Titiraki Mairouia Taani Wareware

Tera ae nanonna Iesu ngke e taekina ana toro ae kakaonimaki bwa e na “wanawana”?

E titiraki ni kangai Iesu: “Antai te toro ae kakaonimaki ae wanawana, ae kateaki iroun ana toka ba mataniwiia tabonibaina ni kaamarakeia n aia tai?” (Mataio 24:45) Te “toro” are e katauraoa te “amwarake” n taamnei bon te ekaretia ae kaainaki irouia Kristian aika kabiraki iroun te taamnei. Bukin tera ngke e arania Iesu bwa a wanawana?a

Ti kona n ota riki n ana reirei Iesu bwa tera are e nanonna n te taeka ae “wanawana.” N te katoto, ngke e taekina te “toro ae kakaonimaki ae wanawana” Iesu, ao e anga te kaikonaki ibukia kibono aika tengaun ake a kaantaningaa rokon te tia iein. A kauringira taekaia Kristian ake a kabiraki imwain 1914, kibono ake a ingainga ni kaantaningaa rokon te tia Iein ae kakannato ae Iesu Kristo. A aki tau aia bwaa niman mai buakoia kibono ake tengaun ngke e a roko te tia iein, ao aikoa ooa te baka n amwarake. A kakoauaki ake niman bwa a wanawana. A a tia ni katauraoi aia bwaa ae bon tau are e na teimatoa ni kaotaia ngkana e roko te tia iein ao a a iria nakon te baka. (Mataio 25:10-12).

A mwaiti ibuakoia Kristian aika kabiraki ake a kaantaningaia ae a na kaai n tautaeka ma Iesu n anganakina mwaakana n Tautaeka i karawa n te 1914. Ma, a bati riki aia mwakuri ae a na riai ni karaoia i aon te aonnaba, ma a aki tauraoi tabeman iai. N aroia kibono ake aki wanawana, a aki kaman kakorakorai aia onimaki imwaina ngaia are a aikoa tauraoi n riki bwa taani kaotiota te ota. E ngae n anne, a mwaiti aika a tia ni karaoi mwakuri aika wanawana ma te rabakau ao te ataibwai ma a kakorakoraki aia onimaki. Ngke a ataia bwa e bubura te mwakuri ae mena imwaia, a kukurei ni moana karaoana. Ma ngaia are a kaotia bwa bon “te toro ae kakaonimaki ae wanawana” ngaiia.

Iangoa naba kabonganan te taeka ae “wanawana” iroun Iesu ni Mataio 7:24. E taku: “Ane ongo au taeka aikai n tauu, ao e na atongaki ba ai aron te aomata ae wanawana, are katea batana i aon te bwa.” E kateitei i aon te bwai ae matoatoa te aomata ae wanawana ibukin iangoan te angibuaka bwa e kona n riki. Ni kaitaraan anne, e kateitei i aon te tano te aomata ae nanobaba ao e bwaka ana auti. Ma ngaia are a noria taan rimwin Iesu ake a wanawana bwa e buakaka touan mwin rabakauia aomata. Ibukin ana atatai ao ana motinnano e a kairaki iai bwa e na kabotoa ana onimaki, ana mwakuri ao ana reirei i aon baike e reiakin Iesu. E karaoa ae aron anne “te toro ae kakaonimaki ae wanawana.”

Nora naba aron kabonganakin te taeka ae “wanawana” n rairai aika mwaiti n te Baibara n Ebera. N te katoto, e rinea Ioteba Barao bwa mataniwin babairean te amwarake n te aba ae Aikubita. Aio bon ana babaire Iehova ibukin katauraoan kanaia ana aomata. Bukin tera ngke e rinea Ioteba? E taku Barao nakoina: “Akea temanna ae wanawana ae rabakau n ai arom.” (Karikani Bwaai 41:33-39; 45:5) N aron naba anne, e taekina Abikaira te Baibara bwa “e nanowanawana.” E katauraoa te amwarake ibukin ana kabiraki Iehova ae Tawita ma ana aomata. (1 Tamuera 25:3, 11, 18) A kona n atongaki Ioteba ao Abikaira bwa a wanawana ibukina bwa a ataa ana kaantaninga te Atua, a bwaina te ataibwai ao te motinnano ae raoiroi.

Mangaia are ngke e kabwarabwaraa te toro ae kakaonimaki ae wanawana Iesu, e katereterea iai ae te koraki ake a tei ibukin te toro a na kaotiota te atatai, te ataibwai, ao te motinnano ae raoiroi ibukina bwa a aana iai aia onimaki, aia mwakuri, ao n reirei aika koaua n Ana Taeka te Atua.

[Kabwarabwara ae nano]