‘Kateimatoai Aroaro Aika Raraoi I Buakoia Bekan’
“Karineia aomata ni kabaneia, tangiria tarimi.”—1 BETERO 2:17, BK.
1, 2. (a) Tera ae e taekinna temanna te tia koro rongorongo ibukia Ana Tia Kakoaua Iehova? (b) Bukin tera ngkai a kakorakoraia Ana Tia Kakoaua Iehova n teimatoa ni kaakaraoi aroaro ni maiu aika rangi n raraoi?
TABEUA te ririki n nako, ao e mwananga temanna te tia koro rongorongo i aon Amarillo, Texas, U.S.A., ni karaoa ana kakaae i aon Aaro aika kakaokoro nako n te tabo anne, ao e ribootina naba mwin ana kakaae. E noria teuaei bwa iai teuana te botaki ae e rangi n anaaki nanona iai, kioina ngkai e rangi n okoro, ao e taku: “I nanon tenua te ririki, ao I a tia n iriri n aia bwabwaro Ana Tia Kakoaua Iehova aika a kaakaraoaki ni katoa ririki n te Amarillo Civic Center. I nanon titiku i buakoia, ao bon akea te tai ae I a tia n nora iai temanna bwa e moko, e mooi biia, ke e taetaebuaka. Bon aomata aika a rangi n itiaki, a ataa te katei, a bwaini kunnikai aika raraoi, a kakateke aroaroia ae bon te bwai ae I tuai man noria mai mwaina.” A mwaiti riki rongorongo aika titeboo ma aei ibukiia Ana Tia Kakoaua Iehova aika a a tia ni boretiaki. Bukin tera ngkai a mwaiti taai aika a kamoamoaki iai Taani Kakoaua irouia aomata aika a kaokoro aia koaua ma ngaiia?
2 N angiin te tai, a kamoamoaki ana aomata te Atua ibukin aroaroia aika raraoi. E ngae ngkai e a rikirake ni buakaka te aroaro ni maiu, ma a bon teimatoa naba Ana Tia Kakoaua Iehova n iaiangoa te aroaro ni maiu ae tamaroa bwa te bwai ae a riai ni maiuakinna, ngkai boni kanoan naba aia taromauri. A ataia ae e na rotaki Iehova ao tariia ni Kristian naba n aia mwakuri, ao e noraki koauan te rongorongo are a tataekinna man aroaroia aika raraoi. (Ioane 15:8; Tito 2:7, 8) Ti na noria ngkanne, bwa ti na kanga ni kona ni kateimatoai aroaro aika raraoi ao ni waakina nako karaoiroan ao karinean Iehova ma Taani Kakoaua, ao ti na kanga ni kakabwaiaki ngkana ti karaoa anne.
Te Utu ni Kristian
3. A kainnanoa kamanoaia utu ni Kristian man tera?
3 Iangoa aroarora i nanon te utu. E taekina ae kangai te boki ae Die Neuen Inquisitoren: Religionsfreiheit und Glaubensneid (Taani Bwainikirina te Aba Aika Boou: Te Inaaomata n Taromauri ao te Nanonibwi ae Boto i aon te Aro), ae koreaki iroun Gerhard Besier ao Erwin K. Scheuch: “Irouia [Ana Tia Kakoaua Iehova] e riai ni kamanoaki raoi te utu.” A boni koaua taeka akanne, bwa a rangi ni mwaiti kangaanga i nanoni boong aikai, ake e a kainnanoa kamanoana mai iai te utu. Iai ataei aika a “aki iri nanoia aia karo” ao ikawai aika “babakaine” ke a “aki tauu bangiia.” (2 Timoteo 3:2, 3) Te mwenga bon te tabo are a unun iai taanga i marenaia, a karaoi mwakuri iai kaaro aika aki riai nakoia natiia ke a bakaineiia, ao a karitei ataei, a irarang ni kamanenai drug ao a wene ni bure, ke a kitani mwengaia. A bane n riki aroaro aikai imwin ana urubwai ‘nanon aon te aba.’ (I-Ebeto 2:1, 2, NW) Ti riai ni kamanoi raoi ara utu man te nano anne. Ni kanga? Man butimwaean ana reirei Iehova ao ana kairiri ibukiia kaain te utu.
