Katauaki Ibukin Te Bwabetito Ni Kristian

“Tera tukau ni babetitoaki?”​—MWAKURI 8:36.

1, 2. E kanga ni moana te maroro Biribo ma te aobitia are te I-Itiobia, ao tera ae kaotia bwa iai nanon teuaei n te taromauri ae koaua?

TEUANA ke uoua te ririki imwin maten Iesu, ao e a mwananga te aobitia n te tautaeka temanna nako maiaki mai Ierutarem nako Kata. Aio te mwananga ae kakua i aon te kaa, n te raroa ae tengaa nimabubua tabun te kiromita. E mwananga mai Itiobia nako Ierutarem bwa e na taromauria Iehova, te mwaane ae kakaonimaki aei. Ni kawaina n oki ae abwabwaki aei, e a kabongana ana tai ni wareka Ana Taeka te Atua, are e a oti iai korakoran ana onimaki. E ataa korakoran nanon te mwaane aei Iehova, ngaia are e a kabongana te anera bwa e na kaira Biribo bwa e na uarongorongo nakoina.​—Mwakuri 8:26-28.

² E aki kangaanga iroun Biribo bwa e na moana ana maroro ma te I-Itiobia aei, kioina ngke e wareware ni kabaibati n aron te katei n taai akekei. Ikanne are e a kona iai n ongo Biribo bwa e wareware teuarei man te nira ni boki are Itaia. E anaaki nanon teuarei n ana titiraki ae uarereke Biribo ae kangai: “Ko ata ane ko warekia?” E a waaki imwin aei maroroakinan Itaia 53:7, 8. N tokina, ao Biribo e a “taekina Iesu nako ina.”​—Mwakuri 8:29-35.

3, 4. (a) E aera ngke e aki kabaenikaia bwabetitoan te I-Itiobia Biribo? (b) Baikara titiraki aika ti na rinanona ngkai?

³ I nanon te tai ae uarereke ao e a mataata te I-Itiobia ni mwiokoan Iesu n ana kaantaninga te Atua, ao e a ataa naba kainnanoan te riki bwa te tia rimwin Kristo ae bwabetitoaki. Ngke e a nora te ran ae tau ibukin te bwabetito ao e a titirakina Biribo ni kangai: “Tera tukau ni babetitoaki?” E koaua bwa e kaokoro are karaoaki iai. Bon te tia onimaki teuaei ao e taromauria te Atua ma ngke e rairaki nakon te Aro n Iutaia. Ngkana e aki bwabetitoaki n te tai aei, ao tao e na rangi ni maan te tai imwain manga reken bwabetitoana. Ma ae kakawaki riki, e bon ota ni baika e tangiria te Atua bwa e na karaoi, ao e kan anga nanona ni kabane nako iai. E kariaiakaki ana bubutii iroun Biribo, ao imwin bwabetitoan te I-Itiobia aei, e a “wakina kawaina ni kimareirei.” E a bae n ingainga nanona n tataekinan te rongorongo ae raoiroi i abana.​—Mwakuri 8:36-39.

⁴ E ngae ngke a riai n tirobaeaki raoi mwaneka aika te katabu ao te bwabetito ke n iangoaki raoi, ma e kaotaki man ana katoto te aobitia are te I-Itiobia, bwa iai aomata tabeman ake a bwabetitoaki tii teutana te tai imwin ongoraean te koaua man ana Taeka te Atua irouia.a Mangaia are a riai n iangoaki titiraki aikai: Tera aron te katauraoi ae riai ni karaoaki imwain te bwabetito? Tera irekerekena ma ana ririki ni maiu te aomata? Tera te rikirake ae riai n tia n noraki n ana onimaki te aomata, imwain bwabetitoana? Ma ae kakawaki riki, e aera Iehova ngkai e tangiriia ana toro bwa a na toua te mwaneka aei?

Te Boraraoi ae Rangi ni Kakawaki

5, 6. (a) A kanga ana aomata te Atua rimoa, ni butimwaea ana tangira Iehova? (b) Tera te iraorao ae kaan ma te Atua ae ti karekea imwin bwabetitoara?

