“E Na Kaaningkami”

“E aki raroa mai roura [te Atua] n tatabemanira nako.”​—MWAKURI 17:27.

1, 2. (a) Tera te titiraki ae tao ti kona n tabekia ni kaineti ma te tia Karikiriki, ngkana ti tararake n taraa karawa ae on n taian itoi? (b) E kanga ni kakoauaa nakoira te Baibara bwa a kakawaki aomata i matan Iehova?

KO A tia n tararake n taraa karawa ae onrake n taian itoi n te tairiki teuana, ao e rotaki nanom n te mimi? E karika te kamimi ae korakora mwaitin itoi aika bati ao abwabwakin te maranga i marenan bwaini karawa. E rangi n uangingi te aonnaba ngkai e mena n te iuniweeti ae koro buburana. E nanonaki iai ngkanne bwa e rangi ni kangaanga iroun te tia Karikiriki are ngaia ae “Moan te Rietata i aonaba ni bane,” bwa e na mutiakinia aomata ke e a rangi n raroa ao e a aki kona n neneraki taekana irouia aomata?​—Taian Areru 83:18.

² E kakoauaa nakoira te Baibara bwa a rangi ni kakawaki aomata i matan Iehova. Ni koauana, e kaungaira ana Taeka te Atua bwa ti na ukoukoria ngke e kangai: “E aki raroa mai roura n tatabemanira nako.” (Mwakuri 17:27; 1 Rongorongo 28:9) Bwa ngkana ti tou mwaneka ake ti na kaaniaki iai ma te Atua, ao e na bon butimwaei arora ni kakorakora iai. N te aro raa? E riinga te nano te kaeka ae mena n te kibu ibukin te ririki 2003: “E na kaaningkami.” (Iakobo 4:8) Ti na maroroakin ngkai tabeua kakabwaia aika kamimi ake e karerekei Iehova nakoia te koraki ake a kaania.

Ana Bwaintangira Iehova

3. Tera te bwaintangira ae e anga Iehova nakoia te koraki ake a kaania?

³ Te moanibwai, iai irouia ana toro Iehova te bwaintangira ae kakawaki are e a tia ni kawakinna ibukia ana aomata. Bwain te aonnaba aei n aron te mwaaka, te kaubwai, ao te rabakau a bon aki kona ni karekea te bwaintangira aei. Bon tii Iehova ae kona n anga te bwaintangira aei nakoia te koraki ake a kaania. Tera te bwaintangira aei? E kaeka ana Taeka te Atua ni kangai: “Ngkana . . . ko kanenea bwanam nakon te ataibwai; ngkana ko ukoukoria ba kaanga te tirewa, ma n neneria ba kaanga te bwai ae kakawaki ae raba; ao ane ko na ataa iai makan Iehova, ao e na reke iroum te atatai i aon taekan te Atua. Ba E anganga te rabakau Iehova.” (Taeka N Rabakau 2:3-6, NW) Iangoi aroia aomata aika aki-kororaoi aika a kona ni karekea “te atatai i aon taekan te Atua”! Te bwaintangira anne, ae te atatai ae kuneaki n ana Taeka te Atua, e kabotauaki ma te “bwai ae kakawaki ae raba.” Bukin tera?

4, 5. Bukin tera bwa e kona ni kabotauaki “te atatai i aon taekan te Atua” ma “te bwai ae kakawaki ae raba”? Kabwarabwaraa.

⁴ Bukina teuana, bwa e rangi ni kakawaki te atatai i aon taekan te Atua. Teuana kakawakina ae rangi n rianako riki bon te kaantaninga ibukin te maiu are akea tokina. (Ioane 17:3) Ma te atatai anne e kanakoraoa naba maiura ngkai. N te katoto, imwin neneran raoi ana Taeka te Atua ao ti kona n atai kaekaan titiraki aika kakawaki n aron ae: Antai aran te Atua? (Taian Areru 83:18) Tera raoi aroia maate? (Te Minita 9:5, 10) Tera ana kaantaninga te Atua ibukin te aonnaba ao ibukia aomata? (Itaia 45:18) Ti a tia naba n ataia bwa e nakoraoi riki maiura man maiuakinan ana reirei te Baibara aika raraoi. (Itaia 30:20, 21; 48:17, 18) Mangaia are iai bwaai ni kairiri aika riai ake a buokira bwa ti na tokanikai i aon tangiran bwaikorakin te maiu aei, ao a kairira naba bwa ti na karekea te maiu ae reke iai te kukurei ni koaua ao te raunnano. Ma ae moan te kakawaki riki, e a tia ara ukeuke man ana Taeka te Atua ni kairira bwa ti na atai aroaron Iehova aika kamimi ao ni kani kaania riki. Tera te bwai ae kakawaki riki nakon karekean te iraorao ae kaan ma Iehova are e boboto i aon “te atatai i aon taekan te Atua”?

