Te Kaboomwi E Kamoamoaa Raoiroin te Atua
IMWIN aia karitei Atam ma Nei Ewa, ao e a taekina ana babaire Iehova are e na karekea te Kariki are e na kaikoakaki bukini waena. (Karikani Bwaai 3:15) E a kakoroaki bukin aei ngke e a tiringaki Iesu Kristo i aon te kai ni kammaraki irouia ana kairiribai te Atua. (I-Karatia 3:13, 16) E aki roko n te bure Iesu, boni mangke e riki n te kakai i nanoni biroton te kibono ni mwaakan te taamnei ae raoiroi. Mangaia are kawaawaean raraana e kona ni kabonganaki bwa te kaboomwi ibukin kainaaomataia aomata, ake a karekea te bure ma te mate mairoun Atam.—I-Rom 5:12, 19.
Akea ae kona n tuka te Atua ae moan te mwaaka ae Iehova man kakoroan bukin ana kaantaninga. Mangaia are kioina ngkai e teimatoa ni kaakakoroi bukin ana kaantaninga, e kona n iangoaki te kaboomwi bwa ai aron ae e a tia ni kabwakaki, ike e a kona n reitaki iai ma ake a onimakina kakoroan bukin ana berita. Ibukin aei, a kona kanoan Atam aika bubure n aron Enoka, Noa ao Aberaam, n nakonako ao n iraorao ma te Atua n akea uruan itiakina.—Karikani Bwaai 5:24; 6:9; Iakobo 2:23.
Tabeman aomata ake a onimakina Iehova, a karaoi kairua aika kakaiaki. E karaoa anne te Uea ae Tawita. Tao ko na titiraki ni kangai: ‘E aera ngkai e teimatoa Iehova ni kakabwaiaa te Uea ae Tawita, e ngae ngke e a tia ni karaoa te wene ni bure ma Nei Bata-teba, ao ni kaira naba kamatean buun neiei are Uria?’ Te bwai ae rangi ni kakawaki iai bon ibukin nanon Tawita n raraoma ni koaua ao n onimaki. (2 Tamuera 11:1-17; 12:1-14) E kona ni kabwaraa ana bure Tawita te Atua ngke e raraoma, ao e boboto karaoan anne man ana angakarea Iesu Kristo are e na karaoia. Ao e aki uruaki iai ana kaetitaeka ae riai te Atua ao ana raoiroi. (Taian Areru 32:1, 2) Ibukin kakoauaan aei, e kabwarabwaraa te Baibara aron rangin nakoraoin karaoan ana karea ni kaboomwi Iesu, bwa “E na kaota ana karaoiroi te Atua ngke E aki mutiakini buure, ake rimoa,” ao aika “ngkai” naba.—I-Rom 3:25, 26.
E rangi ni bati kakabwaiaaia aomata are e reke man kakawakin raraan Iesu. Ni kaineti ma te kaboomwi, a kona aomata aika taani bure aika raraoma ni koaua, ni karekea reitakia ae kaan ma te Atua. Irarikin anne, e karekea te anga te kaboomwi are a na kautaki iai maate nakon te aonnaba ae boou. A na uti naba iai ana toro te Atua aika kakaonimaki, ake a mate imwain ae e karaoa te kaboomwi Iesu, n ikotaki ma ake a mate n aki ataa aron taromaurian te Atua. E taku te Baibara: “Iai ... manga-utiia akana raoiroi ao akana aki raoiroi.” (Mwakuri 24:15), N te tai anne ni kaineti ma te kaboomwi, e nang angania aomata ni kabane aika ongeaba Iehova , te maiu are aki toki. (Ioane 3:36) E kabwarabwaraa ni kangai Iesu: “E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) A na bane n reke kakabwaia aikai nakon te botannaomata, ibukina bwa e a tia te Atua ni katauraoa te karea ni kaboomwi.
Te bwai ae rianako riki arona man te kaboomwi, bon tiaki kakabwaia aika ti karekei mai iai. Ma ae rangi ni kakawaki riki, bon aron ana kaboomwi Kristo ni kaineti ma te ara ae Iehova. E kaotiota koauan ae Iehova bon te Atua ae kororaoi ana kaetitaeka, ae E kona n reitaki ma aomata aika bubure ao e bon teimatoa naba n itiaki ma n tabu. Ngke arona bwa e aki baireia te Atua bwa e na katauraoa te kaboomwi, ao e na bon akea kanoan Atam ae e na kona n nakonako ke n iraorao ma ngaia. A na aki naba kona n nakonako ma Iehova Enoka, Noa ao Aberaam, ke n raoraonna. E ataa aei te tia areru, ao e korea ae kangai: “Iehova, ngkana tao Ko mutiakini buure, ao ai antai ae na tei, te Uea?” (Taian Areru 130:3) Ai bati ra ara kakaitau ae ti riai n angan Iehova ibukin kanakoan Natina ae rangi n tangiraki nakon te aonnaba, ao nakon naba Iesu ngkai e kariaia bwa e na anga maiuna bwa te kaboomwi ibukira!—Mareko 10:45.