4. Baikara bwaai aika a mwiokoaki iai kaain te utu ni Kristian bwa a na karaoia i marenaia?
4 A ataia raao ni mare aika Kristian bwa iai baeia i marenaia ae kakawaki ni kaineti ma aia namakin, bwaai n taamnei, ao bwain te rabwata. (1 I-Korinto 7:3-5; I-Ebeto 5:21-23; 1 Betero 3:7) Iai tabeia kaaro aika Kristian ae moan te rawawata ibukia natiia. (Taeka N Rabakau 22:6; 2 I-Korinto 12:14; Ebeto 6:4) Utu ni Kristian a kataneiaia ataei i nanon kaikawaaia bwa a aonga n ataia ae iai naba tabeia ake a riai ni karaoi. (Taeka N Rabakau 1:8, 9; 23:22; I-Ebeto 6:1; 1 Timoteo 5:3, 4, 8) Karaoan tabeia i nanon te utu e kainnanoa te kakorakora, te nano ni kani karaoa te mwakuri, ao ai te nano n tangira ma te anga boni ngkoe. Mangaia are ngkana a bane kaain te utu ni karaoi tabeia ake a a tia ni mwiokoaki iai iroun te Atua, ao ngkanne a na bon riki bwa bwaai n ibuobuoki i marenaia ao ai moara ra riki nakon te ekaretia. Ma ae moan te kakawaki, a karinea iai Teuare moani karika te utu, ae Iehova ae te Atua.—Karikani Bwaai 1:27, 28; I-Ebeto 3:15.
Te Botaki n Itaritari ni Kristian
5. Baikara kakabwaia aika reke nakoira ngkana ti iraorao ma raora ni Kristian?
5 Ngkai Kristian ngaira, iai mwiokoara ibukia raora n onimaki i nanon ara ekaretia ao ibukia naba ‘tarira aika a uamae nako i aonnaba.’ (1 Betero 5:9, BK) E kakawaki ara itoman ma te ekaretia ibukin kateimatoan marurungira ni kaineti ma bwaai n taamnei. Ngkana ti bobotaki ma raora ni Kristian, ti kakorakoraki iai n aia taeka ni kaungaunga ao ai uana naba ma karara n taamnei aika tamaroa mairoun “te toro ae kakaonimaki ae wanawana.” (Mataio 24:45-47) Ngkana iai ara kangaanga, ti kona ni kawariia tarira ibukin reireiara aika raraoi aika boto i aon ana reirei te Baibara. (Taeka N Rabakau 17:17; Te Minita 4:9; Iakobo 5:13-18) A bon aki kona ni kitanira tarira n te tai are a kai nanora iai n te bwai teuana. Ai kabwaia ra ngaira ngkai ti a kaaina ana botaki te Atua!
6.E kanga ni kaotia Bauro bwa iai mwiokoara ibukia Kristian ake tabemwaang?
6 Ma e ngae n anne, tiaki nanona bwa ti mena i nanon te ekaretia tii ibukin bubutimwaean bwaai, ma ti mena naba iai ibukin te anganga nako bwaai. E boni koaua are e taku Iesu ngke e kangai: “E kakabaia riki te anga nakon te anganaki.” (Mwakuri 20:35) E katereterea raoiroin te nano ni kan anga te abotoro Bauro ngke e korea ae kangai: “Ti na taua kaotan tauani bukin ara kaantaninga ba e na aki nanokokoraki; ba E kakaonimaki Teuare atonga te taeka n akoi. Ao ti na i taratara n iangoi arora ba ti aonga ni keiakinira ni karika te tangira ma makuri aika raraoi. Ao ti na tai kaki te bobotira, n ai aroia tabemang, ma ti na taetae n i kauungaira i roura; ni kakorakoraira riki iai n te aro ane kam nora te Bong arei ba e a kan roko.”—Ebera 10:23-25.
7, 8. Ti na kanga ni kaotiota te nano ni kan anga i nanon ara ekaretia ao nakoia Kristian n aaba nako?
7 Ti “kaota tauani bukin ara kaantaninga” i nanon te ekaretia, ngkana ti anganga ara kaeka n taiani botaki ke ngkana ti anga ara ibuobuoki ae boutokaa te waaki n angareirei. E boni kaungai nanoia tarira aroarora n tataningamarau iai. Ti kona naba ni kaungaia ngkana ti maroro ma ngaiia imwain ao imwin te botaki. Bon aio te tai are ti kona iai ni kakorakoraia aika mamaara, ni kabebetei nanoia aika a rawawata, ao ni buokiia aoraki. (1 I-Tetaronike 5:14) A rangi n akoi Kristian aika raraoi nanoia n aroia ni kan anga n te aro anne, ao bon anne te mwakuri are e a anaaki iai nanoia aomata ake a a tibwa roko n ara botaki, bwa a nora iai te itangitangiri i buakora.—Taian Areru 37:21; Ioane 15:12; 1 I-Korinto 14:25.
