Nakonako Ma Te Atua Ao Taia Te Raoiroi

“A kamaea te ang n unikia, ao a na taia te ukeukenanti.”​—OTEA 8:7.

1. Ti na kanga ni kona n nakonako ma Iehova?

E NAKO raoi riki te mwananga i aon te tabo ae karuanikai, ngkana e kairaki iroun ae mwaatai. Ti wanawana riki ngkana ti nakonako ma te tia kairiri aei, nakon are tii ngaira. N aaro tabeua, e kaikonakaki aei ma arora aika ti kaakaraoi ngkai. E a tia n anga nanona Iehova bwa e na kairira i nanon rereuan te aonnaba ae abwabwaki ae buakaka. Ti wanawana ngkana ti nakonako ma ngaia nakon are ti na kaeti eutani waera i bon iroura. Ti na kanga n nakonako ma te Atua? Boni man touan mwin te kairiri are e katauraoia n ana Taeka.

2. Tera ae na rinanoaki n te kaongora aei?

² N te kaongora are imwain aei, e maroroakinaki iai te kaotioti ni kaikonaki, are e koreaki n Otea mwakoro 1 nakon 5. N aron ae ti a tia n noria, iai reirei man te karaki anne aika kona ni buokira n nakonako ma te Atua. Ti na rinanon ngkai reirei tabeua aika kakawaki man mwakorona 6 nakon 9. Ti na rangi ni buokaki ngkana ti tuoi moa mwakoro aika aua aikai.

Te Tutuo ae Kimototo

3. Taekina kanoan Otea mwakoro 6 nakon 9, ni kakimototoa.

³ E kanakoa Otea Iehova bwa e na taetae ni burabeti moa nakoia kaain te tautaeka n uea ni baronga ake tebwina mai meang, ae Iteraera arana. Te botannaomata aei, e ataaki naba n arana ae Eberaim kioina ngke a mwaiti kaain te baronga anne, ake a a tia ni kitana te Atua. E kaotaki n Otea mwakoro 6 nakon 9 bwa a karitei aomata ngke a urua ana berita n tua Iehova, ao ni kaakaraoan te buakaka. (Otea 6:7) A tabe n inanoi ma te aonnaba n onean mwin are a na okira Iehova. Ibukina bwa a teimatoa n unika ae buakaka, a na manga taia te buakaka. Nanona ngkanne bwa e nang reke nakoia te motiki-taeka ae matoatoa. Ma e ngae n anne, iai naba te rongorongo ae karaunano n ana taetae ni burabeti Otea. A karauaki nanoia aomata bwa a kona n okira Iehova ao e na nanoangaia ngkana a kaota te raraoma ni koaua.

4. Baikara reirei aika manena, ake ti na rinanoi man ana taetae ni burabeti Otea?

⁴ A reke reireiara man mwakoron ana taetae ni burabeti Otea aika aua aikai, ake a na buokira n nakonako ma te Atua. Ti na rinanon reirei aika manena aika aua: (1) E kaotiotaki te raraoma ni koaua n te mwakuri ao tiaki n tii te taetae-ni-kawai; (2) a aki kakukureia te Atua angakarea n tii ngaiia; (3) e maraki Iehova ngkana a rairaki nako taan taromauriia; ao (4) ti riai n unika te raoiroi ngkana ti kan taia te raoiroi.

Aron Kaotiotan te Raraoma ni Koaua

5. Taekin baika kakawaki akana kaotaki n Otea 6:​1-3.

⁵ A rangi ni bati reireiara ni kaineti ma te raraoma ao te nanoanga n ana taetae ni burabeti Otea. N Otea 6:​1-3, ti wareka iai ae kangai: “Nako mai, ao ti na okira Iehova: ba E raebitira, ao E na kamaiuira; E oroira, ao E na bautira. E na kamaiuira i mwin uabong: E na kateirakeira n te kateni bong, ao ti na maiu i matana. Ao ti na ata Iehova, ti na kaaea atakina. E na bon roko iroura n ai aron te ingabong: ao E na roko i roura n ai aron te karau, n ai aron te karau are te kaitira are teteboki aontano.”

