Te Kaubwai Are Mairoun te Atua

E NA kakabwaiako te Atua n te kaubwai ngkana ko kakaonimaki nakoina? Tao e koaua anne, ma tiaki n te aeka ni kaubwai are ko kantaningaia. Iangoa Maria are tinan Iesu. E kaoti te anera are Kaberiera nakoina ao e taku bwa e “moa n akoaki” neiei iroun te Atua ao e na bungia Natin te Atua. (Ruka 1:28, 30-32) Ma e bon aki maiu ni kaubwai, bwa ngke e angakarea Maria imwini bungian Iesu irouna, ao e anga iai “Uoman te taobe ae te turukon, ke uoman te bitian te tei” ake karea aika a aki toki n anganga aika maiu ni kainnano nakon Iehova.​—Ruka 2:24; Nakoaia Ibonga 12:8.

Ma e koaua ngkanne bwa ngkai e maiu ni kainnano Maria, e aki tangiraki iroun te Atua? Boni kaitaraan raoi anne, bwa ngke e kawara ana koraki are Eritabeta ao “e kaonaki Eritabeta n te Tamnei are Raoiroi; ao e taetae n te bwana ae korakora, ao e kangai, Moan te kabaia ngkoe i buakoia aine, ao e a kabaia uaani birotom.” (Ruka 1:41, 42) E kakabwaiaaki Maria n rikina bwa tinan Natin te Atua ae tangiraki.

Tiaki te aomata ae kaubwai Iesu. Tiaki tii ibukina ngke e bungiaki ao ni kaikawaaki n te tabo ae mangori, ma e boni maiu ni kainnano ni kabane maiuna i aon te aba. N te taina ao e taku nakon teuare e kan riki bwa te tia rimwina: “Bon iai bwangaia arobeke, ao ngaoia manin aan-nang; ma akea nen Natin te Aomata ae E na kawenea atuna iai.” (Ruka 9:57, 58) Ma e ngae n anne, te bwai are e karaoia Iesu Kristo n rokona i aon te aba, e a karekea angaia iai taan rimwina bwa a na reke kaubwaia aika rangi ni bati. E koroboki te abotoro Bauro ni kangai: “E riki n aki kaubwai i bukimi, ba kam aonga ni kaubwai n ana aki-kaubwai.” (2 I-Korinto 8:9) Baikara aeka ni kaubwai ake e angania taan rimwina Iesu? Ao te aeka ni kaubwai raa ae reke iroura ni boong aikai?

Te Aeka ni Kaubwai Raa?

E aki toki n riki te maiu ni kaubwai n te aro n rabwata bwa te bwai n tutuki nakon te onimaki, kioina ngkai e na bae te aomata ae kaubwai n onimakina riki ana mwane nakon te Atua. E taku Iesu: “Ai roko maki ra akana kaubwai n uean te Atua!” (Mareko 10:23) E teretere raoi ngkanne bwa te kaubwai are e angania taan rimwina Iesu bon tiaki te kaubwai n rabwata.

Ni koauana, angia Kristian ake n te moan tienture a boni maiu ni kainnano, bwa ngke e butiaki te mwane Betero iroun temanna te mwaane ae mwauku mangke e bungiaki, ao e kaekaa ni kangai: “Akea au tirewa, ma au koora; ma ae iai i rou, ao I anganiko. Ko na nakonako n aran Iesu Kristo are te I-Natareta.”​—Mwakuri 3:6.

E kateretereaki naba n ana taeka te tia rimwini Kristo are Iakobo, ae e kaainaki te ekaretia ni Kristian irouia aomata aika maiu ni kainnano. E korea ae kangai: “Tariu aika kam tangiraki, kam na ongora, tiaki E rineiia akana aki kaubwai ni bwain aon te aba te Atua ba a na kau-onimaki, ao a na riki ba taan ababa n ueana are E atongnga ba ueaia akana tangiria?” (Iakobo 2:5) Irarikin anne, e taekinna naba te abotoro Bauro bwa a aki bati ni weteaki aika “rabakau n te rabata” ke aika “korakora” ke “tooka” bwa a na kaaina te ekaretia ni Kristian.​—1 I-Korinto 1:26.