8 Ma e ngae n anne, e na bon aki onoti ara tangira tii i nanon ara ekaretia, ma e na mwanea te botaki n itaritari ni katobibia te aonnaba. Anne bukina ae iai taiani bwaoki ibukin bwaintangira nakon te Mwane n Tania Ibukin Mwaneaba n Uea, n ara tabo ni bobotaki ni kabane. Tao e kona n taraaraoi ara Mwaneaba n Uea, ma ti ataia ae ngaa ma ngaa raora ni Kristian n aaba tabeua riki aika akea aia tabo ni bobotaki ae raoiroi. Ngkana ti kabwakamwane n te bwaoki ibukin te Mwane n Tania Ibukin Mwaneaba n Uea, ti kaota iai ara tangira nakoia tarira, e ngae ngkana ti aki kinaia.
9. Tera bukina ae kakawaki ngkai a bwabwaina te itangitangiri i marenaia Ana Tia Kakoaua Iehova?
9 Bukin tera ngkai a itangitangiri i marenaia Ana Tia Kakoaua Iehova? Ibukina bwa e tua Iesu bwa a riai ni karaoa anne. (Ioane 15:17) Ao te tangira are a kaotiotia i marenaia, e kaotaki iai bannan taamnein te Atua bwa e mwamwakuri irouia n tatabemania nako ao n aia botaki naba. Te tangira bon teuana mai buakon “uaan te Tamnei.” (I-Karatia 5:22, 23) Ibukina bwa a reirei n te Baibara Ana Tia Kakoaua Iehova, a iri bobotaki ni Kristian ao a tataro n taai nako nakon te Atua, e a riki ngkanne te tangira bwa anuan maiuia e ngae ngke a maeka n te aonnaba ae e a ‘koerikaki aia tangira aomata aika bati iai.’—Mataio 24:12, BK.
Reitaki ma te Botannaomata
10. Tera mwiokoara ni kaineti ma te botannaomata?
10 Ana taeka Bauro are “kaotan tauani bukin ara kaantaninga,” e kauringira bwa iai mwiokoara riki teuana. Kaotan tauani bukin te kaantaninga aei, e raonaki n tataekinan te rongorongo ae raoiroi nakoia aomata ake a tuai n riki bwa tarira ni Kristian. (Mataio 24:14; 28:19, 20; I-Rom 10:9, 10, 13-15) Te mwakuri n uarongorongo aei bon te anga teuana ae ko kona n tituaraoi n angangabwai iai nakoia aomata. Ni karaoan aei, e kainnanoaki iai te tai, te korakora, te katauraoi, te kataneiai, ao kamanenan oini kaubwaim. Ma e ngae n anne, e korea ae kangai Bauro: “Te tia tarau ngai n tataekina te euangkerio nakoia I-Erene ma Bekan naba, ao nakoia ake a rabakau, ma ake a nanobaba naba. Ma ngaia ae e tae nangu n are e konaki i rou n tataekina te euangkerio nako imi naba ngkami ake kam mena i Rom.” (I-Rom 1:14, 15) Ti riai ni katotonga Bauro n aki tauanibwai, ngkana ti kabwara “tarau.”
11. Baikara ana reirei te Baibara aika uoua aika a kawakina aron ara iraorao ma kaain te aonnaba, ma tera te koaua ae ti butimwaaia naba?
11 Iai mwiokoara ibukiia ake tiaki raora n onimaki? Bon iai. Ti ataia raoi bwa “a bane kaain aonaba ni wene i nanon teuare buakaka.” (1 Ioane 5:19) Ti ataia naba bwa e taekina ae kangai Iesu ni kaineti ma taan rimwina: “Tiaki ana bwai te aba ngaiia, n ai arou ngkai tiaki ana bwai te aba Ngai.” Ma e ngae n anne, ti boni maeka naba ngkai n te aonnaba, ni karekei maiura iai, ao ti buokaki ni mwakuri aika karaoaki irouia kaaina. (Ioane 17:11, 15, 16) Mangaia are bon iai mwiokoara ibukin te botannaomata. Baikara mwioko akanne? E kaekaa te titiraki anne te abotoro Betero. Teutana te tai imwain uruakan Ierutarem, ao e korea ana reta nakoia Kristian ake i Asia Minor, ma iai mwakoron te reta anne ae e buokira ni bwaina te aro ae riai n ara iraorao ma kaain te aonnaba.