6-8. Tera kairuaia Iteraera ni kaineti ma aroia n raraoma?

⁶ Antai ae taekin taeka aika koreaki ni kiibu aikai? A taku tabeman bwa a taekinaki irouia tibun Iteraera ake a aki kakaonimaki, ao a taku bwa a baka-n-raraoma aomata ake a aki ongeaba, ao a kabongana buaka ana nanoanga te Atua. Ma tabeman, a taku bwa e taekinna te burabeti are Otea ngke e bubutiia aomata bwa a na okira Iehova. N aki ongeia bwa antai ae taekin taeka aikai, ma e kangai te titiraki ae kakawaki: Te koaua bwa a okira Iehova kaain te tautaeka n uea ni baronga ake tebwina, ao ni kaotiota te raraoma ni koaua? A a aki. E taku Iehova rinanon Otea: “Eberaim, tera ae N na karaoia nako im? Iuta, tera ae N na karaoia nako im? Ba ai aron nangin te ingabong ami raoiroi, ao ai aron naba te aoi ae kai mauna.” (Otea 6:4) Bon te bwai ni kakoaua aei, ibukin kananokawakin aia onimaki ana aomata te Atua! E a kaani mauna nako te akoi ae boto i aon te tangira, n aron te aoi are kai mauna ngkana e oti taai. E ngae ngke a baka n raraoma aomata, ma Iehova e noria ba akea bukina ae e na nanoangaiia iai. Tera te kangaanga?

⁷ A aki raraoma ma nanoia ni koaua I-Iteraera. E taekina aei Otea 7:​14 ibukin aki-kukurein Iehova irouia ana aomata: “A aki tang nako Iu n nanoia, ma a maango i aoni neia ni wene.” E manga taku ni kibuna 16: “A oki, ma tiaki nakon Teuae mena i eta.” E nanonaki n aei bwa a aki okira te taromauri ae moanibaan te raoiroi. A aki kan okira taromaurian Iehova ae moanibaan te raoiroi rinanon karaoan bitaki aika riai bwa a aonga ni manga iraorao ma ngaia. Ni koauana, a aki kan nakonako ma te Atua.

⁸ Iai te kanganga riki teuana ibukin aroia I-Iteraera ni baka n raraoma. A teimatoa ni bubure, ni buure aika mwaiti aekaia nako, n ikotaki naba ma te babakanikawai, te tiritiri, te ira, taromaurian boua, ao te iraorao ma natannaomata ake tabeua. N Otea 7:​4, a kabotauaki aomata aikai ma te “ne n umum” ibukina bwa n taraakina e a rangi ni korakora tangiran te buakaka i nanoia. A riai n nanoangaki ngkai e a rangi ni kananokawaki aia onimaki? A aki! E tuangia aomata ake a karitei Otea bwa e na “uring aia buakaka” Iehova, ao e na “kabo aia bure.” (Otea 9:9) A na aki nanoangaki!

9. Tera ae ti reiakinna ibukin te raraoma ao te nanoanga n ana taeka Otea?

⁹ Tera reireiara ae reke man warekan ana taeka Otea, ni kaineti ma te raraoma ao te nanoanga? E reke te kauring man aia katoto tibun Iteraera ake aki-onimaki, ae te reirei ae ngkana ti kan nanoangaki iroun Iehova, ti riai ni kaotiota te raraoma ni koaua mai nanora. E na kanga ni kaotiotaki te raraoma anne? E aki kona ni mwamwanaki Iehova n te rannimata ke te taetae-nikawai. E kaotaki te raraoma ni koaua ae nako man te nano n te mwakuri. E riai te tia bure ni kitana maiuna ae bure ao ni kaboraoa maiuna ma kaetieti aika kakawaki ibukin taromaurian Iehova, bwa e aonga n nanoangaki.

E Aki Kakukureia Iehova Angakarea n Tii Ngaiia

10, 11. Bukin tera ngke e aki kukurei Iehova n angakarea n tii ngaia n aron ae kabwarabwaraki n rongorongoia I-Iteraera?

