‘Kam Na Korakora Ao Kam Na Ninikoria!’
“Tai kabarai nanomi: I a tia ni kataea ana kai aonteaba.”—IOANE 16:33, BK.
1. Tera te kaunganano are a anganaki I-Iteraera ngke a ataia bwa a tataningaki irouia aia kairiribai aika korakora?
NGKE a nang bon rinanon te Karaanga ae Ioretan nakon te Aba ni Berita I-Iteraera, ao e tuangia Mote ni kangai: “Kam na korakora ao kam na ninikoria, tai maku, ao a na tai bara nanomi i rouia: ba Iehova ae Atuam, boni Ngaia ae airi ma ngkoe.” Imwina, Mote e wetea Iotua are ngaia ae e na kairiia I-Iteraera nako Kanaan, bwa e na manga kauringnga bwa e na bwaina te ninikoria. (Te Tua-Kaua 31:6, 7) Rimwi riki e a manga kaungaaki Iotua iroun Iehova ni kangai: “Ko na korakora ma n ninikoria . . . Ko na ti korakora, ma ni bati n ninikoria.” (Iotua 1:6, 7, 9) A boni kaineti raoi taeka akanne ma aroaroia I-Iteraera n taai akanne. A na kainnanoa te ninikoria I-Iteraera bwa a aonga ni kaaitaraia aia kairiribai aika korakora ake a tataningaiia n iteran te karaanga ae Ioretan.
2. Te aeka n aroaro raa ae ti a mena i nanona ni boong aikai, ao tera ae ti kainnanoia?
2 Ni boong aikai, a nang waekoa n rin Kristian ni koaua i nanon te aonnaba ae boou, ma a riai naba n ninikoria n aron Iotua. (2 Betero 3:13; Te Kaotioti 7:14) E okoro arora ma aron Iotua bwa e buaka teuaei ma ana kabaang ao ana kai-ni-wai. Ma ngaira ti ira te bo-ni-buaka n taamnei ao ti aki kabonganai bwaai ni buaka aika kona n noraki. (Itaia 2:2-4; I-Ebeto 6:11-17) Irarikin anne, a mwaiti naba bo-ni-buaka aika kakamaaku ake e irii Iotua, e ngae ngke a a tia n rin n te Aba ni Berita. Ma ti kaaitara ngaira ma te kabanea ni kakamaaku ni bo-ni-buaka imwain rinra n te aonnaba ae boou. Ti na rinanon kangaanga tabeua ake ti a kainnanoaki iai bwa ti na ninikoria.
Bukin Tera bwa Ti na Kabokorakora?
3. Tera ae e kaotia te Baibara ibukin te tia kakaaitaraira ae te kabanea ni buakaka?
3 E korea ae kangai te abotoro Ioane: “Ti ataira ba mairoun te Atua ngaira, ao a bane kaain aonaba ni wene i nanon teuare buakaka.” (1 Ioane 5:19) Taeka akanne a kaota raoi bukina bwa e aera ngkai a riai Kristian ni kabokorakora ibukin kateimatoan aia onimaki. Ngkana e teimatoa ni kakaonimaki te Kristian, ao kanga titeboo ma e tokanikai i aon Tatan te Riaboro. Mangaia are e a ririaki Tatan n aron te “raian ae bekorara” ni kataia ni kakamaakuia ao ni kabwakaia Kristian aika kakaonimaki. (1 Betero 5:8) Ni koauana, e buakania Kristian aika kabiraki ao raoia. (Te Kaotioti 12:17) N te bo-ni-buaka aei, ao e kabonganaia aomata Tatan, aika iai mai buakoia aika a ataa kabonganakiia irouna, ao iai aika a aki. E kainnanoaki te ninikoria ibukin kaitaraan Tatan ma raona ni kabane.