12. N te aro raa ae a riki iai Kristian bwa ‘iruwa ao aomata aika a aki kamaniia i aon te aba,’ ao tera ae a na tabuia ma iai?
12 E moan taekina aei Betero: “Ngkami akana kam tangiraki, I butingkami, ngkai iruwa ao aomata akana kam nang aki kamaaningkami i aon te aba, ba kam na rawa nakon aia kaibabaru rabatami, aika buakana tamneimi.” (1 Betero 2:11) A bane aia iango riki Kristian ni koaua i aon te itera n taamnei, ‘ngkai iruwa ngaiia aika a nang aki kamaaniia i aon te aba’ ibukina bwa anuan maiuia te koraki ake a kabiraki n te taamnei ae raoiroi bon tii kaantaningan te maiu n aki toki i karawa, ao “tiibu tabemang” i aon te baretaiti ae e na roko n te aonnaba. (Ioane 10:16; I-Biribi 3:20, 21; Ebera 11:13; Te Kaotioti 7:9, 14-17) Ma tera ngkanne kaibwabwarun te rabwata? E irianaki aei n tangiran te kani kaubwai, te kani kakannato, kainnanoan te wene ni bure ao tangiran te aroaro ae e aranaki bwa te “bakantang” ao “te mataai ni kanibwaibwai.”—I-Korote 3:5; 1 Timoteo 6:4, 9; 1 Ioane 2:15, 16.
13. E kanga kaibwabwarun te rabwata ni ‘buakana taamneira’?
13 Tangiran bwaai aikai a bon ‘buakana taamneira.’ Bwaai aika tatangiraki aikai, a urua ara iraorao ma te Atua ao a karekea nakoira te kabuanibwai ni kaineti ma ara kaantaninga ni Kristian (“tamneira,” ke maiura). N aron aei, ngkana ti karikirakei tangiran bwaai aika kammaira, ao ti na kanga ngkanne n anga boni ngaira bwa “te karea ae maiu, ae itiaki, ae kakukureia te Atua”? Ngkana ti bwaka n ana bwai ni kamwane te kanibwaibwai, ti na kanga ngkanne n “ukoukora moa uean te Atua”? (I-Rom 12:1, 2; Mataio 6:33; 1 Timoteo 6:17-19) Te anga ae e raoiroi riki, bon irakin ana banna ni katoto Mote, are ti na tinanikui ana kariri te aonnaba, ao ti na karimoaa te beku iroun Iehova i aoni maiura. (Mataio 6:19, 20; Ebera 11:24-26) Bon anne te kiing ae kakawaki ibukin karekean te reitaki ma te aonnaba ae riai raoi.
‘Kateimatoai Aroaro Aika Raraoi’
14. Bukin tera ngkai ti riai ni kakorakoraira ngaira aika Kristian ni kaotii aroaro aika raraoi?
14 E noraki te bwai ni kakairi riki teuana ae kakawaki n ana taeka Betero imwina riki ae kangai: “Kam ana kaoti aroaro aika a raraoi i buakoia bekan. A kabuakakaingkami bekan ba aongkoa tani kamarua ngkami; ma ngkana a nori ami makuri aika a raraoi, ao a na neboa te Atua iai n te Bong ae e na roko iai.” (1 Betero 2:12, BK) Ngkai Kristian ngaira, ti riai ni kekeiaki ni kaakaraoa ae moanibaan te raoiroi. Ti kakorakoraira ni kamatebwai n ara kuura, ao ti rangi ni mwamwakuri ma ni kakaonimaki n ara tabo ni mwakuri, e ngae ngkana e aki raoiroi ana babaire ara mataniwi. I nanon utu aika bwenaua, e kakorakoraa n tou mwin reirei ni Kristian te buu-te-mwaane ke te buu-te-aine. E bon aki bebete karaoan aei n taai nako, ma ti bon ataia bwa e kakukureia Iehova aroaron maiura ae moanibaan te raoiroi ao e aki toki n oti uaana ae raoiroi nakoia ake tiaki taani Kakoaua.—1 Betero 2:18-20; 3:1.