Ngkana ngaia bwa tiaki te kaubwai n rabwata are e angania taan rimwina Iesu, te aeka ni kaubwai raa ngkanne are e angania? E taekina ae kangai Iesu n te reta nakoia kaain te ekaretia are i Temurena: “I ata rawawatam ma aki-kaubwaim (ma ko boni kaubwai naba).” (Te Kaotioti 2:8, 9) E ngae ngke a maiu ni kainnano Kristian ake i Temurena ma bon iai kaubwaia aika a rangi ni kakawaki riki nakon te tirewa ma te koora. A kaubwai ibukin aia onimaki ao kakaonimakia n te aro ae eti nakon te Atua. E rangi ni kakawaki te onimaki n tii ngaia kioina ngkai “a aki bane aomata n toa” iai. (2 I-Tetaronike 3:2) A boni maiu ni kainnano i matan te Atua te koraki ake a aki onimaki.​—Te Kaotioti 3:17, 18.

Te Kaubwai Bon Uaan te Onimaki

N aaro raa aika e rangi ni kakawaki iai te onimaki? A kakabwaiaaki te koraki ake a onimakina te Atua man “ana atataiaomata ae bati, ma taotaonan nanona ma ana aki-kakaiun.” (I-Rom 2:4) A boni ‘kabwaraaki aia bure’ ibukin onimakinan ana karea ni kaboomwi Iesu. (I-Ebeto 1:7) Irarikin anne, bon iai te rabakau n “ana taeka Kristo” ae kona ni karekea nakoia ake a onimaki. (I-Korote 3:16) Ngkai a tataro nakon te Atua ma te nano n onimaki ao “te rau are mairoun te Atua, are te rau are aki konaki n ataki teutana” e kawakin nanoia ma aia iango ao e angania naba te raunnano ao te kukurei.​—I-Biribi 4:7.

N ikotaki ma kakabwaia aikai ni kabane, a karekea naba te kantaninga ae rangi ni kamimi are te maiu n aki toki, ake a onimakina te Atua rinanon onimakinan Natina are Iesu Kristo. A rangi n ataaki ana taeka Iesu Kristo aikai: “E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) E a kakorakoraaki riki te kantaninga ae rangi ni kakawaki aei iroun te aomata, ngkana e karekea ana atatai ae eti ibukin te Tama ao te Nati bwa e kangai naba Iesu: “Aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.”​—Ioane 17:3.

E ngae ngke e boto riki ana kakabwaia te Atua i aoni bwaai n taamnei, ma bon iai naba kakabwaia ni kaineti ma te namakin ao marurungin te rabwata. Iangoa te katoto ni kaineti ma Dalídio mai Brazil. Imwain ataakin ana kantaninga te Atua irouna ao bon iai ana kangaanga ni kabatiaan te manging. Aio are e a rotakibuaka iai reitakina ma ana utu. N ikotaki ma anne, e tabe naba ni kekerikaaki ana karekemwane. Rimwi riki, e a moana ana reirei n te Baibara ma kaain Ana Tia Kakoaua Iehova ao e karaoa te bitaki ae kamimi.

E a kairaki Dalídio man ana atatai ae boou aei bwa e na kaaki aroarona aika karuanikai aikai. E kakorakoraa ni maiuakin reireiana man ana atatai n te Baibara aei n te aro are e a kangai: “Ngkoa, I nanakon te tabo ni moi manging teuana ma teuana, ma ngkai, I a manga nanakon te auti teuana ma teuana.” E a tia n riki bwa te tia uarongorongo teuaei ibukin Ana Taeka te Atua ae kabwanina ana tai. E aki tii karikirakea marurungina te aeka ni bitaki anne ma e boni buokia naba n ana karekemwane. E taku Dalídio: “Te mwane ngkoa are I kakamanena ibukini boon nimau te kamanging, I a kamanena ngkai ibukia aika kainnanoa buokaia ao ibukini karekeani baika I kainnanoi.” E a tia naba ni karekeia raoraona ni koaua aika bati rinanon bobotakina ma aomata aika a kakairi n ana iango te Atua. E a karekea ngkai nakoraoin ana iango ao raunnanona Dalídio ae riaon ae kona n iangoia ngke e tuai n ataa te Atua.