⁵ Imwin kainaaomatakiia tibun Iteraera mai Aikubita, e a kariaia Iehova bwa a na riki bwa ana “aomata,” ao e na tangiriia, e na kawakiniia, ao e na arania bwa “te botanaomata ae tabu.” A na karekei kakabwaia akanne aomata aikai ngkana a kaotia raoi nakon te Atua bwa a butimwaea ana tangira. A karaoa anne ngke a berita bwa a na “tou mwin ana taeka Iehova ni kabane,” ao a karaoa te boraraoi ma ngaia. (Te Otinako 19:4-9) N te moan tienture ao e tuangia taan rimwina Iesu bwa a na karekeia riki taan rimwina mai buakoia botannaomata ni kabane, ao te koraki ake a butimwaea ana reirei, a na bwabetitoaki. Te iraorao ae raoiroi ma te Atua, e boboto i aon onimakinan Iesu Kristo, ao n taorimwiaki n te bwabetito.​—Mataio 28:19, 20; Mwakuri 2:38, 41.

⁶ E kaotaki ni kiibu aikai bwa e kakabwaiaia Iehova te koraki ake a kamatoaa nanoia ni berita bwa a na toro irouna, ao a kakoroa bukina. Te katabu ao te bwabetito irouia Kristian, boni mwaneka aika riai aika karekea ana kakabwaia Iehova. Ti kamatoaa nanora bwa ti na kakorakoraira n ira nanon ana kaetieti ao n ukoukora ana kairiri. (Taian Areru 48:14) Ibukin anne, e taua baira Iehova n te aro ni kaikonaki, ao e kairira n te kawai ae ti riai n nakonako iai.​—Taian Areru 73:23; Itaia 30:21; 41:8, 11.

7. E aera ngkai ti riai ni karaoa oin ara motinnano ni kaineti ma te katabu ao te bwabetito?

⁷ A riai ni kairaki nanora bwa ti na toui mwaneka aikai, n tangiran Iehova ao te nano ni kan toro irouna. Akea ae riai ni bwabetitoaki tii ibukina bwa iai ae tuangnga bwa e a rangi ni maan ana tai n reirei ke ibukina bwa a nang bwabetito raoraona. Te koaua bwa a kona kaaro ao Kristian aika ikawai n te onimaki ni kaungaa nanon te aomata bwa e na iangoa te katabu ao te bwabetito. E kaungaia naba te koraki ake a ongora irouna te abotoro Betero n tain Bentekota, bwa a na “babetitoaki.” (Mwakuri 2:38) Ma e ngae n anne, ara katabu bon ara bwai iangoana, ao akea ae kona ni motinnanoia ibukira. Ti riai ni karaoa oin ara motinnano ni kaineti ma karaoan nanon te Atua.​—Taian Areru 40:8.

Te Katauraoi ae Riai Ibukin te Bwabetito

8, 9. (a) E aera ngkai e aki boraoi ma te Baibara bwabetitoakia merimeri? (b) Tera aron rikiraken aia onimaki ataei ae e riai n tia n reke irouia imwain bwabetitoakia?

⁸ E tau wanawanaia ataei n te aro bwa a na katabua maiuia? E aki taekina mwaitin te ririki ni maiu ae tau nakon te bwabetito te Baibara. Ma a bon aki kona n riki merimeri bwa taan onimaki, aika karaoa aia motinnano iai ke ni katabua maiuia nakon te Atua. (Mwakuri 8:12) Ni kaineti ma Kristian ake n te moan tienture, e taku te tia koro-rongorongo ae Augustus Neander n ana boki ae atuna General History of the Christian Religion and Church: “Ngkoa, bon tii ikawai ake a bwabetitoaki, kioina ngke e kakoauaki bwa te bwabetito e riai n irekereke ma te onimaki.”

⁹ Ni kaineti ngkanne ma rooro-n-rikirake, iai tabeman aika a kona ni moantaai ni karekea oin aia onimaki ngke a uarereke, ma ake tabemwaang, a tibwa mataata iai ngkana a ikawai riki. Ma, imwain bwabetitoan ae ataei, e riai moa ni karekea ana iraorao ma Iehova, ana atatai i aon booto-n-reirei man te Baibara, ao te kamataata raoi i aon nanon te katabu, n aron naba are a riai ni karaoia ikawai.

