Rooro-n-rikirake Aika A Kakukureia Nanon Iehova

“Natiu, ko na wanawana, ao kakukureia nanou, ba I aonga ni kaeka ane kakanikoai.”​—TAEKA N RABAKAU 27:11.

A a kabobongaki kaongora aikai ibukia rooro-n-rikirake aika Ana Tia Kakoaua Iehova. Ai ngaia are ti kaungaingkami rooro-n-rikirake bwa kam na neneri raoi kaongora aikai ao n anga ami taeka ngkana a rinanoaki n te Reirei n Te Taua-n-Tantani irouia kaain te ekaretia.

1, 2. (a) Kabwarabwaraa bwa atikan nanom nakon bwain te aonnaba aei, e aki nanonna bwa ko aki tau n riki bwa te Kristian. (I-Rom 7:21) (b) Tera reireiam man ana katoto Ataba? (Nora te bwaoki ae mena n te iteraniba 9.)

IANGOIA bwa aongkoa ko na kabooa am kunnikai n te titooa. I nanon am tai ni mamataku ao e a teke naba matam n taraaraoin te kunnikai teuana. E rokoraoi karana ma teina ibukim, ao e oti ni boona bwa bon te boo ae tau. Ma ngke ko a manga karaua raoi n tirobaea, ao ko rangi ni kubanako ngke ko a noria bwa e tebekarai rarikina, ao e aki raoiroi ituana. Mangaia are e ngae ngke e katikimata taraan te kunnikai anne ma e baibuakaki ituakina. Ko na kani kabanea am mwane ni kabooa te kunnikai ae aki karaoaki raoi anne?

² Kabotaua ma te bwai ae e kona n riki nakoim ngkai te roro-n-rikirake ngkoe ni Kristian. N te moan tai, a taraa n anai nano bwain nako te aonnaba aei n ai aron naba te kunnikai arei. N te katoto, a kona n iririi taiani botaki ni kakukurei raom n reirei, ni kabonganai drug ao ni momooi manging iai, ni karekenano iai ao ni wene ni bure naba. E a tia n atikaki nanom n te tai teuana nakon aroaro aikai? Ko a bora naba ni kani kataa teutana aroia are a taku iai bwa a inaaomata? Ngkana ngaia anne, ao tai waekoa n taku bwa e buakaka nanom ao ko aki tau n riki bwa te Kristian. E kaotia te Baibara bwa e korakora ana anainano te aonnaba aei, e ngae ngkana te aomata e kani kakukureia nanon te Atua.​—2 Timoteo 4:​10.

3. (a) Bukin tera bwa e aki manena uaiakinan bwain te aonnaba aei? (b) E kanga te Kristian temanna ni katereterea bwa akea manenan borauakinan bwain te aonnaba aei?

³ Taiaoka ngkai n tirobaea raoi te waaki n te aonnaba aei, n aron are ko karaoia nakon te kunnikai ngkoa are ko kani kabooa. Titirakiniko bwa ‘Tera raoiroin te waaki ae kaakaraoaki n te aonnaba aei?’ E taekinna te Baibara bwa “e kume ni mauna aon te aba.” (1 Ioane 2:17) Kakukurei ake a reke mai iai a na bon aki teimaan. I rarikin anne, e na korakora te rekenikai ae na reke man kaakaraoan mwakuri aika bubuaka. Bon akea te kabwaia teutana mai iai. E ururing rikaaki te Kristian temanna are e a tia n rinanon te bwai ae e atongnga bwa “te maraki ae reke man aki-kabonganan raoi ana tai ngke te roro-n-rikirake ngaia,” ao e taku: “E kona n taraa ni kakukurei ao n anainano te waaki n te aonnaba aei. Ao e tangiriko bwa ko na kakoauaa ae e kona n reke te kakukurei iai n akea te rawawata. Ma e teretere bwa e bon aki kona n reke anne. E na kareketatiko te aonnaba, ao imwina e na kakeaa bongam.”a Bukin tera bwa ko kabanebuakaa am tai n rikirake n te aekaki ni maiu ae aki-raoiroi anne?

