Kakaaean te Kakukurei

TABEUA te ririki n nako, ao a titirakinaki aomata tabeman i aoni Buranti, Tiaman, Buritan ao te United States ae kangai: “Tera ae kainnanoaki ibukin karekean te kukurei?” Mai buakoia ake a titirakinaki, a taekinna 89 te katebubua bwa te marurung raoi; a taku 79 te katebubua bwa te mare ao te tekateka n taanga ae nakoraoi; e taekinaki irouia 62 te katebubua bwa bon uaan kaikawaia ataei n te aro ae riai irouia kaaro; ao 51 te katebubua, a iangoia bwa e kainnanoaki te nakoa ae bubura ibukin karekean te kakukurei. E ngae ngke a taneiai aomata n reireiaki ae e aki kona ni karekea te kakukurei te mwane ma, 47 te katebubua mai buakoia ake a titirakinaki iai aika a kakoauaa raoi bwa e reke te kakukurei man te mwane. Tera ae kaotaki mani koaua aikai?

Te moanibwai, taraa te iango ae iai irekereken iai te kukurei ao te mwane. E oti man te kakaae are e karaoaki i aoia aomata aika tenan kabanea ni kaubwai, aika tebubua mwaitiia n te United States, bwa bon akea rakan kukureia te koraki aikai nakoia aomata ni kabane. Irarikin anne, a taku taan rabakau ibukin marurungin te iango bwa e ngae ngke aomata aika mwaiti n te United States, a a tia ni karaka kaubwaia nakon uoua te tai rakana, nakon kaubwaia i nanon tenibwi te ririki n nako ma bon akea naba rakan kukureia iai. Ni koauana, e taekinaki ae kangai n te ribooti teuana: “E a korakora keraken te rawawatannano irouia aomata i nanon te tai anne. E a raka riki nakon tenua te tai mwaitin te bakabure irouia roro-n-rikirake, ao uoua te tai mwaitin te buu-raure.” A a tia naba ni kakoauaa taani kakaae i aon reitan te kakukurei ma te mwane, n aaba aika kakaokoro aika 50 mwaitiia, bwa e bon aki kona ni kabooaki te kakukurei n te mwane.

Te kauoua ni bwai, tera kakawakin te marurung raoi, te mare ae nakoraoi ao te nakoa ae bubura ibukin karekean te kakukurei? Ni koauana, ngkana ngaia bwa a rangi ni kainnanoaki baikai ibukin karekean te kukurei, ai tera ngkanne aroia aomata aika mirion ma mirion mwaitiia aika a aki marurung raoi, ao te koraki ni kabane ake a aki nakoraoi aia mare? Tera naba aroia taanga aika mareaki aika akea natiia ao aine ma mwaane ni kabane aika a aki reke nakoaia aika bubura? Te koaua bwa boni katauaia aomata aikai n tatabemania nako bwa a na bon nananokawaki nako naba? Ao te koaua bwa te kakukurei are aongkoa e na reke nakoia ake a marurung raoi ao ake a nakoraoi aia mare, e na mauna nako ngkana e bitaki aroaroia?

A Nakoraoi Ara Tabo ni Kakaae?

A tangira te kukukurei aomata ni kabane. E aki kamimi aei, kioina ngkai e kabwarabwaraki te tia Karikiriki bwa “te Atua ae kukukurei,” ao e karaoaki te aomata bwa katotongan te Atua. (1 Timoteo 1:​11, NW; Karikani Bwaai 1:​26, 27) Mangaia are a bon riai ni kakaaea te kakukurei aomata. Ma a mwaiti aika kunea bwa a aki kona ni kukukurei i nanon te tai ae maan, ngaia are e a kabotauaki iai ma tauan te tano ae kai maran nako.

Ma iai tabeman ngkai ake e a riao irouia kaatuuan aia iango i aon kakaaean te kakukurei? Anne ana reke te tia rabakau ni karekeiango ae Eric Hoffer ngke e kangai: “Kakaaean te kakukurei boni ngaia naba teuana oin reken te aki kukurei.” Ao bon te koaua aei, ngkana ti kakaaea te kakukurei n taabo aika aki nakoraoi. N te aro anne, ti kakoauaa iai bwa ti na kaaitara ma te bwarannano ao te rawawata. A aki kona n anganira te kakukurei bwaai aikai; te kani kaubwai; kakaaean te kan atongaki ke te kamoamoaki; moanibwaian karekean tiara aika a irekereke ma te mwakuri n tautaeka, te kakannato, te karikirake; ke iaiangoam i bon iroum ao katokan nanom n te bwai ae ko tangiria. Maroaka ae iai tabeman aika a tia n anaaki nanoia n te iango ae kamimi are e taekinna te tia koro-rongorongo ni kangai: “Ti kona n rangi ni kukukurei, tii ngkana ti katoka moa arora ni kakorakoraira ni kakukureira”!

E kakawaki ataakin ae n te kakaae are e taekinaki ni moan te kaongora aei, e a kaotaki iai bwa 40 te katebubua mai buakoia aomata ake a titirakinaki aika a namakinna bwa e reke te kakukurei man karaoan ae raoiroi ao buokaia aomata. Ao 25 te katebubua mai buakoia aomata ake a titirakinaki, a kaotia bwa te onimaki ao te nano ae korakora ibukin te Aro, boni ngaia riki ae na karekea te kukurei. E teretere raoi man aei, bwa ti riai ni karaua n taraia raoi bwa tera ae kainnanoaki ibukin reken te kukurei ni koaua. Iai buokara i aon aei, n te kaongora ae imwin aei.

[Taamnei n iteraniba 3]

A mwaiti aomata aika a iangoia bwa kiingin te kakukurei bon, te mwane, te mare ae nakoraoi, ke te nakoa ae bubura. Ko kakoauaa te iango aei?