4. Tera ana kauring Iesu are e anga, ao tera aroaroia Kristian ni koaua are a a tia ni kaotiotia?
4 Kioina ngke e ataia Iesu bwa Tatan ma raona nako a na kakorakoraia n totokoa te rongorongo ae raoiroi, ao E kauringia taan rimwina ni kangai: “A na anga ngkami ba kam na karawawataki, ao ane a na kamateingkami: ao ane kam na ribaki irouia botanaomata ni kabaneia i bukin arau.” (Mataio 24:9) A noraki koauan taeka akanne n te moan tienture, ao a a manga noraki naba koauaia ni boong aikai. Moan te rangi ni korakora aron bwainikirinaia taani Kakoaua ibukin Iehova tabeman n taai aikai. E botau korakorana ma korakoran bwainikirinaia ana aomata Iehova ake ma ngkekei ni karokoa ngkai. Ma e ngae n anne, a ninikoria Kristian ni koaua iai. A ataia bwa “e karokoa te ao-ni-katatai makan te aomata,” ao a aki kan reke n te bwai ni kamwane aei.—Taeka N Rabakau 29:25.
5, 6. (a) Baikara kangaanga aika a kainnanoia bwa ti na ninikoria? (b) Tera aroia Kristian aika kakaonimaki ngkana e kataaki aroia n ninikoria?
5 Irarikin te bwainikirinaki, iai riki kangaanga tabeua aika ti riai ni kaninikoriaira nako iai. Irouia tabeman, e katei nang tataekinan te rongorongo ae raoiroi nakoia aomata aika aki-kinaaki irouia. A kataaki ninikoriaia tabeman ataein te reirei, ngke a tuangaki bwa a na taetae n tuea ni kaota iai aia kakaonimaki nakon abaia ao nakon te buraeki ke n tei naba ibuakoia raoia n reirei ngkana e aneneaki anenen te aba. Ibukina bwa te taetae n tuea anne e kuri n titeboo ma te taromauri, ao te anene are e aneneaki e mwaneweaki iai te tataro ibukia te natannaomata, ataein te reirei ngkanne aika Kristian a ninikoria ni kani karaoa ae e kukurei riki iai te Atua. Moan te kaunganano aroaroia ae raoiroi aei.
6 Ti kainnanoa naba te ninikoria ngkana a tuangaki taani kanako-rongorongo irouia taani kakaaitaraira bwa a na katanoataa te ribooti ae kairua ibukia ana toro te Atua, ke ngkana a kataia ni kauarerekea te taromauri ni koaua man karaoan ‘te iowawa n aia kaetieti.’ (Taian Areru 94:20) N te katoto, tera ae ti riai n namakinna ngkana te rongorongo are n te nutibeebwa, te rerio, ke te TV e kabwaouai rongorongoia Ana Tia Kakoaua Iehova, ke e taekin keewe ibukiia? E riai bwa ti na mimi iai? E aki. Ti boni kaantaningai aekan bwaai aikai. (Taian Areru 109:2) Ao ti na aki mimi ngkana iai tabeman aomata aika a kakoauai rongorongora aika kairua aika boretiaki, kioina ngkai “e kakoauai taeka ni kabane te aomata ae aki wanawana.” (Taeka N Rabakau 14:15) Ma e ngae n anne, Kristian aika kakaonimaki a rawa ni kakoauai rongorongo aika karioaki ibukia tariia, ao a aki kariaia rongorongo aika kairua bwa e na karika aki-rokoia ni bobotaki ni Kristian, ke ni kauarerekea aia tai n ibuobuoki n te mwakuri ni minita, ke ni kamamaaraa aia onimaki. Ni kaitaraan anne, a “[kaotiia] ba ana minita te Atua . . . n te karineaki ao n te aki-karineaki, n te uaraoaki ao n te kamoamoaki. Kaanga ai aroia taani bureburea te aba [n aia iango taani kakaaitara], [ma ni koauana, a bon] . . . atonga naba te koaua.”—2 I-Korinto 6:4, 8.