Kamanoko Mairoun “Teuare Buakaka”

4, 5. (a) Tera ana bubutii Iesu nakon Iehova are e kaotia n ana tataro, tabeua te tai imwain matena? (b) Bukin tera bwa e bon riai te bubutii anne?

⁴ A kakorakoraiia rooro-n-rikirake aika Ana Tia Kakoaua Iehova ni katinanikua te iraorao ma te aba, ibukina bwa a ataia bwa akea raoiroina. (Iakobo 4:4) Ngkoe temanna mai buakoia rooro-n-rikirake aika kakaonimaki aikai? Ngkana ngaia anne, ao ko tau ni kamoamoaki. E koaua bwa e aki bebete totokoan te katikitiki mairouia tabonrorom ao ni kaotiko bwa ko kaokoro, ma bon iai ae e kona ni buokiko.

⁵ Teutana te tai imwain maten Iesu, ao e tataro nakon Iehova ni butiia bwa e na “kawakinia” taan rimwina “mairoun teuare buakaka.” (Ioane 17:15) Iai bukin ana bubutii Iesu. E ataia bwa e na aki bebete te kakaonimaki irouia taan rimwina, n aki ongea mwaitin aia ririki ni maiu. Bukin tera? Teuana bukina bwa e a kaman tuangia taan rimwina Iesu bwa a na aitara ma aia kairiribai ae korakora ao n aki kona n noraki rabwatana, are bon “teuare buakaka,” ae Tatan te Riaboro. E taekinna te Baibara bwa te anera ae buakaka aei “e nakonako . . . n ai aron te raian ae bekorara, n ukoukora ae e na oongnga.”​—1 Betero 5:8.

6. Ti kanga n ataia bwa akea ana nanoanga Tatan nakoia rooro-n-rikirake?

⁶ E a tia Tatan ni karokoi kabuanibwai aika rangi ni bubuaka nakoia aomata, ma ngkekei ni karokoa ngkai. Iangoa te kabuanibwai ae kakamaaku are e karokoa Tatan i aon Iobi ma ana utu. (Iobi 1:13-​19; 2:7) Tao ko kona n uring bwaai aika riki i nanoni maium, aika a kaoti iowawan ana mwakuri Tatan. E a kakorakoraa te Riaboro ni kakaaea konana bwa e na ongnga, ao akea ana nanoanga nakoia rooro-n-rikirake. N te katoto, ngke e moanaki te moan tienture C.E., ao e karekea te anga teuana Erote, ike e na tiringia iai ataei aika mwaane ni kabane aika kaka uoua aia ririki ni maiu ke i aana, ake a maeka i Betereem. (Mataio 2:16) E iangoaki bwa bon Tatan are e kaira Erote bwa e na kakorakoraa ni kamaunaa te ataei are e na riki bwa te Mesia are e beritanna te Atua, ao are e na karokoa ana motikitaeka te Atua i aon Tatan! (Karikani Bwaai 3:15) E teretere iai bwa bon akea ana nanoanga Tatan nakoia rooro-n-rikirake. Oin ana iango bwa e na kabwakaia aomata aika mwaiti n aron are e konaa. E a koaua riki aei n taai aikai ibukina bwa e a tia n teweaki nako Tatan mai karawa nako aon te aba, ao “e bati n unun, ngkae e ataia ba a kani bane ana bong.”​—Te Kaotioti 12:9, 12.

7. (a) E a kanga n rangi n okoro aroaron Iehova ma Tatan? (b) Tera ana namakin Iehova ibukim ni kaineti ma karekean te maiu ae kakukurei?