10. Baikara mwaneka aika riai n touaki moa imwain te katabu ao te bwabetito?

¹⁰ E tuangia taan rimwina Iesu bwa a na reireinia aomata bwaai ni kabane ake e tua. (Mataio 28:20) Ngaia are a riai ni karekea moa te atatai ae eti i aon te koaua, aomata aika tibwa reirei, are e na kairiia bwa a na karikirakea onimakinan Iehova ao ana Taeka. (I-Rom 10:17; 1 Timoteo 2:4; Ebera 11:6) Imwina riki, ngkana e ringaki nanon te aomata n te koaua man te Baibara, e a kairaki iai bwa e na raraoma ma n rairaki man aroaroni maiuna nikawai. (Mwakuri 3:19) N tokina ao e nang karekea nanona bwa e na katabua maiuna nakon Iehova ao ni bwabetitoaki, n aron are e tua Iesu.

11. E aera ngkai e kakawaki irakin te mwakuri n uarongorongo ni katoatai imwain te bwabetito?

¹¹ Te mwaneka naba ae kakawaki ibukin te rikirake nakon te bwabetito, bon te ira buakon tataekinan rongorongon te Tautaeka n Uea ae raoiroi. Aio bon te mwakuri ae te kabanea ni kakawaki are e a tia ni mwiokoia ana aomata iai Iehova ni boong aika kaitira aikai. (Mataio 24:14) Mangaia are a kona taan uarongorongo aika tuai ni bwabetitoaki, n nora kakukurein tataekinan aia onimaki nakoia tabemwaang. Irirakin te mwakuri aei e na kataubobongaia bwa a na katoatai ni kaakaraoa te mwakuri ni minita, ao ni kakaonimaki naba iai imwin bwabetitoaia.​—I-Rom 10:9, 10, 14, 15.

Iai te Bwai ae Tuka Bwabetitoam?

12. Tera ae tinetineia tabeman man bwabetitoakia?

¹² Tabeman a kona n tinetineaki man te bwabetito ibukina bwa a rawa nakon te mwioko are reke iai. A ataia bwa ngkana a na karaoa nanon ana kaetieti Iehova, a riai ni karaoi bitaki aika korakora ni maiuia. Ke tao a a maaka are a na aki kona ni maiuakini baike e tangiri te Atua imwin bwabetitoakia. A kona ni kangai tabeman: “Tao n te taina, N na manga karaoa ae buakaka ao N na kabaneaki man te ekaretia.”

13. Ni menan Iesu i aon te aba, tera ae tinetineia tabeman man rikiia bwa taan rimwin Iesu?

¹³ Ni menan Iesu i aon te aba, ao iai tabeman ake a kariaia moanibwaian nanoia ke aia utu bwa a na tinetineia man rikiia bwa taan rimwina. Temanna te tia koroboki are e tuanga Iesu bwa e na riki bwa te tia rimwina nakon taabo nako are e nako iai. Ma e taekinna Iesu bwa n taai aika bati bon akea ana tabo ae e na kona n tiku iai ibukin te tairiki. Ngke e a manga kaoa temanna ae e ongora naba bwa e na riki bwa te tia rimwina, ao e taku te mwaane aei bwa e na nako moa n “tauna” tamana. N taraana, e kukurei riki ni memena i rarikin tamana ni karokoa matena, n onean mwin are e na kaai n riki bwa te tia rimwin Iesu ao te tia tararuaa tamana. Are te kateniman ngkanne e taku bwa e riai n nako “ni kabo” moa ma ana utu imwain ae e na rimwin Iesu. E kabwarabwaraa Iesu bwa aeka ni kairemwe aikai, kaanga ai aron “te tanrikaki” n tarai baike a a tia ni kitanaki ngkoa. Mangaia are e kai reke iroun te aomata ana anga ni birinako man te mwioko ni Kristian, ngkana e kani birinako mai iai.​—Ruka 9:57-62, BK.

14. (a) A kanga Betero, Anterea, Iakobo, ao Ioane ni kaekaa Iesu ngke e kaoia bwa a na riki bwa taan akawaia aomata? (b) E aera ngkai ti aki riai n tabwarabwara nakon butimwaean ana amo Iesu?

