Kararoaa Te Taromauri Ae Kewe!

“E kangai te Uea, . . . Kam na oti nako mai buakoia, ao kaokoroingkami, ao tai ringa te bwai teuana ae kamwara.”​—2 I-KORINTO 6:17.

1. Tera ae a riai n ataia aomata aika bati?

A BATI aomata aika a aki ataa raoi te koaua ibukin te Atua, ao baika a na riki nakoia aomata nakon te tai ae na roko. Ibukin aki-ataakin anne, a a mangaongao aia kaantaninga iai. Iai mirion ma mirion aomata aika a tautoronaki ni koaua aika a boto i aon maakakia taimonio, waaki n Aro aika a taneiai ni kaakaraoaki, ao bukamaru aika kauna ara tia Karikiriki. Tao iai naba kaain rarikim ao am koraki aika kakoauaa te ai ni moone, te Atua ae te temanna-n-teniman, aki-mamaten te taamnei, ke reirei ni kewe riki tabeua.

2. Tera ae a a tia ni karaoia mataniwin Aaro, ao tera mwina?

² Antai ae irekereke ma taabangakin aki-ataakin rongorongon te Atua aei? E kamimi bwa bon taian Aro, ai moara ra riki botaki n Aro ao mataniwi n Aaro ake a reiakinia aomata iango aika a kaaitara ma ana iango te Atua. (Mareko 7:7, 8) N tokina, a bati aomata aika mwamwanaki bwa aongkoa a taromauria te Atua ni koaua, ma ni koauana, a boni kaunna. Aaro aika kewe, boni ngaia aika irekereke n te kangaanga aei.

3. Antai uton boutokaia Aaro aika kewe, ao e kanga ni kabwarabwaraki n te Baibara?

³ Bon iai te aomata ae aki nonoraki ae boutokai Aaro aika kewe. E taekina teuaei te abotoro Bauro ni kangai: “E kamataki nanoia atuan aon te aba, ake aomata ake a aki onimaki; ba e aonga n aki oti i aoia ootan euangkerioni mimitongini Kristo, are katotongan te Atua.” (2 I-Korinto 4:4) “Atuan aon te aba” aei bon Tatan te Riaboro. Boni ngaia uton boutokan te taromauri ae kewe. E korea ae kangai Bauro: “E onikia Tatan ba kaanga te anera ae raona te oota. Ma ngaia ae tiaki te bwai ae ababaki ngkana a onikiia naba tabonibain teuarei ba kaanga tabonibain te raoiroi.” (2 I-Korinto 11:14, 15) E karaoi baika bubuaka Tatan bwa a na taraa n raoiroi ao ni mwamwanaia aomata bwa a na kakoauai keewe.

4. Tera ae taekinaki n Ana Tua te Atua nakoia I-Iteraera rimoa ibukia burabeti ni kewe?

⁴ Maroaka ae e rangi ni kabuakakaia iai Aaro aika kewe te Baibara! N te katoto, e kauringia ana aomata te Atua ake a rineaki n te Tua Rinanon Mote, bwa a na aki mwane irouia burabeti ni kewe. Ane boutokai reirei aika kewe ao n taromauri atua ni kewe, ao “e na kamateaki; ba kioina ngke e a tia n taekina te aro n rawa nakon Iehova.” A tuangaki tibun Iteraera bwa ‘a na kaki mai buakoia te buakaka.’ (Te Tua-Kaua 13:1-5) Eng, e iangoi Aaro aika kewe Iehova bwa a buakaka.​—Etekiera 13:3.

5. Baikara reirei aika ti riai n iri nanoia ni boong aikai?

⁵ A katotonga Iehova, Iesu Kristo ao ana abotoro, ni kaineti ma ana namakin ibukin Aaro aika kewe. E kauringia taan rimwina Iesu ni kangai: “Kam na kawakiningkami nakoia burabeti ni kewe, akana nako imi ni baka n tiibu, ma boni kameanti aika kaakang uakekei i nanoia.” (Mataio 7:15; Mareko 13:22, 23) E koreia Bauro bwa “e kaotaki unin te Atua mai karawa nakon te buakaka ni kabanea ao nakon aia iowawa aomata, aika tuka te koaua.” (I-Rom 1:18) Ai kakawaki ra ngkanne bwa a na ira nanon te kauring aei Kristian ni koaua, ao ni kararoaia mairoun ane tuka te koaua man Ana Taeka te Atua ke e kabuta te reirei ni kewe!​—1 Ioane 4:1.

