E Kamanoia Te Koraki Ake A Onimakinna Iehova
“Iehova, Ko na aki taua am nanoanga mai rou: E na aki toki ni kamaiuai am atataiaomata ma am koaua.”—TAIAN ARERU 40:11.
1. Tera are e butiia iai Iehova te Uea are Tawita, ao tera aron butimwaeakin te bubutii anne?
TE UEA are Tawita are uean Iteraera ngkoa, e ‘kaantaningaa Iehova n taotaona nanona’ ao e kairaki iai bwa e na taekinna ae ‘e ongo ana wewete’ Iehova ni kani buokia. (Taian Areru 40:1) E aki toki n nonori aron Iehova ni kamanoia te koraki ake a tangiria. Ai ngaia are e a kona Tawita ni bubutii bwa e na teimatoa ni kamanoaki iroun Iehova. (Taian Areru 40:11) E iangoaki Tawita bwa ngaia temanna i buakoia mwaane aika kakaonimaki ma aine ake a beritanaki nakoia “te manga-uti are raoiroi riki,” ao e uringaki iroun Iehova, bwa ngaia temanna are e na karekea te bwaintangira anne. (Ebera 11:32-35) E na reke kabwaiana nakon taai aika a na roko. E koreaki arana n ana “boki ni kauring” Iehova.—Maraki 3:16.
2. E a kanga te Baibara ni buokira bwa ti na ota n ae e nanonaki n te kamanoaki iroun Iehova?
2 E ngae ngke a maiu imwain rokon Iesu Kristo aomata aika kakaonimaki ake a koreaki araia n Ebera mwakoro 11, ma a maiuakina ae boraoi ma are e reiakinna Iesu ngke e kangai: “Ane tangira maiuna ao e na kabuaa; ane riba maiuna n te aba aei ao e na kawakinna i mwain te maiu are aki toki.” (Ioane 12:25) Mangaia are te kamanoaki iroun Iehova e teretere iai bwa e aki nanona te katanaki man te karawawataki ke te bwainikirinaki. E nanona kamanoan te aomata n te aro n taamnei, bwa e aonga ni kona ni kateimatoaa arona ae tamaroa i matan te Atua.
3. Ti kanga ni kakoauaa bwa e kamanoaki Kristo Iesu iroun Iehova, ao tera mwina?
3 Iesu boni ngaia riki are e bwainikirinaki n te aro ae aki-riai ao ni kabuakakaki, ao n tokina a a bon tokanikai ana kairiribai n tiringnga n te aro ae kamaamaa ao ni kammaraki. Ma e aki nanonaki n anne bwa e urua ana berita te Atua ibukin kamanoan te Mesia. (Itaia 42:1-6) Ni manga-utin Iesu n ana katenibong imwin matena ae kamaamaa, ao e kaotaki iai bwa e ongo Iehova tangina ni kani buokaki, n aron naba Iehova are e ongo tangin Tawita. Ni kaekaan anne, Iehova e kakorakoraa Iesu bwa e na teimatoa ni kakaonimaki. (Mataio 26:39) Ibukin kamanoakin Iesu n te aro aei, e karekea iai te aki-mamate i karawa, ao mirion ma mirion mwaitiia aomata ake a a tia n onimakina ana karea ni kaboomwi, a a kona ni karekea te maiu are aki toki.
4. Tera te karaunano are a anganaki Kristian ake a kabiraki ao “tiibu tabemwang”?
4 Ti kona ni kakoauaa bwa e tatauraoi Iehova ao ni kona ni kamanoia ana toro n te tai aei, n aron are e karaoia nakon Tawita ao Iesu. (Iakobo 1:17) Nikiraia tarin Iesu aika kabiraki i aon te aba aika tii tabeman, a kona n onimakina ana berita Iehova aikai: “Kantaningan te baibai n te tibanga ae e katauraoaki i maimi i karawa. Bon te tibanga ae e aki kona ni mka, ke ni bareka, ke ni mane. Ba ngkai kam onimaki, ao e kawakiningkami te Atua, ni mwaakana, i main te kamaiu ae e tauraoi ni kaotaki n tokin aonaba.” (1 Betero 1:4, 5, BK) “Tiibu tabemwang,” ake a kaantaningaa te maeka n te aonnaba, a kona naba n onimakina te Atua ma ana berita are e taekinna rinanon te tia areru ni kangai: “Kam na bane n tangira Iehova, ngkami akana ana aomata aika itiaki: E kawakinia akana kakaonimaki Iehova.”—Ioane 10:16; Taian Areru 31:23.
