Kakairi N Ana Katoto Iesu Ngkami Utu Aika Kristian!

“E katuka te aro ae kam na kakairi iai [Kristo], ba kam na tou mwini mwanekana.”​—1 BETERO 2:21.

1. (a) Tera nakoan Natin te Atua ni kaineti ma te karikibwai? (b) Tera ana namakin Iesu nakoia botannaomata?

NGKE e karika karawa ma aonnaba te Atua, ao e memena i rarikina Natina ae te moanibung “ba kaanga te tia makuri ae rabakau.” E kukurei Natin te Atua n aantaeka ni buoka Tamana ae Iehova ngke e bairei ao ni karikiia maan ao aroka aika kakaokoro aika rangi ni mwaitikurikuri i aon te aba. Ao ngke E katauraoa naba te Bwaretaiti are e na riki bwa mwengaia aomata ake a karikaki ni katotongan Iehova ma aroarona. E korakora tangiraia aomata iroun Natin te Atua are e a ataaki imwina riki bwa Iesu. E “kukurei irouia natiia aomata.”​—Taeka N Rabakau 8:27-31; Karikani Bwaai 1:26, 27.

2. (a) Tera buokaia aomata aika aki kororaoi are e a tia ni katauraoia Iehova? (b) Tera iteran te maiu teuana are e a katauraoaki iai te bwai ni kairiri n te Baibara?

² Imwini bureia te moan taanga, e a riki kamaiuaia aomata aika bure bwa te bwai ae rangi ni kakawaki n ana kantaninga Iehova. E katauraoa ana karea ni kaboomwi Kristo Iehova, bwa e aonga ni kona ni karaoaki te kakamaiu anne. (I-Rom 5:8) I rarikina, e katauraoa ana Taeka Iehova ae te Baibara are e na angangania aomata te kairiri, bwa a aonga n totokanikai i aoni kangaanga ni maiuia n aki ongea rikiaia ae te aki kororaoi. (Taian Areru 119:105) E katauraoa naba te bwai ni kairiri i nanon ana Taeka Iehova are e na buokiia aomata bwa a na teimatoa ni kukukurei n aia utu ao ni kaan aia itoman i marenaia. E taekinaki n te boki ae Karikani Bwaai bwa ni kaineti ma te tekateka n taanga, e riai te mwaane n “nim ma buna: ao a na riki n ti te irikona nakai.”​—Karikani Bwaai 2:24.

3. (a) Tera ana reirei Iesu ibukin te tekateka n taanga? (b) Tera ae ti na maroroakinna n te kaongora aei?

³ E katuruturua Iesu n ana mwakuri ni minita i aon te aba, bwa e baireaki te tekateka n taanga bwa e na teimatoa n aki toki. Ao e reiakinia naba aomata booto n reirei ake ngkana a maiuakini, a na buokaki iai kaain te utu n rarawa nakon aroaro ao katei aika a a tia ni karuanikaia tekatekaia n taanga ke kakukurein aia utu. (Mataio 5:27-37; 7:12) E na maroroakinaki n te kaongora aei aron ana angareirei Iesu ao ana katoto are e karaoia ni menana i aon te aba aika kona ni buokiia buumwaane, buuaine, kaaro ao ataei man ana katoto Iesu, bwa a aonga ni kona ni maeka ma te kukurei ao te raunnano.

Aron te Buu te Mwaane ae te Kristian ni Karinea Buuna

4. Tera ae titeboo iai nakoan Iesu ao buumwaane aika Kristian?

⁴ E rinea te buu te mwaane te Atua bwa atun te utu, n aron naba Iesu ngkai Atun te ekaretia. E taku te abotoro Bauro: “Atun te aine te mwane, n ai aron naba Kristo ngkai atun te ekaretia, are rabatana, ao boni Ngaia ana Tia Kamaiu. Mwaane, kam na tangiriia bumi, n ai aron naba Kristo ngke E tangira te ekaretia, ao E anga boni Ngaia, i bukina.” (I-Ebeto 5:23, 25) Ni koauana, aroaron Iesu nakoia taan rimwina e katea te banna ni katoto ibukin aroaroia mwaane aika Kristian nakoia buuia. Ti na iangoi aanga tabeua ake e kamanena iai mwaakana Iesu are mairoun te Atua.