⁵ Iai riki bukina teuana ngkai e kabotauaki te atatai i aon taekan te Atua ma “te bwai ae kakawaki ae raba.” E kangaanga rekena n te aonnaba aei n aron naba kangaangan reken bwaai aika kakawaki aika bati. Ma iai ngkai onoua te mirion mwaitia taan taromauria Iehova mai buakoia kaain te aonnaba ae onoua te birion, ke tao 1 mai buakoia 1,000 ae a a tia ni karekea “te atatai i aon taekan te Atua.” Ibukin kabwarabwaran te bwai ae kakawaki aei, are reke man ataakin te koaua man ana Taeka te Atua ma e kangaanga rekena irouia aomata, ao iangoa moa te titiraki teuana ae kaineti ma te Baibara. Tera ae e riki nakoia aomata ngkana a mate? Ti ataia man te Baibara bwa e mamate te taamnei ao a aki ataa te bwai teuana maate. (Etekiera 18:4) Ma e teimatoa ni butimwaeaki irouia angiia Aaro n te aonnaba aei, te koaua ae kairua are aongkoa iai te bwai ae teimatoa ni maiu i nanon te aomata imwin matena. Boni ngaia naba teuana aan aia reirei Aaro ake aongkoa Kristian ngaiia. Ma e taabangaki naba irouia Buddhist, Intu, Mutirim, kaain te Jain, I-Iutaia, Shinto, Sikh, ao te Taoism. Ma iangoia bwa birion mwaitia aomata aika a mwamwanaaki n te reirei ae kairua aei!

6, 7. (a) Antai aika a tii kona ni kunea “te atatai i aon taekan te Atua”? (b) Baikara katoto aika a kaotia bwa e a tia Iehova ni kakabwaiaia ana aomata n te atatai, are a mwaiti iai aika kainaaomataki mai buakoia “akana rabakau ma akana wanawana”?

⁶ Bukin tera bwa e karako te aomata ae e kona ni kunea “te atatai i aon taekan te Atua”? Ibukina bwa akea temanna ae e kona n ota n nanon ana Taeka te Atua ngkana e aki buokaki iroun te Atua. Uringnga, bwa te atatai aei bon ana bwaintangira Iehova ao e angania tii te koraki ake a kan nenera ana Taeka ma nanoia ni koaua ao te nanorinano. Tao a kona aomata aikai n aki “wanawana ni wanawanan aonteaba.”(1 I-Korinto 1:26, BK) A mwaiti i buakoia aika a kona n atongaki bwa a ‘aki reirei ao a aki ataibwai’ n ana waaki te aonnaba. (Mwakuri 4:13) Ma e aki kakawaki anne. E kakabwaiaira Iehova ni karekea nakoira ‘te atatai i aon taekana’ ibukin nanora aika raraoi.

⁷ Iangoa te katoto teuana. A mwaiti taan rabakau n Aaro aika aongkoa Kristian ngaiia aika a a tia ni betani aron aia kabwarabwara i aon te Baibara. Aia mwakuri ake a kaakaraoi, e kona n nanonaki iai kabwarabwaran rongorongon rimoa, nanon taeka n Ebera ao n Erene, ao a a bati riki. A a tia taan ukeuke aikai ni karekea “te atatai i aon taekan te Atua” imwin aia reirei ae bati? A mataata n ana boto n reirei te Baibara, are kaotan riain mwaakan Iehova n tautaeka rinanon ana Tautaeka n Uea i karawa? A ataia bwa Iehova ae te Atua bon tiaki te Temanna-n-teniman? Ni kaitaraan anne, iai iroura te ota ae eti raoi ibukin bwaai aikai. Bukin tera? E a tia Iehova ni kakabwaiaira n anganira te atatai ni kaineti ma koaua i aon bwaai n taamnei aika mwaiti, ao a bati aika a kainaaomataki iai mai buakoia “akana rabakau ma akana wanawana.” (Mataio 11:25) E kanga Iehova ni kakabwaiaia te koraki ake a kaania!

