Maiu ma Iaiangoan Taai Aika A na Roko

E TAEKINA ae kangai Iesu Kristo n ana kabwarabwara ae rangi n tanoata taekana i aon te maunga are Kariraia: “Tai iango n raraoma i bukini kanoan te ingabong.” E reitia ni kangai Iesu ni kaineti ma te rairai n te New English Bible: “E na bon iangoa arona te ingabong i bon irouna.”​—Mataio 6:34.

N am iango tera ae nanonaki n taeka aika, “e na bon iangoa arona te ingabong i bon irouna”? Te koaua bwa ko na maiu ibukin tii te bong aio ao n aki tabe ma te ingabong? E boraoi ngkanne anne ma ana koaua Iesu ao taan rimwina?

“Tai Iango n Raraoma”

Wareki ana taeka Iesu ni kabane ake a taekinaki ni Mataio 6:25-32, BK. E atonga ae kangai: “Tai iango n raraoma i bukin te amarake ma te moi aika kam na maiu iai, ke i bukin te kunnikai ae kam na rabun rabatami iai . . . Taraia mannikiba: a aki ununiki ao a aki tatai, ao a aki kakaiko, ma e kaamarakeia Tamami are i karawa . . . Antai iroumi ae e kona ni kaanaua teutana maiuna ngkana e tatabeaianga iai? E aera ngkai kam iango n raraoma i bukin rabatami? Tarai rikirakeni kiebun tawana: a aki mamakuri ao a aki raranga kunnikai . . . Ma ngaia ae tai iango n raraoma ni kangai: ‘A na reke mai ia karara ma nimara ma rabunara?’ Boni bekan aika a aki toki ni iaiangoi baikanne ni kabane. E bon ataingkami Tamami are i karawa ba kam kainnanoi baikanne ni kabane.”

E motika ana kabwarabwara Iesu n reirei ni kauring aika uoua aikai. Te moan: “Ukera moa Uean te Atua ma te raoiroi ae e tangiria, ao a na reke naba baikanne ni kabane iroumi.” Te kauoua: “Tai iango n raraoma i bukini kanoan te ingabong: e na boni iangoa arona te ingabong. E tau te bong ma tabeiangana.”​—Mataio 6:33, 34, BK.

E Atai Baika Kam Kainnanoi Tamami

N am iango, te koaua bwa e kabwarai nanoia taan rimwina Iesu, n ikotaki ma taan ununiki bwa a na aki ‘kamae n ununiki, n taia aia uaa, ke n urakin aia uaa nakon nne n amwarake’? Ke ni ‘korakai ni mwakuri ao ni bibinoka’ ibukin karekean kunnikaia ake a kainnanoi? (Taeka N Rabakau 21:5; 24:30-34; Te Minita 11:4) E bon aki. Bwa ngkana aki mwakuri, ao ane a na riki ni “bubuti n tain te tai,” ma n akea kanaia ao kunnikaia.​—Taeka N Rabakau 20:4.

Ma tera ngkanne te raraoma? Te koaua bwa e nanonna ikai Iesu bwa a bane ni kona te koraki ake a ongora akekei ni kainaomataki man te raraoma ni kabanea? E bon aki kona ni koaua anne. E a tia naba Iesu ni bon namakina te rawawata n nano ae korakora ao te raraoma, n te tairiki are e katikaki bwa e na tiringaki iai.​—Ruka 22:44.

E katuruturua te koaua teuana Iesu. Te raraoma ae riao e bon aki kona ni buokiko ni kabebetei am kangaanga ake ko boo ma ngaai. N te katoto, e bon aki kona ni kaananaua maium te raraoma. E kangai Iesu: E aki kona ni “kaanaua teutana maium.” (Mataio 6:27, BK) Ni koauana, e na kona ni kauarerekea riki maium te raraoma ae korakora ae e teimaan.

E rangi n rianako manenan ana reirei ni kauring Iesu. Angiin baika ti raraomaeakin a bon aki riki. E iangoa naba aei ni kaineti ma boong ake a rangi ni kananokawaki n te Kauoua ni Buaka Are Kabutaa Aonnaba, temanna te tia tautaeka mai Buritan ae Winston Churchill. E korea ae kangai ni kaineti ma raraomana n te tai anne: “Ngke I tanrikaki man ururing raraomau ao ai aron ae I a uringa iai karakinan temanna te unimwaane are e bwaebwaeti imwaini matena, ao e taku bwa a rangi ni mwaiti kurikuri kangaanga aika e iaiangoi, ma angiina mai buakoia a bon tuai man riki.” Ni koauana, bon te wanawana riki tii iaiangoan kanoan te bong teuana ma teuana, ao e a moamoa riki ngkana ti bo ma kataaki ao kangaanga ake a kona ni kauekei raraomara aika korakora.