5. Tera aron Iesu ni kamanena mwaakana nakoia taan rimwina?

⁵ E ‘nimamannei ao e nanorinano’ Iesu. (Mataio 11:29) Bon te mwaane ae mwamwakuri ao akea te tai ae e kakeaa iai bongani mwiokoana nako. (Mareko 6:34; Ioane 2:14-17) E reireinia taan rimwina n taai aika riai ma te bwanaa n akoi, ao e okioki naba ni karaoi n taai ake a kainnanoaki iai. (Mataio 20:21-28; Mareko 9:33-37; Ruka 22:24-27) E teimatoa Iesu n aki boaia ke ni kamaamaeia ao e aki naba karekea irouia namakinan ae a aikoa tangiraki ke a aikoa konabwai ni karaoa te mwakuri are e reireinia bwa a na karaoia. N oneani mwin anne, e kamoamoaia ao ni kaungaia taan rimwina. (Ruka 10:17-21) Maroaka are a a boni karinea Iesu taan rimwina ibukin arona n tatangira ao n nanoanga!

6. (a) Tera ae kona n reiakinna te buu te mwaane n aroaron Iesu nakoia taan rimwina? (b) Tera te kaungaunga ae e angania buumwaane Betero?

⁶ A reireiaki buumwaane n ana katoto Iesu bwa te aro ni kairiri ni Kristian bon tiaki te nakoa are e na tautaeka iai te buu te mwaane i aoni buuna ma te iowawa. Ma a riai ni kairiri ma te karinerine ao te tangira ae te anga boni ngaiia. E kaungaia buumwaane te abotoro Betero bwa a na kakairi n aroaron Iesu, n aroia ni karaoi mwakuri n tatangira n ‘tekatekaia n te aro naba anne’ ma buuia ao ‘n angania karineaia.’ (Wareka 1 Betero 3:7.) Ma e na kanga ni kona ni kamanena mwaakana mairoun te Atua te buu te mwaane ao n te tai anne e akoa naba buuna kaanga ai aron te aomata ae riai ni karineaki?

7. N te aro raa ae e kona iai te buu te mwaane ni karinea buuna? Kabwarabwaraa.

⁷ Te anga teuana ae kona iai te buu te mwaane ni karinea buuna, boni mani karabinoan raoi ana iango buuna ao ana namakin imwaini karaoan ana babaire ake a na kona n rotaki iai kaain ana utu. Tao e kona ni kainnanoaki karaoan te moti ni kaineti ma te mwaing nakon te tabo teuana ke te auti teuana ke bitakin te mwakuri. Ao e kona ni kaineti naba ma baika a riiriki ni katoa bong, tao n aron ae a na motirawa ia kaain te utu ke bitakin te babaire ibukin te kataumwane bwa e aonga n tau te karekemwane ibukin te maiu. Ibukina bwa e na rotaki te utu iai, e na manena ao boni kaotan naba te akoi iroun te buumwaane ngkana e karabinoa raoi moa ana iango buuna, ngkai e kona n reke buokana iai ni karaoa ana moti ae riai, ae atataiaomata ao ni bebete riki boutokaana irouni buuna. (Taeka N Rabakau 15:22) A na aki tii karekea tangiraia ao karineaia buumwaane aika Kristian ake a karineia buuia, ma ae kakawaki riki bwa a a karekea akoaia iroun Iehova.​—I-Ebeto 5:28, 29.

Aron te Buu te Aine ni Kaota Korakorani Karineani Buuna

8. E aera ngkai e riai te rarawa nakon ana katoto Ewa?

⁸ Bon te banna ni katoto ae kororaoi Iesu ibukia buuaine aika Kristian, ni kaineti ma te aantaeka nakon te mwaaka ni kairiri. Ai korakorara okoron ana iango Iesu ni kaineti ma te mwaaka ni kairiri ao te aroaro are e kaotiotaki iroun te moani buu te aine! E kabwaka Ewa n riki bwa te banna ni katoto ae tamaroa are a na kakairi iai buuaine. Iai atun neiei are e mwiokoaki iroun Iehova are e anganga ana kaetieti rinanona. Ma e bon aki karinea mwaakani buuna ni kairiri Ewa. E kabwaka n ongeaba nakon te kaetieti are e anganna Atam. (Karikani Bwaai 2:16, 17; 3:3; 1 I-Korinto 11:3) Ni koauana, e mwamwanaaki Ewa ma e ngae n anne, e riai ni kaman titirakina buuna bwa e kainnanoaki ke e aki irakin nanon te bwanaa are e taku nakoina bwa e bon ‘ataia te Atua.’ N oneani mwin anne, e iangoia bwa e aki riai n aantaeka irouni buuna ma e iangoia neiei bwa e kona ni karaoa te kairiri.​—Karikani Bwaai 3:5, 6; 1 Timoteo 2:14.

