E na Waekoa ni Koro Bukin Ana Kaantaninga Te Atua Ibukin Te Aonnaba

NGKE a maeka ngkoa Atam ao Ewa n te Baretaiti, a kakabwaiaki iroun te Atua ni kangai: “Kam na bati ni kariki, ao kam na kabatiaingkami, ao kaona aonaba, ao kataea ana kai; ae tau aroia ikani marawa, ma manin aan-nang, ma maan aika maiu aika kawakawa i aontano ni kabaneia.”​—Karikani Bwaai 1:28.

E mwaiti riki ae nanonaki ni kataean ana kai te aonnaba, nakon ribanaakin ke tararuakin tii te aono ae uarereke iai. A na karababaa nako te Baretaiti ni kabuta te aonnaba Atam, Ewa ao natiia. Ma a bure te moan taanga aei ao a a kakionakoaki man te oo-n-aroka are i Eten. (Karikani Bwaai 3:23, 24) Ma tiaki nanona, bwa e na aki kataeaki ana kai te aonnaba.

Ibukina bwa a na kakabwaiaki botannaomata aika ongeaba iroun te Atua, a na kona ngkanne ni kataea ana kai te aonnaba. Ni kakabwaiaa I-Iteraera rimoa iroun te Atua, a riki kaai aika raraoi i aon abaia ao uaanikai aika rangi ni kangkang n aia oo-n-aroka. E na riki naba aei ngkana e a baretaiti ara aonnaba. N aron ae beritanaki n ana Taeka te Atua ae kairaki koreana, ae te Baibara, “e kariki uaana aontano: E na kakabaiaira te Atua, ae bon Atuara.” (Taian Areru 67:6) Ai aron ae a kimwareirei tawaana n uteute n te aonnaba, maunga, kain ao ueen aona, karaanga ao taari. (Taian Areru 96:11-13; 98:7-9) E na onrake te aonnaba n te amwarake ao mannikiba aika kirimatamata, maan aika tamaroa, ao aomata aika tatangira.

E na Waekoa n Roko te Waaki ae Boou i Aon te Aba!

Ti a uakaan ngkai ma rokon te waaki ae boou i aon te aba, are e beritanaki iroun Iehova ae te Atua. E korea ae kangai te abotoro Betero: “N ai aron ana taeka n akoi, ti kaantaningai karawa nabangkai ma aonaba nabangkai, ake e mena iai te raoiroi.” (2 Betero 3:13) Imwin warekan ana taeka Betero akanne, tao a kona tabeman ni motikia n aia iango bwa e aki kona n riki ni baretaiti te buraneti aei. A kona n iangoia bwa a na manga karaoaki karawa ao aonnaba aika boou, ma e na karaoaki aei?

Tera “karawa nabangkai”? Bon tiaki karawa are e a tia ni karikia te Atua. (Taian Areru 19:1, 2) E nanona “karawa” n te aro ni kaikonaki Betero, ae tautaeka n aomata ake a rietata i aoia kaaina. (2 Betero 3:10-​12) A a tia n aki nakoraoi aia tautaeka taian “karawa” aikai ibukia botannaomata ao a nang kamaunaki. (Ieremia 10:23; Taniera 2:44) “Karawa nabangkai” are e na onei mwiia, bon Ana Tautaeka n Uea te Atua are e kaainaki iroun te Uea ae Iesu Kristo ao raona n ababa, aika 144,000 mwaitiia ake a na kautaki nako karawa.​—I-Rom 8:16, 17; Te Kaotioti 5:9, 10; 14:1, 3.

Tiaki taekan te buraneti ae boou, are e nanonna Betero n te “aonaba nabangkai.” E karaoaki te aonnaba ae ngkai bwa nneia aomata ni maeka n aki toki. (Taian Areru 104:5) N taai tabetai, e kamanena “aonaba” te Baibara, n onean mwiia aomata. (Karikani Bwaai 11:1) Te aonnaba ae na kamaunaki n te tai ae waekoa, bon aomata ake a a tia ni kataua bwa a na riki ngaiia bwa kaain te waakiae buakaka. A kamaunaki aomata ake a aki tangira te Atua ake a mena n te aonnaba rimoa . (2 Betero 3:5-7) Ma tera ngkanne te “aonaba nabangkai”? Bon te botannaomata ae boou, aika taromauria te Atua ni koaua, aika a“eti nanoia.” (Taian Areru 125:4, BK; 1 Ioane 2:17) A na bane n roko tuua ibukin te “aonaba nabangkai” man “karawa nabangkai.” A na taraia raoi mwaane aika kakaonimaki i aon te aba bwa a iraki nanon tuua aikai.

