E Anga ‘Te Taamnei Are Raoiroi Iehova Nakoia Akana Butiia’
“Ngkai kam ata te angania natimi baika raraoi, ngkami akana kam buakaka, ao tiaki e maiti riki iroun Tamami are i karawa te kan anga te Tamnei are Raoiroi nakoia akana butiia.”—RUKA 11:13.
1. N ningai te tai ae ti kainnanoa riki iai ana ibuobuoki te taamnei ae raoiroi?
‘I AKI kona ni kaitaraa aei n tii ngai. I kona n nanomwaaka i aan te kataaki aei, tii man ana ibuobuoki te taamnei are raoiroi!’ Ko a tia n taekina aekan aei? A a bon tia angiia Kristian. Tao ko boni bae naba n tia, ngke ko taonaki n te aoraki ae kakaiaki. Ke tao ni maten buum ae ko a tia n taanga ma ngaia i nanon ririki aika mwaiti. Ke n te tai are e a oneaki iai kukureim nakon te uruakinnano. Ko kona n namakina tokanikaim iroun te taamnei ae raoiroi mairoun Iehova are e anganiko te “mwaka ae moan te korakora,” n taai ake ko karawawataki iai.—2 I-Korinto 4:7-9; Taian Areru 40:1, 2.
2. (a) Baikara kangaanga aika kaaitara ma ngaai Kristian ni koaua? (b) Titiraki raa, aika ti na rinanoi n te kaongora aei?
2 Ni boong aikai, ao a kaaitara Kristian ni koaua ma rikiraken te kangaanga ao te karitei mairouia aomata aika aki tangira te Atua. (1 Ioane 5:19) Irarikin anne, a buakanaki taan rimwin Kristo iroun Tatan te Riaboro, are e tabe ngkai ni buakania te koraki ake a “kakawakin ana tua te Atua, ma n taua kaotiotan Iesu.” (Te Kaotioti 12:12, 17) Maroaka ae ti a kainnanoa riki ngkai ana boutoka taamnein te Atua. Tera ae ti kona ni karaoia bwa ti aonga n teimatoa ni karerekea taamnein te Atua ae raoiroi ae bati? Ao e aera ngkai ti kona ni kakoauaa raoi bwa e rangi ni kukurei Iehova n anganira te korakora ae ti kainnanoia n taai ake ti kataaki iai? Ti kona n nori kaekaan titiraki aika uoua aikai n ana kaikonaki Iesu aika uoua.
Teimatoa n Tataro
3, 4. Tera te kaikonaki are e taekinna Iesu, ao e kanga ni kaekaa ni kainetia nakon te tataro?
3 E bubutii ngkoa temanna te tia rimwin Kristo ni kangai: “Te Uea, Ko na reireira arora n tataro.” (Ruka 11:1) Ni kaekaana iroun Iesu, e angan te tia rimwina aei kaikonaki aika uoua. Te moan, rongorongon te mwaane ae iai ana iruwa, ao te kauoua taekan te karo ae ongo ana taeka natina. Ti na rinanoi kaikonaki aikai teuana imwin teuana.
4 E taku Iesu: “Antai i roumi ae iai raona, ae ko na kawaria n te nukanibong, ao ko na kangai nako ina, Raou, N na tangoi am berena tenua; ba e roko i rou raou temanna, ngkae e nakonako, ao akea nikirau ni kaki i matana; ao teuare i nanon te auti e kaeka ni kangai, Tai nanoai: e bonotaki te mataroa ngkai, ao a mena natiu i rou ni nera ni wene; I aki kona n teirake n anganiko? I taku nako imi ba tao e aki tei rake n anganna, ngkai raona, ma e na tei rake n anganna maitin ae e tangiri, ngkae e kabatia ana bubuti.” Imwina, e a manga kabwarabwaraa Iesu irekereken ana kaikonaki ma te tataro ni kangai: “Ao I taku nako imi, Bubuti, ao kam na anganaki; ukeuke, ao kam na karereke; karebwerebwe, ao e na kaukaki nako imi. Ba ane bubuti ao e na anganaki; ao ane ukeuke ao e na karereke; ao ane karebwerebwe ao e na kaukaki nako ina.”—Ruka 11:5-10.
