Te Bwai Ae Ti Reiakinna Mairoun Iesu

Ni Kaineti ma te Kantaninga Ibukia Maate

E kautiia aomata aika e aki kee i aan te mwaiti ae teniman Iesu, ike e a kaotia bwa iai te kantaninga ibukia maate. (Ruka 7:11-17; 8:49-56; Ioane 11:1-45) Ti riai moa n ota raoi bwa tera ae karika te mate ao moan rikina bwa ti aonga ni kona ni karekea otara ni kaineti ma te kantaninga ibukia maate.

Bukin Tera Bwa Ti Aoraki ao Ti Mate?

A kamaiuaki man aorakia aomata ngke a kabwaraaki aia bure iroun Iesu. N te katoto, ngke e kairaki nakon Iesu te aomata ae te nakibaina ao e taku nakoina: “Ba e nga ae kai atongaki riki, te kangai, A kabaraki am bure, ke te kangai, Tei rake, ao nakonako? Ba kam aonga n ataia ba E konai ni kabarai bure i aonaba Natin te Aomata,​—ao E taku nakon te nakibaina,​—Tei rake, tabeka kiem, ao naako n am auti.” (Mataio 9:2-6) Mangaia are te bure e karika te aoraki ao te mate. E reke rikiara ae te bure mairoun te moan aomata are Atam.​—Ruka 3:38; I-Rom 5:12.

Bukin Tera Bwa E Mate Iesu?

E bon aki bure Iesu. Ibukin anne, e bon aki tau ni mate. N oneani mwira, e a mate Iesu ni kabwaka iai boon ara bure. E taku bwa raraana e na “kawawaeaki i bukiia aomata aika bati ba bwaini kabaran aia bure.”​—Mataio 26:28.

E kangai naba Iesu: ‘E roko Natin te Aomata bwa e na toro irouia aomata ao bwa e na anga maiuna bwa te kaboomwi ibukia aomata aika bati.’ (Mataio 20:28) E aranaki iroun Iesu boon ara bure are e a tia ni kabwakaa Iesu bwa “te kaboomwi” ibukina bwa e kamaiuia aomata man te mate. E kangai naba Iesu: “I roko ba e na reke te maiu i rouia, ao e na bati n reke i rouia.” (Ioane 10:10) Ni karekean otara ni kaineti ma te kantaninga ibukia maate ti riai n ataa aroia aomata i nanoni mateia.

Tera ae Riki n te Mate?

Ni maten raoraona ae Rataro ao e a kabwarabwaraa iai te bwai ae riki n te mate Iesu. E taku nakoia taan rimwina: “E matu Rataro are raora; ma I a nako [Betania], ba N na kautia. . . . A taku i nanoia ba E taekina motikan rawana ni matu. Ma ngaia are E taku Iesu nako ia ni kaeti, E boni mate Rataro.” N te aro anne, e katereterea iai Iesu bwa a matu maate n aki namakinaaba.​—Ioane 11:1-14.

Ngke e kauta raoraona are Rataro Iesu ao ai bon ana kaabong imwini matena. Ma e ngae n anne, akea ana taeka teutana Rataro ae taekinaki n te Baibara ibukin te bwai ae riki nakoina i nanon te tai anne. Ni maten Rataro ao akea te bwai ae namakinna ke n ataia.​—Te Minita 9:5, 10; Ioane 11:17-44.

Tera te Kantaninga Ibukia Maate?

A na manga maiu maate ma ni kantaningaa te maiu are aki toki. E taku Iesu: “Ba e na bon roko te aoa, ae a na bane iai n ongo bwanana [bwanaan Iesu] aomata ake a mena i nanon ruaia ni mate, ao a na oti nako.”​—Ioane 5:28, 29.

Te kantaninga aei boni kaotiotan ana tangira te Atua. E taku Iesu: “E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”​—Ioane 3:16; Te Kaotioti 21:4, 5.

Ibukin rongorongona riki tabeua nora te mwakoro 6 n te boki ae Tera Ana Reirei ni Koaua te Baibara?a

[Kabwarabwara ae nano]