¹⁴ Aia katoto Betero, Anterea, Iakobo, ao Ioane, e bon rangi ni kaokoro ma anne. Ngke e kaoiia Iesu bwa a na rimwina ao n riki bwa taan akawaia aomata, ao e taekinaki ae kangai n te Baibara: “Ao a kitan naba aia karaun, ao a iria.” (Mataio 4:19-22) N aroia n aki baenikai ni karaoa aia motinnano anne, a karekea iai are e tuangia Iesu rimwi riki ni kangai: “Amoa amou i aomi, ao reirei i Rou; ba I nimamanei ao I nanorinano; ao e na reke i roumi iai motikan rawaia tamneimi. Ba e aoraoi amou, ao e bebete uotau.” (Mataio 11:29, 30) E ngae ngke e na iai te amo ae mwiokoara ngkana ti bwabetitoaki, ma e karaui nanora Iesu n tuangira bwa e bebete ana amo ao ti na kimwareirei iai.

15. E kanga ana katoto Mote ao Ieremia ni kaotia nakoira bwa ti kona n onimakina te Atua bwa e na buokira?

¹⁵ E bon riiriki ae a namakina ae a aki tau nakon are a mwiokoaki iai aomata. Ngke a karekea mwiokoaia mairoun Iehova Ieremia ao Mote, a namakinna moa bwa a aki kona ni kakororaoia. (Te Otinako 3:11; Ieremia 1:6) E kanga ni karaua nanoia te Atua? E taku nakon Mote: “N na boni memena i roum.” E berita naba ni kangai nakon Ieremia: “I memena i roum ni kamaiuko.” (Te Otinako 3:12; Ieremia 1:8) Ngaira naba ti kona n onimakina ana boutoka te Atua. Tangiran te Atua ao onimakinana, e kona ni buokira bwa ti na tokanikai i aon raraomara ae teimatoa i aon arora ni kona ni maiuakina ara katabu. E korea ae kangai te abotoro Ioane: “Akea te maku i nanon te tangira: ma e kaki te maku te tangira ae koro raoi.” (1 Ioane 4:18) E bae ni maaku te tei ae uarereke ngkana e nakonako n tii ngaia, ma e aki maaku ngkana e tauaki baina iroun tamana. Ngaira naba ngkana ti onimakina Iehova ma nanora ni koaua, ao e berita bwa “e na kaeti” kawaira, ngkana ti nakonako i rarikina.​—Taeka N Rabakau 3:5, 6.

Te Tai ae Rine

16. E aera ngkai e irekereke te bwabetito ma kateboan te rabwata ni kabane i aan te ran?

¹⁶ Iai te kabwarabwara man te Baibara ae katereterea kakawakin te bwabetito ni Kristian, imwain waakin te bwabetito. Ni banen te kabwarabwara aei, ao a anganaki aia tai ni kaota aia onimaki i mataia aomata taan bwabetito ngkana a kaekai titiraki aika uoua aika kaineti ma te bwabetito. (I-Rom 10:10; nora te bwaoki n iteraniba 20.) Imwina ao a a katebonakoaki n te ran taani bwabetitoaki, ni katotonga are e karaoaki iroun Iesu. E kaotaki n te Baibara bwa ngke e a tia ni bwabetitoaki Iesu, ao “E aerake mai nanon te karanga” ke “E aerake naba man te ran.” (Mataio 3:16, BK; Mareko 1:10) E teretere ngkanne bwa e kateboaki Iesu nako aan te ran ni kabane rabwatana iroun Ioane te tia Bwabetito.b Te tebonako ni kabane rabwatam n te ran, e tei ibukin korakoran te bitaki ae ti a tia ni karaoia nakoni maiura. E kaikonakaki iai bwa ti a tia ni mate ngkoa n anuan maiura rimoa, ao ti a manga moana maiura ae boou n te beku iroun te Atua.

17. A na kanga ni boutokaa rinen te bwabetito, taani bwabetitoaki ao akana a mataku iai?

¹⁷ Te bwabetito bon te tai ae rangi ni kakawaki ao n rangi ni kakukurei. E kaotaki n te Baibara bwa e tataro Iesu ngke e bwabetitoaki iroun Ioane n te Karaanga are te Ioretan. (Ruka 3:21, 22) Ni kaineti ma te katoto aei, taani bwabetitoaki ni boong aikai a riai naba ni bwaina te katei ae riai n tain te bwabetito. Ao kioina ngkai e kaumakira te Baibara bwa ti na kunnikaira n te aro ae riai ni katoabong, ai riai ra ngkanne bwa ti na ira naba nanon aei n te tai are ti bwabetitoaki iai! (1 Timoteo 2:9) A kona naba ni kaota te karinerine taani mataku, n aia kakauongo raoi nakon te kabwarabwara ae kaineti ma te bwabetito, ao ni matakuakina te bwabetito n te aro ae riai.​—1 I-Korinto 14:40.