⁷ E “bati n unun” Tatan ma e rangi ni kaokoro aroaron Iehova, bwa e “nanoanga.” (Ruka 1:78) Boni ngaia nibwan te tangira. Ni koauana, e a tia n rangi n rianako kaotiotan te aroaro aei iroun ara tia Karikiriki, ai ngaia are e a taekinna te Baibara bwa “te Atua bon te tangira.” (1 Ioane 4:8) Ai kaokoro ra anuan maiun atuan te aonnaba aei ma te Atua ae ko a kakabwaiaki n taromauria! E tabe Tatan n ukoukora ae e na kabwakaa, ma e “aki tangira maten temanna” Iehova. (2 Betero 3:9) E taraiia aomata nako bwa a kakawaki, ao anne naba ana kaantaninga ibukim. Ngke e kaungako Iehova rinanon ana Taeka bwa ko na aki irekereke ma ana waaki te aonnaba, ao e aki kataia ni katoka kukureim ke n taubeakina inaaomatam. (Ioane 15:19) Ma e kawakiniko iai mairoun teuare buakaka. E tangiria Tamam are i karawa bwa e na reke iroum te bwai ae kakawaki riki nakon karekean te kakukurei ae kai bua man te aonnaba aei. Te bwai ae e tangiria, bwa ko na karekea “te maiu ni koaua,” ae taekan te maiu ae aki-toki n te baretaiti i aon te aba. (1 Timoteo 6:17-​19) E tangiriko Iehova bwa ko na tokanikai iai, ao e kaumakiko bwa ko na roko n te tia anne. (1 Timoteo 2:4) I rarikin naba anne, e a manga anganiko riki mwiokoam ae okoro Iehova. Ae tera?

“Kakukureia Nanou”

8, 9. (a) Tera te bwaintangira ae ko kona n angan Iehova? (b) E a kanga Tatan ni kakanikoa Iehova, n aron are e kaotaki n rongorongon Iobi?

⁸ Ko a tia ni kabooa te bwaintangira ibukin raoraom ae ko rangi ni kaan ma ngaia, ao ni matakuakina aroni mimina ma ana kakaitau imwin rekena irouna? Ko a boni bae ni kaman karaua raoi n iangoia bwa te aeka ni bwaintangira raa ae ko na karekea ibukina. Iangoa ngkai te titiraki aei: Te aeka ni bwaintangira raa ae ko na angan am tia Karikiriki ae Iehova ae te Atua? N te moan tai, e na taraa ni kamanga iangoakin anne. Tera ae e tangiria mairouia aomata aika mangori te Atua ae Moan te Mwaaka? Iai te bwai ae ko kona n anganna ae tuai n reke irouna? E kaeka ni kangai te Baibara n Taeka N Rabakau 27:11: “Natiu, ko na wanawana, ao kakukureia nanou, ba I aonga ni kaeka ane kakanikoai.”

⁹ N aron ae ko a ataia man neneran te Baibara iroum, ao bon Tatan te Riaboro are e kakanikoa Iehova. E taku bwa a bane n toro aomata iroun te Atua tiaki ibukin tangirana, ma ibukin nanoia ni kani karekei kaubwaia mairouna. E taku Tatan bwa aongkoa ngkana a karawawataki ana toro te Atua n taiani kataaki, ao ane a na waekoa ni kitana te taromauri ae koaua. N te katoto, iangoa ana taeka Tatan nakon Iehova ni kaineti ma te mwaane ae raoiroi are Iobi: “Ko katanna ma ni kawakinna, ngaia ma ana utu ma ana bai ni bane. Ko katekeraoia n ana makuri ni kabane, ao e kebo te aba n ana nanai ni man. Ma ngkana ko kamaunai ana bai ao I bon tuangko, e na kaitarako n taetaebuakaiko!”​—Iobi 1:10, 11, BK.

10. (a) Ti kanga n ataia bwa Tatan e aki tii kananokokorakina ana kakaonimaki Iobi? (b) Ko a kanga n irekereke naba n te kauntaeka ae boto i aon antai ae riai n tautaeka i aon bwaai ni kabane?

