Iesu—Tera Aia Taeka Aomata Ibukina
“Iesu ae te I-Natareta . . . bon te aomata ae rangi ni kinaaki n rongorongon rimoa.” —Aikai ana taeka H. G. Wells, ae te tia korea rongorongon rimoa ae kaain Engiran.
“E riki Kristo bwa te aomata ae tei n okoro . . . i buakoia aomata aika tanoata taekaia n rongorongon rimoa.” —Aikai ana taeka Philip Schaff, ae te tia rabakau n te Aro ao te tia korea rongorongon rimoa ae kaain Switzerland.
ANTAI ae tau n riki bwa te aomata ae te kabanea ni kakannato mai buakoia aomata? E na reke kakannaton temanna man tera? Ni mwaataina ni buaka? Korakorana? Ke n rianakon rabakauna? Ke e riai n ataaki n arona n rotii maiuia aomata nako n ana taeka ao n ana mwakuri ao n ana katoto are e karaoia ibukia bwa a na kakairi iai?
Nori ngkai baike a taekinaki ni kaineti ma Iesu Kristo ae te I-Natareta irouia taani korei rongorongon rimoa, taan rabakau ni bwain te aonnaba, taan rabakau n te reirei, taani kororongorongo, taani kairiri n te tautaeka ao tabeman riki ake ngkoa ao n taai aikai:
“E na kainnanoaki iai te numera ae rangi ni bati ni kamimi bwa ko aonga ni kakewea ae Iesu are te I-Natareta bon tii ngaia te aomata ae te kabanea ni kakannato mai buakoia aomata nako. Boni ngaia are e rotii maiuia aomata tiaki tii i nanon uoua tenga te ririki n nako ma mangke a moan riki aomata ni karokoa ngkai.”—Aikai ana taeka Reynolds Price, ae te tia kororongorongo ao te tia rabakau n te Baibara ae kaain Amerika.
“Bon te mwaane ae akea ana bure ao e anga ngaia bwa te karea are a na kabwaia iai aomata nako n ikotaki naba ma ana kairiribai ike e a riki iai bwa te karea ni kaboomwi ibukia aomata ni kabane. Bon te mwakuri ae kororaoi aei.”—Aikai ana taeka Mohandas K. Gandhi, ae te tia tautaeka ao te tia kairiri n te onimaki i aon Inria.
“Ngke te teei ngai ao I anganaki te reirei ni kaetieti man te Baibara ao n te Tua n Iutaia rimoa ae te Talmud. Bon te I-Iutaia ngai ma e rangi n anaaki nanou n rianakon te aomata ae te I-Natareta ae Iesu.”—Aikai ana taeka Albert Einstein, ae te tia rabakau ni bwain te aonnaba ae kaain Tiaman.
“N au iango Iesu Kristo bon te aomata ae rianako aroarona ae akea n ai arona mai buakoia aomata, ma ngke a moan riki aomata ni karokoa ngkai, n arona ngkai Natin te Atua ao Natin te Aomata naba ngaia. Bwaai ni kabane ake E a tia n taekini ke ni karaoi a rangi ni manena ibukira ni boong aikai. Ao anne ae e aki kona n taekinaki ibukin temanna riki te aomata ae maiu ke ae e a tia ni mate.”—Aikai ana taeka Sholem Asch, ae te tia kororongorongo ae kaain Poland ake a mwaneweaki n te nuutibeeba ae te Christian Herald; aia bwai te man reireiti.
“I aki onimakina te bwai teuana i nanon tenibwi ma nimaua te ririki ni maiu aei, ngkai bon te nihilist ni koaua raoi ngai, ae te aomata ae akea te bwai ae I kakoauaa. Nimaua te ririki n nako ao I a kakoauaa bwa ngaia bon te aomata ni koaua Iesu. I a kakoauaa te reirei ibukin Iesu Kristo ao e karina ni bitaki maiu ni kabane.”—Aikai ana taeka Count Leo Tolstoy, ae te tia korokaraki ao te tia karioiango ae kaain Rutia.
“Akea temanna riki ae e a tia n rotii maiuia aomata n ai aron [Iesu] mai buakoia aomata rimoa ao ngkai ao e tabe n rikirake korakoran rotakini maiuia aomata ni maiuna.”—Aikai ana taeka Kenneth Scott Latourette, ae te tia korea rongorongon rimoa ao te tia kororongorongo ae kaain Amerika.
“Ti riai n iangoia bwa rongorongoni maiun Iesu bon tii te karioiango? Ni koauana raou, e bon aki taraa ni karioiango. Ni kaitaraan anne, a aki nanououa aomata ni koauan rongorongoni maiun Socrates bwa te aomata ni koaua ngaia, ma e aki rangi n ataaki te mwaane anne n aron Iesu Kristo.”—Aikai ana taeka Jean-Jacques Rousseau, ae te tia karioiango ae kaaini Buranti.
E teretere ngkanne bwa bon tii Iesu Kristo ae tau n riki bwa ara banna ni katoto ni maiura. E rineaki Bauro ae bubura ana reirei n te moan tienture iroun Iesu bwa te tia rimwina n taekina taekana nakoia natannaomata ao e kaumakira naba Bauro bwa ti na ‘tarataraa raoi’ Iesu. (Ebera 12:2; Mwakuri 9:3) Tera ae kona n reireinira Iesu ibukini kanakoroani maiura? E na kanga ni kona ni kakabwaiako maiuna?