E Kamanoaki Aia Iraorao ma Iehova
5, 6. (a) A a kanga n tia ni kamanoaki ana aomata te Atua ni boong aikai? (b) Tera te reitaki i marenaia taani kabiraki ma Iehova, ao tera aroia te koraki ake a kaantaningaa te maeka n te aonnaba?
5 N taai aikai, e a tia Iehova ni karaoi babaire ibukin kamanoakiia ana aomata n te aro n taamnei. E ngae ngke ti aki kamanoaki man te bwainikirinaki ke taiani kangaanga ao kabuanibwai ake a riiriki nakon maiura, ma e kakaonimaki n anganiia te buoka are a kainnanoia ibukin kamanoan aia iraorao ae kaan ma ngaia. A aana aia iraorao aei i aon onimakinan ana babaire te Atua ae tatangira ibukin te kaboomwi. Tabeman mai buakoia Kristian aika kakaonimaki aikai, a a tia ni kabiraki n taamnein te Atua ao a na riki bwa taan tautaeka ma Kristo i karawa. A a tia n atongaki bwa a raoiroi ngkai natin te Atua ngaiia n te aro n taamnei, ao a kaineti taeka aikai nakoia: “E a tia ni kamaiuira mani mwakan te ro, ao E uotira nako nanon uean Natina are tangiraki; are e reke mai Rouna kamaiuara, are kabaran ara bure.”—I-Korote 1:13, 14.
6 Mirion ma mirion mwaitiia Kristian aika kakaonimaki naba ake a a tia ni karauaki nanoia bwa a na kakabwaiaki naba man ana babaire te Atua ibukin te kaboomwi. Ti wareka ae kangai: “E aki nako mai naba Natin te Aomata ba E na tau-toronia aomata, ma E roko ba E na toro irouia aomata, ao ba E na anga maiuna ba unoraia aomata aika maiti.” (Mareko 10:45) A ingainga nanoia Kristian bwa a nang karekea ‘te inaaomata ae kamimi are ana bwai natin te Atua.’ (I-Rom 8:21) Ma n te tai moa aei, a kateimatoaa kakawakin aia iraorao ma te Atua ao a botumwaaka ni kakorakoraa aia iraorao anne.
7. E kamanoa mweeraoia n taamnei ana aomata Iehova rinanon tera?
7 Te anga teuana are e kamanoa iai mweeraoia n taamnei ana aomata Iehova, boni man katauraoan te kaetieti ibukin katamaroan aia kataneiai. Karaoan aei e kariaia bwa a na karekea riki te atatai ae eti ibukin te koaua. E katauraoa naba te kairiri ae waaki nako Iehova rinanon ana Taeka, ana botaki ao taamneina are raoiroi. I aan ana kairiri “te toro ae kakaonimaki ae wanawana,” ana aomata te Atua ni katobibia te aonnaba a riki n ai aron te utuna. Te toro aei e tabeakina kainnanoia ana aomata te Atua n te aro n taamnei ao ngkana iai riaina, a tabeakina naba kainnanoia n te itera n rabwata n aki ongeia bwa te reeti raa ngaiia ke tera nakoaia.—Mataio 24:45.
8. Tera are e kakoauaa Iehova ni kaineti ma ana aomata aika kakaonimaki, ao tera are e karau nanoia iai?
8 N aron Iehova n aki kamanoa Iesu man kamwaneakina irouia ana kairiribai, e aki naba kamanoia Kristian ni boong aikai n aron anne. Ma tiaki nanona bwa e aki kukurei iroura te Atua. E bon aki kona ni karaoa anne! Ma e katereterea raoi bwa e onimakinia ana aomata bwa a na boutokaa ana itera n te kauntaeka ibukin antai ae riai n tautaeka i aoni bwaai ni kabane. (Iobi 1:8-12; Taeka N Rabakau 27:11) E na bon aki mwanuokina taekaia te koraki ake a kakaonimaki nakoina Iehova, bwa “E tangira te kaeti-taeka Iehova, ao E aki kitania ana aomata aika itiaki. A kakawakinaki n aki toki.”—Taian Areru 37:28.
Kamanoaki n te Akoi ae Boto i Aon te Tangira ao te Kakaonimaki
9, 10. (a) E kanga ana kakaonimaki Iehova ni kamanoia ana aomata? (b) E a kanga ni kaotia te Baibara bwa e kamanoia ana aomata Iehova aika kakaonimaki, rinanon ana akoi ae boto i aon te tangira?