¹⁰ Ti na rinanon ngkai te kauoua n reirei ae e na buokira n nakonako ma Iehova. E kangai: E aki kakukureia te Atua angakarea n tii ngaiia. E taku Otea 6:6: “Ba I [Iehova] tangira te nanoanga, ao I aki tangira te anga-karea; ao I tangira riki atakin te Atua nakoni karea ni kabuokaki.” E kukurei Iehova n te akoi ae boto i aon te tangira, ke n te tangira ae kona n onimakinaki, ae bwain te nano, ao e kukurei naba n ataakin te Atua irouia aomata. Ma tao ko na mimi n aei man taku: ‘E aera ngkai e taekinna te kibu aei bwa e aki kukurei Iehova n te “anga-karea” ao n te “karea ni kabuokaki”? A aki katauaki n te Tua Rinanon Mote?’

¹¹ A katauaki angakarea ao karea ni kabuokaki n te Tua, ma iai aia kangaanga ae kakaiaki aomata ake n ana bong Otea. E teretere bwa iai tibun Iteraera ake a kakaonimaki n anganga karea n te aro ni kainikatonga. Ao n te tai naba anne, a kaakaraoa ae bure. Ni kaakaraoan ae bure irouia, a kaotia iai ae akea irouia te tangira ae kona n onimakinaki. A kaotia naba iai, bwa a rawa ni butimwaea te atatai ibukin te Atua kioina ngke a aki maiuakini. Ngkana akea te raoiroi i nanoia aomata, ao a aki ukoukora te aroaro ni maiu ae riai, tera ngkanne bongan aia angakarea? A aki kakukurei aia angakarea iroun Iehova ae te Atua.

12. Tera te kauring ibukia aomata aika maiu ni boong aikai n Otea 6:6?

¹² Iai te kauring n ana taeka Otea ibukia aomata aika mwaiti, aika iriri aia taromauri ni boong aikai. A anganga karea nakon te Atua n aron ae kaakaraoaki n aia Aaro. Ma e rangi ni karako ke tao akea rotakin maiuiia n aia taromauri, n aron ae a kaakaraoia ni katoa bong. Te koaua bwa a na kakukureia te Atua aomata aikai, ngkana akea nanoia ni kani butimwaea te atatai ae eti ibukina, ao ni maiuakina te atatai anne n aron are a kitan aroia aika bure? Ke e tai iangoia temanna bwa e kukurei te Atua, ni mwakuri aika kaakaraoaki n Aaro n tii ngaiia. E aki kukurei Iehova irouia aomata aika a kataia ni karekea akoaia irouna man tii aia taromauri, ao a aki maiuakin reirei aika n ana Taeka.​—2 Timoteo 3:5.

13. Baikara karea aika a anganga Kristian, ma tera ae riai n uringaki ibukin kakawakiia?

¹³ Ngkai Kristian ni koaua ngaira, ti ururingnga bwa e aki kukurei te Atua n taian angakarea n tii ngaiia. E koaua bwa ti a aki anga ara karea aika maan nakon Iehova ngkai. Ma, ti bon “anga te karea ae karaoiroan te Atua, ae uaani matanriara aika kaota tauani bukin arana.” (Ebera 13:15) E rangi ni kakawaki bwa ti na aki-katotongia tibun Iteraera ake a kaakaraoa ae bure n ana bong Otea, ao n iangoia bwa e kona ni karaoiroaki ke ni mwanuokinaki ara bure ngkana ti kabatiaa ara tai n tataekina te Atua nakoia aomata. Iangoa ana katoto temanna te roro-n-rikirake are e kakarabaa ni wene ni bure. E taku imwina riki neiei: “I kabatiaa au tai n te mwakuri ni minita, bwa n au iango, karaoan aei e kona ni kabooa mwin au bure aei.” Titeboo te mwakuri anne ma are a kataia ni karaoia naba tibun Iteraera ake a bubure. Mangaia are, e kakukureia Iehova ara angakarea ae uaan matanriara, tii ngkana ti irianna ma nanora ni koaua ao ni kaakaraoi naba aaro aika kakukureia te Atua.