5. Tera reireiara ibukin arora n tataro ae reke man kaikonakan teuare kabatiaa ana bubutii?
5 E kaotaki arora n tataro ae riai n te kaikonaki are e teretere ni kaineti ma te mwaane are e kabatiaa ana bubutii. E taekinna Iesu bwa e tokanikai te mwaane arei bwa e reke irouna te bwai are e kainnanoia, “ngkae e kabatia ana bubuti.” (Ruka 11:8) E kona n noraki bwa tii te taina kamanenan taeka aika rairaki bwa “kabatia ana bubuti” n te Baibara. E rairaki te taeka aei man te taetae n Erene ae nanona raoi “aoburamaiu.” N angiin te tai ao e taekinaki te taeka ae aoburamaiu ni kaineti ma te aroaro ae buakaka. Ma ngkana e kaotiotaki te aoburamaiu ke kabatiaan te bubutii ibukin te bwai ae riai, e a kona ngkanne ni manga riki bwa te aroaro ae kamoamoaki te aomata iai. Aio ae riki iroun te mwaane are n te kaikonaki. Akea namakinan te maamaa irouna ngke e kabatiaa ana bubutii ibukin te bwai are e kainnanoia. Kioina ngkai e taekina te mwaane aei Iesu bwa te banna ni katoto ibukira, ti riai naba ni kabatiai ara tataro n aron anne. E tangirira Iehova bwa ti na teimatoa ni ‘bubutii, n ukeuke, ao ni karebwerebwe.’ Ni kaekaana, e na “anga te Tamnei are Raoiroi nakoia akana butiia.”
6 Tera aron iangoan te katei ae kaotiotan te akoi n ana bong Iesu?
6 E aki tii kaota arora ni kabatiaa ara tataro Iesu, ma e kaota naba bukin karaoana. Ibukin kaotaakira raoi n te reirei aei, ti riai n iaiangoa aroia te koraki ake a ongora n ana kaikonaki Iesu ibukin te mwaane are e kabatiaa ana bubutii, bwa tera aia iango ni kaineti ma te katei ae karababan nako te akoi. A mwaiti rongorongo n te Baibara aika kaotaki iai, bwa e rangi ni kakawaki mwannanoaia iruwa irouia kaain rimoa, ao riki irouia ana toro te Atua. (Karikani Bwaai 18:2-5; Ebera 13:2) Bon te bwai ni kamaamaa te kabwaka ni kaotiota te akoi. (Ruka 7:36-38, 44-46) Ti na ururinga anne, ao ti bia manga iangoa riki ana karaki Iesu.
7. Bukin tera bwa e a aki maamaa ni kauta raoraona, teuare n ana kaikonaki Iesu?
7 E roko ana iruwa te mwaane are n te kaikonaki n te nukanibong. E namakinna teuaei bwa e riai ni kaamwarakea ana iruwa ma ‘akea nikirana ae e na kaaki i matana.’ E iangoia teuaei bwa e riai ni waekoa ni karaoa te bwai teuana! E riai ni karekea te kariki, n aki ongea te kangaanga ae kona n riki. Ngaia are e a nakon raoraona ao e aoburamaiu ni kautia. E taku: “Raou, N na tangoi am berena tenua.” E kabatiaa ana bubutii ni karokoa reken te baere e kainnanoia. E a tibwa riki bwa te oi n aomata ae kawaraki, ngke e a reke ana kariki.
E Kabatiaa te Bubutii Baika Kainnanoaki Aika Mwaiti
8. Tera ae na kairira bwa ti na kabatiai ara tataro ni bubutii ibukin te taamnei are raoiroi?
8 Tera ae kaotaki n te kaikonaki aei ni kaineti ma arora ni kabatiai ara tataro? E teimatoa ni bubutii te kariki te mwaane arei, ibukina ngkai e namakinna bwa ngkana iai ana kariki ao bon te oi ni mwaane ngaia ibukin karaoan tabena ae te tia butimwaai. (Itaia 58:5-7) Ngkana akea ana kariki, ai bon tiaki te oi n aomata ae riai ni kawaraki. N te kabotau, ibukina bwa ti ataia ae ti riai ni karekea iroura taamnein te Atua ibukin waakinan nako ara mwakuri ni minita ngkai Kristian ni koaua ngaira, ti riai n teimatoa n tataro nakon te Atua ni butiia te taamnei anne. (Tekaria 4:6) Ti na boni bwaka ngkana akea iroura. (Mataio 26:41) Ko a ota n te iango ae kakawaki ae ti kona n noria man te kaikonaki aei? Ngkana ti iangoa taamnein te Atua bwa te bwai ae ti rangi ni kainnanoia ngkai, ti riai ni kabatiaa riki ara bubutii ibukina.
