Moanibaan Te Kakawaki Te Reirei Are Mairoun Te Atua
“Boni ngaia, ao I atongi baikai ni kabane ba te kabuanibwai, ngkai moaniban te raoiroi atakini Kristo Iesu are au Uea.”—I-BIRIBI 3:8.
1, 2. Tera te rinerine ae a karaoia Kristian tabeman, ao bukin tera?
NGKE e uarereke Robert, e riki bwa te ataei ae rangi ni wanawana n ana tabo n reirei. Ngke ai tibwa wanua ana ririki, e kawaraki iroun temanna mai buakoia ana tia reirei ni mwengana, ao e tuangnga bwa akea tiatianakina ibukini baika e kona ni kakororaoi. E taekina ana kantaninga ana tia reirei bwa n te bong teuana e na riki Robert bwa te taokita n te onnaoraki. Imwini karekean rabakauna n te kauarinan n reirei ao e a katauaki n rin n te kuura ae rietata teuana mai buakoni kuura ni kabane aika a moan raraoi i abana. Ma e ngae n anne, e motinnanoia Robert bwa e na aki butimwaea aia iango aomata aika mwaiti are e aki kona n okioki te tai aei, bwa e aonga n uaiakina tiana ni beku bwa te regular bwaiania.
2 A mwaiti Kristian aika ataei ao kara, n ai aron Robert, ake a kona ni karekei aia tai aika riai ibukini karekean nakoaia i nanon te waaki ae ngkai. A rineia tabeman bwa a na aki butimwaei baikai, bwa a aonga n uaiakin tiaia aika irekereke ma aia taromauri. (1 I-Korinto 7:29-31) Tera ae kairiia Kristian aikai n ai aron Robert bwa a na kukurei ni kakorakoraia n te mwakuri n uarongorongo? A kakorakoraia n te mwakuri n uarongorongo, ao oin raoi bukin anne bwa a tangira Iehova, ma a ataia naba ae moanibaan te kakawaki te reirei are mairoun te Atua. Ko a tibwa iaiangoia ngkai bwa tera aroni maium ngkana arona bwa ko aki ataa ana koaua te Atua? Iaiangoan raoi kakabwaia tabeua aika rangi n rianako ake ti karekei n reiakinara iroun Iehova, e na buokira ni kateimatoa ururingani kakawakin te rongorongo ae raoiroi, ao te ingainga n tibwaia ma aomata nako.
Bon te Kakabwaia ae Rine Reiakinara Iroun te Atua
3. Bukin tera bwa ti kona ni koaua raoi bwa e kukurei n reiakinia aomata aika aki kororaoi Iehova?
3 Ibukin raoiroin Iehova, e rangi ni kukurei n reiakinia aomata aika aki kororaoi. Ibukin taetae ni burabetinakia Kristian aika kabiraki, e taekinaki ae kangai n Itaia 54:13: “A na bane natim n reireiaki iroun Iehova; ao e na korakora aia rau natim.” Iai irekereken taeka akanne ma ana “tiibu tabemang” Kristo. (Ioane 10:16) E rangi ni mataata aei man te taetae ni burabeti are e kakororaoaki bukina n ara bong aikai. E noriia aomata n te miitara Itaia bwa a na raanga nakon te taromauri ae koaua mai buakoia natannaomata ni kabane. E kabwarabwaraa bwa a taekina ae kangai i marenaia: “Ti na ararake nakon ana maunga Iehova, nakoni maneaban Atuaia Iakoba; ao ane E na reireira ana aro nako, ao ti na nakonako ni kawaina nako.” (Itaia 2:1-3) Ai bon te kakabwaia ae rine reiakinara iroun te Atua!
4. Tera ae e tangiria Iehova mairouia akana reiakinaki irouna?
4 Ti na kanga n tau ni karekei reireiara mairoun te Atua? Moan te kakawaki iroun te aomata bwa e na nimamannei ao ni kani butimwaea te reirei. E korea ae kangai te tia areru ae Tawita: “E raoiroi Iehova, ao E eti. . . . Ao E na reireiia akana nimamanei kawaina.” (Taian Areru 25:8, 9) Ao Iesu e taku: “I karaoiroiko, Tamau, ae Ueani karawa ma aonaba, ba Ko karaba baikai nakoia akana rabakau ma akana wanawana, ao Ko kaotioti nakoia merimeri.” (Ruka 10:21) Ko aki namakina ngkanne burimauniam nakon te Atua ae “E anga te akoi nakoia akana nanorinano”?—1 Betero 5:5.