Iangoa Renato ae te katoto naba teuana mai buakoia ake a a tia n rangi ni kakabwaiaaki ni maiuia, ibukini karikirakean onimakinan Iehova ae te Atua irouia. Ngkana ko taraa moangarena ni boong aikai, e na boni kangaanga kakoauaan ae e a tia n aki rangi ni mwannanoaki ni maiuna. E a tia ni bakataeaki iroun tinana ngke e a tibwa bungiaki. E katukaki i nanon te baeki i aan te kaintekateka teuana, e korakora nanangauana ao ikoakina ao e tuai naba ni bwaka butona. Iai uoman aine ake a nora te baeki aei i aan te kaintekateka bwa e kakammwakuri. N te moantai ao a taku bwa iai temanna ae katuka ana bung ni katamwa ikekei. Ma ngke a a ataia ae ngaia bon te teei ae e a tibwa bungiaki, a boni kawaekoaia naba n nikiria n te onnaoraki are a uakaan ma ngaia ibukini bwainnaorakiana.

Temanna mai buakoia aine akekei bon Ana Tia Kakoaua Iehova, are e a kaongoa temanna te tia Kakoaua ae Rita taekan te teei arei. E bati ana tai Rita ni bwabwaka natina, ao tii temanna natina te aine. E bon rangi n tangira natina te mwaane, ai ngaia are e a iangoa tabekan Renato bwa natina.

E kaotia raoi Rita nakon Renato ae bon tiaki raoi ngaia tinana. Ma e bon tabeakinna ma te tangira ao te nanoanga ao e kakorakoraa naba ni karina tangirani booto n reirei man te Baibara irouna. Ngke e tabe n ikawai ao e a moanna n rikirake tangiran te Baibara irouna. E rikirake naba ana kakaitau n aroni kamaiuana ae kangaanga kakoauaana. E aki toki n tiinako rannimatana ni katoai taai ake e wareka iai ana taeka te tia areru are Tawita aika kangai: “E kitanai tamau ma tinau, Ma e na mwaneai rake n akoai Iehova.”​—Taian Areru 27:10.

E bwabetitoaki Renato n 2002 ike e a kaota iai ana kakaitau nakon Iehova ibukini baike e a tia ni karaoi nakoina, ao e a riki naba bwa te minita ae te Kristian ae kabwanina ana tai iai n te ririki are imwina. E bon teimatoa naba ngkai n tuai n ataa oin tamana ma tinana ao tao e na bon aki naba kona n ataia. Ma e ngae n anne, e namakinna Renato bwa teuana mai buakoni bwaintangira aika rangi ni kakawaki ake e a tia ni karekei, bon ataakin ao onimakinan Iehova bwa Tamana ae tatangira mani mwamwannano.

Tao ko bae ni kani karekea am iraorao ae boto i aon te tangira ma te Atua are ngaia ae boni kona ni kakabwaiaa maium. Karekean te iraorao ma Iehova ae te Atua ao Natina ae Iesu Kristo, bon te kakabwaia ae uki nakoia aomata nako aika kaubwai ao aika maiu ni kainnano. E bon aki karekea te maiu raoi n te aro n rabwata, ma e karekea nakoim raun am iango ao raunnanom, ae e aki kona ni karekea nakoim te mwane ni kabane n te aonnaba aei. A boni koaua raoi taeka ake a kuneaki n Taeka N Rabakau 10:22 aika kangai: “Kakabaian te aba iroun Iehova, e kabatia kaubwain te aba, Ao E aki raonna n te rawawata teuana.”

E rangi n tabeakinia aomata ake a kawaria Iehova ae te Atua: “Ko bia kaman iri nanon au tua nako! ao ai aron te karanga raun nanom iai, ao ai aron naoni marawa am raoiroi.” (Itaia 48:18) Ao e beritanna bwa a na bon rangi ni bati kakabwaiaaia te koraki ake a kawaria ngke e kangai: “Boon te nanorinano ma makan Iehova Te kaubwai, ma te karineaki, ma te maiu.”​—Taeka N Rabakau 22:4.

[Kabwarabwaraan n iteraniba 5]

E ngae ngke a maiu ni kainnano kaain ana utu Iesu ake i aon te aba, ma a bon rangi ni kakabwaiaaki iroun te Atua

[Taamnei n iteraniba 6]

Uaan onimakinan te Atua bon te rau, te raunnano ao te kimwareirei