Baika Boou ma ni Kamimi!

Ni koauana, e a anganira Iehova mwengara ae tikauarerei ni karaoan te aonnaba ibukira. E taekinna bwa “moan te raoiroi” ana mwakuri ni kabane i aonnaba. (Karikani Bwaai 1:31) E kairiia Atam ao Ewa Tatan te Riaboro bwa a na karitei. (Karikani Bwaai 3:1-5; Te Kaotioti 12:9) Ma, e ngae n anne, e na waekoa te Atua n angania aomata aika eti nanoia “te maiu ni koaua.” E nanonaki n aei, te “maiu are aki toki” n te kororaoi i aon te Baretaiti. (1 Timoteo 6:12, 19) Ti na rinanon ngkai tabeua mai buakon kakabwaia ake a na reke n te tai anne.

I nanon ana tai Kristo n Tautaeka ae Maanna Tenga te Ririki, e na kabaeaki iai Tatan ao e nang aki kona ni karawawataia botannaomata. E taku te abotoro Ioane: “I nora te anera [te akanera ae Mikaera, ke Iesu Kristo] temanna ba e ruo mai karawa, ao iai i rouna kiingin te rua ae rangi n nano arei ma te taurekereke ae ababaki i nanoni baina. Ao e taua te rakon, are te naeta nikawai, are te Riaboro are Tatan, ao e kabaea, ao tenga ana ririki ni bae, ao e tewea nako nanon te rua arei, ao e kainna, ao e kanikinaea aona, ba e aonga n aki mamanaiia riki botanaomata, ni kakoro ririki ake tenga.” (Te Kaotioti 20:1-3; 12:12) Irarikin te inaaomata man ana karirii Tatan ngkana e a mena i nanon te rua, a nang karekei kakabwaia aika mwaiti riki aomata i aan ana kairiri te Tautaeka n Uea.

E nang mauna nako te buakaka, mwakuri n tiritiri, ao te buaka. E berita te Baibara ni kangai: “Ai ti teutana riki, ao akea naba te aomata ae buakaka: Eng, ko na tarataraa raoi ana tabo, ao akea naba. Ma a na abana te aba akana nimamanei; ao a na kukurei ni kabatian te raoi. A na abana te aba akana raoiroi, ao a na mamaeka iai n aki toki.” (Taian Areru 37:10, 11, 29) Iehova ae te Atua e na “katoki buaka, ao tokina tabon aonaba.” (Taian Areru 46:9) Ai raoiroira karaunano aikai ibukin te mwengaraoi ao te raoi!

A na mwaiti kurikuri amwarake aika mimirati ao ni kangkang n te tai anne. E anene ni kangai te tia areru: “Ke e kebo aon te aba n te uita, ke a rabunaki iai aoni maunga.” (Taian Areru 72:16, BK) Akea ae e na namakina te baki n te tai anne.

Akea te aomata ae e na ituaki n te aoraki. Ni koauana, “ane maeka iai e na aki kangai, I aoraki.” (Itaia 33:24; 35:5, 6) Ni menan Iesu Kristo i aon te aba, e katoka te rebera, e kateirakeia mwauku ao e kanoraabaia mataki. (Mataio 9:35; Mareko 1:40-42; Ioane 5:5-9) Iangoia bwa tera ae e na karaoia n te waaki ae boou i aon te aba! Iangoa te kakukurei ae e na reke ngkana ai akea ae mataki, ae bonotaninga, ae mwauku ao ae bae newena.

Ngkana a a ririkirake aomata aika ongeaba nakon te kororaoi, e nang akea ngkanne kammarakin te kara. E na aki kainnanoaki te kirati ni mata, te oko n nakonako, kaa ake a kokokaki iai mwauku, oo-n-aoraki ao bwainnaoraki. Ai kakukureira bitaki ake a na riki ngkana e a manga oki marurungira ni kairake! (Iobi 33:25) Ni katoa ingabong, ti na marurung, imwin te matu raoi. Ti na namakina te ang ae boou ao ti a tauraoi nakoni karaoan ara mwakuri aika kakukurei n te bong anne.

Ti na kimwareirei ni kautakia aika tangiraki iroura ao tabeman riki. (Ioane 5:28, 29; Mwakuri 24:15) Ti na rangi ni kukurei ni butimwaia Abera, Noa, Aberaam, Tara, Iobi, Mote, Ruta, Tawita, Eria, Etita, ao aomata aika mwaiti riki! Mirion ma mirion riki, aika na kautaki naba. Angiina mai buakoia, a tuai ataa Iehova, ma a na boni butimwaeaki irouia aomata aika ingainga nanoia ni kan reiakinia taekan te Atua, ana kaantaninga, ao taekan Natina ae Iesu Kristo. Ni koauana, e na taabangaki ataakin Iehova, ngkana a a ataa raoi aia tia Karikiriki aomata aika kautaki.