5. Tera te aro ae tii teuana ae ti kona iai ni karekea te atatai ibukin te Atua?
5 E koaua bwa ti kona n ataa te koaua n oin wanawanara ao ara konabwai, ngkai ana toro Iehova ngaira? Ti aki kona. Ni koauana, ti bon aki kona ni karekea te atatai ibukin te Atua i bon iroura. E taku Iesu: “Akea ane kona n nako Iu, ngkana E aki burimaunia te Tama are kanakomaiai.” (Ioane 6:44) E burimaunia aomata Iehova n tatabemania ake ai aroia tiibu, aika “bwaai aika tatangiraki aika aia bwai botanaomata ni kabaneia,” rinanon te mwakuri n uarongorongo ao te taamnei ae raoiroi. (Akai 2:7) Ko aki ngkanne rangi ni kakaitau, ngkai ngkoe temanna mai buakoia ake e a tia ni burimaunia Iehova nakon Natina?—Wareka Ieremia 9:23, 24.
Kanakoraoani Maiuia Aomata n Ana Reirei te Atua
6. Baikara uaa aika kamimi aika a reke irouia aomata imwini butimwaean ‘te atatai ibukin Iehova’?
6 E kaikonakaki n te aro ae rangi n tamaroa n ana taetae ni burabeti Itaia bitakin aroaroia aomata ae riiriki n ara tai aikai. A a tia ni bitaki taan tiritiri ngkoa bwa taan raoi ngkai. (Wareka Itaia 11:6-9.) A a tia n reirei aroni maekaia ni katiteuanaaki aomata aika a kakairiribai i marenaia ngkoa ibukini kaokoron aia reeti, aia taetae, aia baronga, ke aia katei. N te aro ni kaikonaki, a a tia naakai n ‘ororoi aia kabaang bwa winibwarau.’ (Itaia 2:4) Tera bukin rikini bitaki aika kamimi aikai? A a tia aomata ni kaaki i nanoia ‘te atatai ibukin Iehova’ ao ni maiuakinna. E ngae ngke a aki kororaoi ana toro te Atua, ma a riki bwa te botaki n itaritari ni katobibia te aonnaba. E kakoauaaki iai bwa moanibaan te kakawaki te reirei are mairoun te Atua, ngkai e ringi nanoia aomata te rongorongo ae raoiroi ma uaana ae tamaroa, ni kabutaa te aonnaba.—Mataio 11:19.
7, 8. (a) Baikara “baika nene wakaaia” tabeua ake a buokaki aomata iai bwa a na urui man te reirei are mairoun te Atua? (b) Tera ae kaotaki bwa te reirei are mairoun Iehova e reke kamoamoaana iai?
7 E kabotaua aia mwakuri n uarongorongo ana toro te Atua ma te buaka ibukin te onimaki te abotoro Bauro. E korea ae kangai: “Ba tiaki bwain aon te aba ara kai ni buaka, ma a boni korakora iroun te Atua n uru noono [ake “baika nene wakaaia,” NW]. Ao ti uru taeka aika baka n rabakau, ma bwaai ni kabane aika rietata aika kateirakeaki n eka nako atakin te Atua.” (2 I-Korinto 10:4, 5) Baikara “baika nene wakaaia” tabeua aika a kainaomataaki mai iai aomata, n ataakin te reirei are mairoun te Atua? Katoto tabeua mai buakon aikai bon te karawawataaki n reirei aika kewe, koaua aika boto i aoni maakakia taimonio, ao aia karioiango aomata. (I-Korote 2:8) E buokiia aomata te reirei are mairoun te Atua bwa a na tokanikai i aoni mwakuri aika bubuaka ao ni karikirakei aroaro aika kakukureia te Atua. (1 I-Korinto 6:9-11) E kanakoraoa te maiu n te utu ao e angania aomata ake akea aia kantaninga bwa a na nora manenani maiuia ni koaua. Aio te aeka n reirei ae kainnanoaki ni boong aikai.