“E Kawakinia Iehova Akana Tangiria ni Kabaneia”

8, 9. (a) E kanga Tawita ni kabwarabwaraa te kakabwaia teuana ibukia te koraki ake a kaania Iehova? (b) Bukin tera bwa a kainnanoa ana kamanomano te Atua Kristian ni koaua?

⁸ Te kakabwaia teuana ae taekan ana kamanomano te Atua, e reke naba irouia te koraki ake a kaania Iehova. E korea ae kangai te tia areru ae Tawita, are e a mwaiti ana tai n rinanon te kangaanga: “E a kaan Iehova nakoia akana weteia ni kabaneia, nakoia akana weteia n te koaua ni kabaneia. E na karekea ae a tangiria akana makua; ao E na ongo tangia, ao E na kamaiuia. E kawakinia Iehova akana tangiria ni kabaneia.” (Taian Areru 145:18-​20) Eng, e boni kaan Iehova ma ake a tangiria ao ai ngaia are e a waekoa iai n ongo aia bubutii ibukin kani buokakiia.

⁹ Bukin tera bwa ti kainnanoa ana kamanomano te Atua? Ibukina bwa Kristian ni koaua a a riki bwa ana taakete uton ana Kairiribai Iehova ae Tatan te Riaboro, irarikin namakinan ae a maeka n “tai aika kamamate.” (2 Timoteo 3:1) E kataia te tia kairiribai ae wanawana aei ni ‘kamwaneira.’ (1 Betero 5:8) E bwainikirinira Tatan, e kairoroira ao e karokoi kataaki nakoira. E taratarai naba nanora ao ara iango bwa e aonga ni kona ni karekea iai ana anga n atikira nako. Iai tiana ae uaiakinna bwa kamamaraan ara onimaki ao uruan arora n te itera n taamnei. (Te Kaotioti 12:12, 17) Kioina ngkai iai ara kairiribai ae rangi ni korakora are ti riai n tokanikai i aona, e aki ngkanne kaninikoriaira ataakin ae “E kawakinia Iehova akana tangiria ni kabaneia”?

10. (a) E kanga Iehova ni kamanoia ana aomata? (b) Te aeka ni kamanomano raa ae te kabanea ni kakawaki, ao bukin tera?

¹⁰ E kanga Iehova ni kamanoia ana aomata? E aki nanonaki ikai ana berita ibukin kamanoara bwa e nang bon akea te kangaanga i nanoni maiura n te aonnaba aei, ao e aki naba nanonaki iai bwa e kabaeaki bwa e na karaoi kakai ibukin kamaiuara. Ma e ngae n anne e katauraoa te kamanomano n te itera n rabwata Iehova ibukia ana aomata nako. E na aki naba kariaia kamaunakia taan taromauri ni koaua mai aon te aba iroun te Riaboro! (2 Betero 2:9) Ma ae kakawaki riki, e boni kamanoira Iehova n te itera n taamnei. E katauraoi baika ti kainnanoi bwa ti aonga n nanomwaaka i aan taiani kataaki, ao e kanakoraoa ara itoman ma ngaia. Ni koauana, te kamanomano n taamnei bon te bwai ae te kabanea ni kakawaki. Bukin tera? Ibukina bwa ngkana ti teimatoa n iraorao ma Iehova, ao bon akea te bwai ae e na teimatoa ni kammarakira n ikotaki naba ma te mate.​—Mataio 10:28.