¹⁰ N aron ae e oti n te rongorongo man te Baibara, ao Tatan e kananokokorakina ana kakaonimaki Iobi n ikotaki naba ma aia kakaonimaki aomata ni kabane ake a beku iroun te Atua, ao ai uana naba ma ngkoe. Ni koauana, e taekinia aomata Tatan nakon Iehova ni kangai: “E tauraoi te aomata [tiaki tii Iobi ma aomata nako] ni kaki bai ni kabane i bukini kawakinani maiuna.” (Iobi 2:4, BK) Ko nora tabem n te itera ae kakawaki aei? N aron ae e kaotaki n Taeka N Rabakau 27:11, ao e taku Iehova bwa iai te bwai ae ko kona n anganna, are e na aana ana kaeka nakon te tia kakaniko are Tatan. Iangoia bwa e butiiko te tia Tautaeka i aon Bwaai ni Kabane bwa ko na buoka kaetan te kauntaeka ae te kabanea ni kakawaki. Ai tamaroa ra te mwioko ae okoro aei ibukim! Ko kona ni kakororaoa nanon te bwai ae tuangko Iehova? E karaoa anne Iobi. (Iobi 2:9, 10) E karaoa naba anne Iesu ao ai aomata aika mwaiti kurikuri n ikotaki ma rooro-n-rikirake aika maiu ma ngkekei ni karokoa ngkai. (I-Biribi 2:8; Te Kaotioti 6:9) Ko boni kona naba ni karaoa anne. Uringnga bwa akea te tei i nuka n te itera aei. E na oti man am mwakuri bwa tao ko boutokaa ana kakaniko Tatan, ke ana kaeka Iehova. E ngaa ae ko na boutokaia?

E Tabeakiniko Iehova!

11, 12. E akaka iroun Iehova bwa ko na toro irouna ke ko na aki? Kabwarabwaraa.

¹¹ E akaka iroun Iehova bwa e ngaa ae ko na rineia? Tiaki te koaua bwa iai aomata aika a a tia ni kakaonimaki nakoina n te aro are kaanga a anga iai te kaeka ae riai nakon ana kakaniko Tatan? Ni koauana e taku te Riaboro bwa akea ae beku iroun Iehova ibukin tangirana, ma e a tia ni kakeweaki te bukibuki anne. E tangiriko Iehova bwa ko na boutokaia ni kaineti ma te kauntaeka aei, ibukina bwa e tabeakiniko. E taku Iesu: “Ao ai aron naba Tamami are i karawa, ngkae E aki tangira maten temanna i buakoia aika uarereke aikai.”​—Mataio 18:14.

¹² E mataata bwa e nano Iehova n te bwai are ko rineia. Ao e moamoa riki bwa e rotaki naba iai. E kaotia raoi te Baibara bwa e korakora rotakin nanon Iehova ni mwakuri aika raraoi ao aika aki-raraoi ake a karaoi aomata nako. Te katoto, e ‘karawawataki’ Iehova ngke a okioki ni bure I-Iteraera. (Taian Areru 78:40, 41, BK) E “rawawata nanoni” Iehova imwain rokon te Ieka n ana bong Noa, ibukina “ba moan te korakora aia bure aomata i aon te aba.” (Karikani Bwaai 6:5, 6, BK) Iangoa ae nanonaki n aei. Ngkana ko karaoa te mwakuri ae kairua, ao ko na karika iai rawawatan nanon am tia Karikiriki. E aki nanonaki n aei bwa e mamaara te Atua ke e kai rotaki. Ma e bon tangiriko ao e tabeakina mweeraoim. N te itera teuana, ko kakukureia nanon Iehova ngkana ko kaakaraoa ae eti. E aki tii kukurei ibukina bwa e reke boutokana ni kaekaa ana kakaniko Tatan, ma e a kona naba n riki bwa te tia Karekea kaniwangam. Ao anne te bwai ae e tangiria ni karaoia. (Ebera 11:6) Ai tatangira tamam ae Iehova ae te Atua!

