Nanon Ana Tataro te Uea Ibukim
E KOREAKI ana Tataro te Uea are e taekinna Iesu n ana Kabwarabwara i aon te Maunga, n te Baibara ni Mataio mwakoro 6, kibuna 9 nakon 13. E taekina ae kangai Iesu imwain raoi reiakinan te tataro aei: “Ngkana kam tataro, ao tai barantiko [“kaokiokia,” NW] n ai aroia Tientaire: ba a taku i nanoia ba e ongo te aba i rouia n aia taeka ngkae e bati.”—Mataio 6:7.
Mangaia are e teretere raoi ngkanne, bwa e aki kaantaningaia Iesu bwa e na kamatenikunaki ana Tataro te Uea. E koaua bwa imwina riki, ao e a manga taekina te tataro aei ibukiia taan ongora tabeman. (Ruka 11:2-4) Ma, iai okoron taekan te tataro aei tabeua n Euangkerio ake a koreaki iroun Mataio ao Ruka. Irarikin naba anne, a aki manga kamatenikunai taeka ake n te tataro ni katoto anne, Iesu ma taan rimwina n aia tataro rimwi riki.
Tera raoi bukin korean ana Tataro te Uea n te Baibara? Rinanon te tataro ni katoto aei, ao E reireinira iai Iesu aron ara tataro ae e na kakukureia te Atua. N te tataro naba aei, ti kona n nori kaekaan titiraki aika kakawaki ni kaineti ma te maiu aei. Ti na maroroakina ngkai mwakoron ana Tataro te Uea, teuana imwin teuana.
Antai Aran te Atua?
“Tamara are i karawa, E na tabuaki aram.” (Mataio 6:9) Ti a buokaki ni kaaniaki riki ma te Atua n taeka ni kaukuki aika n te tataro ni katoto aei, ngkai ti weteia bwa “Tamara.” N aron te ataei ae uarereke ae e kani kaania tamana ae tatangira ao n ataibwai, ngaira naba ti kona ni kaania Tamara are i karawa n ara tataro ma ni kakoauaa raoi bwa e boni kan ongo iroura. E anene ni kangai te Uea ae Tawita: “Ngkoe ae Ko ongo tataro, a na bane ni kawariko aomata.”—Taian Areru 65:2.
E anga ana kaetieti Iesu bwa ti na tataro ibukin katabuan aran te Atua. Ma antai aran te Atua? E kaeka te Baibara n taeka aikai: “IEHOVA aram, ba bon ti Ngkoe Teuare Moan te Rietata i aonaba ni bane.” (Taian Areru 83:18) Ko a tia ni wareka te ara ae Iehova i nanon te Baibara?
Ni koauana, e koreaki aran te Atua ae Iehova ni Baibara nikawai n te mwaiti ae 7,000 tabun. Ma, a riao taan raitaeka tabeman n te aro are a kanakoa te ara aei man kibun te Baibara ake a rairi. Mangaia are e bon eti bwa ti na tataro nakon te tia Karikira bwa e na katabua arana. (Etekiera 36:23) Te anga teuana ae ti kona ni karaoa iai ae boraoi ma te tataro aei, boni mani mwanewean arana ae Iehova ngkana ti tataro nakoina.
E kaikawaki n te Aro ni Katorika temanna te aine ae arana Patricia ao e kakamanena ana Tataro te Uea. Tera aron te aine aei ngke e a kaotaki nakoina aran te Atua n te Baibara, iroun temanna Ana tia Kakoaua Iehova? E taku: “I a bon aki kona ni kakoauaa te rongorongo aei! Mangaia are I a anaa au Baibara ao I noria bwa bon iai naba te ara aei i nanona. Imwin anne, e kairai te tia Kakoaua aei nakon Mataio 6:9, 10, ao e kabwarabwaraa bwa iai rekereken ana Tataro te Uea ma aran te Atua. E a bon rangi n ingainga nanou, mangaia are I a tuanga neiei bwa I kan reirei n te Baibara ma ngaia.”
E na Tauaki Ana Taeka te Atua i Aonnaba
“E na roko ueam. E na tauaki am taeka i aonaba, n ai aron tauana i karawa.” (Mataio 6:10) E na kanga ni kakoroaki nanon mwakoron ana tataro ni katoto Iesu aei? Angiia aomata a iangoia bwa karawa bon te tabo n raoi ao ni karaunano. E taekina karawa te Baibara bwa ana tabo Iehova ae “tabu ae mimitong.” (Itaia 63:15) Maroaka ae ti tataro bwa e na tauaki ana taeka te Atua i aonnaba n “ai aron tauana i karawa”! Ma e na kona ni koro nanon aei?
E taetae ni burabetinna ana burabeti Iehova ae Taniera ni kangai: “E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane [i aon te aba], ao e na tei matoa n aki toki.” (Taniera 2:44) Uean te Atua aei, are nanona ana Tautaeka n Uea i karawa, e nang waekoa ni karokoa te rau ae taabangaki i aonnaba, i aan te kairiri ae raoiroi.—2 Betero 3:13.
