Antai ae Kona n Atai Taai Aika Imwaira?
“Bon te Atua Ngai . . . , I kaota te toki mai moani bwaai, ma ni kaoti naba ma ngkoangkoa baika tuai ni karaoaki.”—Itaia 46:9, 10.
N TAAI aika bibitaki aikai, ao a karaoi aia kakaae n rongorongon rimoa ao baika tatangiraki ni boong aikai taan rabakau ni kaineti ma tautaeka, te mwane ao te reitaki i marenaia aomata aika kakaokoro aroia, bwa a aonga ni kona n taekin taai aika imwaira. A korakai aomata ni kan atai taai aika imwaia ibukia n tatabemania nako, ao a onimakini bwaini karawa ke te tabunea ibukini kaekaan aki raunnanoia. A aki toki ni bwara nanoia aeka n aomata aikai ni baika riki imwin aia mwakuri. Te koaua bwa bon akea ae kona n ataa ae na riki nakon te aonnaba aei, ara utu ao ai boni ngaira n tatabemanira nako? Ma n tokina, iai ae kona ni kaman nori taai aika imwaira?
E kabwarabwaraa oin rabakauna te Atua ae Moan te Mwaaka ae Iehova ni kaman nori taai aika imwaira, n ana taeka nakon te burabeti ae Itaia ae mwaneweaki mai eta. E taetae ni burabeti te Atua rinanon Itaia ibukini kainaomataia tibun Iteraera rimoa man tautoronakia i Baburon, ike a na manga okira iai Ierutarem ma temborana ni manga kateia. Tera aron etirurun te taetae ni burabeti aei? Tao 200 te ririki mai mwaina, ao e bon eti Itaia ngke e taekina teuare e na kataea ana kai Baburon bwa Tairati. Irarikina, e eti naba kabwarabwaraan ana waaki Tairati iroun Itaia are e na bita butin te Karaanga are Iuberetiti are boni kamanoan te kaawa. E a kaman noria bwa e na nori mataroan te kaawa ake a rangi n totoa Tairati, bwa a na aki tararuaki raoi ao a na tiku n uki ao aio are e a buoka Tairati bwa e na bebete tokanikaina iai.—Itaia 44:24–45:7.
Ngkana e kabotauaki te aomata ma te Atua, bon akea mwaakan te aomata n ukoukori kanoan taai aika imwaira. E korea ae kangai te Uea ae Toromon ae wanawana: “Tai kamoamoako n reken te ingabong; Ba ko aki ata ae e na karikia te bong ae ti te bongina.” (Taeka N Rabakau 27:1) E teimatoa ni koaua ngkai te kukune anne. Akea te aomata ae kona ni kaman nori taai aika i mwaina. Tera aroni kaokoron te Atua iai? E ota raoi ni bwaai ni kabane aika e kariki, n ikotaki naba ma aroaroia aomata ao baika kai anaaki nanoia iai. Ngkana e rinea te bwai teuana bwa e na karaoia te Atua, e a kaman atai raoi aroia aomata ao te natannaomata anne ni kabane bwa tera ae a na karaoia iai. Irarikina, akea tian ana konabwai n taua taekani baika a na riki imwini karaoan te bwai teuana. Ngke e taetae ni burabeti rinanoia ana burabeti bwa e na riki te bwai teuana, e a riki iai bwa ‘Teuare e kamatoai aia taeka ana toro, ae e kakoroi aia taeka ana man.’ (Itaia 44:26) Bon tii Iehova ae te Atua ae kona n taekina anne.
E maiu Itaia 700 tabun te ririki imwain Iesu ae te Mesia. Ma e taetae ni burabeti Itaia ibukin rokon te Mesia. Ma e a moamoa riki man te ka-18 n tienture, bwa e a korakora iai tiriburean te Baibara irouia taan tiribureia n te aro are e a kabuakakaaki iai koauani katoton te boki ae Itaia. A taku bwa tiaki taetae ni burabeti ni koaua ana taetae ni burabeti Itaia ibukin taai aika a na roko, bwa a koreaki imwin rikini baikai, ao te tia koro rongorongo are imwina riki e tii korei rongorongoni baike a a tia n riki. E koaua anne? N 1947 ao e a kuneaki katoton te boki ae Itaia irarikin nira ni boki rimoa ake tabeua riki, n te bwanganimatang irarikin Taari ae Mate. A motinnanoia taan rabakau bwa e a kamani karaoaki katoton te boki aei bubua ma bubua te ririki imwaini bungian te Mesia ke Kristo are e taetae ni burabetinaki. Eng, a kaotaraeaki taai aika imwaira n te Baibara!
A aki kona n taetae ni burabetini kanoan taai aika imwaira Itaia ao taani korea te Baibara riki tabeman n tii oini wanawanaia. Ma a “taetae aomata mairoun te Atua ngke a kairaki iroun te Tamnei are Raoiroi.” (2 Betero 1:21) Ni kaongora aika imwin aei, ao ti na kaatuua riki iai maroroakinani bwaai tabeua ake a riki n rongorongon Iesu aika a taetae ni burabetinaki iroun te Atua rinanon Itaia. Imwin anne, ti na maroroakini baike a taetae ni burabetini Iesu ma taan rimwina ibukin ara bong aikai ao aika imwaira.