“E Rauaki Raoi Nanou Iai”
“I KARABWAINGKAMI ma nanou ni koaua ibukin te bwaintangira ae tamaroa ae Kaaniko Riki ma Iehova. E rauaki nanou iai, n ataakin ae ti riai n namakina tangirara ao nabeakira iroun Iehova. I a bon namakinna ngkai bwa I a kaan riki ma Iehova ao Natina ae tatangiraki irouna. I kani kaongoia aomata ni kabane taekan te boki aei, ao I kan angania naba aomata aika tangiraki irou, katotona.” Anne aron ana namakin temanna Ana Tia Kakoaua Iehova, ibukin te boki ae boou ae 320 baana are e tibwatibwaaki nako n te Bwabwaro ae atuna “Taan Uarongorongo Aika Ingainga Nanoia,” i nanon ririki aika 2002 ao 2003. Ti bia neneri bwaai tabeua aika kakawaki man te boki ae boou aei, ao n ataa naba bukin boretiakina.
Bwaai Tabeua Aika Kakawaki man te Boki ae Boou Aei
Tera kanoan te boki ae boou aei? Bon rongorongo ni kabane akana taekinaki n reirei aika uoua i nanona ao a bati riki! Iai mwakoron te boki aei aika 31, ae e kan titeboo abwakin teuana, ma te reirei teuana n Te Taua-n-Tantani. Imwin te taeka ni kaukuki ao moani mwakorona aika tenua, e a tibwatibwaaki ngkanne kanoan te boki aei nakon aua iterana aika bane ni kabwarabwarai aroaron Iehova aika rianako kakawakiia. A bane ni kaukaki iterana aikai n rongorongon aroarona. E maroroakinaki ni mwakoro aika imwina riki aron Iehova ni kaotiota aroarona. A bane n toa itera aikai n rongorongon Iesu. Bukin tera? E taku Iesu: “Ane e a tia n norai ao e a tia n nora naba te Tama.” (Ioane 14:9) E anganira bannan aroaron te Atua aika teretere raoi Iesu, kioina ngke boni ngaia katotongan Iehova ni kororaoi. Ni kabanean mwakoro aikai ni kabane, iai reireiara mai iai ibukin te aro ni kakairi iroun Iehova ni kaotiotii aroaro aika a tabe n rinanoaki ngkai. E aki toki te boki ae boou aei ni mwanewei kanoan bokin te Baibara, ngkana e maroroakin aroaron nako Iehova.
Iai naba bwaai tabeua aika okoro aika kakawaki n te boki ae Kaaniko Riki ma Iehova. A bane n toa mwakoro nako ni moa man te mwakoro 2, n te bwaoki ae atunaki n ae “Titiraki Aika Kananoa te Iango.” Tiaki nanona bwa a katauraoaki kiibu ao titiraki ibukin te kauring i aon te mwakoro anne, ma a katauraoaki ibukin buokam ni kamanenaa te Baibara ibukin kananoan am iango i aon te rongorongo anne. E raoiroi riki bwa ko na karau ni wareki kiibu ni kabane aika kaotaki. Imwin anne, iaiangoi titiraki ao kakorakorako ni kamanenai ni maium. Ngkana ko kaakananoa am iango i aoni bwaai aika ko wawareki, ao ane e na kaungaaki iai nanom ao ni buokiko naba ni kaaniko riki ma Iehova.—Taian Areru 19:14.
A a tia n tirinanoaki raoi taamnei aika a koreaki n te boki ae Kaaniko Riki ma Iehova n te aro are a na kona n reke reireiara man taraakiia ao n anaaki naba nanora iai. Tebwi ma itua mwaitin mwakoro ake a kebo iteranibaia tabeua n taamnein rongorongo aika taekinaki n te Baibara.
Tera Bukin Boretiakina?
Bukin tera ngkai e boretiaki te boki ae Kaaniko Riki ma Iehova? Oin boretiakin te boki ae boou aei bwa e na buokira ni kinaa riki Iehova n te aro bwa e na karikirakeaki riki iai ara iraorao ma Atuara.
Ko kona n iangoa temanna ae na kona n reke kakabwaiakina man te boki ae Kaaniko Riki ma Iehova, ae tao te aomata ae ko reirei ma ngaia n te Baibara, ke te Kristian ae te tari te mwaane ke te aine ae e a manga mamaara n te aro n taamnei? Ao ngkoe tera arom, ko a tia ni moana warekan te boki ae boou aei? Ngkana ko tuai, ao bukin tera ngkai ko aki karaoa am babaire ibukin moanakin warekana n te tai ae waekoa? Karekea naba am tai n iaiangoi bwaai aika ko wareki. E bia riki te boki ae boou aei bwa kairam ni kaaniko riki ma te Atua ae Iehova, bwa ko aonga n tataekina te rongorongo ae raoiroi ibukin te Tautaeka n Uea, ma te kukurei ao te ingaingannano ae korakora!