Tera Aron Nakoraoin Ami Uaia Ni Mamaroro?

“TE RETA n tangira mairoun te aomata ae 60 ana ririki ni maiu.” Anne te boto n iango n te kabo n te takaakaro n te mwane man te bangke teuana i Tiaban, tabeua te ririki n nako. E kaungaia kaain Tiaban ake a a bwakara te 50 tabun ao te 60 tabun n ririki, bwa a na kaotiota “nanoia ni koaua” nakoia buuia. E korea ae kangai te mwaane ae te tia takaakaro nakon buuna: “Tao ko na ngare iai, ma N na bon nanokawaki ngkana I aki atongnga, ngaia are aio raoi nanou ni koaua, n te bwana ae korakora: Ko rabwa ngkai ko mare ma ngai.”

Ni katein aaba aika kakaokoro, n ikotaki naba ma are n te aono n Atia, e tototokoaki kaotiotan ana namakin ni koaua te aomata. Ma e ngae n anne, e raka i aon 15,000 reeta n tangira ake a roko n te kabo anne. Moan te tatangiraki n te aro are e a manga karaoaki naba te kabo teuana imwina, ao a boretiaki booki ake a boboto i aon reeta. E kaotaki n aei bwa a bati aika ingainga ni kani kaota nanoia ae raba ibukia buuia aika rangi n tangiraki irouia. Ma a rawa tabemwaang ni kaotiota nanoia ni koaua nakoia buuia. Bukin tera? Ibukina bwa tao e kainnanoaki iai te kakorakora ao te mwaatai bwa a aonga ni kona ni kabwarabwaraa aia namakin nakon te aomata temanna, n aron buuia.

E taku Hitoshi Kato are e korea te boki i aon taekan te ritaea man te mwakuri, bwa a bati buu-raure mai buakoia taanga i Tiaban ake a a ikawai riki, aika karioaki irouia buu-aine, ibukin korakoran unia ae ikoiko i nanoia i nanon ririki aika mwaiti. E taku: “Ma e bon riki naba anne bwa mwin aia aki-tataetae ni kawai taanga, ngkana a kaaitara ma kangaanga ake a rotaki iai.”

N tabetai e kona n tangira te buu-raure te buu-te-aine n te tai ae waekoa imwin ana ritaea buuna man te mwakuri, ao e kona ni kubanako iai te mwaane. Tao a a tia taanga n aki mamaroro i aon baike a namakin i marenaia i nanon ririki aika bati. A kona n ae a kekeiaki ni kaotiota aia namakin, ma e aki teimatoa te rau i marenaia ngkana a maroro. N onean mwin are a na karikirakea te itoman ae kaan, a a riki bwa taani kauntaeka.

A na kanga buu-mwaane ao buu-aine n tokanikai i aon baika a kaokoro n iango iai n te aro ae rau, ao ni mamaroroakina aia namakin n te aro ae riai? E bae n anaaki nanom n ataakin ae te reirei ae te kabanea n nakoraoi, e aki reke man te boki ae e a tibwa tia ni koreaki iroun te tia angareirei nakoia taanga, ma e reke man te boki ni kawai ae e kakawakinaki i nanon tienture aika bati, ae te Baibara.