11. Baikara babaire ake e karaoi Iehova ni kaineti ma te kamanomano n taamnei ibukia ana aomata?

¹¹ E a tia Iehova ni katauraoi babaire aika bati ni kaineti ma te kamanomano n taamnei ibukia te koraki ake a kaania. Rinanon ana Taeka, ae te Baibara ao e anganira iai te rabakau ni kaaitarai kataaki aika kakaokoro nako. (Iakobo 1:2-5) Ti boni kamanoaki man maiuakinan reirei ake a kuneaki n te Baibara. Irarikin naba anne, Iehova e katauraoa “te Tamnei are Raoiroi nakoia akana butiia.” (Ruka 11:13) E bon rangi ni mwaaka te taamnei anne i aon bwaai ni kabane, mangaia are e kona ni katae nangira bwa ti na tokanikai i aoni kataaki ke kariri ake ti kona ni kaaitara ma ngaai. E katauraoi naba “bwaai n tituaraoi aika mwaane” Iehova rinanon Kristo. (I-Ebeto 4:8, NW) Mwaane aika tangiri bwaai n taamnei aikai, a kakorakoraia ni kaotiota aron ana nanoanga Iehova ngkana a buokiia raoia n taromauri.​—Iakobo 5:14, 15.

12, 13. (a) Tera ae nanonaki n are e katauraoa te amwarake n taamnei Iehova nakoira n te tai ae riai? (b) Tera aron am namakin n ana babaire Iehova ibukin mweeraoira n taamnei?

¹² E katauraoa naba te amwarake n taamnei Iehova n taina ae riai ibukin kamanoara. (Mataio 24:45) E katauraoi naba bwaai aika ti kainnanoi n taia aika riai rinanon booki ake a boretiaki n ikotaki naba ma Te Taua-n-Tantani ao te Awake!, ao ai rinanon kaean taiani bobotaki, ruunga ao bwabwaro. Ko kona n uringa te botaki ni Kristian teuana, te runga, ke te bwabwaro ae ko ongo iai taekan te bwai ae riinga nanom, ma ni kakorakorako ke ni kabebeteko? Ko a tia ni wareka te kaongora teuana ni booki akana a koreaki taekaia i eta ao n namakinna bwa te rongorongo anne e kaineti raoi nakoim?

¹³ Teuana mai buakon ana bwai ni buaka Tatan ake taiani kabanea ni korakora, boni kabwaran nanoia aomata ao ti kona n rotaki n uaan ana mwakuri anne. E ataia Tatan bwa e na kona n anaaki korakorara ao ti na kai reke naba n te kangaanga, ngkana e teimatoa ni bwara nanora. (Taeka N Rabakau 24:10) Ti kainnanoa buokara ibukina bwa e kataia Tatan ni kariri nanora n taai ake a bubuaka iai ara namakin. A aki toki ni boretiaki rongorongo ni maekatin aika Te Taua-n-Tantani ao te Awake! aika buokira bwa ti na tokanikai i aon te bwarannano. E korea ae kangai te tari te aine ni Kristian ni kaineti ma te kaongora teuana: “E kuri ni katoa bong warekan te kaongora aei irou, ao e aki toki n tim rannimatau iai. I kakawakinna i rarikin au kainiwene bwa I aonga ni wareware iai ngkana e rotai te bwarannano. I kona n namakina bain Iehova ni kamanoai rinanoni kaongora aikai.”a Ti aki ngkanne kakaitau nakon Iehova ibukin katauraoan amwarake n taamnei ibukira n taia aika riai? Uringnga bwa ana babaire ibukin mweeraoira n taamnei, boni bwaai ni kakoaua bwa e boni kaan ma ngaira ao e katikuira i aan ana tararua.

Katauaki ni Kawara te Tia “Ongo Tataro”

14, 15. (a) Tera te kakabwaia are e anga Iehova nakoia te koraki ake a kaania? (b) Bukin tera bwa katauakira ni kawara Iehova n te tataro bon te kakabwaia ae kamimi?

¹⁴ Ko a tia n noria ae ngkana e reke te mwaaka ma te tautaeka irouia aomata, ao e a moanna naba n tei nangin kakawaraia irouia te koraki ake a mena i aan aia kairiri? Ma tera aron Iehova ae te Atua? E kangaanga irouna mutiakinan raraomaia aomata aika mangori? E aki! Te bwaintangira ae te tataro bon te kakabwaia naba teuana are e anga Iehova nakoia te koraki ake a kaania. Katauakin temanna ni kawara te tia “ongo tataro” bon te kakabwaia ae rangi ni kamimi. (Taian Areru 65:2) Bukin tera?

