E na Roko n Ningai Ana Tautaeka N Uea Te Atua?

“TE UEA, Ko nangi manga kaoka ueaia Iteraera nako ia ngkai?” (Mwakuri 1:6) A ingainga nanoia abotoro ni kan ataia bwa e na katea n ningai ana Tautaeka n Uea Iesu. Tao ai 2,000 ngkai te ririki imwin anne, ao aomata ae a bon teimatoa naba n ingainga nanoia ni kan ataia bwa e na roko n ningai Ana Tautaeka n Uea te Atua?

Kioina ngkai oin ana rongorongo Iesu n ana mwakuri ni minita bon te Tautaeka n Uea, tao ko kaantaningaia bwa e maroroakina taekan te titiraki aei. Ni koauana, bon anne ae karaoia! E kabatiaa Iesu taekinan te tai ae namataki, ae e aranna bwa ‘rokona [ke menana ma aomata.]’ (Mataio 24:37) E irekereke menana ma aomata ma tein te Tautaeka n Uea Iroun te Mesia. Tera menana ma aomata aei? Ti na rinanon koaua aika aua man te Baibara aika kaota taekan menan Kristo ma aomata.

1. E na moanaki menan Kristo ma aomata n te tai ae maan imwin matena. E anga te kaikonaki Iesu ni kabotaua iai ma te aomata ae e “nakon te aba ae raroa, ba e na karekea ueana.” (Ruka 19:12) E kanga te kaikonaki ni burabeti anne ni kakoroaki bukina? Ni koauana, ngke e mate Iesu ao ni manga kautaki; e nako ngkanne nakon te “aba ae raroa,” ae karawa. E taetae ni burabetinna Iesu n te kaikonaki riki teuana ae aron aei, bwa e na oki ma mwaakana n uea “i mwini boong aika bati.”​—Mataio 25:19.

Tabeua te ririki imwin rieraken Iesu nako karawa, e korea ae kangai te abotoro Bauro: “Ao Teuaei [Iesu] ngke E a tia n anga te karea ae ti teuana i bukini buure, ae manena n aki toki, ao E tekateka i angatain te Atua. Ao rimwi E kume ni kaantaninga te bong are a na kakiaki iai ana kairiribai ba neni katokaani waena.” (Ebera 10:​12, 13) Mangaia are e maan te tai n tataninga imwin rokon Iesu i karawa. E toki te tataninga anne ngke e a kaueaa Natina Iehova ae te Atua n te Tautaeka n Uea Iroun te Mesia are e a kaman beritanaki. Ikanne are e a moanaki iai menan Kristo ma aomata. E na noraki irouia aomata te bwai ae riki ae kakawaki aei?

2. E na aki noraki menana ma aomata. Uringnga bwa Iesu e maroroakina, kanikinaean menana ma aomata. (Mataio 24:3) A na kainnanoaki kanikinaa ngkana e na bon noraki menana ma aomata? Ni kabwarabwarana: Iangoia bwa ko mena n te aba ae rangi n niku ao n raroa nako ma taari. E kona ni kabanea iraua te aoa ke tao bon irabong kaean taari. Ni mwanangam, tao ko bae n nori kanikinaa n tei irarikin te kawai aika a na kaota kawaim nako taari. Ma ngkana ko a roko n te bike, ao n tei i etan taari, ko na kaantaningaia bwa e na iai riki te kanikinaa ae na tei ni kaotia bwa taari anne? E na bon akea. Bukin tera bwa e na kainnanoaki te kanikinaa ibukini kaotan te bwai ae ko a bon noria raoi ni matam?

E kabwarabwaraa kanikinaean menana ma aomata Iesu, tiaki ibukini kamatataan baika a bon kai noraki irouia aomata, ma e buokiia n ataia bwa iai te bae e na riki i karawa. E taku Iesu: “E aki roko uean te Atua n noraki.” (Ruka 17:20) A na kanga ngkanne kanikinaa ni kaotia nakoia kaain aonnaba bwa e a moana menana ma aomata Kristo?