9, 10. (a) Kabwarabwaraa bwa e aera ngkai ti kainnanoa kabatiaan ara bubutii ibukin taamnein te Atua. (b) Tera te titiraki ae ti riai n titirakinira iai ao bukin tera?
9 Ni kamanenan te reirei aei ni maiura ngkai, iangoia bwa aongkoa e ituaki n te aoraki temanna man am utu n te nukanibong. Te koaua bwa ko na kauta te taokita bwa e na buokiko? Ngkana e bebete te aoraki, ao ko na bon aki. Ma ngkana e reke irouna te aoraki ae te boo, ko na aki maamaa ni wetea te taokita. Bukin tera? Ibukina bwa ko a kaaitara ma te aoraki ae kona ni waekoa ni mate te aomata iai. Ko nora riain waekoan rokon te aomata ae mwaatai n te itera aei. Ngkana ko aki kakaaea buokam, e kona ni mate te aoraki anne. N aron anne, Kristian ni koaua a kainnanoa buokaia ni kaitaraa te kangaanga ae korakora. Bwa e nakonako Tatan n ai aron “te raian ae bekorara,” ae e ingainga nanona ni kani kabwautira. (1 Betero 5:8) Ngkana ti kani kateimatoaa ara iraorao ma Iehova, ti rangi ni kainnanoa ngkanne ana ibuobuoki taamnein te Atua. Ti na ruanikai ngkana ti aki bubutia te Atua bwa e na buokira. Mangaia are, ti riai n ninikoria ni kabatiaa butiian te Atua taamneina are raoiroi. (I-Ebeto 3:14-16) Ti na kateimatoaa te korakora ae ti kainnanoia ‘ni karokoa te toki,’ tii ngkana ti karaoa aei.—Mataio 10:22; 24:13.
10 Mangaia are e rangi ni kakawaki ibukira bwa ti na tei moa ao n titirakinira ni kangai, ‘Tera aroni batin au tataro?’ Uringnga bwa ngkana ti ataa raoi kainnanoan buokara mairoun te Atua, a riai ngkanne ni kabatiaki ara tataro.
Tera ae Kairira Bwa Ti na Tataro ma te Onimaki?
11. E kanga Iesu ni kamanena te kaikonaki ibukin te tama ao te nati ni kaineti ma te tataro?
11 E kateretereaki n ana kaikonaki Iesu aron te tia onimaki n tataro n aron te aomata ae teimatoa ni bubutii ana kariki. N te kaikonaki are imwina, e katereterea iai Iesu aron Iehova ae te Atua ae e ongoraei tataro nako. E titiraki ni kangai: “Antai iroumi ae e na angan natina te naeta ngkana e bubuti te ika? Ke tao e na anganna te tikaobian ngkana e bubuti te bunnimoa?” E reitia nako Iesu ni kamataataa ni kangai: “Ngaia kam rabakau n angania natimi baika a raraoi, ngkami aika kam buakaka! Ao ai bati ra riki nanon Tamami are i karawa ni kan anga te Tamnei ae e Raoiroi nakoia akana a butia!”—Ruka 11:11-13, BK.
12. E kanga ni kaotaki ingaingan nanon Iehova n ongoraei ara tataro n te kaikonaki are ibukin te tama are e ongoraea ana bubutii natina?
12 N te katoto ibukin te tama ae kaekaa natina, e kaotaki iai ana namakin Iehova nakoia te koraki ake a tataro nakoina. (Ruka 10:22) Te moanibwai, nora te kaokoro i marenan kaikonaki aikai. E kaokoro Iehova ma te mwaane are e rawa ni kaekaa te bubutii n te moan kaikonaki, bwa titeboo Iehova ma te karo ae mwamwannano ae ingainga ni kaekaa te bubutii mairoun natina. (Taian Areru 50:15) E a manga katereterea riki ingaingan nanon Iehova nakoira Iesu ngke e taekina aron te karo ae te aomata ao imwina aron Tamara are i karawa. E taekinna bwa ngkana e anga te bwaintangira nakon natina te karo ae e riki ni “buakaka” ibukin te bure-n-riki, e na mwaitira riki kaantaningaan Tamara are i karawa bwa e na angania taan taromauria te taamnei ae raoiroi!—Iakobo 1:17.