7. Baikara titiraki aika a kona ni buokira n tuoa nanora?
7 E koroboki Bauro nakon Timoteo ni kangai: “E aki anganira te Atua te nano ae mamaku; ma E anganira te nano ae korakora . . . Ma ngaia ae ko na tai maamaa n taekina taekan ara Uea.” (2 Timoteo 1:7, 8; Mareko 8:38) Imwin warekan taeka akanne, ao ti kona n titirakinira ni kangai: ‘I maamaa n au koaua ke I ninikoria iai? I kaotia nakoia aomata ake a mena i rarikiu n au tabo ni mwakuri (ke n au kuura), ae ngai Ana Tia Kakoaua Iehova, ke I kataia ni karabaa? I maamaa ni kaokoroai ma aomata tabemwaang ke I kamoamoaa arou ni kaokoro ibukin au itoman ma Iehova?’ Ngkana iai temanna ae mamaaka tataekinan te rongorongo ae raoiroi, ke e maaku ibukina bwa e tei ibukin koaua aika riribaaki irouia angiia aomata, e bia uringa ana reirei Iehova nakon Iotua are kangai: “Ko na korakora ma n ninikoria.” Tai mwamwaninga, bwa e aki kakawaki are a iangoia raora ni mwakuri ke raora n reirei, ma e boni kakawaki ana iango Iehova ao Iesu Kristo.—I-Karatia 1:10.
Ti na Kanga ni Kona n Ninikoria Riki
8, 9. (a) E kanga ni kataaki ninikoriaia Kristian rimoa n te tai teuana? (b) Tera aroia Betero ma Ioane ngke a kaaitara ma taeka ni kakamaaku, ao tera te bwai are e riki nakoia ma tariia?
8 Ti na kanga ni kona ni karikirakea te aeka n ninikoria are e na kona ni kateimatoaa ara kakaonimaki ni boong aika bubuaka aikai? A kanga Kristian rimoa ni karikirakea te ninikoria? Iangoa are e riki ngke a tuangaki Betero ma Ioane irouia mataniwi aika ibonga ao unimwaane ake Ierutarem, bwa a na katoka aia mwakuri n tataekina aran Iesu. A rawa taan rimwin Kristo akekei ao ibukin anne a kakamaakaki ma a a manga kabwaraaki imwina. A manga botaki rimwi riki ma tariia, ao a bane n tataro ni kangai: “[Iehova] Ko na tarai aia taeka ni kamaku ngkai: ao Ko na angania am toro te taekina am taeka n aki maku teutana.” (Mwakuri 4:13-29) Ni kaekaan anne, Iehova e kakorakoraiia n te taamnei ae raoiroi, ao rimwi riki e kakoauaki aei irouia taani kairiri i Iutaia ngke a kaotia bwa a “kaona Ierutarem” n aia reirei.—Mwakuri 5:28.
9 Ti na rinanon ngkai te bwai are e riki n te tai arei. Ngke a kakamaakaki taan rimwin Kristo irouia taani kairiri i Iutaia, ao a aki iangoa katokan aia mwakuri ibukin korakoran te bwainikirinaki. Ma a tataro ibukin reken te ninikoria bwa a aonga n teimatoa n tataekina te rongorongo. Imwina, a karaoa ae boraoi ma aia tataro, ao e kakorakoraiia Iehova n taamneina ae raoiroi. E oti iai bwa are e koreia Bauro ibukin te bwai teuana, tabeua te ririki imwina, e kona ni kamanenaki naba irouia Kristian ngkana a bwainikirinaki. E taku Bauro: “I boni konai bwaai ni kabane ni karaoi iroun Teuare kakorakoraai.”—I-Biribi 4:13.
10. E a kanga rongorongon Ieremia ni buokiia te koraki ake bon anuaia te mamaamaa?
10 Ao tera ngkanne ngkana bon anuan maiun te aomata bwa e mamaamaa? E kona n ninikoria ni beku iroun Iehova n te tai are e a kaaitara iai ma te bwainikirinaki? E boni kona! Uringa ana taeka Ieremia ngke e rineia Iehova bwa te burabeti. E taku te rorobuaka n ataeinimwaane aei: “Te tei ngai.” E teretere man ana kaeka bwa e namakinna ae e aki tau. Ma e boni kaungaa naba Iehova n taeka aikai: “Tai kangai, Te tei ngai: ba ane I kanakoko nako ina ao ko na kawaria, ao ane I tuangko ao ko na taekinna. Ko na tai maku i rouia: ba I memena i roum ni kamaiuko.” (Ieremia 1:6-10) E onimakina Iehova Ieremia, ao n tokina, e a tokanikai i aon namakinan ae e aki tau n tataekina te rongorongo ibukina bwa e kakorakoraki iroun Iehova. E a riki bwa te tia kakoaua ae ninikoria i aon Iteraera.