E Maraki Iehova Ngkana A Rairaki Nako Taan Taromauria

14. Tera ae kaotaki n ana taetae ni burabeti Otea ibukin ana namakin Iehova?

¹⁴ Te katenua n reirei ae ti reiakinna n Otea mwakoro 6 nakon 9, bon ana namakin Iehova ni kaineti ma aroia taan taromauriia ngkana a rairaki nako mairouna. E kona ni matoatoa aroaron te Atua iai, ao e kona naba ni mwamwannano naba. E mwannanoia ao n nanoangaia te koraki ake a raraoma ibukin aia bure. Ma ngkana a rawa n raraoma ana aomata, e motika nanona bwa e na karaoa te bwai teuana ae matoatoa. E kimwareirei te Atua ngkana ti kakaonimaki n nakonako ma ngaia, ibukina bwa e korakora tabeakinan mweeraoira irouna. E taku Taian Areru 149:4: “E kukurei Iehova iroun ana botanaomata.” Ma tera ana namakin Iehova ngkana a aki kakaonimaki ana toro?

15. Tera aroaroia tibun Iteraera nakoia buuia?

¹⁵ E taekina ae kangai Iehova ni kaineti ma I-Iteraera ake a aki kakaonimaki: “A ri aon te berita n ai aron Atam: a burebureai iai.” (Otea 6:7) Te taetae n Ebera ae rairaki bwa “burebureai” e nanonaki iai “mwamwanai, (te mwakuri) n aki kakaonimaki.” Ni Maraki 2:​10-16, e kabonganaki naba te taetae n Ebera aei ibukin kabwarabwaraan aroaroia tibun Iteraera ake a aki onimakinaki n aroaroia, ake a aki-kakaonimaki nakoia buuia. Ni kaineti ma kabonganan te taeka aei n Otea 6:​7, e taekinaki n te boki teuana bwa bon “te taeka ni kabotau ibukin te mare are e kaotaki iai te aro n iraorao i marenaia taanga. . . E katereterea bwa e rotaki nanon te aomata bwa e a tia n uruaki te tangira i marenaia.”

16, 17. (a) Tera aroia I-Iteraera ni kaineti ma karinean aia berita ma te Atua? (b) Tera ae ti riai n uringnga ibukin ara mwakuri?

¹⁶ E iangoa Iteraera Iehova bwa buuna n te aro ni kaikonaki ibukina bwa e a tia ni karaoa ana berita ma te natannaomata anne. Ngaia are ngke a urua te berita anne, titeboo ma a wene ni bure iai. E kabotauaki te Atua ma te buu te mwaane ae kakaonimaki, ma bon ana aomata aika a kitanna!

¹⁷ Ao ngaira, tera arora? E kakawaki iroun te Atua ataakin ae ti nakonako ma ngaia ke ti aki. E raoiroi riki bwa ti na ururinga ae “Te Atua bon te tangira,” ao e rotaki n ara mwakuri. (1 Ioane 4:​16) Ngkana ti uaiakina te maiu ae buakaka, ti na kammaraka iai Iehova ao e na aki kukurei naba. Ururingan aei n taai nako, e kona n riki bwa otangara ae korakora ibukin kaaitaran te kataaki.

Arora ni Kona n Taia te Raoiroi

18, 19. Tera te boto-n-reirei ae ti kunea n Otea 8:​7, ao e kanga n noraki koauana irouia tibun Iteraera?

¹⁸ Ti na rinanon te kaaua n reirei man ana taetae ni burabeti Otea, ae arora ni kona n taia te raoiroi. Ni kaineti ma nanobabaia tibun Iteraera ao aia aki-kakaonimaki, e korea ae kangai Otea: “A kamaea te ang n unikia, ao a na taia te ukeukenanti.” (Otea 8:7) Ti kona n nora te reirei ae raoiroi riki ikai, ae ti riai n ururingnga: Iai reitakin te bwai ae ti karaoia ngkai, ma te bwai ae na riki nakoira rimwi riki. E kanga n noraki koauan te reirei aei, n rongorongoia I-Iteraera ake a aki kakaonimaki?