Kakabwaia Aika Bati Ngkai

13. E a kanga te beku iroun Iehova ni karekei kakabwaia ma ngkai nakoira?

¹³ Kakabwaia ake a roko mairoun Iehova a aki tii kona n namakinaki nakon taai aika a na roko. A mwaiti rooro-n-rikirake aika Ana Tia Kakoaua Iehova aika a a tia ni kakabwaiaki n anganaki te kimwareirei ao te raunnano ngkai naba, ao e riai anne. E korea ae kangai te tia areru: “A raraoi ana tua Iehova, ao a kakukureia te nano.” (Taian Areru 19:8) E ataa riki ae raoiroi ibukira Iehova nakoia aomata nako. E taku Iehova rinanon te burabeti are Itaia: “Bon Iehova ae Atuam Ngai, ae I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai. Ko bia kaman iri nanon au tua nako! ao ai aron te karanga raun nanom iai, ao ai aron naoni marawa am raoiroi.”​—Itaia 48:17, 18.

14. A na kanga ni kona ni buokiko ana reirei te Baibara bwa ko na kararoa karawawatan te taarau?

¹⁴ Te aantaeka nakon ana reirei te Baibara, e na buokiko ni kararoa te maraki ao te rawawatannano. N te katoto, e taku te Baibara bwa te koraki ake a karikirakea tangiran te mwane “a ewariia i bon i rouia ni maraki aika bati.” (1 Timoteo 6:9, 10) A a tia tabonrorom n rinanon te maraki ae nanonaki n te kibu aei? A koko n taarau tabeman ataeinimwaane ao ataeinnaine tii ibukin kani karekean kunnikai aika bobuaka ma n tanoata taekaia, ao bwaai aika boou. Karawawatakim n te taarau ae teimaan ma ni bubura bakaona, ibukin bwaai aika a riaon am kona ni kabooi, bon ai aron ae ko a toronaki iai n te aro ae kammaraki!​—Taeka N Rabakau 22:7.

15. A kanga ana reirei te Baibara ni kamanoko man rawawatan uaan te wene ni bure?

¹⁵ Iangoa taekan te wene ni bure. Ni katoa ririki, a mwaiti kurikuri ataei aika tebwi tabun aia ririki aika bikoukou ao n tuai ni mareaki. Tabeman a bungia natiia aika akea nanoia irouia ke akea aia konabwai ni kaikawaiia. Tabeman a kabwakaia natiia, ao a aki karauaki ibukin aki-raoiroin mataniwin nanoia iai. Ao iai naba ataeinimwaane ma ataeinnaine aika a reke irouia aorakin te wene ni bure n aron te AIDS. Ma uaan te mwakuri anne ae te kabanea ni buakaka ae na reke nakon te aomata ae e ataa Iehova, bwa e na uruaki ana iraorao ma Iehova.b (I-Karatia 5:19-21) E raoiroi bukina are e taekinaki iai ae kangai n te Baibara: “Tabunimatea te wenenibure!”​—1 I-Korinto 6:18, BK.

Beku Iroun “te Atua ae Kukukurei”

16. (a) Ti kanga n ataia bwa e tangiria Iehova bwa ko na kukurei n am bong n ataei? (b) Bukin tera bwa e katei kaetieti Iehova ibukim bwa ko na irii?

¹⁶ E kabwarabwaraki taekan Iehova n te Baibara bwa “te Atua ae kukukurei.” (1 Timoteo 1:11, NW) E tangiriko bwa ko na kukurei. Ni koauana e taku ana Taeka: “Kukurei, ngkoe te rorobuaka, n am tai n ataei, karekea kabaiam n am tai n rikirake.” (Te Minita 11:9, BK) Ma e a kaman atai bwaai aika na riki rimwi Iehova, ao e kona n ataia bwa tera uaan karaoan ae raoiroi ao ae buakaka. Anne bukina ae e kaungako iai ni kangai: “Ko na ururinga naba te tia Karaoiko n am bong n ataei, ngkai a tuai n roko boong aika bubuaka, ngkai a tuai ni kaaniko ririki ake ko nang kangai iai, Akea au kukurei n aikai.”​—Te Minita 12:1.

