ai mataata ra te banna are e katereterea te taetae ni burabeti ae mena n te kibu 4 nakon 9, ni kaineti ma te rikirake are e a tia n riki ni katobibia te aonnaba, ni moa man 1919! Bukin tera bwa e kakabwaiaa Tion Iehova ni karikirakea? Ibukina bwa man 1919, ao ana Iteraera te Atua, e a tia n ongeaba ao n teimatoa ni kaotaa ootan Iehova. Ko noria n te kibu 7 bwa e taekinaki iai ae ianena a ‘aerake ma te tangiraki nako aoni baonikarean [te Atua]’? Te baonikarea bon te bwai are e karaoaki iai te anga-karea, ao aio are e a kauringira iai bwa te beku iroun Iehova, e i rekereke ma te angakarea. E korea aei te abotoro Bauro: “I butingkami . . . anga rabatami ba te karea ae maiu, ae itiaki, ae kakukureia te Atua, ae ami taromauri ae bwain te nano.” (I-Rom 12:1) Ni kaineti ma ana taeka Bauro aikai, Kristian ni koaua a taku bwa e aki tau ngkana a tii kaea naba te taromauri tao teuana te tai ni katoa wiki. Ma a anga naba aia tai, korakoraia, ao aia bwai, ibukin boutokaan te taromauri ae itiaki. Tiaki te koaua ngkanne bwa rorokoia taan taromauri ni koaua aikai, e katamaroaa ana tembora Iehova? Boni ngaia are e taetae ni burabetinna Itaia. Ao ti kona ni kakoauaa bwa taan taromauri aika ingainga nanoia n aroia aikai, a taraaki naba bwa a tamaroa iroun Iehova.
16. Antai ae a boutokaa te mwakuri ni kateitei n taai ake rimoa, ao antai ae a karaoia naba n taai aikai?
16 A tangiria ni beku ianena aikai. E a manga taku naba te taetae ni burabeti aei: “Ane a na katei am nono ianena, ao a na toro i roum aia uea.” (Itaia 60:10) E moani kakoroaki bukin te taetae ni burabeti anne n okia taenikai mai Baburon, ike a a buoka iai manga katean te tembora ao kaawan Ierutarem, ueea ao tabeman riki aika Tientaire. (Etira 3:7; Neemia 3:26) Ni kakoroan bukina n taai aikai, ao te koraki ae uanao a a tia ni buokia kaain te nikira ae kabiraki ni karikirakea riki te taromauri ae koaua. A a tia ni buoka katean ekaretia ni Kristian, ao n te aro anne, a kakorakoraa riki iai ‘nonon’ ana botaki Iehova. A buoka naba te mwakuri ni kateitei n aron katean Maneaba n Uea, Taabo ni Botaki, ao auti ni Beta-era. N aroia aikai, a buokia iai tariia aika kabiraki ni bwaai aika kainnanoaki n ana botaki Iehova ae tabe n ririkirake!
17. Tera te anga teuana ae e kabongana Iehova ibukin katamaroaaia ana aomata?
17 Ai kaunga ra ana kabanea n taeka Itaia 60:10! E taku Iehova: “I oroiko n unu, ma I nanoangaiko n au akoi.” Eng, e boaia ana aomata Iehova n 1918-1919. Anne ae riki ngkekei, ma ngkai ai ana tai moa Iehova ni kaota ana nanoanga nakoia ana toro aika kabiraki ao raoia aika tiibu tabemwaang. Kakoauan aei e a kaotaki n arona ni kakabwaiaiia, rinanon te rikirake ae korakora, are e a ‘katamaroaia’ iai.
18, 19. (a) Tera ana berita Iehova are karaoia nakoia ianena ake a kaaina ana botaki? (b) Tera ae kaotaki nakoira man nikiran kiibu ake n Itaia mwakorona 60?
18 Ni katoa ririki, ngaa ma ngaa riki “ianena” aika a ikoikotaki nakon ana botaki Iehova, ao e teimatoa n uki te kawai nakoia te koraki ake a kan rimwia ianena aikai. E taku Iehova nakon Tion: “A na uki nako naba mataroam n te bong ae koraki; e na aki kainaki ni ngaina ao ni bong; ba a aonga n uoti nako im aia bwaikoraki botanaomata aomata, ma aia uea aika kairaki.” (Itaia 60:11) Kairiribai tabeman a na kataia ni kaini ‘mataroa’ aikai, ma ti bon ataia bwa a aki kona n tokanikai iai. E taku Iehova bwa a na teimatoa n uki mataroa aikai n aki ongeia bwa tera ae e na karaoaki nakoia. E na bon teimatoa ni waakinako te rikirake.
19 Iai riki aanga tabeua ake e a tia ni kakabwaiaiia iai ana aomata Iehova, ma ni katamaroaia i nanoni boong aika kaitira aikai. Taetae ni burabeti ake n nikiran kibun Itaia mwakorona 60, a kaotia bwa baikara aanga akanne.
Ko Kona ni Kabwarabwaraa?
• Antai ana “aine” te Atua, ao e tei ibukia te koraki n aomata raa i aon te aba?
• N ningai te tai are a wene ni bobaraki iai natin Tion, ao n ningai are a “teirake” iai, ao n te aro raa?
• E kanga Iehova ni kabonganai bwaai ni kaikonaki aika kakaokoro, n taetae ni burabetina iai rikiraken mwaitiia taan uarongorongoa te Tautaeka n Uea?
• E kanga Iehova n tia ni kaotaa ootana i aoia ana aomata?
[Taamnei n iteraniba 8]
E tuangaki ana “aine” Iehova bwa e na teirake
[Taamnei n iteraniba 10]
Te nna ni kaibuke bon ai aron te nanai n taobe ae e noraki mai kiraroa