13. Tera ae ti kona ni kakoauaa ngkana ti tataro nakon Iehova?
13 Tera reireiara man aei? Ti kona ni kakoauaa iai bwa ngkana ti butiia Tamara are i karawa taamneina are raoiroi, e rangi n ingainga nanona ni kariaia ara bubutii. (1 Ioane 5:14) Ngkana ti okioki n tataro nakon Iehova, e bon aki kona ni kangai: “Tai nanoai: e bonotaki te mataroa.” (Ruka 11:7) Ni kaitaraan anne e taku Iesu: “Bubuti, ao kam na anganaki; ukeuke, ao kam na karereke; karebwerebwe, ao e na kaukaki nako imi.” (Ruka 11:9, 10) Eng, e “na ongo [Iehova} i roura n te bong ae ti wewete iai.”—Taian Areru 20:9; 145:18.
14. (a) Tera te iango ae kairua ae karawawataia tabeman ake a kaaitara ma kataakia? (b) E aera ngkai ti kona n tataro nakon Iehova ma te onimaki ngkana ti kaaitara ma kataakira?
14 E katuruturuaki naba n ana kaikonaki Iesu ibukin te tama ae mwamwannano, bwa e rangi ni kakawaki riki ana raoiroi Iehova nakon te raoiroi ae kaotiotaki irouia kaaro aika aomata. Ngaia are akea mai buakora ae riai n iangoia bwa kataaki aika tao ti kaaitarai, boni kaotan aki-kukurein te Atua iroura. Bon teuare karoton ara kairiribai are Tatan, ae tangirira bwa ti na iangoa anne. (Iobi 4:1, 7, 8; Ioane 8:44) Akea bukina n te Baibara ae ti riai ni kabuakakaira i bon iroura n te aro anne. E aki kataira Iehova “ni baika bubuaka.” (Iakobo 1:13) E aki naba anganira te kataaki ae ai aron te naeta ke te tikaobian. E anga “baika raraoi nakoia akana butia,” Tamara are i karawa. (Mataio 7:11; Ruka 11:13) Ngkana ti a ota riki n ana raoiroi Iehova ma ingaingan nanona ni kani buokira, ti na kairaki ngkanne bwa ti na tataro nakoina ma nanora n onimaki. Ngkai ti karaoa anne, ti nang kona iai n taekina ana namakin te tia areru are e korea ae kangai: “E bon ongo te Atua; E katanimaia taningana nakoni bwanan au tataro.”—Taian Areru 10:17; 66:19.
Aron te Taamnei ae Raoiroi n Riki Bwa te Tia Ibuobuoki
15. (a) Tera ana berita Iesu ni kaineti ma te taamnei ae raoiroi? (b) Tera te anga teuana ae e buokira iai te taamnei ae raoiroi?
15 E kaokioka te karaunano are e anga n ana kaikonaki Iesu, teutana te tai imwain matena. E tua ae kangai ngke e taekina te taamnei ae raoiroi nakoia ana abotoro: “N na butiia te Tama, ao Ngaia E na anganingkami te tia Buobuoki temanna, ba E na memena i roumi n aki toki.” (Ioane 14:16) E berita Iesu bwa e na memena irouia taan rimwina te tia ibuobuoki ke te taamnei ae raoiroi n taai aika imwaia ao n ara bong aikai naba. Tera te anga teuana ae moan te kakawaki are ti namakina iai te boutoka aei? Te anga teuana, e buokira te taamnei ae raoiroi bwa ti na nanomwaaka i aani kataaki aika kakaokoro. Ni kanga? E kabwarabwaraa te abotoro Bauro are e kaaitara ngkoa ma kataaki, n ana reta nakoia Kristian ake i Korinto aroni buokana iroun te taamnei ae raoiroi. Ti na rinanon ngkai ana reta.