“Ukera Moa Uean te Atua”

Ni koauana a mwaiti riki baika e iangoi Iesu nakon tii marurungin rabwataia ao aia iango taan rimwina. E ataia bwa raraomaeakinan baika kainnanoaki n te maiu aei, n ikotaki ma bwaikorakina ao kakukureina a kona ni karibwai baika a rangi ni kakawaki. (I-Biribi 1:10) Ko kona n iango ni kangai, ‘tera ae kakawaki riki nakon ae karekean bwaikorakin te maiu aei?’ Te kaeka nakon anne, bon maiuakinan te onimaki ni koaua n irekereke ma taromaurian te Atua iroura. E kabwarabwaraa te bwai ae riai ni kakawaki i nanon maiura Iesu, bwa ti riai n “ukera moa Uean te Atua ma te raoiroi.”​—Mataio 6:33, BK.

A mwaiti aomata n ana bong Iesu ake a kakorakoraia n ukoukori bwaikorakin te maiu aei. Te bwai ae rangi ni kakawaki irouia bon karikirakean kaubwaia. Ma e ngae n anne ao Iesu e kaumakiia taan ongoraa bwa a na bwaina te kaantaninga ae e okoro ma anne. Ibukina bwa ngaiia aomata ake a tia ni katabuaki nakon te Atua, ngkanne “kabanean te aro ae riai” irouia boni ‘maakan te Atua, ao touan mwin ana tua.’​—Te Minita 12:13.

Kaatuan iaiangoan bwaikorakin te maiu aio, n aron “te iango n raraomaeakini bwain aon te aba, ma te mamanaki n te kaubwai” e kona ni katannakoira man taromaurian te Atua ni koaua. (Mataio 13:22) E korea ae kangai te abotoro Bauro: “Ma akana kani bwaibwai a bwaka n te kaririaki ma te ao-ni-katatai ma taiani kaibabaru aika bati aika nanobaba aika kamaraki, aika kaiinakoia aomata n te tiringaki ma te kamateaki.” (1 Timoteo 6:9) Ibukin kamanoaia man te “bwai ni kamwane” aio, are e a kauringia taan rimwina Iesu bwa e bon atai baika a kainnanoi Tamaia are i karawa. E na bon tararuaia te Atua n ai aron are e karaoia nakoia “mannikiba.” (Mataio 6:26, 32, BK) N onean mwin are a kariaia bwa e na taonaki nako aia iango n te raraoma, a riai ngkanne ni karaoi baika a kona ni karaoi ibukin kainnanoia ao ni katukui bwaai ni kabane i nanoni bain Iehova ma te aki nanokokoraki.​—I-Biribi 4:6, 7.

Ngke e taekina ae kangai Iesu “bwa e na bon iangoa arona te ingabong i bon irouna,” e nanonna raoi iai bwa ti na aki riai ni kariaia te raraoma ae e riao ni kaineti ma kanoan te ingabong bwa e na kamwaita riki ara kangaanga n te bong aei. Baibara tabeua a raira ana taeka ni kangai: “Tai raraomaeakina te ingabong; bwa e na bon tau tabeaiangana i bon irouna. Bon akea riaina bwa ti na kamwaiti riki kangaangan boong nako.”​—Mataio 6:34, Today’s English Version.

“E na Roko Ueam”

E bon rangi ni kaokoro ae ko raraomaeakina kanoan te ingabong ao ae ko bon aki tabe iai. E aki kaungaia taan rimwina Iesu bwa a na aki tabeakina te ingabong. Ma ni kaitaraan anne, e kaumakiia bwa a riai ni kan atai taai aika a na roko. A riai n tataroi baika a kainnanoi n te bong teuana ma teuana n aron marikeia. Ma a riai ni moanibwai baika a tuai n riki ni kaineti ma rokon ana Tautaeka n Uea te Atua ao tauan ana taeka i aon te aba.​—Mataio 6:9-11.