15. Ti kanga n ataia bwa e a taabangaki ngkai ataakin ae a rangi n raraoi aroaroia Ana Tia Kakoaua Iehova?
15 E boretiaki i nanoni beebwa ni kaongora i nanon ririki aika a a tia n nako, aroia n teimatoa angiia Ana Tia Kakoaua Iehova n tokanikai ni kaakaraoi aroaro ni maiu aika raraoi. N aron aei, e ribootinaki n te nutibeebwa ae te Il Tempo mai Itare ae kangai: “Aomata ake a uaia ni mwakuri ma Ana Tia Kakoaua Iehova, a taekiniia bwa bon taani mwakuri aika kakaonimaki, aika a rangi n ira nanon aia onimaki ao a taraa n ae e a taonaki nako aia iango iai, ma e ngae n anne a bon riai ni karineaki ibukin aroaroia ni kakaonimaki.” E taekina naba ae kangai te nutibeebwa ae te Herald mai Buenos Aires, i Argentina: “A a tia ni kakoauaki Ana Tia Kakoaua Iehova i nanon ririki aika mwaiti bwa aomata aika a mwakuri korakora, a karaoa te mwakuri ma nanoia ni koaua, a aki bakatae ao a mamaaka te Atua.” E taekina ae kangai te tia rabakau ae kaain Rutia ae arana Sergei Ivanenko: “A rangi n ataaki Ana Tia Kakoaua Iehova ni kabuta te aonnaba bwa a ongeaba nakon te tua, ao riki n aroia ni kakaonimaki ni kabwakaan aia angabwai.” E taekina ae kangai te manatia temanna n te tabo ni botaki i Zimbabwe, are a kakabongana Ana Tia Kakoaua Iehova ni kaakaraoa iai aia bwabwaro: “I noriia tabeman Taani Kakoaua bwa a rikorikoi maange ao a kaitiaki naba taabo n nako tinaniku. E a rangi n itiaki riki ara tabo imwin aia botaki, nakon are mai imwaina. E bon raoiroi maiuia ami roro-n-rikirake. Ai bia e kaonaki te aonnaba aei irouia Ana Tia Kakoaua Iehova.”
Te Aantaeka ni Kristian
16. Tera arora n itoman ma taan tautaeka n te aonnaba, ao bukin tera?
16 E taekina naba arora Betero n itoman ma aomata ake a a tia n anganaki te mwaaka n tautaeka n te aonnaba, ngke e kangai: “Kam na ri aan taeka ni kabane aika aia taeka aomata i bukin te Uea: ae ana taeka te king, ngkai mataniwin te aba ao aia taeka taan tau-taeka, ba kaanga akana kanakoaki i rouna ba a na kareke kaiia akana kakaraoa ae buakaka, ao a na karaoiroiia akana karaoa ae raoiroi. Ba aio nanon te Atua, ba kam na bonoti win aia babanga aomata ake a nanobaba, n ami karaoa ae raoiroi.” (1 Betero 2:13-15) Ti kakaitau ibukin kakabwaia aika a reke nakoira man te tautaeka, ao ti kairaki n ana taeka Betero bwa ti na ongeaba n ana tua ao ni kakaonimaki naba ni kabwakai ara angabwai nakon te tautaeka. E ngae ngkai ti ataia ae e anganaki mwaakana te tautaeka i aon te aba iroun te Atua bwa e na kona ni katuuaia aomata ake a karitei nakon te tua, ma oin raoi ara aantaeka irouia, bon “i bukin te Uea.” Bon ana kaantaninga te Atua aei. Ao irarikin naba anne, ti aki tangiria bwa e na kabuakakaki aran Iehova ngkana ti katuuaeaki ibukin karaoan mwakuri aika bubuaka.—I-Rom 13:1, 4-7; Tito 3:1; 1 Betero 3:17.
17. Ngkana a karitei nakoira “aomata ake a nanobaba,” tera ae ti kona ni kakoauaa bwa e na bon riki?
17 Te kananokawaki, bwa tabeman “aomata ake a nanobaba” are iai te mwaaka irouia, a bwainikirinira, ke a karitei nakoira n aanga riki tabeua, n aron are a kona n uaraoira nakoia aomata bwa ti aonga n riribaaki. E ngae n anne, ma n rokon ana aua Iehova, ao a na bane ni kaotaki aia kewe ao e na kainaki naba ni kamatoaki ‘wia akana a babanga.’ E na boni kaotaki man aroarora ni Kristian, bwa aeka n aomata raa ngaira. Bon aei bukina ae a aki toki iai taani mwakuri n te tautaeka aika kakaonimaki n tataekinira bwa taani kaakaraoa ae raoiroi ngaira.—I-Rom 13:3; Tito 2:7, 8.