9. Tera ana katoto Iesu ni kaineti ma te aantaeka?

⁹ Ni kaitaraan anne, e katea te katoto ae kororaoi Iesu ni kaineti ma te aantaeka nakon Atuna. E oti man aroarona ao maiuna bwa e “aki iangoa arona ae bo raoi ma aron te Atua.” Mangaia are, “E kaki kanoana ae neboakina, ao E arona aron te toro.” (I-Biribi 2:5-7) Ni boong aikai, e boni kateimatoa te aroaro naba anne Iesu ngkai e a tautaeka bwa te Uea. E aantaeka ma te nanorinano nakon Tamana ni bwaai ni kabane ao e boutokaa Arona ni kairiri.​—Mataio 20:23; Ioane 5:30; 1 I-Korinto 15:28.

10. E na kanga te buu te aine ni kona ni boutokaa aron ana kairiri buuna ae atuna?

¹⁰ E karaoa ae raoiroi te buu te aine ae te Kristian n arona ni kakairi iroun Iesu ni boutokaan aron ana kairiri buuna ae atuna. (Wareka 1 Betero 2:21; 3:1, 2.) Iangoa te aro teuana ae kona n reke iai ana tai te buu te aine ni karaoa aei. E bubutii natin neiei ae te mwaane kariaiakana n ira te mwakuri ae kainnanoaki iai aia kariaia ana karo. Ibukina bwa e tuai ni maroroakinaki te baei irouia kaaro aikai mai imwaina, e riai te tina aei n titirakina natina ni kangai, “Ko a tia ni butiia tamam?” Ngkana e tuai karaoa aei natina, e riai ngkanne neiei ni maroroakinna ma buuna imwaini motikan te bwai anne. I rarikin anne, e bon riai n rawa te buu te aine ae te Kristian ni kauntabaa ke ni kabuakakaa ana iango buuna i mataia natiia. Ngkana e aki boraoi n iango ma buuna n te bwai teuana, e na maroro ma buuna n tii ngaiia.​—I-Ebeto 6:4.

Ana Katoto Iesu Ibukia Kaaro

11. Tera ana katoto Iesu ibukia kaaro?

¹¹ E ngae ngke e aki mare Iesu ke tao akea natina, ma boni ngaia te banna ni katoto ae te kabanea n tamaroa ibukia kaaro aika Kristian. N te aro raa? E taotaona nanona n reireinia taan rimwina ma te tangira rinanon ana taeka ao ana katoto. E kaota nakoia aron waakinani mwiokoaia are e a tia n angania. (Ruka 8:1) A reireiaki taan rimwina aroaroia n reitaki i marenaia, man aroaron Iesu ao mwakuri ake e kakaraoi nakoia.​—Wareka Ioane 13:14-17.

12, 13. Tera ae a riai ni karaoia kaaro ngkana a na kaikawaia natiia bwa ataei aika mamaaka te Atua?

¹² A aki toki ataei ni kakairi irouia aia karo ni karaoan ae raoiroi ke ae buakaka. Mangaia are titirakiningkami kaaro ni kangai: ‘Tera ae ti reireinia iai natira n ara katoto ni kaineti ma mwaitin ara tai ake ti kabanei ni mataku n te TV ao arora ni kaakibotu, ni kabotauaki ma ara tai n ukeuke n reirei n te Baibara ao n uataboan te mwakuri ni minita? Baikara baika ti moanibwai raoi n ara utu? Te koaua bwa ti katea te katoto ae raoiroi n arora ni moanibwaia te taromauri ae koaua ni maiura ao n ara motinnano?’ E riai ni mena moa i nanoia kaaro ana tua te Atua, ngkana a kani kaikawaia natiia bwa ataei aika mamaaka te Atua.​—Te Tua-Kaua 6:6.