Ma ae moan te raoiroi riki, ti nang boni kona n taromauria te Atua ae koaua n aki toki. Ti na boni kakabwaiaki n “toro iroun Iehova ma te kukurei,” ao n uaia ni mwakuri n te boonnano ngkana ti a katei mwengara aika tamaroa, ti kamaraua aontano, ao ni kataea ana kai te aonnaba ni kabutaa. (Taian Areru 100:1-3; Itaia 65:21-24) Ai kakukureira te maiu n aki toki n te baretaiti ae kariki uaana aika mwaiti, ae rau, ae tikauarerei ao ae reke iai kamoamoaan aran te Atua ae tabu ae Iehova!​—Taian Areru 145:21; Ioane 17:3.

Kabanean Kataakia Aomata

N ana tai Iesu n Tautaeka ae Manna Tenga te Ririki, e na kamanenai kakabwaia man ana karea ni kaboomwi nakoia aomata aika ongeaba ni kabane. Imwin tabeua te tai, e na kamwawaaki te bure ao a nang kororaoi aomata. (1 Ioane 2:2; Te Kaotioti 21:1-4) Ngkana a a bane ni kamaunaki mwin ana bure Atam, aomata ngkanne a na maiuakin ana kaetieti te Atua ao a nang namakina marurungin rabwataia, aia iango, te aroaro ni maiu ae riai ao kaakaraoan nanon te Atua. Mangaia are, a na “manga maiu” n te aro ae te kabanea n raoiroi ni karokoa ae a a kororaoi. (Te Kaotioti 16:14, 16; 20:5) E nang kamoamoaki ngkanne Iehova n aei ao ibukin naba te aonnaba ae baretaiti!

Teutana te tai imwin banen ana tai Kristo n Tautaeka ae Manna Tenga te Ririki, ao e na kabwaraki Tatan te Riaboro ma ana taimonio, ke anera aika buakaka, man kabaeakia tao tebwina te tienture n nako. (Te Kaotioti 20:1-3) A na anganaki aia kabanea n tai are a na kataia iai ni katannakoia aomata mairoun te Atua. E ngae ngke iai tabeman aika a na mwane n tangiran baika bubuaka, ma a na boni bwaka taani karitei aikai. E na tiringia aomata aika bangaaomata Iehova, n ikotaki naba ma Tatan ao ana taimonio ni kabane. E na aki manga noraki te buakaka. A na kamaunaki n aki toki taani kaakaraoa ae bure ni kabane, ao a na anganaki te maiu ae aki toki akana raoiroi.​—Te Kaotioti 20:7-10.

Ko na Mena Ikekei?

E mena te maiu ae kakukurei n aki toki imwaia aomata aika tangira Iehova ae te Atua. Akea kabotun te maiu n aki toki n te Baretaiti. Ni koauana, e na rikirake ni kakukurei riki te maiu i nanon waakinakon te tai, kioina ngkai ai akea tian te atatai ibukin Iehova ae te Atua. (I-Rom 11:33) Ko na kunea bwa iai n taai nako te bwai ae boou ae ko riai n reiakinna, ao e na mwaiti am tai ibukin karekean te atatai. Bukin tera? Ibukina bwa ai tiaki tii 70 ke 80 am ririki ni maiu, ma ai n aki toki.​—Taian Areru 22:26; 90:10; Te Minita 3:11.

Ngkana ko tangira te Atua, ko na kukurei ngkanne ni kaakaraoa nanona n taai nako. E korea ae kangai te abotoro Ioane: “Bon tangiran te Atua te baei, ae tauan ana tua i roura: ao a aki rawawata ana tua.” (1 Ioane 5:3) Mangaia are, tai kariaia te bwai teuana bwa e na katokiko man kakukureian Iehova ae te Atua rinanon kaakaraoan ae raoiroi. Teimatoa n ururinga te kaantaninga ae moan te tamaroa are e kaotaki nakoim n Ana Taeka te Atua, ae te Baibara. Kamatoaa nanom ni kaakaraoa nanon Iehova, ao tai kitanna. Ao ane ko na nora iai kakoroan bukin ana kaantaninga te Atua ibukin mwengara ae te aonnaba, ao bitakina nakon te baretaiti.

[Taamnei n iteraniba 4]

A kariki uaa aika mwaiti aia tawaana I-Iteraera man ana kakabwaia te Atua

[Taamnei n iteraniba 7]

Baikara kakabwaia aika ko kaantaningai n te Baretaiti?