3. E na kanikinaeaki menan Iesu ma aomata n te tai ae korakora iai te rawawata i aon te aba. E taekinna Iesu bwa e na kanikinaeaki menana n Uea i karawa, n rokon roongo, mwaieien aaba, aoraki aika kamamate ao te buakaka. (Mataio 24:7-12; Ruka 21:10, 11) Tera ae na karika te karawawata aei? E kabwarabwaraa te Baibara bwa Tatan ae, “uean aonaba,” e a rangi n un bwa e ataia bwa e a kimototo ana tai ngkai e a moanaki menan Kristo ma aomata bwa te Uea. (Ioane 12:31; Te Kaotioti 12:9, 12) E noraki kakoauaan unin Tatan ao menan Kristo ma aomata n te aro ae korakora n taai aikai. E a moamoa riki man 1914, ae te ririki ae ataaki irouia taan korea rongorongon rimoa bwa te tai ae e a bitaki iai aroaron te maiu n te aonnaba, ao e noraki kakoauaan aei ni katobibia te aonnaba n te aro ae tuai man nonoraki.

A na bae n taekinaki baikanne bwa rongorongo aika kananokawaki, ma bon tiaki. Ma e nanonaki bwa te Tautaeka n Uea Iroun te Mesia e a tautaeka ngkai i karawa. N te tai ae e a kaan roko ngkai, e nang tautaeka te tautaeka aei i aonnaba ni kabutaa. A na kanga aomata n ataa taekan te Tautaeka n Uea bwa aonga ni butimwaeia ao n aantaeka nakoina?

4. E kanikinaeaki menan Iesu ma aomata n te mwakuri n uarongorongo ni kabutaa te aonnaba. E kabotaua menana ma aomata Iesu ma “ana bongi Noa.”a (Mataio 24:37-39) Tiaki tii te tia kabaa te aake Noa ma bon “te tia taekina te raoiroi” naba. (2 Betero 2:5) E kauringiia aomata Noa bwa e nang roko ana motikitaeka te Atua. E taku Iesu bwa a na karaoa naba aron anne taan rimwina i aon te aba ni menana ma aomata. E taetae ni burabetina ae kangai: “Ane e na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko naba iai te toki.”​—Mataio 24:14.

N aron ae ti a tia n noria n te kaongora ae imwain aei, a na kamaunaki tautaekan te aonnaba aei ni kabane n Ana Tautaeka n Uea te Atua. E kauringiia aomata te mwakuri n uarongorongo bwa te tautaeka mai karawa aei e nang waakina ana mwakuri, ao e anganiia naba aia tai bwa a na birinako man te kabuanibwai ao n aantaeka nakon te Tautaeka n Uea. Te titiraki ngkanne ae kakawaki bwa Ko na kanga ni butimwaia?

E Kakukurei Iroum Rongorongon te Tautaeka n Uea?

Te rongorongo are e taekinna Iesu, e anganira te kaantaninga ae akea kabotauana. Imwin te karitei i Eten irangaa te ririki n nako, e a bairea katean te tautaeka teuana Iehova ae te Atua ibukin kanakoraoan bwaai ni kabane. E na kaoka te maiu n aki toki n te baretaiti i aon te aba te Atua, nakoia aomata aika kakaonimaki n aron are e bon moan baireia ngkoa. Tera ae na kakukurei riki ngkanne ngkai ti a ataia bwa te tautaeka ae e a kaman beritanaki aei, e a tautaeka ngkai i karawa? Bon tiaki tii kanoan te iango ma bon te koaua ni koaua!

E a tautaeka ngkai te Uea are e rineia te Atua i buakoia ana kairiribai. (Taian Areru 110:2) E a tia ni kakororaoa ana iango Tamana te Mesia, are e na ukeria te koraki ake a kan ataa te Atua bwa antai ngaia, ao n taromauriia n te “tamnei ma te koaua” n te aonnaba ae mangaongao aei ao n ianena mairoun te Atua. (Ioane 4:24) E kaukaki nakoia rooro nako, reeti nako, ao aika a kakaokoro nako aroia, te kaantaninga ibukin te maiu n aki toki i aan Ana Tautaeka n Uea te Atua. (Mwakuri 10:34, 35) Ti kaungako bwa ko na butimwaea te kakao aei. Reiakina taekan Ana Tautaeka n Uea te Atua ngkai, bwa ko aonga ni kukurei ni maeka i aan ana tautaeka ae raoiroi n aki toki!​—1 Ioane 2:17.

[Kabwarabwara ae nano]

[Taamnei n iteraniba 8]

Ongoraara n rongorongo aika bubuaka ni katoa bong bon kakoauaan rokon baika raraoi n te tai ae e a kaan roko

[Te Kabwarabwaraan te Taamnei]

Antiaircraft gun: U.S. Army photo