9 N ana tataro Tawita are e koreaki n Taian Areru 40, ao e tuatua iai bwa e na kamanoaki n ana akoi Iehova ae boto i aon te tangira ao ana kakaonimaki. Ana kakaonimaki Iehova ao tangiran te raoiroi irouna, e kairia bwa e na taekinna bwa baikara ana kaetieti aika e tangiri. Te koraki ake a mena i aan ana kaetieti aikai a kamanoaki man te rawawatannano, te maaku, ao taiani kangaanga ake a kaaitara ma ngaai te koraki ake a aki mutiakin ana kaetieti. N te katoto, ti kona ni kamanoaki ao ara koraki aika tangiraki iroura man te uruakinnano ngkana ti rawa ni kabonganai drug ao te kamanging n te aro ae aki-riai, ni wene ni bure, ao ni maiuakina te iowawa ae tiritiri. Ao te koraki naba ake a raure nako man ana kakaonimaki Iehova n aron are e karaoia Tawita n taai tabetai, a karauaki nanoia n ataakin ae e teimatoa te Atua n riki bwa ‘te tabo are a na karabaki iai’ te koraki ake a karaoi kairua ma a rairi nanoia. A kona te koraki aei n takaka ni kukurei n atonga aei: “Ko na kawakinai ngkana e kai nanou.” (Taian Areru 32:7) Ai tamaroa ra kaotan ana akoi te Atua ae boto i aon te tangira!
10 Te katoto riki teuana ibukin ana akoi te Atua ae boto i aon te tangira, bwa e kauringia ana toro ae a na teimatoa n raure nako ma kaain te aonnaba aika buakaka, ake e na waekoa ni kamaunaia nako. Ti wareka ae kangai: “Tai tangira aon te aba, ao tai tangiri naba bwain aon te aba. Ngkana e tangira aon te aba te aomata, ao e aki mena tangiran te Tama i nanona. Ba bwaai ni kabane aika mena i aon te aba, ae ana kaibabaru te rabata, ma aia kaibabaru maata, ma kainikatongan te maiu aei, a aki riki mairoun te Tama, ma a riki mai aon te aba.” Ngkana ti kaboraoa maiura ma te kauring aei, ti kona iai ni kamanoira n aki totoki, ibukina bwa e reitia ni kangai te kibu aei: “Ao e kume ni mauna aon te aba ma kaibabaruna: ma ane kakaraoa ae E tangiria te Atua, ao e teimatoa n aki toki.”—1 Ioane 2:15-17.
Kamanoaki n te Rabakau n Iango, te Atatai, ao te Wanawana
11, 12. Kabwarabwaraa bwa ti kanga ni kamanoaki n te rabakau n iango, te atatai, ao te wanawana.
11 E kairaki natin Tawita are Toromon bwa e na korea ae kangai nakoia te koraki ake a kaantaningaa akoakia iroun te Atua: “E na tautaua maurim te wanawana, e na kawakiniko te ataibwai.” E kaumaki naba ni kangai: “Karekea te rabakau . . . Tai manuokia, ao tai tan nako man ana taeka wiu: Tai kitanna, ao e na kakawakiniko; Tangiria, ao e na tautaua maurim.”—Taeka N Rabakau 2:11; 4:5, 6.
12 Ti kabongana te rabakau n iango ngkana ti kananoa ara iango i aon baika ti reiakinna man ana Taeka te Atua. Karaoan anne e kairira bwa ti na karikirakea riki te atatai ae bati bwa ti aonga ni baireia bwa baikara bwaai aika ti na moanibwai ni maiura. E kakawaki aei ngkai a ataia angiina i buakora tao rinanon bwaai aika a a bon tia n riki nakoia, ae a riki kangaanga ngkana aomata a uaiakin tiia aika akea manenaia ni bon nanoia ke n tiaki nanoia. E mwamwanaira ana aonnaba Tatan n tangiran te kaubwai, te nakoa ae kakannato, ao te mwaaka, e ngae ngke e katuruturua nakoira Iehova bwa e kakawaki riki karaoan nanona. Te kabwaka ni moanibwaia irakin nanon te Atua nakon te kaubwai, te nakoa ae kakannato ao te mwaaka, e kona ni karekea te iraraure i nanon te utu, kerikakin te iraorao, ao mamaaran te nano ni kani karaoa nanon te Atua. N tokina, e kona te aomata ni karekea uaan anne bwa te nanokawaki are e kaotia Iesu n taeka aikai: “Tera kabaian te aomata, ngkana tao e kareke aaba ni kabane ni kabua tamneina iai?” (Mareko 8:36) E kairira te wanawana bwa ti na mutiakina ana reirei Iehova aikai: “Kam na ukoukora moa uean te Atua ma ana raoiroi; ao a na bane n raonaki baikai nako imi.”—Mataio 6:33.