Otinako Mai “Baburon ae Kakanato”

6. E kanga ni kabwarabwaraki “Baburon ae Kakanato” n te Baibara?

⁶ Iangoa aron bokin te Baibara ae Te Kaotioti ni kabwarabwarai Aaro aika kewe. E kaikonakaki bwa te kabekaau ae koro ni manging ae mwaaka i aoia tautaeka aika bati ma aia aomata. E wene ni bure te aine ni kaikonaki aei ma uea aika bati ao e manging n raraaia taan taromauria ni koaua te Atua. (Te Kaotioti 17:1, 2, 6, 18) Iai te ara ae koreaki i aon ramwana ae botau ma arona ae rangi ni barekareka ao aroarona ae kammaira. Te taeka aei boni “BABURON AE KAKANATO, AE TINAIA KABEKAU MA BWAIN AON TE ABA AIKA RIAI NI BATI N RIBAKI.”​—Te Kaotioti 17:5.

7, 8. A kanga Aaro aika kewe n riki bwa te kabekaau, ao tera mwina?

⁷ Kabwarabwaran Baburon ae Kakannato n te Baibara, e botau raoi ma te botaki n Aro ae kewe ae katobibia te aonnaba. E ngae ngke ngaa ma ngaa Aaro aikai a aki katiteuanaki bwa te rabwata ae tii teuana n te aonnaba, ma a reitaki n aia kaantaninga ao n aia mwakuri. N aron ae kaotaki iroun te aine are n Te Kaotioti, iai mwaakaia Aaro aika kewe i aoia tautaeka. A katotonga te aine are e aki kakaonimaki nakon ana berita ni mare Aaro aika kewe, bwa a kabekaau ni kaineti ma aroia n itoman ma te tautaeka teuana ma teuana. E korea ae kangai te tia rimwin Kristo ae Iakobo: “Ngkami aika kaanga ainenuma aika kimoa, kam aki ata te raoraona te aba ba bon ribaan te Atua? Ma ngaia aei, ba ane kan raona te aba, ao e riki ba ana kairiribai te Atua.”​—Iakobo 4:4.

⁸ E bati karawawataaia te botannaomata man aia reitaki tautaeka ma Aaro aika kewe. Man ana kukune te tia rabakau i aon waaki n tautaeka ae Dr. Xolela Mangcu, ao e taku bwa “a bati katoto n rongorongon rimoa ni kaineti ma te tiritiri ae korakora ae bon riki man te reitaki i marenaia Aaro ao tautaeka.” E taku te nuutibeeba teuana n taai aikai: “Te kabanea ni korakora ni katuturaraa ao te itabararaa ae karuanikai ni boong aikai . . . a bane ni boto i aon taian Aro.” A a tia ni mate aomata aika mirion ma mirion mwaitiia ni buaka ake a boutokaki irouia Aaro. E a tia naba Baburon ae Kakannato ni bwainikirinia ao n tiringia ana toro ni koaua te Atua, ike e a manging iai n raraaia n te aro ni kaikonaki.​—Te Kaotioti 18:24.

9. E kanga kabwarabwaraan ribaakin te Aro ae kewe iroun Iehova, n te boki ae Te Kaotioti?

⁹ E teretere ribaakia Aaro aika kewe iroun Iehova man te bwai ae riki nakon Baburon ae Kakannato. E taku Te Kaotioti 17:16: “Kooro ake tengaun, ake ko nori, ma te man arei, a na riba te kabekaau, ao a na urua, ao a na buuta karabana, ao a na kana irikona, ao a na kabuokia n te ai ni kabanea.” Te moanibwai, e na raebitiaki rabwatana iroun te man ae totoa, ao e na kanaki irikona. Ngkanne e na kabuekaki nikiran rabwatana are e tiku. Ni kakoroan bukin anne n te tai ae e a kaan rokona ngkai, a na karaoa aekakin anne tautaekan te aonnaba nakoia Aaro aika kewe. E na kairiia te Atua bwa a na karaoia. (Te Kaotioti 17:17) E nang kamaunanakoaki Baburon ae Kakannato, ae te botaki n Aro ae kewe ae katobibia te aonnaba. “E na bon aki manga noraki.”​—Te Kaotioti 18:21.