11. Tera ae e buokiia Kristian ni boong aikai bwa a na katotonga Ieremia?
11 Kristian aika kabiraki ni boong aikai, iai naba mwiokoaia ae ai aron are e mwiokoaki iai Ieremia. A boutokaki te koraki aei irouia kaain “te koraki ae uanao” aika “tiibu tabemang,” ao a teimatoa n tataekina ana kaantaninga Iehova, n aki ongea rawaia aomata ni kan ongora irouia, kakanikoaia, ao bwainikirinaia. (Te Kaotioti 7:9; Ioane 10:16) A kaungaaki n ana taeka Iehova nakon Ieremia ae kangai: “Tai maku.” A aki kona ni mwanuokinna are a a tia ni mwiokoaki iroun te Atua, ao a tataekina ana rongorongo.—2 I-Korinto 2:17.
Aomata Aika Ninikoria Aika Ti Riai ni Kakairi Irouia
12. Tera te katoto ae moanibaan te raoiroi ae kaineti ma te ninikoria are e kaotiotia Iesu, ao e kanga ni kaungaia taan rimwina?
12 Ti kona ni buokaki man arora ni karikirakea te ninikoria, ngkana ti kananoa iangoan aia katoto tabemwaang n aron Ieremia, are e a tia ni bwaina te ninikoria. (Taian Areru 77:12) N te katoto, ngkai ti nenera rongorongon ana mwakuri ni minita Iesu, ao ti a kaungaki n arona n ninikoria ngke e kaririaki iroun Tatan, ao imwina ngke e a manga kaaitara ma aia waaki n totoko taani kairiri i Iutaia. (Ruka 4:1-13; 20:19-47) Ni korakoran Iehova, e nene ana onimaki Iesu, ao tabeua te tai imwain matena, e taku nakoia taan rimwina: “Kam na bae ni maraki i aonteaba, ma tai kabarai nanomi: I a tia ni kataea ana kai aonteaba.” (Ioane 16:33, BK; 17:16) Ngkana a na kakairi taan rimwin Iesu n ana katoto, ao a riai naba ni kataea ana kai aon te aba. (1 Ioane 2:6; Te Kaotioti 2:7, 11, 17, 26) Ma a aki riai ni ‘kabwarai nanoia.’
13. Tera te kaunganano are e katauraoia Bauro ibukia I-Biribi?
13 Tabeua te ririki imwin maten Iesu, ao a karabutinaki Bauro ma Tira i Biribi. Imwina, e kaungaia kaain te ekaretia are i Biribi Bauro bwa a na ‘teimatoa n te taamnei ae tii teuana, ni kakorakoraiia n te nano ae tii teuana ibukin te onimaki are n te euangkerio; ao a na tai kamaakaki teutana irouia aia kairiribai.’ E taku Bauro ibukin kakorakorakiia n te itera aei: “Boni kanikinaeani mateia [taani kakaaitara], ma boni kanikinaeani kamaiuami [are bwainikirinaia Kristian], ao boni mairoun te Atua, te baei. Ba kam anganaki i bukini Kristo tiaki ti te onimakinna, ma kam anganaki naba te bainikirinaki i bukina.”—I-Biribi 1:27-29.
14. Tera are e riki i Rom imwin ana ninikoria Bauro?
14 Ngke e koroboki Bauro nakon te ekaretia are i Biribi, ao e mena naba i nanon te karabuti n te tai anne i Rom. Ma e ngae n anne, e teimatoa n ninikoria n tataekina te rongorongo nakoia aomata. Tera mwina? E korea ae kangai: “E kaotaki kabaeakiu ba bon i bukini Kristo, i buakoia tautia ni kabaneia n ana auti te uea, ma aomata nako; ao taari aika bati i nanon te Uea, ngkai a onimaki i bukini kabaeakiu, a riki ni moan te ninikoria n taekina ana taeka te Atua n aki maku.”—I-Biribi 1:13, 14.