8 Teuana mai buakon aroaro ake e buokiia aomata iai Iehova ni karikirakea ni maiuia, boni maiuakinan te eti ao te koaua, n aron ae kaotaki n te rongorongo ae nang taekinaki ngkai. (Ebera 13:18) E butimwaea te reirei n te Baibara te aine temanna i Inria, ao imwin tabeua te tai e a katauaki bwa te tia uarongorongo ae tuai ni bwabetitoaki. N te bong teuana, ngke e oki man te mwakuri ni kateitei ibukin te Tabo n Taromauri, ao e kunea i aontano irarikin te kai ni bwati te mwae ae te koora, ae titeboo boona ma wanibubua te taara n Amerika. E ngae ngke e maiu ni kainnano neiei, ma e anaa te mwae aei ao e uotia nakon te aobiti ni bureitiman bwa a na kakaaea bwa antai ana bwai. E bon rangi ni mimi te bureitiman arei n te baere e noria! Rimwi riki, e manga titirakinaki neiei iroun te bureitiman temanna ni kangai, “E aera bwa ko aki kawakina te mwae aei?” E kabwarabwaraa ni kangai neiei, “E a boni bita maiu te reirei man te Baibara, ai ngaia are I a maiuakina te eti ao te koaua ngkai.” E rangi n ringaki nanon teuaei ao e taku nakon te unimwaane ae te Kristian are raon neiei: “Iai aomata aika a raka i aon 38 te mirion mwaitiia n te aono aei. Ngkana ko kona ni buokiia aomata aika tengaun bwa a na bitaki n ai aron te aine aei, e a koro iai nanon te kantaninga ae moan te raoiroi.” Ngkana ti iangoia aomata aika mirion ma mirion mwaitiia ake a a tia ni kanakoraoaki maiuia man te reirei are mairoun te Atua, a bon rangi ni bati ngkanne bukina aika ti na kamoamoaa iai Iehova.
9. A na kanga aomata ni kona ni karaoi bitaki aika rangi ni korakora ni maiuia?
9 E kona n onika maiun te aomata mwaakan Ana Taeka te Atua, n ikotaki naba ma ana ibuobuoki Iehova ae e katauraoia rinanon taamneina ae raoiroi, ni buokiia aomata ni karaoi bitaki aika rangi ni korakora ni maiuia. (I-Rom 12:2; I-Karatia 5:22, 23) E taekinaki ae kangai n I-Korote 3:10, (BK): “Kam a tia ni karina i aomi aomatami ae e bou, ae e karikaki iroun te Atua ba katotongana, ba e aonga n reke iroumi te atatai ae e kororaoi.” Iai mwaakan te rongorongo man Ana Taeka te Atua ae te Baibara ni kaota anuan raoi te aomata i nanona ae aki kai ataaki, ao e kona ni bita arona n iango, ao aron naba ana namakin ibukini bwaai nako. (Wareka Ebera 4:12.) E kona n riki bwa raoraon te Atua ao ni kantaningaa te maiu are aki totoki, te aomata ae karekea te atatai ae eti man te Baibara, ao ni kaboraoani maiuna ma ana kaetieti Iehova aika raraoi.
Katauraoara Nakon Taai Aika Imwaira Iroun Iehova
10. (a) Bukin tera ngkai bon tii Iehova ae kona ni buokira ni katauraoira nakon taai aika imwaira? (b) Baikara bitaki aika rangi ni korakora ake a nang waekoa n rotaki iai kaain te aonnaba ni kabutaa?
10 Bon tii Iehova ae kona ni buokira ni katauraoira ibukin taai aika imwaira ibukina bwa e atai baika a na waekoa n roko. E bairei baika a na riki nakoia botannaomata n taai aika imwaira. (Itaia 46:9, 10) E kaotaraeaki n te taetae ni burabeti n te Baibara bwa “E a kaan ana bong Iehova ae kakanato.” (Tebania 1:14) Ni kaineti ma te bong anne, e na boni kakoauaaki are e taekinaki n Taeka N Rabakau 11:4 ae kangai: “Akea manen te bwaikoraki n te bongi n un: Ma e kamaiua te aba man te mate te raoiroi.” Ngkana e a roko ana tai ni motikitaeka Iehova ike e nang tiringia iai kaain ana waaki Tatan, te bwai ngkanne ae moan te kakawaki bon tangirara iroun te Atua. E na bon akea manenan te mwane. Ni koauana, e taekinaki n Etekiera 7:19 ae kangai: “A na tetewe nako aia tirewa i nanoni kawai, ao a na riki aia koora ba kaanga bwaai aika kamwara.” Ti kona ni buokaki ni karaoi motinnano aika wanawana ngkai mani kaman ataani baika a nang riki.