10. Tera ae ti riai n iangoia ni kaineti ma Aaro aika kewe?

¹⁰ Tera ae a riai n iangoia taan taromauri ni koaua ni kaineti ma Baburon ae Kakannato? E rangi n teretere ana tua te Baibara ae kangai: “Au aomata, kam na oti nako mai nanona, ba kam na aki buokanibwai ma ngaia n ana bure, ao a na aki reke i roumi bwaai ni kamamate ake kaina.” (Te Kaotioti 18:4) Naake a kani kamaiuaki, a riai n otinako man Aaro aika kewe, imwain ae e a oimwi. E a kaman taetae ni burabetinna Iesu ngke e mena i aon te aba, bwa ni boong aika kaitira a na bati aika a na taku bwa a boni kakairi irouna. (Mataio 24:3-5) Ma e taku nakoia te koraki aikai: “I bon aki ataingkami ma ngkoa: naako mai Rou, ngkami aika kam kakaraoa ae buakaka.” (Mataio 7:23) E rawa nakoia Aaro aika kewe te Uea ae e a tia ni katokaaki i aon ana kaintokanuea ae Iesu Kristo.

Teimatoa ni Kararoaa ​—N te Aro Raa?

11. Tera ae ti riai ni karaoia bwa ti aonga n teimatoa ni kararoaa te taromauri ae kewe?

¹¹ A teimatoa Kristian ni koaua ni kararoaia man te taromauri ae kewe, n rawa nakon aia reirei Aaro aika kewe. Nanon aei bwa ti na aki ongora ke ni mataku n aia waaki i aon te rerio ke n te TV, ao ti na aki naba wareware n aia boki aika boutokai keewe ibukin te Atua ao ana Taeka. (Taian Areru 119:37) Ti wanawana naba ngkana ti aki irekereke ma botaki ao waaki ni kakibotu ake a mwanenaki man te botaki ae iai irekerekena ma te Aro ae kewe. N reitaki ma anne, ti bon aki naba boutokaa te taromauri ae kewe n te anga teuana. (1 I-Korinto 10:21) Kararoaan baikai, e kamanoira man mwamwanakira iroun temanna “n ana ataibwai ma mamanan te aba i rouna ae akea uana, n ai aron aia taeka nikawai aomata, n ai aron reirein aon te aba aika moan reirei, ao tiaki ai aroni Kristo.”​—I-Korote 2:8.

12. A na kanga aomata ni kainaaomataki man irekerekeia nako ma botaki n Aro aika kewe?

¹² Ma tera aron te aomata ae kan riki bwa Ana Tia Kakoaua Iehova, ngkana boni kaain te Aro ae kewe? N angiin te tai, te reta ni butiaaina e na kakoauaa raoi te aomata arei bwa e a aki kaaina te Aro ae kewe. Moan te kakawaki bwa e na motinnanoia raoi te aomata bwa e na kararoai bwaai ni kabane man te taromauri ae kewe ake a na kabarekaa ana onimaki. E riai n teretere man anuan te aomata are e kan riki bwa te tia Kakoaua, iroun te botaki ao aomata, bwa e a boni katoka reitakina ma te Aro ae kewe.

13. Tera te reirei ae anga te Baibara ni kaineti ma te teimatoa ni kararoaaki man te taromauri ae kewe?

¹³ E korea ae kangai te abotoro Bauro: “Kam na tai reitaki buaka ma akana aki Kristian. Ba te i-raorao ra i-raoraon te raoiroi ma te buakaka? Ke te buobuoki ra buobuokan te oota ma te ro? Ao tera ae e bo iai nanoni Kristo ma Beriara? Ao te i-raorao ra i-raoraon te Kristian ma ane aki Kristian? Ao tera ae kabooa maneaban te Atua ma bouananti? . . . E kangai te Uea, Ma ngaia ae kam na oti nako mai buakoia, ao kaokoroingkami, ao tai ringa te bwai teuana ae kamwara.” (2 I-Korinto 6:14-​17) Ti iri nanon taeka akanne ngkana ti teimatoa ni kararoaira man te taromauri ae kewe. Ma ti tuangaki n ana reirei Bauro bwa ti na kararoaira naba mairouia taan taromauri ni kewe?