¹⁵ Ni kabwarabwarana: A mwaiti nako taben te mataniwi n te botaki ni mwakuri teuana ae bubura. E iangoia bwa baikara bwaai aika e na karaoi i bon irouna, ao baikara bwaai ake e na angania tabemwaang bwa a na karaoi. N aron naba anne, iai iroun te tia Tautaeka ae Rietata i aon bwaai ni kabane te kona n iangoia bwa baikara bwaai ake e na karaoi ao baikara bwaai ake e na angania tabemwaang. Iangoi ni kabane bwaai ake e anga Iehova nakon Natina ae tatangiraki irouna ae Iesu. E a tia n angan Natina “mwakana ni motiki taeka.” (Ioane 5:27) A mena anera “i aan ana taeka.” (1 Betero 3:22) E a tia ni buoka Iesu taamnein Iehova ae mwaaka, bwa e na kairiia taan rimwina i aon te aba. (Ioane 15:26; 16:7) Anne bukina are e kona ni kangai iai Iesu: “I anganaki te mwaka ni kabanea i karawa ao i aonaba.” (Mataio 28:18) Ma ni kaineti ngkanne ma te tataro, e a tia ni baireia Iehova bwa boni ngaia are e na tabena ongoraeakinan te tataro. Anne bukina are e kairira iai te Baibara bwa ti na tataro tii nakon Iehova rinanon aran Iesu.​—Taian Areru 69:13; Ioane 14:6, 13.

16. Bukin tera ngkai ti kona ni kakoauaa raoi bwa e boni kakauongo Iehova n ara tataro?

¹⁶ Te koaua bwa e boni kakauongo raoi Iehova nakon ara tataro? Ngke arona bwa akea nanona ni mutiakinira ao e na bon aki kona ni kaumakira bwa ti na “botumwaka n tataro” ke ni kaki rawawatara ma raraomara irouna. (I-Rom 12:12; Taian Areru 55:22; 1 Betero 5:7) Tooro aika kakaonimaki n taai ake e koreaki iai te Baibara, a kakoauaa raoi bwa e bon ongora Iehova n te tataro. (1 Ioane 5:14) Mangaia are e taekina ae kangai te tia areru ae Tawita: “E na ongo bwanau [Iehova].” (Taian Areru 55:17) Iai naba riaina iroura bwa ti na kakoauaa ae e kaan Iehova ma ngaira, ao e tauraoi n ongoraeakin ara iango ma tabeaiangara nako.

E Kakabwaiaia Ana Toro Iehova

17, 18. (a) Tera aron ana namakin Iehova ibukin aia mwakuri ni kakaonimaki ana karikibwai aika wanawana? (b) Kabwarabwaraa bwa e kanga Taeka N Rabakau 19:17 ni kaotia bwa a noraki raoi ara mwakuri n nanoanga iroun Iehova.

¹⁷ Mwaakan Iehova n Tautaeka i aon Bwaai ni Kabane, e aki kona n rotaki ni mwakuri ake a kona ni karaoi aomata ke ake a rawa ni karaoi. Ma e ngae n anne, Iehova bon te Atua ae tatauraoi ni butimwaira. N etina, e tangiri aia mwakuri ni kakaonimaki ana karikibwai aika wanawana ao e tarai aia mwakuri bwa a kakawaki. (Taian Areru 147:11) Te bwai naba teuana ae noraki kakukureina irouia te koraki ake a kaan ma Iehova, boni kakabwaiakia ana toro irouna.​—Ebera 11:6.