¹⁹ Ibukina bwa a bubure tibun Iteraera, a a unika iai te buakaka. A kona n teimatoa ni kaakaraoi mwakuri aikai n akea mwina ae buakaka nakoia? A na bon aki kona ni kamanoia man te motiki-taeka ae matoatoa. E taku Otea 8:​13: “E na uring aia buakaka [Iehova] ngkai, ao E na kabo aia bure.” Ao n Otea 9:​17, ti wareka iai ae kangai: “E na teweia nako Atuau, ba kioina ngke a aki kan ongo i Rouna: ao a na riki ba taan tiotio nako i buakoia botanaomata.” E na kabooi aia bure tibun Iteraera Iehova. Ibukina bwa a unika te buakaka, a na manga taia te buakaka. E koro bukin ana motiki-taeka te Atua nakoia n 740 B.C.E., ngke e a bwaka te tautaeka n uea ni baronga ake tebwina, ae Iteraera arana, irouia I-Aturia ao a kairaki nako kaaina bwa kaaunga.

20. Tera reireiara ma ni bwaai ake a a tia n riki nakoia tibun Iteraera?

²⁰ Ti reiakina te koaua ae kakawaki ma ni bwaai ake a a tia n riki nakoia tibun Iteraera, ae kangai: Ti na taia ae ti unikia. E kauringira Ana Taeka te Atua ni kangai: “Kam na tai burebureaki; E aki konaki ni mamanaki te Atua: ba te bae e unikia te aomata, ao e na manga anaa naba uaana.” (I-Karatia 6:7) Ngkana ti unika te buakaka, ti na taia te buakaka. N te katoto, te koraki ake a uaiakina maiuakinan te aroaro ni maiu ae buakaka, a na taia mwina ae kananokawaki. E na riki te bwai ae kananokawaki nakon te tia bure ae aki raraoma.

21. Ti na kanga ni kona n taia te raoiroi?

²¹ Ma tera arora ae ti na taia iai te raoiroi? E kona ni kaekaaki te titiraki anne n te kaikonaki ae bebete. Ngkana e kan taia te bwabwaia te tia ununiki, te koaua bwa e na unika te kaina? E na aki! E riai n unika te baere e kan taia. N aron anne, ti riai n unika te raoiroi ngkana ti kan taia te raoiroi. Ko kan teimatoa n taia te raoiroi, ae te maiu ae kakukurei ngkai, ao ni kaantaningaa te maiu are e aki toki n ana waaki ae boou te Atua i aon te aba? Ngkana ko tangira aei, ko riai n teimatoa n unika te raoiroi rinanon te nakonako ma te Atua ao ni maiuakini ana kaetieti aika raraoi.

22. Baikara reirei aika ti a tia n reiakin n Otea mwakoro 6 nakon 9?

²² Ti a tia n reiakin reirei aika aua n Otea mwakoro 6 nakon 9, ibukin buokara n nakonako ma te Atua: (1) E kaotiotaki te raraoma ni koaua n te mwakuri; (2) a aki kakukureia te Atua angakarea n tii ngaiia; (3) e maraki Iehova ngkana a rairaki nako taan taromauriia; ao (4)  ti riai n unika te raoiroi ngkana ti kan taia te raoiroi. Ti na kanga ni buokaki bwa ti na nakonako ma te Atua, ni kabanean mwakoron bokin te Baibara aei aika nimaua?

Tera Am Kaeka?

• E na kanga ni kaotiotaki te raraoma ni koaua?

• Bukin tera bwa e aki kakukureia Tamara are i karawa angakarea n tii ngaiia?

• Tera ana namakin te Atua ngkana a kitanna taan taromauria?

• Tera ae ti riai n unikia ngkana ti kan taia te raoiroi?

[Taamnei n iteraniba 18]

Bukin tera bwa e rawa Iehova nakon aia angakarea ana aomata?