“Kam na Nakonako ma te Wanawana”

14. Te koaua bwa ti riai ni kararoaia aomata ake a irekereke ma te taromauri ae kewe? Kabwarabwaraa.

¹⁴ Te koaua bwa a riai taan taromauri ni koaua ni katoka aia reitaki n aanga nako ma aomata ake a irekereke n te taromauri ae kewe? Te koaua bwa ti aki riai n reitaki ma aomata ake tiaki kaain ara onimaki? Tiaki ngaia anne. E taku te tua ae te kauoua ni kakawaki: “Ko na tangira raom n ai aron tangiram i bon i roum.” (Mataio 22:39) Ti boni kaotiota te tangira nakoia raora n aomata ngkana ti tibwaa te rongorongo ae raoiroi nakoia, ae taekan te Tautaeka n Uea. E oti naba tangiraia iroura ngkana ti reirei ma ngaiia n te Baibara ao ni kaotaia bwa a riai naba n teimatoa ni kararoaa te taromauri ae kewe.

15. Tera ae nanonaki n “tiaki ana bwai te aba”?

¹⁵ E ngae ngke ti tataekina te rongorongo ae raoiroi nakoia kaain rarikira ngkai taan rimwin Iesu ngaira, ma bon “tiaki ana bwai te aba” ngaira. (Ioane 15:19) Te taeka ae “te aba” ikai, e nanonaki iai te botannaomata are e ianena mairoun te Atua. (I-Ebeto 4:17-​19; 1 Ioane 5:19) Ti kaokoro ma te aba n arora n aki karaoi aroaro, taetae, ao mwakuri ake a kauna Iehova. (1 Ioane 2:15-​17) Irarikin anne, ni kaineti ma te kaetieti are a “uru aaro aika riai taian iraorao aika bubuaka,” ti aki iraorao ni kaan ma aomata ake a aki maiuakina te aroaro ni maiu ni Kristian. (1 I-Korinto 15:33) Ti na teimatoa n aki “baareka ni bwain aon te aba,” ngkana ti aki irekereke ma te aba. (Iakobo 1:27) Maikai are te raurenako ma te aba, e aki nanonaki iai bwa ti na katoka ara reitaki ma aomata nako.​—Ioane 17:15, 16; 1 I-Korinto 5:9, 10.

16, 17. Tera ae a riai ni karaoia Kristian nakoia ake a aki ataa te koaua man te Baibara?

¹⁶ Tera arora ae riai nakoia ake a aki ataa te koaua man te Baibara? E korea ae kangai Bauro nakon te ekaretia are i Korote: “Kam na nakonako ma te wanawana i mataia akana i ao, ni kamanenai raoi ami tai. A na raonaki ami taeka n te akoi, ao a na taarinaki n taari, ba kam aonga n ata te aro ae riai ba kam na kaekaia aomata ni kabaneia iai.” (I-Korote 4:5, 6) E korea ae kangai te abotoro Betero: “Kam na tabua Kristo i nanomi ba te Uea. Ao a na tae nangimi n te bong ae koraki ba kam aonga ni kona ni kaeka te aomata ae titirakiningkami bukin te kaantaninga ae mena i nanomi, ma kam na kaeka ma te nimamanei ma te maku.” (1 Betero 3:15) E reireinia Kristian Bauro bwa “a na tai taetaebuaka temanna, a na tai unun, a na nanoraoi, a na kaota te nimamanei ni kabanea nakoia aomata ni kabaneia.”​—Tito 3:2.

¹⁷ Kioina ngkai Ana Tia Kakoaua Iehova ngaira, ti aki iowawa ke ni kainikatonga nakoia aomata. Ti aki naba kabonganai taeka aika a kaun n taekinia iai aomata n Aaro tabeua. Ma ti bwaina ae riai n ara taetae ni kawai, e ngae ngkana e a bangaaomata ke e a kabonganai taeka aika bubuaka kaain te auti are ti kawaria, kaain rarikira, ke raora ni mwakuri.​—I-Korote 4:6; 2 Timoteo 2:24.

