Aremaketon Bon Kamaunan Bwaai ni Kabane?

AREMAKETON! E karika iangoan te urubwai ae moan te korakora te taeka aei iroum, ke iangoan te iuniweeti ae urarake? E a rangi ni bati n tataekinaki n aaba tabeua te taeka man te Baibara ae “Aremaketon.” E a taonaaba kabonganakin te taeka aei, ibukin kabwarabwaran te kaantaninga ae karawawata ae mena imwaia aomata. A a tia taamnei aika noraki i aon te TV ao birim ni katea bannan “Aremaketon,” n te aro ae rangi ni buakaka. E kangaanga ataakin nanon te taeka aei ao a mwaiti iango ibukina aika kairua. E ngae ngke a mwaiti iango ibukin te taeka ae “Aremaketon,” ma angiia a aki boraoi ma are e taekinna te Baibara, ae bon nibwan taeka n reirei ibukin Aremaketon.

Kioina ngkai e kairekerekeaki Aremaketon ma “tokin aonnaba” n te Baibara, ko aki ngkanne kakoauaa ae e kakawaki bwa ti na ota raoi n te taeka aei? (Mataio 24:3) Ao e aki riai ngkanne bwa ti na okira nibwan te koaua ae Ana Taeka te Atua ibukin kakaaean nanon Aremaketon, ao aron rotakim ma am utu iai?

Man te kakaae anne, e na kaotaki iai ae n onean mwin ae ti na iangoia bwa kamaunan bwaai ni kabane, e na kaotaki iai bwa n Aremaketon e na reke te maiu ae kakukurei ibukia aomata aika a kani maeka n te aonnaba ae on n te raoiroi. Ko na kakabwaiaki n anganaki te ota raoi ni kaineti ma ana koaua te Baibara aei, ngkana ko rinanon maroroakinan Aremaketon n te kaongora ae imwina.

[Te Bwaoki/Taamnei n iteraniba 3]

N AM IANGO, TERA AREMAKETON?

• Te kabuanibwai ae na riki man kabonganan bwaai ni buaka aika mwaakaroiroi

• Te kabuanibwai n te otabwanin

• Kauntaban bwaini karawa ma bwain te aba

• Kamaunakia aomata aika buakaka iroun te Atua