17, 18. E kanga te roro-n-rikirake ni Kristian ni kaota kukureina man te beku iroun Iehova, ao ti na kanga ni kona ni karekea te kimwareirei anne?

¹⁷ A mwaiti rooro-n-rikirake ni boong aikai, aika a karekea kukureia ae bati man aia beku iroun Iehova. N te katoto, e taku Nei Lina ae 15 ana ririki: “Akea bukina ae N na maamaa iai. E marurung rabwatau ibukina bwa I rawa ni moko ao ni kabonganai taian drug. E reke kairirau ae kakawaki man te ekaretia, are I a buokaki iai ni kauntabaa korakoran ana kariri Tatan. I tokabeti ibukina bwa I kateimatoaki n te iraorao ae kaunga ni bobotaki aika kaakaraoaki n ara Tabo n Taromauri. Ao ae moamoa riki bwa e reke irou te kaantaninga ae akea ae e kona n anaia mairou, ae taekan te maiu ae akea tokina i aon te aba.”

¹⁸ A mwaiti rooro-n-rikirake aika Kristian n aron Lina aika a kabokorakora ibukin aia onimaki, ao aei are e a karekea kimwareireiia. A ataia bwa iai manenan maiuiia ao e reke irouia te kaantaninga ni koaua nakon taai aika a na roko, e ngae ngke a kaaitara ma kangaanga. Mangaia are teimatoa ni beku iroun te Atua ae e rangi n tabeakina mweeraoim. Kakukureia nanona, ao e na kakukureiko ma ngkai ao n aki totoki!​—Taian Areru 5:11.

[Kabwarabwara ae nano]

Ko Uringnga?

• Tera te kangaanga ae ko kaaitara ma ngaia mairoun “teuare buakaka” are Tatan?

• Ko na kanga ni kakukureia nanon Iehova?

• E a kanga ni kaotia te Baibara bwa e tabeakiniko Iehova?

• Baikara kakabwaia tabeua aika reke man te beku iroun Iehova?

[Te bwaoki/Taamnei n iteraniba 9]

E Kuri ni Bwaka te Mwaane ae Raoiroi

Ataba bon te I-Rewi ao te tia katangitang ae e eke taekana n ana tembora Iehova i Iteraera ngkoa. E otei naba kuuna ake a kabonganai aomata n tain te taromauri. Ma e ngae ngke iai mwiokoana aika okoro, ma n te taina, e moanna n anaaki nanona n aroaro aika buakaka ake a kaakaraoi raoraona, ake a taraa n urua iai ana tua te Atua n akea rekenikaia. E taekina ae kangai imwina: “A kuri ni bwaka waeu; a kuri kanga nakonakou ni maran nako. Ba I bakantang irouia akana kainikatonga, ngke I nora kabaiaia akana buakaka.”​—Taian Areru 73:2, 3.

Imwina, e kawara mwaneaban te Atua ae tabu Ataba, ao n tataroakina ana kangaanga arei. E a manga reke ana iango ae raoiroi ni kaineti ma bwaai n taamnei, ao e a ataia bwa e ribaa te buakaka Iehova. E ataia naba bwa n taina ae riai, a na bane aomata aika raoiroi ao aika buakaka n anganaki uaan aia mwakuri. (Taian Areru 73:17-​20; I-Karatia 6:7, 8) Ni koauana, a toua te kawai ae maranran te koraki aika bubuaka. Ao n tokina, a na boni bwaka ngkana e a kamaunaa te waaki ae buakaka aei Iehova.​—Te Kaotioti 21:8.

[Taamnei n iteraniba 11]

E tabeakina mweeraoim Iehova, ma e uaiakina bwakam Tatan

[Taamnei n iteraniba 12]

A mwaiti rooro-n-rikirake aika a karekea te kukurei ae bati rinanon te beku iroun Iehova ma raoia ni Kristian