11. Tera te aro teuana ae e na buokira iai te reirei are mairoun te Atua ni katauraoira ibukin taai aika imwaira?
11 E katauraoira n te aro teuana ae teretere raoi te reirei are mairoun te Atua ibukin rokon ana bong Iehova, bwa e buokira n iangoi baike a rangi ni kakawaki ake ti na moanibwaia ni maiura. E korea ae kangai te abotoro Bauro nakon Timoteo: “Ko na tuangia akana kaubwai i aon te aba, ba a na tai kainikatonga, ao a na tai onimakina te kaubwai ae aki teimatoa, ma a na onimakina te Atua.” E ngae ngke ti aki kaubwai, ma ti kona ni kakabwaiaaki man te reirei ae roko mairoun te Atua aei. Tera ae irekereke iai? N oneani mwin are ti na kaikoi bwaikorakin te maiu aei, ti riai ni “kakaraoa ae raoiroi” ao ni “kabati makuri aika riai.” N arora ni moanibwaia ara beku ibukin Iehova ni maiura, ti “na kaiko [aara] aika raraoi i mwaini boong aika nangi roko.” (1 Timoteo 6:17-19) E kaota te wanawana maiuakinan te kan anga boni ngkoe ibukina bwa e taku Iesu, “Tera kabaian te aomata ae e na karekea aonaba ni kabanea ba ana bai ngkana e kabua maiuna iai?” (Mataio 16:26, 27, BK) Ibukina bwa e a uakaan ana bong Iehova, ti riai n tatabemanira nako n iaiangoa te bwai aei: ‘I kaikoi au bwai nakea? I toro iroun te Atua ke te Kaubwai?’—Mataio 6:19, 20, 24, BK.
12. Bukin tera bwa a na aki bwara nanora ngkana a kamangora ara mwakuri ni minita tabeman?
12 Moan te kakawaki te mwakuri n uarongorongoa te Tautaeka n Uea ao karekeaia taan rimwini Kristo, ake ngaai mai buakoni “makuri aika riai” ake a a tia n taekinaki n Ana Taeka te Atua ibukia Kristian. (Mataio 24:14; 28:19, 20) N ai aron are e riki n te moan tienture, tao a na bae ni kamangora ara mwakuri ni minita tabeman. (Wareka 1 I-Korinto 1:18-21.) Ma e ngae n anne, e aki bitaki manenan ara rongorongo, ao e aki kauarerekeaki naba iai kakawakin anganakia aomata ni kabane te tai n onimakinna, ngkai bon iai riki te tai. (I-Rom 10:13, 14) Ngkai ti buokiia aomata ni karekei kakabwaiaia n te reirei are mairoun te Atua, ti na boni karekei kakabwaiaara aika bati naba.
A Kakabwaiaaki Akana Kareani Bwaai Ibukin Iehova
13. Baikara baike e kakeai te abotoro Bauro ibukin te rongorongo ae raoiroi?
13 Imwain rikin te abotoro Bauro bwa te Kristian, e reiakinaki bwa e na rikirake ni kakannato n aia waaki I-Iutaia. Ngke e tuai n ikawai bwa tao ai 13 ana ririki ke i aana, e mwaing man ana kaawa ae Tareto nako Ierutarem, bwa e na reireiaki iroun te tia reirei n te Tua ae rangi ni karineaki ae Kamariera. (Mwakuri 22:3) Imwin teutana te tai, e taraa ni kaokoro mai buakoia tabonrorona Bauro ibukina bwa e rangi ni mwaatai. Ngke arona bwa e bon teimatoa ni waakina ana reirei n te tai anne, tao e a kona n rangi ni kakannato n te Aro n Iutaia. (I-Karatia 1:13, 14) Ngke e butimwaea te rongorongo ae raoiroi ao ni moana te mwakuri n uarongorongo, e kukurei ni kakeai baikai ni kabane. E uringaaba Bauro n te bwai are e a tia n rineia? E bon aki. Ni koauana, e korea ae kangai: “Boni ngaia, ao I atongi baikai ni kabane ba te kabuanibwai, ngkai moaniban te raoiroi atakini Kristo Iesu are au Uea, are I kabua au bwai ni kabane i bukina, ao I atongi ba maange, ba E aonga n reke Kristo i rou.”—I-Biribi 3:8.