Ti aki riai ni katotongia te koraki ake n ana bong Noa. A tabe n “amamarake ma ni momoi, ma n iein, ma n anganga te aba nakon te iein” ao a “aki ata” rokon baika a nang riki. Ao tera mwina? ‘E roko te ieka n uotiia nako ni kabaneia.’ (Mataio 24:36-42) E kabongana te bwai are e riki ngkoa anne te abotoro Betero ni kauringira iai bwa ti riai ni maiu ma iaiangoan te ingabong. E korea ae kangai: “Ngkai a nangi bane ni waanako bwaai ni kabane n te aro aei, ao aro ra aromi aika riai ba kam na maeka n itiaki ma n tangira te Atua, ni kaantaninga rokon ana bong [Iehova] ma ni barekia!”​—2 Betero 3:5-7, 11, 12.

Kaikoi Ami Kaubwai Nako Karawa

E koaua, ti riai ni ‘bareka’ rokon ana bong Iehova. E rangi n irekereke karaoan anne ma arora ni kamanenai ara tai, korakorara, rabakaura, kaubwaira, ao ara konabwai. Ti aki riai ni katabetabeaki n uaiakinan bwain te maiu aio, n aron baika a kainnanoaki n te maiu ke bwaikorakina ao man kauarerekea ara tai ibukin karaoan mwakuri aika kaotiota ‘tangiran te Atua.’ Kaatuan iaiangoan kanoan te bong e kona n uotii mwina n te tai ae waekoa, ma ni koauana bon baika a aki teimaan. Ma e kangai Iesu, bwa kam wanawana riki ngkana, kam “kaiko ami bwai nako karawa” nakon ae kam na kaikoi nako aon te aba.​—Mataio 6:19, 20.

E kamataataa te iango anne Iesu n ana kabwarabwara ni kaineti ma te mwaane ae rangi ni bati ana babaire ibukin taai aika na roko. Ma babaire aikai akea irekerekeia ma te Atua. E rangi ni maiureirei aban te aomata aio. E iangoia bwa e na urua nen ana uaa ao ni manga katea ae bubura riki bwa e aonga ni kona n aoaoriia, n amwamwarake, ni momooi, ao ni kimwareirei. Ma tera te kangaanga n anne? E boni mate imwain ae e na kakukureia n ana ua ake e ribanai. Ma ae buakaka riki nakon anne, e bon aki karikirakea ana iraorao ma te Atua. E motika ana maroro ni kangai Iesu: “Bon anne aron te aomata ae e kaiko i boni i bukina, ma akea kaubaina i matan te Atua.”​—Ruka 12:15-21, BK; Taeka N Rabakau 19:21.

Tera ae Ko Kona ni Karaoia?

Tai karaoa ae kairua n aron are e karaoia teuare e taekinna Iesu. Ukoukori baika e a tia ni bairei te Atua i bukin taai aika a na roko ao kaboraoa maium ma anne. E aki mwanuokiniia ana aomata te Atua ni baika e karaoi. E korea ae kangai te burabeti ngkoa are Amota: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.” (Amota 3:7) Baike e taekin Iehova rinanoia ana burabeti a bane n tauraoi i bukim ni baan nako ana boki ae kairaki koreana iroun te taamnei, ae te Baibara.​—2 Timoteo 3:16, 17.

Teuana te bwai ae e kaotia naba te Baibara, bon te bwai ae e na riki nakon taai aika a na roko, are e na rota te aonnaba aei ni kabutaa, n te aro ae akea n ai arona ma ngkoa. E kangai Iesu: “Ba ane e na bati te rawawata iai, ae akea arona ma ngke a moa ni karikaki aonaba, ao bon akea arona naba rimwi.” (Mataio 24:21) Akea te aomata temanna ae kona n totokoa rikin anne. Ni koauana, bon akea bukina bwa a na totokoa rikin aei taan taromauri ni koaua. Bukin tera? Ibukina bwa te bwai ae e na riki aio e na bon kamaunai baika bubuaka man te aonnaba, ao e na karokoa “karawa nabangkai ao aonnaba nabangkai,” ae nanonaki iai te tautaeka i karawa ae boou ao te waaki i aon te aonnaba ae boou. N te waaki ae boou i aon te aba ao: “E na kabane rannimataia [aomata] te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki.”​—Te Kaotioti 21:1-4.

E aki riai ngkanne bwa ti na karekea ara tai n nenera ana taeka te Baibara ni kaineti ma rikin aei? Ko kainnanoa te ibuobuoki ibukin karaoan anne? Tuangia Ana Tia Kakoaua Iehova ibukin buokam. Ke koroboki nakoia taan boreetia te maekatin aei. Mangaia are, ti bia maiu tiaki tii bukin te bong aei ma ibukin naba tamaroan taai aika a na roko.

[Taamnei n iteraniba 7]

“Tai raraoma bwa e na bon tau te ingabong ma tabeaiangana”