“Tauu Aron Taeka Akana Kamaiu”

18. Tera aroia n te aro n taamnei ae rangi ni buakaka, te koraki ake a a manga okira te taromauri ae kewe?

¹⁸ Imwin reiakinan te koaua man te Baibara, ai kananokawaki ra ngkana e a manga okira te taromauri ae kewe te aomata! E kabwarabwaraa karuanikain anne te Baibara ni kangai: “Ba ngkana a a tia ni biri nako mani kamwaran aon te aba n atakin te Uea are te tia Kamaiu are Iesu Kristo, ao ngkana a a manga bae iai ni kataeaki aia kai, ao e buakaka riki aroia are rimwi nakon aroia are rimoa. Ba a kabaia riki ngkana a tuai n ataa te raoiroi, nakon aroia ngkana a a manga bitaki man te tua are raoiroi are a anganaki, i mwin atakina i rouia. E a riki i rouia n ai aron te taeka n rabakau ae koaua ae kangai, E a manga okira mumutana te kamea; ao, Te beki ae e a tia n tebokaki e a manga okira rabinobinona i nanon te bokaboka.”​—2 Betero 2:20-​22.

19. E aera ngkai e kakawaki te teimatoa n taratara raoi nakon baike a kona n urua ara onimaki?

¹⁹ Ti riai n teimatoa n taratara raoi nakon baike a kona n urua ara onimaki. E bae n iai n taai nako te karuanikai imwaira! E kauring ni kangai te abotoro Bauro: “E taku te Tamnei n aki kamwaninga te aba teutana, ba ane a nang kitana te onimaki tabemang ni boong aika kaitira, ngkai a iri nanoia tamnei aika bureburea te aba ma aia reirei taimonio.” (1 Timoteo 4:1) Ti a maeka ngkai “ni boong aika kaitira.” Te koraki ake a aki teimatoa ni kararoaa te taromauri ae kewe, a kona “ni katiotioaki, ma ni kakamwaeieiaki nako n te angi nako ae te reirei nako, ni mamanaki irouia aomata, ma ni kairaki n te nanowanawana, nakon te kamwaneaki are te burebureaki.”​—I-Ebeto 4:13, 14.

20. Ti na kanga ni kamanoira man karuanikain te taromauri ae kewe?

²⁰ Ti na kanga ni kamanoira man karuanikain te taromauri ae kewe? Iangoi bwaai ni kabane ake e katauraoi Iehova. Iai Ana Taeka te Atua iroura ae te Baibara. (2 Timoteo 3:16, 17) E a tia naba Iehova ni katauraoi karara n taamnei aika bati rinanon “te toro ae kakaonimaki ae wanawana.” (Mataio 24:45) Ngkai ti a ririkirake n te onimaki, tiaki ti riai ni kataa ‘te amwarake ae matoatoa ae kanaia akana ikawai’ ao te nano ni kani bobotaki ike ti na reiakina iai te koaua n te onimaki? (Ebera 5:13, 14; Taian Areru 26:8) Ti bia kananomatoaira bwa ti na kabonganai raoi baike e katauraoi Iehova ibukira, bwa ti aonga ni kona n “tauu aron taeka akana kamaiu” ake ti a tia n ongo. (2 Timoteo 1:13) Mangaia are ti kona n teimatoa ni kararoaa te taromauri ae kewe.

Tera Reireiam ae Reke?

• Tera “Baburon ae Kakanato”?

• Tera ae ti riai ni karaoia bwa ti aonga n teimatoa ni kararoaa te taromauri ae kewe?

• Baikara karuanikai nakon ara onimaki aika ti riai ni kararoai?

[Taamnei n iteraniba 14]

Ko ataa bukin kaikonakan “Baburon ae Kakanato” bwa te aine ae te kabekaau?

[Taamnei n iteraniba 15]

E na boni kamaunaki “Baburon ae Kakanato”

[Taamnei n iteraniba 17]

Ti kaotiota “te nimamanei ma te maku” nakoia aomata aika tiaki kaain ara onimaki