14, 15. Baikara kakabwaia aika ti rinanoi, ngkai ‘raon te Atua ni mwakuri ngaira’?
14 A kareani bwaai Kristian ni boong aikai, n ai aroni Bauro, bwa a aonga n tataekina te rongorongo ae raoiroi. (Mareko 10:29, 30) Ti kainnano ngkanne ni karaoan anne? Titeboo ana namakin Robert, ae taekinaki ni moan te kaongora aei, ma aomata aika mwaiti riki, ngke e kangai: “Bon akea uringaabau. I a tia ni kimwareirei ao n rau nanou ni kabwanina au tai n te mwakuri ni minita, ao e buokai naba bwa N na “kata Iehova ma n noria ba E raoiroi.” Ngke I kareani bwaai aika kakawaki irou bwa I aonga n uaiakin tiau ni beku ibukin Iehova, e a kakabwaiaai riki nakon are I a tia ni kareanna ibukina. Kaanga ai aron ae I tuai ni kareana te bwai teuana, bwa I a karekei aika bati riki!”—Taian Areru 34:8; Taeka N Rabakau 10:22.
15 Ngkana ko a tia n uataboa te mwakuri n uarongorongo ao n angareirei i nanon te tai ae maan, akea te nanououa bwa ko a tia naba ni karekei taai tabeua ike ko kataa iai Iehova ma n noria ba e raoiroi. Ko namakinna n taai tabetai bwa ko a tia ni buokaki rinanon taamneina ae raoiroi ngke ko tataekina te rongorongo ae raoiroi nakoia aomata? Ko a tia n nora kimwareireia aomata ngke e kauka nanoia Iehova bwa a na mutiakina te rongorongo? (Mwakuri 16:14) E a tia ni buokiko Iehova n tokanikai i aoni kangaanga, tao n aron are e a kauka te kawai ibukim bwa ko na karaababa riki am mwakuri ni minita? E a tia ni boutokaiko n am tai n rawawata bwa ko aonga ni kona n teimatoa ni beku irouna, e ngae ngke ko namakinna bwa akea korakoram? (I-Biribi 4:13) Ngkana e anganira buokara Iehova n tatabemanira nako ni karaoan ara mwakuri ni minita, ti namakinna bwa ti a kinaa raoi iai ao ti a kaaniaki riki ma ngaia. (Itaia 41:10) Tiaki te koaua bwa ti bon kakabwaiaaki n riki bwa temanna mai buakoia ‘raon te Atua ni mwakuri,’ n te mwakuri n angareirei ae rangi ni kakannato are te reirei mairoun te Atua?—1 I-Korinto 3:9.
16. Tera am namakin ibukin am kekeiaki ao arom ni kareani bwaai ni kaineti ma te mwakuri n angareirei are te reirei mairoun te Atua?
16 A kantaningaa kakororaoan te bwai are e na teimatoa n rangi ni manena i nanoni maiuia aomata aika mwaiti. Ti a tia n nori baika rianako ake a a tia ni kakororaoaki ni boong aikai, ma a waekoa ni mwanuokaki taekaia. Ma e ngae n anne, akea te nanououa bwa ana mwakuri Iehova ake e kakororaoi ni boong aikai ni kaineti ma katabuan arana, a na koreaki bwa kanoani rongorongoia ana aomata te Atua ae aki kona ni kamaunaaki. A na bon uringaki n taai nako. (Taeka N Rabakau 10:7; Ebera 6:10) Ti bia karinea mwiokoara n uataboa te mwakuri n angareirei are te reirei mairoun te Atua nakoia aomata, are e na bae ni koreaki n rongorongoia ana aomata te Atua.
Ko na Kanga ni Kaeka?
• Tera are e tangiria Iehova bwa a na karaoia akana reiakinaki irouna?
• E kanga ni kanakoraoa maiuia aomata te reirei are mairoun te Atua?
• N aaro raa aika ti na kakabwaiaaki iai mani buokaia aomata bwa a na karekei kakabwaiaakia n te reirei are mairoun te Atua?
[Taamnei n iteraniba 26]
Tiaki te koaua bwa ti kakabwaiaaki n rikira bwa temanna mai buakoia ‘raon te Atua ni mwakuri’?