E aki kona ni maneang te aomata ae kaota ana onimaki i nanon tataroakinan rokon Uean te Atua ao tauan ana taeka i aonnaba. E korea ae kangai te Kristian ae te abotoro Ioane: “I ongo te bwana ae korakora man te kaintokanuea ba e kangai, Noria, e mena uman te Atua irouia aomata, ao E na maeka i rouia, ao a na riki ba ana botanaomata, ao te Atua E na boni memena i rouia, ao E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.” Ao e a manga taku riki Ioane: “Ao Teuare tekateka i aon te kaintokanuea E kangai, . . . Koroboki: ba a kakaonimaki taeka aikai ao a koaua.” —Te Kaotioti 21:3-5.
Te Tataro ni Kaineti ma Bwaai Aika Ti Kainnanoi
E kaotia nakoira Iesu n ana tataro ni katoto bwa ti riai ni katuuaa riki n ara tataro aran te Atua, ao kakororaoan nanona. Ma, a bon mwaneweaki naba n te tataro ni katoto aei, taian bubutii ni kaineti ma bwaai aika ti kainnanoi aika a kona naba n taekinaki nakon Iehova.
Te bubutii are e moan taekinaki, bon aio: “Ko na anganira karara ae ti a tau iai n te bong aei.” (Mataio 6:11) Tiaki te bubutii aei ibukin te kaubwai. E kaungaira Iesu bwa ti na tataro ibukin “karara ae ti a tau iai ni bongi nako.” (Ruka 11:3) N aron ae e kaotaki n ana Tataro te Uea, ti boni kona n tataro ma te onimaki bwa e na bon anganira bwaai aika ti kainnanoi te Atua n te bong teuana ma teuana, ngkana ti tangiria ao n ongeaba irouna.
E kona ni kairira bwa ti na aki tabeakina ara onimaki te raraoma ae bati ni kaineti ma te mwane, n te aro are ti a manga aki karaoi bwaai aika e kaantaningai te Atua mairoura. Ma, ngkana ti moanibwaia taromaurian te Atua i nanoni maiura, ti kona ni kakoauaa raoi ngkanne bwa e bon ongoraei ara bubutii ibukini bwaai n rabwata aika ti kainnanoi, n aron te amwarake ao kunnikai. E taku Iesu: “Ma kam na ukoukora moa uean te Atua ma ana raoiroi; ao a na bane n raonaki baikai nako imi.” (Mataio 6:26-33) E kona ni kangaanga ukoukoran ana raoiroi te Atua kioina ngkai ti bane ni bubure ao ti kainnanoa kabwaran ara bure. (I-Rom 5:12) E boni mwaneweaki naba taekan aei n ana Tataro te Uea.
Ara Tataro ni Kaineti ma te Kabwarabure
“Ko na kabara ara bure mai roura, n ai arora ngkai ti kabara aia bure akana bure nako ira.” (Mataio 6:12, Ruka 11:13) Te koaua bwa e na boni kabwarai ara bure Iehova ae te Atua?
E ngae ngke e a tia ni karaoa te bure ae moan te kakaiaki te Uea are Tawita, ma e raraoma ao e tataro ma nanona ni koaua ni kangai: “Ko raoiroi, te Uea, ao Ko kani kabara buure, ao e bati am nanoanga nakoia akana weteiko ni kabaneia.” (Taian Areru 86:5) Ai karaunano ra iangoan aei! E ‘kani kabwarai aia bure’ te koraki ake a tang nakoina ma te nano n raraoma ni koaua, Tamara are i karawa. N aron te taarau ae kona ni kabwaraaki ni kabane, e kona naba Iehova ni kabwarai ara bure ni kabane.
Ma, e taekina te bwai teuana ae ti riai ni karaoia Iesu bwa e aonga ni kabwarai ara bure te Atua: Ngkana ti tangiria bwa e na kabwarai ara bure te Atua, ti riai naba ni kabwarai aia bure aomata. (Mataio 6:14, 15) E ngae ngke e karaoaki ae aki-riai nakon te aomata ae raoiroi are Iobi irouia raona aika teniman, ma e bon kabwarai aia bure ao e tataro naba ibukiia. (Iobi 42:10) Ngkana ti kabwarai aia bure akana bure nakoira, ti na kakukureia iai te Atua ao ni kakabwaiaki n ana nanoanga naba.
Kioina ngkai e butimwai ara bubutii te Atua, ti riai ngkanne ni kakaaea akoakira mairouna. Ao ti kona naba ni kakukureia, e ngae ngkai ti aki-kororaoi. (Mataio 26:41) E kona naba ni buokira Iehova n te itera aei, n aron are e kaotia Iesu nakoira ngke e motika te tataro ni katoto n te bubutii ae kakawaki.