¹³ Ngkana a kakorakoraia kaaro ni maiuakini booto n reirei n te Baibara ni kaineti ma baika a riiriki nakoia ni katoa bong, a na bon noraki aikai irouia natiia. A na bon rotaki maiuia ataei n aia taeka aia karo ao aia reirei. Ma ngkana a noria ataei bwa a aki boraoi maiuia aia karo ma kaetieti ake a boni katei ibukia natiia, tao a kona ni motinnanoia ataei aikai bwa a aki rangi ni kakawaki ao ni manena booto n reirei man te Baibara. Ibukin anne, tao e a kona ngkanne ni bebete riki kairaraangaia ataei ni kariri n te aonnaba aei.

14, 15. Baikara baika kakawaki ake a riai ni karikirakei kaaro i nanoia natiia, ao tera te aro teuana are a na kona iai ni karaoa aei?

¹⁴ A ataia kaaro aika Kristian bwa e bati riki ae kainnanoaki ni kaikawaan te ataei, nakon tii katauraoani baika e kainnanoi ni maiuna. Mangaia are, bon te aro ae aki rangi ni wanawana reireian te ataei bwa e na uaiakin tiia ibukin tii kakabwaiaana ni baika e kainnanoi ni maiuna. (Te Minita 7:12) E reireinia taan rimwina Iesu bwa a na moanibwaia ukoukoran te tautaeka n uea ma raoiroina. (Mataio 6:33) Mangaia are, ngkana a na kakairi kaaro aika Kristian iroun Iesu, a riai ni kakorakoraia ni karikirakea i nanoia natiia te nano ni kan uaiakin tiia n taamnei.

¹⁵ Te anga teuana ae a na kona iai kaaro ni karaoa aei, boni mani kabatiaan aia tai natiia ni bobotaki ma te koraki ake a kabwanina aia tai n te mwakuri ni minita. Iangoa aron ungan nanoia rooro n rikirake aika a kabatiai aia tai n iraorao ma bwaiania ke mataniwin te aono ae uarereke ma buuna. A kona n taekini kakimwareirein te beku iroun Iehova ma te ingaingannano mitinare aika mwamwananga, kaain te Betaera, ao kaain te mwakuri ni kateitei n aaba aika kakaokoro. Akea te nanououa bwa a na bae n iai rongorongon te mwakuri aika anainano ake a kona ni maroroakinna taan roko aikai. Tao e na bae n rangi ni korakora buokaia natimi man aia katoto naakai n aroia n anga ngaiia n te beku aei. Ao ngkanne, a a kona iai natimi ni bwaina te wanawana n rinean aia motinnano, katean tiaia aika reitaki ma te beku iroun te Atua ao karekean aia reirei aika tau ake a na boutokaiia ngkana a kabwanina aia tai n te mwakuri ni minita.

Tera ae na Buokingkami Ataei ni Kakairi n Ana Katoto Iesu?

16. E kanga Iesu ni karineia ana karo ake a kaikawaia ao Tamana are i karawa?

¹⁶ E katauraoa naba te katoto ae moanibaan te tamaroa Iesu ibukimi ataei. E kariaia Iehova bwa e na kaikawaaki Iesu iroun Ioteba ma Maria ao e ongeaba irouia. (Wareka Ruka 2:51.) E ataia bwa e ngae ngke a aki kororaoi naakai, ma e a tia te Atua n angania te mwioko bwa a na kaikawaia. Ni kaineti ma anne, e riai naba Iesu ni karineia. (Te Tua-Kaua 5:16; Mataio 15:4) E kakaraoi bwaai ni kabane Iesu aika kakukureia Tamana are i karawa ngke e a ikawai. E nanonaki n anne bwa e rarawa nakon te kariri. (Mataio 4:1-10) Tao kam kona naba ngkami ataei ao rooro n rikirake ni kaririaki n tabetai bwa kam na aki ongeaba nakoia ami karo. Mangaia are, tera ae na buokingkami bwa kam na kakairi n ana katoto Iesu?

17, 18. (a) Aekakira kariri aika a kaaitara ma ngaai ataei ao rooro n rikirake n te tabo n reirei? (b) Ururingakin tera ae kona ni buokiia ataei ao rooro n rikirake bwa a na nanomwaaka i aani kataaki aika a kaaitarai?