Ruanikain te Iangoiko i Bon Iroum
13, 14. Tera ae e nanonaki n tabeakinam i bon iroum, ao bukin tera bwa e aki raoiroi?
13 E bon riiriki ae aomata a na tabeakinia i bon irouia. Ma a kona n riki kangaanga ngkana e moanibwaia oin nanona te aomata. Mangaia are ibukin kamanoan ara iraorao ma Iehova, ao e reireinira bwa ti na aki rangi n tabeakin oin nanora. Te aomata are e tabeakina oin nanona, e “kaatuua ana iango i aon te bwai ae e tangiria, e kainnanoia, ke e mamate nanona iai.” Tiaki te koaua bwa anne raoi aroia aomata aika mwaiti ni boong aikai? E kakawaki ngkai e a kaman taekinna te Baibara bwa “ni boong aika kaitira” n ana waaki ae buakaka Tatan, ao “a na riki aomata ba taan tangiriia i bon irouia” ke a na tii tabeakin oin nanoia.—2 Timoteo 3:1, 2.
14 Kristian a ataa raoiroin iran nanon ana reirei te Baibara ni kaineti ma tabeakinaia aomata, n tangiriia n aron tangiraia i bon irouia. (Ruka 10:27; I-Biribi 2:4) A kona aomata n iangoa aei bwa e aki manena, ma e rangi ni kainnanoaki karaoan te aro aei ngkana ti na karekea te mare ae kakukurei, te reitaki ae kakukurei i nanon te utu, ao te iraorao ae karaunano. Mangaia are e aki riai ana toro Iehova ni koaua, ni kariaia bwaai aika e tangiri oin nanona bwa a na tautorona aroni maiuna, n te aro are a katinanikuaki riki iai bwaai aika kakawaki riki. Te bwai ae moan te kakawaki bon tabeakinan nanon Iehova ae te Atua ae e taromauriia.
15, 16. (a) E kona ni kairaki te aomata nakon tera ngkana e rangi n tabeakinna i bon irouna, ao antai are e oti anne irouna? (b) Ni koauana, tera ae e karaoia te aomata ngkana e waekoa ni motika taekaia aomata?
15 Tabeakinam i bon iroum, e kona ni kairiko bwa ko na kamoamoaa oin raoiroim, ao ko kona iai n riki bwa te aomata ae uarereke ana iango, ao e kainikatonga. E taku te Baibara: “Ma ngaia ae bon akea nanoangakim, ngkoe te aomata nako ae ko kabuakakaia raom. Ba ngkana ko kabuakaka temanna, ao ko kabuakakako boni ngkoe, ba ko karaoi naba baika e karaoi.” (I-Rom 2:1, BK; 14:4, 10) Mataniwin Aaro n ana tai Iesu a rangi ni kamoamoaa oin raoiroia n te aro are a namakinna bwa e riai irouia bwa a na kabuakakaa Iesu ao taan rimwina. Ni karaoan anne, a karikiia iai bwa taani moti. Ibukina ngke a aki nora oin kabwakaia, ao a kabuakakaia iai i bon irouia.
16 Iuta, are te tia rimwin Iesu are e kamwanea, e a riki naba bwa te tia motika taekaia aomata. N te tai teuana i Betania ngke e kabiraki Iesu iroun Nei Maria are mwanen Rataro n te bwaa ae boiarara, ao e rangi ni kabuakakaa anne Iuta. E karina ana eti ni kauntaeka n taku: “E aera ngke e aki kaboaki te kabira aei n tenibubua te tiring, ma n anganaki akana aki kaubwai?” Ma e reitaki te rongorongo ni kangai: “E aki atonga aei ba e mutiakinia akana aki kaubwai; ma e atonga aei ba te tia ira ngaia, ao e memena i rouna te buua-ni-mane, ao e uota nako are nneaki iai.” (Ioane 12:1-6) Ti bia aki riki n ai aron Iuta ke mataniwin Aaro ake a waekoa ni motika taekaia aomata, are a a manga bon kabuakakaia iai.