¹⁸ E katereterea te Baibara bwa a kakawaki iroun Iehova bwaai ake a karaoi taan taromauria. N aron anne, ti wareka ae kangai: “Ane nanoangaea te aomata ae akea ana bwai ao e angan Iehova, ao ana makuri ae raoiroi aei E na manga kaboa.” (Taeka N Rabakau 19:17) Ana nanoanga Iehova nakoia aomata aika akea aia bwai, e kaotaki raoi n ana Tua Mote. (Nakoaia Ibonga 14:21; 19:15) Tera aron ana namakin Iehova ngkana ti katotonga ana nanoanga n ara mwakuri nakoia aika akea aia bwai? Ngkana ti anga bwaai nakoia aika akea aia bwai n aki kaantaningaa kabooan mwina mairouia, ao e taraa aei ngkanne Iehova bwa kanga ana taarau. E berita Iehova bwa e na kabooa mwin te taarau anne n te akoi ao te kakabwaia. (Taeka N Rabakau 10:22; Mataio 6:3, 4; Ruka 14:12-​14) Eng, e ringaki nanon Iehova, ngkana ti kaota te nanoanga nakon temanna raora n taromauri ae kainnanoa buokana. Ai kakaitau ra ngaira n ataakin ae a noraki raoi ara mwakuri n nanoanga ni bane, iroun Tamara are i karawa!​—Mataio 5:7.

19. (a) Bukin tera bwa ti kona ni kakoauaa ae a kakawaki iroun Iehova baike ti karaoi n te mwakuri n uarongorongo ao karekeaia taan rimwin Iesu? (b) E kanga Iehova ni kakabwaiai mwakuri aika karaoaki ni boutokaa ana Tautaeka n Uea?

¹⁹ E rangi ni kakawaki riki i matan Iehova te mwakuri are ti karaoia ibukin ana Tautaeka n Uea. Ngkana ti kaanira ma Iehova, ao e bon riiriki ae ti na bae n tangira kabanean ara tai, korakorara, ao kaubwaira ni buoka te mwakuri n tataekina rongorongon te Tautaeka n Uea ao karekeaia taan rimwin Iesu. (Mataio 28:19, 20) Tao ti kona n namakinna n taai tabetai bwa e uarereke mwin ara mwakuri. Tao e kona nanora ae aki-kororaoi ni kairira bwa ti na iangoia ae e kukurei Iehova n ara kakorakora ke e aki. (1 Ioane 3:19, 20) Ma e ngae ngke ti karaoa ae uarereke, ma e kakawaki anne iroun Iehova ngkana e nako man te nano ae aanaki n te tangira. (Mareko 12:41-​44) E taekina ae kangai te Baibara: “E aki ribuaka te Atua ni manuoki ami makuri ma ami tangira are kam kaotia nakon arana.” (Ebera 6:10) Ni koauana e uringi mwakuri aika uarereke Iehova ake a boutokaa ana Tautaeka n Uea ao e kakabwaiai. Irarikin kakabwaia n taamnei aika rereke ngkai, ti kona n iangoa taekan te kimwareirei n rokon te aonnaba ae boou ike e nang kaurea iai baina Iehova ao ni karekei baika raraoi ake a tangiri te koraki ake a kaania!​—Taian Areru 145:16; 2 Betero 3:13.

20. Ti na kanga ni kona n teimatoa ni mutiakin taeka ake a mena n ara kibu ibukin te ririki 2003, ao tera mwina?

²⁰ Rinanon te ririki 2003, ti na titirakinira iai bwa ti kateimatoaa korakorara ni kaania Tamara are i karawa ke tiaki. Ngkana ti kateimatoaa, ao ti kona ni kakoauaa bwa e na kaboa mwina n aron are e a tia ni beritanna. Ma ae kakawaki riki bwa ‘e aki kona ni kewe te Atua.’ (Tito 1:2) Ngkana ko kaania, ao e na manga kaaniko. (Iakobo 4:8) Ao tera mwina? Ti na karekei kakabwaia aika bati ngkai ao kaantaningan te itoman ae kaan riki ma Iehova n aki totoki!

[Kabwarabwara ae nano]

Ko Uringnga?

• Tera te bwaintangira are e anga Iehova nakoia te koraki ake a kaania?

• Baikara babaire ake e karaoi Iehova ni kaineti ma te kamanomano n taamnei ibukia ana aomata?

• Bukin tera bwa katauakira ni kawara Iehova n te tataro bon te kakabwaia ae kamimi?

• E kanga ni kaotia te Baibara bwa Iehova e butimwaai aia mwakuri ni kakaonimaki ana karikibwai aika wanawana?

[Taamnei n iteraniba 15]

E a tia Iehova ni kakabwaiaia ana aomata n te atatai ni kaineti ma koaua i aon bwaai n taamnei