¹⁷ E bae n ae angia mai buakoia raoraomi n te tabo n reirei tao a aki bati ke a bon aki karinei ana kaetieti nako te Baibara. Tao ane a na kataia ni kairiko bwa ko na airi ma ngaiia ni karaoi mwakuri aika bure ao ni bwainingareiko ngkana ko rawa. A a tia raoraom n te tabo reirei ni weteiko n aara aika ko na kamaamaeaki iai ngke ko rawa n iriia ni karaoi mwakuri tabeua? Ngkana ngaia aei ae riki nakoim, tera ngkanne arom iai? Ko ataia raoi bwa ngkana ko kataua bwa ko na maakuia ao n iriia te koraki anne, ko na boni karawawatai nanoia am karo ao Iehova naba. Tera ae na riki nakoim ngkana ko kakairi irouia raoraom n te tabo n reirei? Tao ko a bae n tia ni katei tiam tabeua i bon ibukim n aron te bwaiania ke tabonibain te ekaretia, te ibuobuoki n aono ake e korakora riki iai kainnanoaia taan uarongorongoa te Tautaeka n Uea, ke kaainakin te Betaera. Ko kona n roko n tiam akanne ngkana ko bobotaki ma raoraom n te tabo n reirei?

¹⁸ Kam a tia ngkami rooro n rikirake n te ekaretia ni Kristian ni kaaitara ma aaro ake e a kataaki iai ami onimaki? Tera aromi iai? Iaiangoa Iesu bwa te banna ni katoto ibukimi. E rawa n taonakinako n te kariri ao e tei n nene n te bwai ae e a ataia bwa e eti. Ururingan aei, e na buokingkami n anganingkami te korakora n te aro are kam a kona raoi iai n tuangia raomi n te tabo n reirei, bwa kam aki kan airi ma ngaiia ni karaoa te bwai ae kam ataia bwa e bure. Kakairi iroun Iesu n teimatoa ni kaatuui ami iango i aoni kantaningaan te tai are kam nang kimwareirei iai ni beku ao n ongeaba iroun Iehova.​—Ebera 12:2.

Kiingin te Maiu ni Kukurei n te Utu

19. Tera te aroaro ni maiu ae kona ni karekea te kakukurei ni koaua?

¹⁹ A tangira te aro ae te kabanea n nakoraoi ibukia botannaomata Iehova ae te Atua ma Iesu Kristo. E ngae ngkai ti aki kororaoi, ma ti boni kona naba ni karekea kukureira. (Itaia 48:17, 18; Mataio 5:3) E reiakini koaua ni kaineti ma te onimaki Iesu ake a a riki bwa aani karekeani kukureia botannaomata, ma tiaki tii anne are e tuangia taan rimwina. E reiakina naba te aroaro ni maiu ae te kabanea n nakoraoi Iesu. I rarikin are e a tia n taekinna, e katuka te katoto ae manena ni kaineti ma te aroaro ni maiu ae riai ao te iango ae raoiroi. E ngae ngkana tao tera tabera n ara utu, ma ti kona ngaira ni kabane ni kakabwaiaaki ngkana ti kakairi n ana katoto Iesu. Mangaia are, kakairi n ana katoto Iesu ngkami buumwaane, buuaine, kaaro ao ataei! Kiingin raoi te maiu n utu ae karaunano ma ni kakukurei, boni maiuakinan ana reirei Iesu ao te kakairi n ana katoto.

Ko na Kanga ni Kaeka?

• Tera aroia buumwaane ae riai ni kamanenaani mwaakaia ni kairiri are a a tia n anganaki iroun te Atua?

• E na kanga te buu te aine ni kona ni kakairi n ana katoto Iesu?

• Tera ae a kona n reiakinna kaaro n aroaron Iesu nakoia taan rimwina?

• Tera ae a kona n reiakinna ataei ao rooro n rikirake n ana katoto Iesu?

[Taamnei n iteraniba 17]

Tera ae na karaoia te buu te mwaane ae tatangira imwaini karaoan ana babaire ae kona n rotaki iai ana utu?

[Taamnei n iteraniba 18]

Tera te aro ae e angaraoi ibukin te buu te aine ni boutokaa aron ana kairiri buuna ae atuna?

[Taamnei n iteraniba 19]

A kakairi ataei ni kateia aika raraoi aia karo