17. Kabwarabwaraa karuanikain te kamoamoa i bon iroura ke te karakaraka ni kainikatonga i bon iroura.
17 E kananokawaki bwa iai tabeman Kristian ngkoa ake a katotonga aron Iuta, e ngae ngke a aki riki bwa taan iraa. A riki bwa konan te kainikatonga, ni kabatiaa iangoan oin nanoia. E korea ae kangai Iakobo ibukiia: “Kam kamoamoaingkami ngkai n ami kainikatonga.” E a manga taku riki: “A bane ni bubuaka taiani kamoamoa aika ai aron aikai.” (Iakobo 4:16) E aki manena kamoamoakira i bon iroura ibukin bwaai aika ti a tia ni karaoi ke ibukin mwiokoara n ana mwakuri Iehova. (Taeka N Rabakau 14:16) Ti uringa te baere riki nakon te abotoro Betero are e kamoamoaa n taku: “Ngkana tao a bane ni bwaka i bukim, ao I bon aki bwaka ngai! . . . Ngkana tao I mate ma Ngkoe, ao I bon aki kaakeako.” Ni koauana, akea te bwai teuana ae ti riai ni kamoamoaira iai i bon iroura. Bwaai aika ti karekei, a reke ibukin ana akoi Iehova ae boto i aon te tangira. Uringakin aei e na kararoaira man te nano ni kamoamoa i bon iroura.—Mataio 26:33-35, 69-75.
18. Tera ana iango Iehova ibukin te kainikatonga?
18 Ti tuangaki bwa “e ri moan te kamateaki te kainikatonga, ao e rimoan te bwaka te nanorieta.” Bukin tera? E kaeka Iehova ni kangai: “I riba te kainikatonga, ma te nanorieta.” (Taeka N Rabakau 8:13; 16:18) Maroaka are e kaunaki Iehova n “nanorietan uean Aturia ma tamaroani karietatani matana”! (Itaia 10:12) E katuuaea teuaei Iehova ibukin nanorietana. E nang waekoa ni motikaki taekan ana waaki Tatan ni kabane, n ikotaki ma taani kairiri iai aika nanorieta ma ni kainikatonga, aika bon aomata ke anera aika buakaka. Ti bia aki kaotiota aroaron nanoia te koraki ake a riribaa Iehova, ake a aki kani kaetaki!
19. Tera bukina bwa a na kamoamoa ana aomata te Atua, ao n teimatoa naba n nanorinano?
19 Iai bukina ae a na kamoamoa iai Kristian ni koaua n te aro ae riai, ibukina bwa a a tia n riki bwa ana toro Iehova. (Ieremia 9:24) Ma e ngae n anne a na riai naba n teimatoa n nanorinano. Bukin tera? Ibukina bwa “a bane ni bure, ma n aki karekea te neboaki mairoun te Atua.” (I-Rom 3:23) Mangaia are ni kamanoan rikira bwa ana toro Iehova, ao ti riai naba n arona aroaron te abotoro Bauro are e taku bwa “E roko Iesu Kristo i aon te aba ba e na kamaiuia tani bure,” ao e a manga reitia n taku: “Ao boni ngai te kabanea ni buakaka i buakoia.”—1 Timoteo 1:15, BK.
20. E a kanga ngkai Iehova ni kamanoia ana aomata, ao e na kanga ni kamanoia nakon taai aika a na roko?
20 Kioina ngke a kukurei ana aomata Iehova ni mwinibwaia oin nanoia bwa a aonga ni moanibwaia nanon te Atua, ti kona ni kakoauaa iai bwa e na teimatoa Iehova ni kamanoia n te itera n taamnei. Ti kona naba ni kakoauaa bwa ngkana e roko te rawawata are korakora, e na kamanoia ana aomata Iehova tiaki tii n te itera n taamnei, ma n te itera naba n rabwata. A na takaka ni kangai ngkana a nang rin n ana aonnaba ae boou te Atua: “Noria, bon Atuara aei; ti kaantaningaia, ti na kukurei ma ni kimareirei n te maiu mai Rouna.”—Itaia 25:9.
Ko Uringnga?
• E kanga ni kamanoaki te Uea are Tawita ao Iesu Kristo?
• A kanga ni kamanoaki ana aomata Iehova ni boong aikai?
• Bukin tera bwa ti riai ni katinanikua iaiangoara i bon iroura?
• Bukin tera bwa ti kona ni kamoamoa ao n teimatoa naba n nanorinano?
[Taamnei n iteraniba 23]
E kanga Iehova ni kamanoa Tawita ma Iesu?
[Taamnei n iteraniba 25]
A kanga ni kamanoaki ana aomata te Atua n te itera n taamnei ni boong aikai?
[Taamnei n iteraniba 26]
E ngae ngke ti kamoamoa ngkai ti beku iroun Iehova ma ti riai n teimatoa n nanorinano