15. Ti na kona ni kunea iia katoto aika raraoi ibukin te onimaki, ake a na kakorakorai nanora bwa ti aonga n ninikoria?
15 E kaungaira naba ana katoto Bauro. Ai aron naba aia katoto Kristian ni boong aikai ake a a tia n nanomwaaka i aan bwainikirinaia n aaba ake a kairaki i aan te tautaeka ae kairimatoa ke aika kairaki irouia mataniwin Aaro. Rongorongoia Kristian aika mwaiti, a a tia ni kaotaki n Te Taua-n-Tantani ao te Awake! ao n aia Yearbook Ana Tia Kakoaua Iehova. Ngkana ko wareki rongorongo akanne, ao uringnga are te koraki ake a kaotaki rongorongoia iai bon aomata naba n ai arora, ma ngke a kaaitara ma taiani kangaanga, ao e anganiia te korakora Iehova ae e a riaon aia konaa, ao a nanomwaaka ma n tokanikai iai. Ti kona ni kakoauaa bwa e na karaoa naba aekan anne nakoira ngkana ti kainnanoia.
Arora n Ninikoria E Kakukureia Iehova ma ni Karinea Naba
16, 17. Ti na kanga ngaira ni boong aikai, ni kona ni karikirakea te ninikoria?
16 Ngkana e teimatoa te Kristian temanna n nene ibukin te koaua ao te eti, ao e oti n anne bwa e bon ninikoria. Ngkana e karaoa naba anne te aomata n aki ongea maakuna are raba i nanona, ao e kaota iai te ninikoria ae korakora riki. Ni koauana, a kona n ninikoria Kristian ni kabane ngkana a bon tangiria raoi ni karaoa nanon Iehova, ngkana a kamatoaa nanoia bwa a na kakaonimaki, ngkana a aki toki ni mwiokoa te Atua, ao ngkana a ururinga are e a tia Iehova ni kakorakoraia aomata aika mwaiti aika ai aroia. Irarikin anne, ngkana ti ataia bwa ninikoriara e kakukureia Iehova ao e karinea naba, ti a kaungaaki riki iai ngkanne bwa ti na aki mamaara. Ti a tauraoi n nanomwaaka i aan kakanikoara ke karaoan mwakuri aika bubuaka nakoira ibukina bwa e korakora tangirana iroura.—1 Ioane 2:5; 4:18.
17 Tai mwaninga are ngkana ti rawawata ibukin ara onimaki, ao e aki nanonaki iai bwa ti a tia ni karaoa ae kairua. (1 Betero 3:17) Ti rinanon te rawawata ibukin boutokaan riain Iehova n tautaeka, ibukin kaakaraoan ae raoiroi, ao ibukina bwa ti aki irekereke ma ana waaki te aonnaba. E taku te abotoro Betero ni kaineti ma anne: “Ngkana kam karaoa ae raoiroi, ni kamarakaki iai, ngkana kam taotaon naba nanomi, ao kam na karaoiroaki iai iroun te Atua.” E a manga taku riki Betero: “Ba akana maraki, ngkai bon nanon te Atua, ao a na karaoa ae raoiroi ma ni mwiokoi tamneiia iroun te tia Karikiia ae kakaonimaki.” (1 Betero 2:20; 4:19) Eng, ara onimaki e kakukureia te Atua ae tatangira ae Iehova, ao e reke karineakina iai. Ai korakora ra bukina ae ti na bwaina iai te ninikoria!
Te Maroro ma Taan Tautaeka
18, 19. Tera ae e kaotaki iroura n arora n ninikoria n tei i mataia taani moti?