Kakabwaia Aika Reke Irouia Taan Rimwin Kristo Aika Bwabetitoaki

18, 19. Baikara kakabwaia aika reke man te bwabetito?

¹⁸ N te tai are ti katabua iai maiura nakon te Atua ao ni bwabetitoaki, ti a riki ngkanne bwa kaain te utu ae rianako okorona. Te moani kakabwaia, bon rikin Iehova bwa Tamara ao Raoraora. Ti ianena ngkoa mairoun te Atua imwain bwabetitoara; ao ngkai ti a raoiakinaki ma ngaia. (2 I-Korinto 5:19; I-Korote 1:20) Ti a kaania te Atua ao e a kaanira naba, rinanon ana karea Kristo. (Iakobo 4:8) E kabwarabwaraa aron Iehova te burabeti ae Maraki, ni mutiakinia te koraki ake a tataekina arana, ao n ongo irouia, ao e karina araia n ana boki ni kauring. E taku te Atua: “A na riki ba au aomata, . . . ao N na nanoangaiia, n ai aron te aomata ae nanoangaea natina ae bebeku i rouna.”​—Maraki 3:16-18.

¹⁹ Ni bwabetitoakira ao ti a riki iai bwa kaain te botaki n itaritari ae katobibia te aonnaba. Ngke e titiraki te abotoro Betero i aon taekan kakabwaia ake a na karekei Kristian ibukin kukureia ni kabuai bwaai tabeua bwa a aonga n riki bwa taan rimwin Kristo, ao e berita ni kangai Iesu: “Ane kitana batana, ke tarina, ke mwanena, ke tamana, ke tinana, ke natina, ke abana, i bukin arau, ao e na anganaki tebubua, ao e na reke irouna te maiu are aki toki.” (Mataio 19:29) Tabeua te ririki imwina ao e a korea Betero taekan te botaki ae kaainaki irouia “taian tari” n te aonnaba. E a tia n rinanon te ibuobuoki Betero ni boutokana ao kakabwaiana ae reke man te botaki n itaritari ae tatangira aei, ao ngaira naba e kona n reke nakoira.​—1 Betero 2:17; 5:9.

20. Tera te kaantaninga ae kakukurei ae reke man te bwabetito?

²⁰ Irarikin anne, e katereterea Iesu bwa te koraki ake a toua mwin mwanekana, a na karekea naba irouia “te maiu are aki toki.” Ni koauana, te katabu ao te bwabetito, a anganira te kaantaninga ibukin reken te “maiu ni koaua,” are te maiu n aki toki n ana waaki ae boou te Atua i aon te aba. (1 Timoteo 6:19) Tera aara ae tamaroa riki ibukin taai aika a na roko, ae ti kona ni karekea ibukira ao ibukia ara utu? E na kairira te kaantaninga ae kakukurei aei, bwa ti na “nakonako n aran Iehova ae Atuara n aki toki ao n aki toki.”​—Mika 4:5.

[Kabwarabwara ae nano]

Ko Kona ni Kabwarabwaraa?

• Tera arora ae ti riai iai ni butimwaea ana tangira Iehova ao e aera ngkai ti riai ni karaoa anne?

• Tera te rikirake n te onimaki ae riai ni karaoaki imwain te bwabetito?

• E aera ngkai ti aki riai n iangoa ae ti aki kona ni kakororaoa nanon te bwabetito, ke n rawa ni butimwaea te mwiokoaki ae irekereke ma ngaia?

• Baikara kakabwaia aika rianako okoroia ake a kona n reke irouia taan rimwin Iesu Kristo ake a bwabetitoaki?

[Taamnei n iteraniba 24]

“Tera tukau ni babetitoaki?”

[Taamnei n iteraniba 27]

Te bwabetito bon te tai ae rangi ni kakawaki ao n rangi ni kakukurei