Titiraki Mairouia Taani Wareware
E kona n rotaki buaka ana iraorao ma Iehova te aomata, ni kabonganakin takaakaro aika tiritiri n te kombiuta?
E korea ae kangai Uean Iteraera ngkoa are Tawita: “E kata te aomata ae raoiroi Iehova: Ma taamneina e riba te aomata ae buakaka ma ane tangira te tiritiri.” (Taian Areru 11:5) Te taetae n Ebera ae rairaki bwa “riba” e kona n nanona “te aomata ae te tia kairiribai.” Mangaia are te aomata are e tangira te tiritiri, e a karikia bwa ana kairiribai te Atua. Aei ngkanne te titiraki ae ti riai n iaiangoia: E kona n rikirake tangiran te tiritiri ni kabonganakin takaakaro n te kombiuta?
E kaungaki kabonganakin bwaai ni buaka n takaakaro aika mena n te kombiuta. E aki toki ni kataneiaki iai te tia kabongana bwa e na rabakau ni buaka. E taku te maekatin ae The Economist: “A rangi ni kakabonganai takaakaro i aon te kombiuta kaain ana taanga ni buaka Amerika, bwa aia bwai ni kataneiai. Takaakaro tabeua ake a kabonganaki irouia kaain te taanga ni buaka, a bon kona ni kabooaki n taian titooa.”
Ni koauana, te koraki ake a kabonganai takaakaro i aon te kombiuta, a aki kaikoakiia aomata aika boni maiu. Ma tera ae e na kona n riki nakon nanon te aomata, man rineakin bwaai ni kakibotu n aron aikai? (Mataio 5:21, 22; Ruka 6:45) Tera ae ko na motinnanoia ibukin te aomata ae tangiria n ewariia aomata, ni katiia, n kaikoakiia, ao n tiringia, n aron aika a kaoti n taian taamnei? Tera ae e na riki ngkana e kakabanea te tai ae bati te aomata aei, ni katoa wiki n takaakaro aika tiritiri aikai, ao ni karokoa ae e a kuri n tautoronaki iai? Tao ko na bae n iangoia bwa e a karikirakea tangiran te tiritiri, n aron naba te aomata ae matakuakin taamnei aika bwaitingako, bwa e na rikirake tangiran te wene ni bure i nanona.—Mataio 5:27-29.
Tera aron korakoran Iehova n ribaa te aomata ae e tangira te tiritiri? E taku Tawita bwa “e riba te aomata” anne Iehova. N ana bong Noa, ao e kaota korakoran ribaakin te tiritiri Iehova nakoia te koraki ake a tangira te tiritiri. E taku Iehova nakon Noa: “E a reke nanou ba N na kamaunaia aomata ni kabaneia, ba e buta aonaba n te tiritiri i rouia; ao noria, N na kamaunaia mai aonaba.” (Karikani Bwaai 6:13) E kamaunaia aomata ni kabane te Atua ibukin aroia n tiritiri. E kamaiua tii Noa ma kaain ana utu, ae waniman ikotaia ni kabane, ake a aki tangira te tiritiri.—2 Betero 2:5.
Aomata ake a tangiria n riki bwa raoraon Iehova “a na ororoi aia kabaang ba winibarau, ao aia raanti n oniki ba bwaai ni koro-mwangani-kaai.” N onean mwin are a na tangira te tiritiri, a aikoa “reireiia te buaka.” (Itaia 2:4) Ngkana ti kan teimatoa n riki bwa raoraon te Atua nakon are ti na riki bwa ana kairiribai, ti riai ni ‘kitana te buakaka, ao ni kakaraoa te raoiroi.’ Ti riai n ‘ukoukora te raoi, ao [ni] kaea ni kan tauua.’—1 Betero 3:11.
Tera arora ngkana ti a tia n kakabonganai takaakaro aika tiritiri i aon te kombiuta? Ti riai ni kananomatoaira bwa ti na kakukureia Iehova rinanon te rarawa nakon kaakaraoan te bwai are e ribaia. Ti riai n tataro ibukin ana ibuobuoki taamnein te Atua ae raoiroi, ao ni katoka kaakaraoan te aroaro aei ae kamamaaraa ara onimaki. Ti kona ni katokia ngkana ti kariaia aeka n aroaro n aron te rau, te raoiroi, ao te taotaonakinnano, bwa a na buokira ni maiuakin baika tangiraki iroun te Atua.—Ruka 11:13; I-Karatia 5:22, 23.