18 Ngke e tuangia taan rimwina Iesu bwa a na bae ni bwainikirinaki, ao e tuangia naba ae kangai: “Ane a na anga ngkami [aomata] nakoni kabowi, ao ane a na kataereingkami ni maneabaia; ao ane kam na kairaki nako mataia taan tau-taeka ma uea i bukiu, ba te bwai ni kaotioti nako ia ma Tientaire.” (Mataio 10:17, 18) Ti riai n ninikoria ngkana ti na kateaki i matan te tia moti ke te tia tautaeka ibukin bukibuki aika kairua. Ma ngkana ti ninikoria ni kabonganai taai akanne n tataekina iai te rongorongo nakoia aomata, ao ti kamanenaa raoi iai ngkanne te tai ae karuanikai ibukin kakoroan bukin te bwai ae manena. Ni koauana, ti uota iai ana taeka Iehova nakoia te koraki ake a motiki taekara, aika taeka ake a koreaki n te kauoua n Areru are kangai: “Kam na wanawana ngkai, ngkami aika uea: Kam na reireiaki, ngkami aika taani motiki taekan aonaba. Kam na toro iroun Iehova ma te maku.” (Taian Areru 2:10, 11) E nonoraki n taai aika mwaiti bwa ngkana a kabuakakaki ni bukibuki aika kairua Ana Tia Kakoaua Iehova i matan te boowi, ao taani moti iai a boutokaa te inaaomata n taromauri, ao ti rangi ni kakaitau ibukin anne. Ma tabeman taani moti, a a tia n iraniia taani kakaaitaraira. E taekina ae kangai te kibu ni kaineti ma taani moti aikai: “Kam na reireiaki.”
19 A riai n ataia taani moti bwa ana tua Iehova ae te Atua, bon te kabanea n rietata i aon te aonnaba. A riai n uringnga bwa a na bane aomata n tei ibukin aia bure i matan Iehova ae te Atua ao Iesu Kristo. (I-Rom 14:10) Ao ngaira ngkana ti karekea te moti ae riai mairouia taani moti aika aomata ke ti aki, ma bon iai bukina n taai nako ae ti na ninikoria iai, ibukina bwa e boutokaira Iehova. E taku te Baibara: “A bane ni kabaia akana onimakinna.”—Taian Areru 2:12.
20. Bukin tera bwa ti kona ni kukurei ngkana ti na nanomwaaka i aan bwainikirinara ao kabuakakakira?
20 E taku Iesu n ana Kabwarabwara i aon te Maunga: “Kam a kabaia, ngkana a taetaebuakaingkami aomata, ma ni bainikiriningkami, ma n atonga te taetae ae buakaka ni kabanea, n uaraoingkami, i bukiu. Kam na kakatonga, ao kimareirei: ba a bati ami bwai i karawa: ba ai aron naba bainikirinaia burabeti ake i mwaimi i rouia.” (Mataio 5:11, 12) Ni koauana, te bwainikirinaki bon tiaki te bwai ae kakukurei, ma teimatoara n nene n aki ongea te bwainikirinaki n ikotaki naba ma ribooti ni kabuakaka ake a kanakoaki man taabo ni kanako-rongorongo, e karika kimwareireira. Karaoan aei iroura, e kakukureia Iehova ao e na reke kaniwangara iai. Teimatoan arora n ninikoria, e kaotia bwa iai te onimaki ni koaua iroura, ao e kakoauaa nakoira bwa ti na bon akoaki iroun te Atua. Ni koauana, e kaotia bwa ti onimakina raoi Iehova. E kakawaki te aeka n onimaki anne ibukia Kristian, n aron are e na kaotaki n te kaongora are imwin aei.
Tera Reireiam?
• Baikara kangaanga ni boong aikai aika a kainnanoa te ninikoria?
• Ti na kanga ni kona ni karikirakea te ninikoria?
• Antai tabeman aika a karaoa te katoto ae raoiroi ni kaineti ma te ninikoria?
• Bukin tera bwa ti kani bwaina te ninikoria?
[Taamnei n iteraniba 23]
A ninikoria ao a totokoa ana mwakuri teuare buakaka Nei Simone Arnold (ae arana ngkai Liebster) i Tiaman, Widdas Madona i Malawi, ao Nei Lydia ma Oleksii Kurdas i Ukraine
[Taamnei n iteraniba 24]
Ti aki maamaa n te rongorongo ae raoiroi
[Taamnei n iteraniba 25]
Ana ninikoria Bauro ni menana n te karabuti, e buoka kabutan te rongorongo ae raoiroi
[Taamnei n iteraniba 26]
Ti taekina te rongorongo ae kakawaki ngkana ti ninikoria ni kabwarabwaraa ara koaua man te Baibara nakoia taani moti