Ana Toro te Atua
18. N aroia Kristian, aanga raa aika ti na kona n totokoa iai kamanenan inaaomatara n te aro ae rangi ni buakaka?
18 E kauringira Betero ni kangai: “Kaotingkami ba kam inaomata, ma tai kabongana inaomatami ba karaban aromi aika a bubuaka; ma kaotingkami ba ana toro te Atua.” (1 Betero 2:16 BK; I-Karatia 5:13) Ni boong aikai, ara atatai i aon ana koaua te Baibara, e kainaaomataira man aia reirei Aaro aika kewe. (Ioane 8:32) Irarikin anne, a a kainaaomataki ara iango ao ti a kona n rinei bwaai aika ti tangiri. Ma e ngae n anne, ti na aki kabongana inaaomatara aei n te aro ae rangi ni buakaka. Ni kaineti ma rineakin raoraora, ara kunnikai, aron katamaroaara, arora ni kakibotu ao ai uana naba ma karara ao nimara, ti riai n ururinga are, Kristian ni koaua bon ana toro te Atua aika a aki iri oin nanoia ni kakukureiia. Ti rineia bwa ti na toro iroun Iehova ao ti na aki toronaki ni kaibwabwarun te rabwata, ke bwaai aika a tangiraki irouia aomata ma ana waaki nako te aonnaba.—I-Karatia 5:24; 2 Timoteo 2:22; Tito 2:11, 12.
19-21. (a) E kanga aron ara iango ibukia aomata ake a anganaki te mwaaka n tautaeka? (b) A kanga tabeman ni kaotiota ae a ‘tangiriia tariia’? (c) Tera te mwioko ae te kabanea ni kakawaki ibukira?
19 E reitia nako Betero ni kangai: “Karineia aomata ni kabaneia, tangiria tarimi, maaka te Atua, ao karinea te Embera.” (1 Betero 2:17, BK) Ti kaotiota karineaia aomata kioina ngkai bon Iehova ae te Atua ae e a tia n angania aomata akanne te mwaaka n tautaeka. Ti kona naba n aki toki n tataro ibukiia, bwa ti aonga ni kariaiakaki ni waakina ara mwakuri n te rau ao n tangiran te Atua. (1 Timoteo 2:1-4) Ao n te tai naba anne, ti na bon ‘tangiriia tarira.’ Ti mwamwakuri n taai nako ibukin kabwaiaia tarira ni Kristian ao tiaki ibukin kamarakaia.
20 Nora te katoto, ngke e a maenako te botannaomata i aon Aberika imwin te kakeru i marenaia aomata aika kakaokoro aia reeti, ao e noraki iai okoron aroaroia Kristian aika Ana Tia Kakoaua Iehova. E ribootina ae kangai te nutibeebwa ae te Reformierte Presse mai Switzerland: “N te ririki 1995, kaain te Botaki Ibukin Inaaomataia Kaain Aberika . . . a kakoauaa bwa a irekereke Aaro ni kabane n [te kakeru anne] ma tii Ana Tia Kakoaua Iehova aika a aki ira buakona.” Ngke e a butanako te rongorongo ae kananokawaki aei n aaba nako, ao Ana Tia Kakoaua Iehova ake i Eurobe a waekoa ni kanakoi amwarake ao bwaai-n-aoraki nakoia tariia ao tabeman riki n te aba are e riki iai te kabuanibwai. (I-Karatia 6:10) A iri nanon taeka ake n Taeka N Rabakau 3:27: “Tai taua te bwai ae raoiroi mairouia akana e riai anganakiia, ngkana e kona baim ni karaoia.”
21 Iai te mwioko ae rangi ni kakawaki riki nakon baera are ti na karineia mataniwi aika a tei n te tautaeka, ao ti na tangiriia tarira. Tera te mwioko anne? E taku Betero “Maka te Atua.” E rangi ni korakora riki baera iroun Iehova nakon baera irouia aomata. E na kanga ni koaua anne? Ao ti na kanga n uaia ni karaoa tabera iroun te Atua ma baera irouia mataniwi aika a tei n te tautaeka n te aonnaba? A na kaekaaki titiraki aikai n te kaongora are imwin aei.
Ko Uringnga?
• Tera tabeia Kristian i nanon te utu?
• Ti na kanga ni kaotiota te nano ni kan anga i nanon te ekaretia?
• Tera mwiokoara ni kaineti ma te botannaomata?
• Baikara kakabwaia tabeua aika a reke man teimatoara ni karaoi aroaro ni maiu aika rangi n raraoi?