16. E na kanga ni kona n titeboo arora ma Bauro?
16 Te moan, e kamataataa raoi Bauro nakon raona n onimaki bwa e kaaitara ngkoa ma ‘te bwai ni kateketeke n irikona,’ ae te aeka ni kataaki teuana. E a manga taku riki: “I katenua au butiia te Uea [ae Iehova] i bukin te baei ba e na nako mai rou.” (2 I-Korinto 12:7, 8) E ngae ngke e butiia te Atua Bauro bwa e na kanakoa marakina, ma e bon teimatoa n tiku naba. Tao ko a tia naba ni kaaitara ma aekan aei ni boong aikai. N aron Bauro, tao ko a tia naba ni kabatiaa am tataro ma te nano n onimaki ike ko a butiia iai Iehova bwa e na kanakoa mairoum. N aki ongea okiokim n tataro ni butiia, ma e bon teimatoa naba n tiku am kangaanga. Te koaua bwa nanona ngkanne bwa e aki kaekai am tataro Iehova ao e aki buokiko naba taamneina? Tiaki ngaia anne! (Taian Areru 10:1, 17) Nora ana taeka te abotoro Bauro ae imwina.
17. E kanga Iehova ni kaekai ana tataro Bauro?
17 Ni kaekaan ana tataro Bauro, e taku te Atua nakoina: “‘E tau buokam n au akoi, ba e oti riki makau ngkana ko mamara.’ Ma ngaia ae I bati ni kukurei ni kamomoaai riki ni mamarau, ba I aonga ni kawakinaki ni makani Kristo.” (2 I-Korinto 12:9, BK; Taian Areru 147:5) Mangaia are, e namakinna Bauro bwa e rabunaki ni, mwaakan ana kamanomano te Atua rinanon Kristo n ai aron te umwa n rianna. E kaekaa ara tataro Iehova n te aro naba anne ni boong aikai. E taakina nako ana kamanomano n ai aron te umwa i aoia ana toro.
18. E aera ngkai ti kona n nanomwaaka i aani kataakira?
18 Ni koauana, e aki katoka te karau ke karen te ang te umwa n rianna, ma e karekea te tabo ni kamanomano man baikai. N aron naba anne, e aki katoki kataakira ke kangaanga aika ti kaaitara ma ngaai, te kamanomano rinanon “mwakani Kristo.” Ma e kamanoi ara onimaki man ruanikaina ni bwain aon te aba ao man ana buaka te tia tautaekanna ae Tatan. (Te Kaotioti 7:9, 15, 16) Mangaia are, e ngae ngke ko kaaitara ma te kataaki ae aki ‘kitaniko,’ ko a kona ni kakoauaa ngkanne bwa e nora am kakorakora Iehova ao e a tia ni kaekaa ‘bwanam ni wewete.’ (Itaia 30:19; 2 I-Korinto 1:3, 4) E korea ae kangai Bauro: “E kakaonimaki te Atua, ae bon aki kitaningkami ba kam na kaririaki n te aro ae kam aki kona n teimatoa iai; ma E na karaoia ba raon te kaririaki kawaimi ni biri nako maiai, ba kam aonga ni kona n taon nanomi.”—1 I-Korinto 10:13; I-Biribi 4:6, 7.
19. Tera ae ko motinnanoia bwa ko na karaoia, ao bukin tera?
19 E koaua bwa a kanikinaeaki “boong aika kaitira” ibukin te waaki ae buakaka ae ngkai, n “tai aika kamamate.” (2 Timoteo 3:1) Ma e ngae n anne, a kona n tokanikai i aoni kangaanga aikai, ana toro te Atua. Bukin tera? Ibukina bwa a boutokaki ao ni kamanoaki iroun taamnein Iehova, are e anga ma nanona ni kukurei ae bati nakoia aomata nako ake a kabatiaa aia bubutii ma te nano n onimaki. Ti bia motinnanoia bwa ti na teimatoa n tataro ni bubutii ibukin te taamnei ae raoiroi ni katoa bong.—Taian Areru 34:6; 1 Ioane 5:14, 15.
Tera Am Kaeka?
• Tera ae ti riai ni karaoia ibukin karekean taamnein te Atua ae raoiroi?
• E aera ngkai ti kona ni kakoauaa bwa e na kaekai ara tataro Iehova ibukin te taamnei ae raoiroi?
• E na kanga ni buokira te taamnei ae raoiroi bwa ti na nanomwaaka i aani kataakira?
[Taamnei n iteraniba 13]
Tera ae ti kona n reiakinna man ana kabotau Iesu ibukin te mwaane are e kabatiaa ana bubutii?
[Taamnei n iteraniba 14]
Ko kabatiaa am tataro ibukin taamnein te Atua ae raoiroi?
[Taamnei n iteraniba 15]
Tera ae ti a tia n reiakinna ibukin Iehova n te kabotau ibukin te karo ae mwamwannano?