Tera Uean Te Atua?

AI KORAKORARA te kabuanibwai ae taonia aomata teutana te tai imwini karikaia! E karitei te anera nakon ana tautaeka Teuare e karikia. E mwamwanaki Ewa iroun te tia karitei aei bwa e na kana uaan te kai are katabuaki. E kangai te anera ni kaineti ma neiei ao buna are Atam: “Kam na bon aki mate: ba E ataingkami te Atua ba n te bong ae kam na kanna iai, ao a na kaureaki matami, ao kam na riki ba kaanga te Atua n ata te raoiroi ma te buakaka.” (Karikani Bwaai 2:16, 17; 3:1-5) E a riki iai n ataaki te anera ae karitei aei bwa te Riaboro ao Tatan.​—Te Kaotioti 12:9.

E mutiakina ana taeka Tatan Ewa? E taku te Baibara: “Ao te aine arei ngke e nora te kai arei ba e kakanaki uaana, ao ba e kan tarataraki ni maata, ao ba e na tangiraki te kai arei ba e na kawanawana te aba, ao e kinika uaana, ao e kanna; ao e angan naba buna ma ngaia, ao e kanna naba.” (Karikani Bwaai 3:6) Eng, a irana Tatan n ana karitei te moan tanga are Atam ao Ewa. Ao ibukin anne, a a kabuaa te baretaiti ibukiia ma aia kariki. A a ituaki n te bure ao te mate ataei ake a na bon riai ni bungiaki ni kororaoi ma kaantaningaan te maiu n aki toki.​—I-Rom 5:12.

Tera ae e karaoia Iehova ae te Atua, ae te tia Tautaeka ae Rietata i aoni bwaai ni kabane, ibukin aei? E motikia bwa e na katauraoa te anga ibukin kabwaraan buure. (I-Rom 5:8) E a tia naba Iehova ae te Atua ni katea te waaki n tautaeka are e mwiokoaki ibukin kaetan te kabuanibwai aei. E aranaki te waaki aei bwa uean te Atua, ke “ana tautaeka n uea te Atua.” (Ruka 21:31, NW) Kioina ngkai e kateaki te Tautaeka n Uea aei bwa te tautaeka teuana i aani mwaakan te Atua i aoni bwaai ni kabane, nanona ngkanne bwa iai bukin kateana ae okoro.

Tera bukin katean Ana Tautaeka n Uea te Atua? Tera kabwarabwarana, ao tera aroni kabotauana ma aia tautaeka aomata? E moana ana tautaeka n ningai? A na maroroakinaki titiraki aikai n te kaongora ae imwina.