Buokira n Toua te Kawai ae Raoiroi
“Tai kairira nakon te kaririaki, ma Ko na kamaiuira man te buakaka [“Teuare e buakaka,” BK].” (Mataio 6:13) E aki kitanira Iehova n akea buokara ngkana ti kaririaki, ao e bon aki karirira naba nakon te bure. E taku ana Taeka: “E aki konaki te Atua ni kaririaki ni baika bubuaka, ao E aki kariria temanna.” (Iakobo 1:13) E aki tuki kaririakira te Atua, ma e kona ni kamaiuira mairoun Teuare Karoton te kariri are “Teuare e buakaka,” are e ataaki n arana ae Tatan te Riaboro.
E kaumakia raao ni Kristian te abotoro Betero ni kangai: “Kam na tauu baangimi, kam na kamarurungingkami. Ba e nakonako ami kairiribai are te riaboro n ai aron te raian ae bekorara, n ukoukora ae e na oongnga.” (1 Betero 5:8) Ni koauana, e boni kaririaki naba te aomata ae kororaoi are Iesu Kristo, iroun Tatan! Tera ngkoa tian te Riaboro? Bon anaakin nanon Iesu man taromaurian te Atua ae Iehova n te itiaki. (Mataio 4:1-11) Ngkana ko kani beku ibukin te Atua, e na manga uaiakina naba tiana Tatan ibukim, are anaakin nanom man te taromauri ae itiaki!
E kabongana te aonnaba te Riaboro ae tauaki taekana irouna , bwa e na kataia ni karirira bwa ti na karaoi mwakuri aika ribaaki iroun te Atua. (1 Ioane 5:19) Mangaia are e rangi ni kakawaki bwa ti na aki toki ni bubutii buokara mairoun te Atua, ao riki ngkana ti a kaaitara ma te kariri teuana ae okioki nakoira. Ao ngkana ti taromauria Iehova ni kaineti ma ae taekinaki n Ana Taeka ae kairaki koreana ae te Baibara, e na kamaiuira n te aro are e na buokira bwa ti na rarawa nakon te Riaboro. E taku te Baibara: “E kakaonimaki te Atua: e na aki kariaia ba kam na kataki i aoni korakorami.”—1 I-Korinto 10:13, BK.
E Kainnanoaki Onimakinan te Atua
Ai kaunganano ra ataakin ae e mwannanoira n tatabemanira nako Tamara are i karawa! E a bon tia naba ni mwiokoa Natina ae Iesu Kristo, bwa e na reireinira arora n tataro. Te koaua bwa ataakin aei e kairoroira bwa ti na kani kakukureia nanon Iehova ae te Atua. Ti na kanga ni kona ni karaoa aei?
E taku te Baibara: “Ngkana akea te onimaki ao e aki kona te aomata ni kakukureia te Atua; ba e riai ba ane nako n te Atua ao e na kakoaua ba bon iai, ao ba bon te tia kabo aia onimaki akana kakorakoraia n ukoukoria.” (Ebera 11:6) E na kanga ni kona n reke te aeka n onimaki aei? E taku te Baibara: “E reke te onimaki n te ongora.” (I-Rom 10:17) A rangi ni kukurei Ana tia Kakoaua Iehova ni maroroakin reirei man te Baibara, ma aomata ni kabane aika korakora nanoia ni kan toro iroun te Atua ma n onimakinna raoi.
Bon te kaantaninga ae abwabwaki bwa e a tia ni buokiko te kaongora aei bwa ko na ota riki n ae nanonaki n ana Tataro te Uea. E kona ni kakorakoraki onimakinan te Atua iroum ngkana ko karababaa riki am atatai ibukin Iehova ao ana bwai n tituaraoi nakoia “akana kakorakoraia n ukoukoria.” Ko bia kabatiaa riki am atatai ibukin Iehova ma ana kaantaninga bwa e aonga n reke iroum te iraorao ae kaan ma Tamam are i karawa n aki toki.—Ioane 17:3.
[Kabwarabwaraan n iteraniba]
“Tamara are i karawa, E na tabuaki aram. E na roko ueam. E na tauaki am taeka i aonaba, n ai aron tauana i karawa. Ko na anganira karara ae ti a tau iai n te bong aei. Ao Ko na kabara ara bure mai roura, n ai arora ngkai ti kabara aia bure akana bure nako ira. Ao tai kairira nakon te kaririaki, ma Ko na kamaiuira man te buakaka.”—Mataio 6:9-13
[Taamnei n iteraniba 7]
E katauraoi bwaai aika kainnanoaki irouia akana tangiria, Iehova
[Taamnei n iteraniba 7]
E buokira naba te Atua bwa ti na rarawa nakon te Riaboro
[Taamnei n iteraniba 7]
Ngkana ti kakairi iroun Iobi are e kabwarai aia bure te koraki ake a iowawa nakoina, ti kona naba ngkanne ni kakabwaiaki n ana nanoanga te Atua